Read Tulu 2 ಕೊರಿಂಥ್ಯೆರೆಗ್ 13 Bible Online

2 ಕೊರಿಂಥ್ಯೆರೆಗ್ 13 - Tulu bible

2 ಕೊರಿಂಥ್ಯೆರೆಗ್ 13

¹ಯಾನ್ ನಿಕ್ಲೆನಡೆಗ್ ಬರ್ಪಿನಿ ಉಂದು ಮೂಜನೇ ಸರ್ತಿ. ಪ್ರತಿಯೊಂಜಿ ಸಂಗತಿಡ್ಲಾ ರಡ್ಡ್ ಮೂಜಿ ಜನ ಸಾಕ್ಷಿದಾಕುಲೆ ಬಾಯಿಡ್ದ್ ಸ್ಥಿರ ಆವೊಡು.

²ಯಾನ್ ನಿಕ್ಲೆ ನಡುಟು ರಡ್ಡನೆ ಸರ್ತಿ ಬತ್ತ್‌ದುಪ್ಪುನಗ ನಿಕ್ಲೆಗ್ ಶಿಕ್ಷೆ ಕೊರಂದೆ ಕುಲ್ಲಯೆ ಪಂಡ್ದ್ ಪನ್ತೆನಾ ಅಂಚೆನೇ ಇತ್ತೆ ದೂರ ಇತ್ತ್ಂಡಲಾ ಪಾಪ ಮಲ್ತಿನಾಕುಲೆನ್ ಮಾತೆರೆನ್ಲಾ ಎಚ್ಚರಿಕೆ ಮಲ್ತೊಂದುಲ್ಲೆ. ಯಾನ್ ಕುಡ ಬನ್ನಗ ಏರೆನ್ಲಾ ಬುಡ್ಪುಜಿ.

³ಕ್ರಿಸ್ತೆ ಎನಡ ಪಾತೆರ್‌ವೆ ಪನ್ಪಿನೆಕ್ಕ್ ನಿಕುಲು ಪುರಾವೆ ಕೇನಿನೆಡ್ದ್ ಯಾನ್ ಇಂಚ ಪನ್ಪೆ. ಆಯೆ ನಿಕ್ಲೆ ಸಂಗತಿಡ್ ಬಲಹೀನೆ ಆದುಪ್ಪಂದೆ; ನಿಕ್ಲೆ ನಡುಟು ಬಲವಂತೆ ಆದುಲ್ಲೆ.

⁴ಆಯನ್ ಕ್ರುಸ್ಸುಗು ಪಾಡ್ನಗ ಬಲದಾಂತಿನಾಯೆ ಆದಿತ್ತೆ. ಆಂಡಲಾ ದೇವೆರೆ ಬಲೊಟು ಬದುಕುನಾಯೆ ಆದುಲ್ಲೆ. ಎಂಕುಲುಲಾ ಆಯನ ಬಲದಾಂತಿನೆಟ್ಟ್ ಪಾಲ್‌ದಾರೆರಾದುಲ್ಲ. ಆಂಡಲಾ ಆಯಡೊಪ್ಪ ದೇವೆರೆ ಬಲೊಡ್ದು ನಿಕ್ಲೆಗಾದ್ ಎಂಕುಲು ಬದುಕೊಂದುಲ್ಲ.

⁵ನಿಕುಲು ನಂಬುನಾಕುಲು ಆದಿತ್ತ್ಂಡ ನಿಕ್ಲೆನ್ ನಿಕುಲೇ ಶೋಧಿಯೊನ್ಲೆ, ನಿಕ್ಲೆನ್ ನಿಕುಲೇ ಪರೀಕ್ಷೆ ಮಲ್ತೊನ್ಲೆ. ಯೇಸು ಕ್ರಿಸ್ತೆ ನಿಕ್ಲೆಡ್ ಉಲ್ಲೆ ಅಂದ್‌ದ್ ನಿಕ್ಲೆಗ್ ತೆರಿಯುಜಾ? ಆಯೆ ನಿಕ್ಲೆಡ್ ಇಜ್ಜೆಡ ನಿಕುಲು ಯೋಗ್ಯೆರ್ ಅತ್ತ್.

⁶ಎಂಕುಲು ಪರೀಕ್ಷೆಡ್ ಸೋತು ಪೋತಿಜ ಪನ್ಪಿನೆನ್ ನಿಕುಲು ತೆರಿಯೊನ್ವರ್ ಅಂದ್‌ದ್ ಎಂಕ್ ನಿರೀಕ್ಷೆ ಉಂಡು.

