Read Tulu 2 ಕೊರಿಂಥ್ಯೆರೆಗ್ 10 Bible Online

2 ಕೊರಿಂಥ್ಯೆರೆಗ್ 10 - Tulu bible

2 ಕೊರಿಂಥ್ಯೆರೆಗ್ 10

¹ನಿಕ್ಲೆ ಎದುರುಡುಪ್ಪುನಗ ತಗ್ಗ್‌ದಿನಾಯೆಲಾ ದೂರೊಡುಪ್ಪುನಗ ಧೈರ್ಯೊಡುಪ್ಪುನಾಯೆಲಾ ಆದ್ ನಿಕುಲು ಎನ್ನುನ ಪೌಲು ಪನ್ಪಿ ಯಾನ್ ಕ್ರಿಸ್ತನ ತಾಳ್ಮೆಡ್ಲಾ ಸಜ್ಜನಿಗೆಡ್ಲಾ ನಿಕ್ಲೆಡ ಪಾತೆರ್‌ವೆ.

²ಎಂಕುಲು ಈ ಲೋಕೊಗು ಸರಿಯಾದ್ ನಡತೊಂದುಲ್ಲ ಅಂದ್‌ದ್ ಎನ್ನುನಾಕುಲೆ ಎದುರುಡು ಶರೀರೊಡು ಧೈರ್ಯೊನು ತೋಜಾಪಾವೊಡು ಅಂದ್‌ದ್ ಯಾನ್ ಎನ್ನೊಂದುಲ್ಲೆ. ಆಂಡ ಯಾನ್ ನಿಕ್ಲೆ ಕೈತಲ್‌ ಬನ್ನಗ ಅಂಚಿನ ಧೈರ್ಯೊನು ತೋಜಾಪಾವರೆ ಇಡೆ ಕೊರೊಡ್ಚಿ ಅಂದ್‌ದ್ ನಿಕ್ಲೆಡ ನಟ್ಟೊನ್ವೆ.

³ಎಂಕುಲು ಲೋಕೊಡುಪ್ಪುನಾಕುಲು ಆದಿತ್ತ್‌ಂಡಲಾ ಲೋಕದ ರೀತಿಡ್ ಲಡಯಿ ಮಲ್ಪುನಾಕುಲತ್ತ್.

⁴ಎಂಕುಲು ಲಡಯಿಗ್ ಉಪಯೋಗ ಮಲ್ಪುನ ಆಯುಧೊಲು ಲೋಕದ ರೀತಿದ ಆಯುಧೊಲು ಅತ್ತ್. ಅವು ದೇವೆರೆಡ್ ಬಲತ್ತವು ಆದಿತ್ತ್‌ದ್ ಕೋಟೆಲೆನ್ ಮರಪುನಂಚಿತ್ತಿನವು ಆದುಂಡು.

⁵ಎಂಕುಲು ತರ್ಕೊಲೆನ್ ಬೊಕ್ಕ ದೇವೆರೆ, ಗೇನೊಗು ಎದುರಾಪಿನ ಮಾತ ಅಹಂಕಾರದೆನ್ಲಾ ನಾಶ ಮಲ್ತ್‌ದ್, ಪ್ರತಿಯೊಂಜಿ ಯೋಚನೆಲೆನ್ಲಾ ವಶ ಮಲ್ತ್‌ದ್ ಕ್ರಿಸ್ತಗ್ ಅಧೀನ ಆಪಿಲೆಕ್ಕ ಮಲ್ಪುವ.

⁶ನಿಕುಲು ಕ್ರಿಸ್ತಗ್ ಪೂರ್ತಿ ವಿಧೇಯ ಆಯಿ ಬೊಕ್ಕ ವಿಧೇಯ ಆವಂದಿ ಬೇಲೆಲೆಗ್ ಶಿಕ್ಷೆ ಕೊರಿಯೆರೆ ತಯಾರಾದುಲ್ಲ.

⁷ನಿಕುಲು ಪಿದಯಿದ ತೋರಿಕೆನ್ ಮಾತ್ರ ತೂಪರ್. ಏರಾಂಡಲಾ ಒರಿ ಕ್ರಿಸ್ತಗ್ ಸೇರ್ದಿನಾಯೆ ಅಂದ್‌ದ್ ಭರವಸೆ ಮಲ್ತೊನುವೆಡ, ಎಂಕುಲುಲಾ ಆಯ ಲೆಕ್ಕನೇ ಕ್ರಿಸ್ತಗ್ ಸೇರ್ದಿನಾಕುಲು ಅಂದ್‌ದ್ ಆಲೋಚನೆ ಮಲ್ಪಡ್.

⁸ಎಂಕುಲೆಡುಪ್ಪು ಅಧಿಕಾರದ ಬಗೆಟ್ ಎಂಕುಲು ಹೆಚ್ಚಿಗೆ ಪುಗರೊಂಡಲಾ ಅಂಚ ಪುಗರೊನುನೆಟ್ಟ್ ನಾಚಿಗೆ ಮಲ್ಪೆರೆ ಇಜ್ಜಿ. ಎಂಚಂದ್ಂಡ, ನಿಕ್ಲೆನ್ ಬೂರುಲೆಕ್ಕ ಅತ್ತ್, ಕಟ್ಟುನೆಕ್ಕಾದ್ ಕರ್ತವೆ ಎಂಕ್ಲೆಗ್ ಆ ಅಧಿಕಾರೊನು ಕೊರ್ತೆ.

