Read Tulu 2 ಕೊರಿಂಥ್ಯೆರೆಗ್ 4 Bible Online

2 ಕೊರಿಂಥ್ಯೆರೆಗ್ 4 - Tulu bible

2 ಕೊರಿಂಥ್ಯೆರೆಗ್ 4

¹ಅಂಚಾಯಿನೆಡ್ದ್, ಈ ಸೇವೆ ಎಂಕ್ಲೆಗ್ ದೇವೆರೆ ಕರುಣೆಡ್ ತಿಕ್ಕಿನೆಡ್ದ್ ಧೈರ್ಯ ತತ್ತ್‌ದ್ ಪೋಪುಜ.

²ಆಂಡ ನಾಚಿಗೆ ಪುಟ್ಟಾವುನ ಬೊಕ್ಕ ದೆಂಗ್ದಿನ ಕಾರ್ಯೊಲೆನ್ ಬುಡ್ದು, ತಂತ್ರೊಡು ನಡತೊನಂದೆ, ದೇವೆರೆ ಪಾತೆರೊಗು ಬೆರಕೆ ಮಲ್ಪಂದೆ, ಸತ್ಯೊನು ಎಡ್ಡೆ ರೀತಿಡ್ ಬೋಧನೆ ಮಲ್ತೊಂದು ಎಂಕ್ಲೆನ್ ದೇವೆರೆ ದುಂಬು ಮಾತ ನರಮಾನಿಲೆ ಉಡಲ್‌ಡ್ ಸಜ್ಜನೆರಾದ್ ತೋಜಿದ್ ಬರ್ಪಿಲೆಕ್ಕ ನಡತೊಂದುಲ್ಲ.

³ಆಂಡ ಎಂಕುಲು ಸಾರಿಯುನ ಸುವಾರ್ತೆ ಕೆಲೆವೆರೆಗ್ ಬೊಕ್ಕಲಾ ಮದೆ ಆದಿತ್ತ್ಂಡ ಅವು ನಾಶನ ಆಪಿನಾಕುಲೆಗ್ ಮದೆ ಆದುಂಡು.

⁴ದೇವೆರೆ ಪ್ರತಿರೂಪ ಆಯಿ ಕ್ರಿಸ್ತ ಮೈಮೆ ಪನ್ಪಿ ಸುವಾರ್ತೆದ ಬೊಲ್ಪು ಮಿಂಚಂದಿಲೆಕ್ಕ, ಈ ಲೋಕದ ದೇವೆರಾದುಪ್ಪು ಸೈತಾನೆ ನಂಬಿಕೆದಾಂತಿನಾಕುಲೆನ ಮನಸ್‌ನ್ ಮಂದ ಮಲ್ತ್‌ದೆ.

⁵ದಾಯೆಗಂದ್ಂಡ ಎಂಕುಲು ಎಂಕ್ಲೆನೇ ಸಾರಿಯೊನಂದೆ, ಯೇಸು ಕ್ರಿಸ್ತೆ ಕರ್ತವೆ ಪಂಡ್ದ್‌ಲಾ ಯೇಸುಗಾದ್ ನಿಕ್ಲೆನ ಸೇವಕೆರ್ ಪಂಡ್ದ್‌ಲಾ ಸಾರಿಯುವ.

⁶ದಾಯೆಗ್ ಪಂಡ, “ಕತ್ತಲೆದ ಉಲಯಿಡ್ದ್ ಬೊಲ್ಪು ಆವಡ್,” ಪಂಡಿ ದೇವೆರ್, ಕ್ರಿಸ್ತನ ಮೋನೆಡ್ ತೋಜುನ ಮೈಮೆದ ಗೇನ ಪನ್ಪಿ ಬೊಲ್ಪು ಉಂಡಾಪಿಲೆಕ್ಕ ದೇವೆರ್ ತಾನೇ ಎಂಕ್ಲೆನ ಉಡಲ್‌ಡ್ ಬೊಲ್ಪು ಕೊರಿಯೆ.

⁷ಇಂಚಿತ್ತಿ ಮಲ್ಲ ಬಲ ಎಂಕ್ಲೆನವು ಅತ್ತ್, ದೇವೆರೆನವೇ ಅಂದ್‌ದ್ ತೋಜಿದ್ ಬರ್ಪಿಲೆಕ್ಕ ಈ ದ್ರವ್ಯ ಎಂಕ್ಲೆಗ್ ಮಣ್ಣ್‌ದ ಪಾತ್ರೆಲೆಡ್ ಉಂಡು.

⁸ಮಾತ ಕಡೆಡ್ದ್ ಎಂಕ್ಲೆಗ್ ಭಂಗ ಇತ್ತ್ಂಡಲಾ ಎಂಕುಲು ಸೋತುದು ಪೋತುಜ; ದಿಕ್ಕ್ ತೋಜಂದಿಲೆಕ್ಕ ಇತ್ತ್ಂಡಲಾ ನಿರಾಶೆಗ್ ಬೂರ್ದುಜ.