⁷ನಿಕುಲು ದಾಲಾ ಪಡಿಕೆಂತಿನೆನ್ ಮಲ್ಪೆರೆ ಬಲ್ಲಿ ಅಂದ್‌ದ್ ಎಂಕುಲು ದೇವೆರಡ ನಟ್ಟೊನ್ವ. ಉಂದೆಟ್ಟ್ ಎಂಕುಲೇ ಪರೀಕ್ಷೆಡ್ ಗೆಂದ್‌ದ ಅಂದ್‌ದ್ ತೋಜಿದ್ ಬರೊಡು ಅಂದ್‌ದ್ ಎಂಕ್ಲೆನ ಉದ್ದೇಶ ಅತ್ತ್. ಆಂಡ ಎಂಕುಲು ಆ ಪರೀಕ್ಷೆಡ್ ಸೋತುದಿತ್ತ್‌ಂಡಲಾ ನಿಕುಲು ಎಡ್ಡೆಂತಿನೆನ್ ಮಲ್ಪುನಾಕುಲು ಆವೊಡು ಅಂದ್‌ದೇ ಎಂಕ್ಲೆನ ಉದ್ದೇಶ.

⁸ದಾಯೆಗಂದ್ಂಡ ಎಂಕುಲು ಸತ್ಯೊಗು ವಿರೋಧಾದ್ ದಾಲಾ ಮಲ್ಪೆರೆ ಆಪುಜಿ, ಸತ್ಯೊಗು ಬೋಡಾದೇ ಮಲ್ಪುವ.

⁹ಎಂಕುಲು ಬಲದಾಂತಿನಾಕುಲು ಆದಿತ್ತ್‌ಂಡಲಾ ನಿಕುಲು ಬಲತ್ತಾಕುಲು ಆದುಪ್ಪುನೆಟ್ಟ್ ಎಂಕುಲು ಸಂತೋಷ ಮಲ್ಪುವ. ನಿಕುಲು ಕ್ರೈಸ್ತ ಜೀವನೊಡು ಸಮರ್ಥೆರ್ ಆವೊಡು ಪಂಡ್ದ್ ದೇವೆರೆಡ ಎಂಕುಲು ನಟ್ಟೊನ್ವ.

¹⁰ಐಕಾದೇ ಯಾನ್ ನಿಕ್ಲೆಡ್ದ್ ದೂರ ಇತ್ತೊಂದು ಈ ವಿಷಯೊಲೆನ್ ಬರೆತೆ. ದಾಯೆಗ್ ಪಂಡ ಯಾನ್ ಬನ್ನಗ ದೇವೆರ್ ಎಂಕ್ ಕೊರ್ತಿ ಅಧಿಕಾರೊಡು ಯಾನ್ ಕಠಿಣ ಆದ್ ತೋಜಿದ್ ಬರಂದಿಲೆಕ್ಕ ಆಸೆ ಮಲ್ತೊಂದುಲ್ಲೆ. ದೇವೆರ್ ಈ ಅಧಿಕಾರೊನು ನಿಕ್ಲೆನ್ ಮರಪುನೆಕ್ಕಾದ್ ಕೊರಂದೆ ಕಟ್ಟುನೆಕ್ಕಾದ್ ಕೊರ್ತೆ.

¹¹ಕಡೆಕ್ಕ್ ಸಹೋದ್ರೆರೇ, ಸಂತೋಷೊಡುಪ್ಪುಲೆ, ಪೂರ್ತಿ ಸರಿ ಆವೊನ್ಲೆ. ಎನ ಬುದ್ಧಿ ಪಾತೆರೊಗು ಕೆಬಿ ಕೊರ್ಲೆ. ಒಂಜೆ ಮನಸ್‌ದಾಕುಲು ಆದುಪ್ಪುಲೆ, ಸಮಾಧಾನೊಡುಪ್ಪುಲೆ. ಅಪಗ ಪ್ರೀತಿನ್ಲಾ ಶಾಂತಿನ್ಲಾ ಕೊರ್ಪಿನ ದೇವೆರ್ ನಿಕ್ಲೆಡೊಪ್ಪ ಉಪ್ಪುವೆ.

¹²ಒರಿಯಗ್ ಒರಿ ಪರಿಶುದ್ಧದ ಮುದ್ದು ಕೊರ್ದು ವಂದಿತೊನ್ಲೆ.

¹³ಮಾತ ದೇವಜನೊಕುಲು ನಿಕ್ಲೆಗ್ ವಂದಿಪುವೆರ್. ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ, ದೇವೆರೆ ಪ್ರೀತಿ, ಪರಿಶುದ್ಧಾತ್ಮನ ಅನ್ಯಮನ್ಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್. ಆಮೆನ್.