⁹ಎನ ಪತ್ರಿಕೆಲೆಡ್ ನಿಕ್ಲೆನ್ ಪೋಡಿಯಾವುನಾಯೆ ಆದ್ ತೋಜಿಯೆರೆ ಎಂಕ್ ಮನಸ್ ಇಜ್ಜಿ.

¹⁰ದಾಯೆ ಪಂಡ ಕೆಲೆವೆರ್ ಪನುವೆರ್, “ಆಯೆ ಬರೆಪಿನ ಪತ್ರಿಕೆಲು ಕಠಿಣದವುಲಾ ಬಲತ್ತವುಲಾ ಆದುಂಡು. ಆಂಡಲಾ ಆಯೆ ಶರೀರೊಡು ಎದುರು ಬನ್ನಗ ಬಲದಾಂತಿನಾಯೆಲಾ ಆಯನ ಪಾತೆರೊಲು ಯೋಗ್ಯದಾಂತಿನವುಲಾ ಆದ್ ತೋಜುಂಡು.”

¹¹ಎಂಕುಲು ದೂರೊಡು ಪತ್ರಿಕೆದ ಪಾತೆರೊಡು ಎಂಚ ಉಲ್ಲನಾ, ಕೈತಲ್‌ ಬನ್ನಗ ಕಾರ್ಯರೂಪೊಡ್ಲಾ ಅಂಚೆನೇ ಉಲ್ಲ ಅಂದ್‌ದ್ ಪನ್ಪಿನಾಕುಲು ತೆರಿಯೊನಡ್.

¹²ತನ್ಕುಲೆನ್ ತಾನೆ ಪುಗರುನ ಕೆಲೆವೆರೆಡ್ ಎಂಕ್ಲೆನ್ ಸೇರಾವೊನಿಯೆರೆ ಆವಡ್ ಅಕ್ಲೆಡೊಪ್ಪ ಹೋಲಿಕೆ ಮಲ್ಪೆರೆಗಾವಡ್ ಎಂಕುಲು ಪ್ರಯತ್ನ ಮಲ್ಪುಜ. ಅಕುಲಾಂಡಲಾ ತನ್ಕುಲೆ ಉಲಯಿಡೇ ತನ್ಕುಲೆನ್ ಲತ್ತೊಂದು ತನ್ಕುಲೆನ್ ತನ್ಕುಲೆಗೇ ಹೋಲಿಕೆ ಮಲ್ತೊಂದು ಬುದ್ಧಿದಾಂತಿನಾಕುಲೆ ಲೆಕ್ಕ ಉಲ್ಲೆರ್.

¹³ಎಂಕುಲಾಂಡಲಾ ಮಿತಿ ತತ್ತ್‌ದ್ ಎಂಕ್ಲೆನ್ ಪುಗರೊನುಜ. ದೇವೆರ್ ಎಂಕ್ಲೆಗ್ ಕೊರ್ತಿನ ಮಿತಿತ ಉಲಯಿಡೇ ಪುಗರೊಂದು ಈ ಮಿತಿತ ಉಲಯಿ ಇತ್ತ್‌ದ್ ನಿಕ್ಲೆನ ಕೈತಲ್‌ ಬೈದ.

¹⁴ಎಂಕುಲು ಕ್ರಿಸ್ತನ ಸುವಾರ್ತೆನ್ ಸಾರಿಯೊಂದು ಸುರು ನಿಕ್ಲೆ ಕೈತಲ್‌ ಬೈದಿನೆಡ್ದ್ ನಿಕ್ಲೆ ಮಿತ್ತ್ ಅಧಿಕಾರ ಇಜ್ಜಂದಿಲೆಕ್ಕ ಮಿತಿ ತತ್ತ್‌ದ್ ಪೋಪುಜ.

¹⁵ಅತ್ತ್‌ಡ ಎಂಕುಲು ಮಿತಿ ಮೀರ್‌ದ್ ನನೊರಿ ಮಲ್ತ್‌ದಿನ ಕೆಲಸೊಲೆಗಾದ್ ಪುಗರೊನುಜ. ನಿಕ್ಲೆ ನಂಬಿಕೆ ಹೆಚ್ಚಾವೊಂದು ಬನ್ನಗ, ನಿಕ್ಲೆ ನಡುತ ಎಂಕ್ಲೆ ಸೇವೆಲಾ ವಿಸ್ತಾರ ಆವು ಅಂದ್‌ದ್ ಎಂಕ್ಲೆನ ನಿರೀಕ್ಷೆ.

¹⁶ಅಪಗ ಎಂಕುಲು ನಿಕ್ಲೆಡ್ದ್ ಆಪೆದಿಕ್ಕ್‌ಡ್ ಪೋದು ಬೇತೆ ಜಾಗ್‌ಲೆಡ್ ಸುವಾರ್ತೆ ಸಾರಿಯೊಲಿ, ನನೊರಿಯನ ಜಾಗ್‌ಡ್ ಆತಿನ ಬೇಲೆದ ಸಂಗತಿಡ್ ಪುಗರೊನುಜ.

¹⁷“ಪುಗರೊನುನಾಯೆ ಕರ್ತವಡೇ ಪುಗರೊನಡ್.”

¹⁸ತನನ್ ತಾನೇ ಮೆಚ್ಚಾವುನುನಾಯೆ ಯೋಗ್ಯದಾಯೆ ಅತ್ತ್. ಕರ್ತವೆ ಏರೆನ್ ಮೆಚ್ಚುವೆನಾ ಆಯೆನೇ ತಕ್ಕದಾಯೆ ಆದುಲ್ಲೆ.