⁹ಭಂಗ ಬತ್ತ್‌ಂಡಲಾ ಕೈ ಬುಡ್ತಿನಾಕುಲಾದ್ ಇಜ್ಜ. ಮರತ್ತ್ ಬೂರ್ದಿನಾಕುಲು ಆಂಡಲಾ ನಾಶ ಆತಿಜ.

¹⁰ಎಂಕುಲೆ ಶರೀರೊಡು ಯೇಸುನ ಜೀವ ತೋಜಿದ್ ಬರ್ಪಿನೆಡ್ದಾವರ ಯೇಸುನ ಮರಣದ ಅನುಭವೊನು ಎಂಕುಲು ಎಂಕ್ಲೆನ ಶರೀರೊಡು ಏಪಲಾ ಅನುಭವ ಮಲ್ತೊಂದುಪ್ಪುವ.

¹¹ಎಂಚಂದ್ಂಡ ಎಂಕುಲೆ ಸೈಪಿ ಶರೀರೊಡು ಯೇಸುನ ಜೀವ ತೋಜಿದ್ ಬರ್ಪಿನೆಡ್ದಾವರ ಜೀವೊಡುಪ್ಪು ಎಂಕ್ಲೆನ್ ಯೇಸುಗಾದ್ ಏಪಲಾ ಮರಣೊಗು ಒಚ್ಚಿದ್ ಕೊರ್ಪ.

¹²ಇಂಚ ಎಂಕ್ಲೆಡ್ ಮರಣ ಕಾರ್ಯ ಮಲ್ಪುಂಡು; ಆಂಡ ನಿಕ್ಲೆಡ್ ಜೀವ ಕಾರ್ಯ ಮಲ್ಪುಂಡು.

¹³ಇಂಚ ಇತ್ತ್ಂಡ “ಯಾನ್ ನಂಬಿಯೆ; ಅಂಚಾದ್ ಪಾತೆರಿಯೆ,” ಅಂದ್‌ದ್ ಶಾಸ್ತ್ರೊಡು ಬರೆತಿ ನಂಬಿಕೆದ ಅವ್ವೇ ಆತ್ಮ ಎಂಕ್ಲೆಡುಪ್ಪುನೆಡ್ದ್ ನಂಬಿನಾಕುಲಾದ್ ಪಾತೆರ್‌ವ.

¹⁴ಕರ್ತವೆ ಆದುಪ್ಪು ಯೇಸುನು ಲಕ್ಕಾಯಿನಾಯೆ ಎಂಕ್ಲೆನ್ಲಾ ಯೇಸುಡೊಪ್ಪ ಲಕ್ಕಾದ್ ನಿಕ್ಲೆ ಒಟ್ಟುಗು ತನ ದುಂಬು ಉಂತಾವೆ ಅಂದ್‌ದ್ ಎಂಕುಲು ತೆರಿದ.

¹⁵ಉಂದು ಮಾತಲಾ ನಿಕ್ಲೆಗಾದೆ ಎಂಕ್ಲೆಗ್ ಉಂಡಾಪುಂಡು. ಐಟ್ಟ್ ದೈವ ದಯೆ ಮಸ್ತ್ ಜನೊಕುಲೆಗ್ ಹೆಚ್ಚಾದ್ ತಿಕ್ಕುನೆಡ್ದಾವರ ದೇವೆರೆ ಮೈಮೆಗ್ ಹೆಚ್ಚಾದ್ ಉಪಕಾರ ಸ್ತುತಿ ಉಂಡಾಪುಂಡು.

¹⁶ಅಂಚಾಯಿನೆಡ್ದ್ ಎಂಕುಲು ಧೈರ್ಯ ತತ್ತ್‌ದ್ ಪೋಪುಜ. ಎಂಕುಲೆ ಶರೀರ ನಾಶಾವೊಂದು ಇತ್ತ್ಂಡಲಾ ಎಂಕುಲೆ ಅಂತರ್ಯ ದಿನ ದಿನ ಪೊಸತ್ತಾವೊಂದು ಬರ್ಪುಂಡು.

¹⁷ದಾಯೆಗಂದ್ಂಡ, ಒಂತೆ ಸಮಯ ಮಾತ್ರ ಹಗುರಾದುಪ್ಪುನ ಎಂಕುಲೆ ಭಂಗ, ನಿತ್ಯ ಮೈಮೆದ ರಾಶಿನ್ ಎಂಕ್ಲೆಗ್ ಉಂಡು ಮಲ್ಪುಂಡು.

¹⁸ಎಂಕುಲು ತೋಜುನ ವಿಷಯೊಲೆನ್ ತೂವಂದೆ, ತೋಜಂದಿನ ವಿಷಯೊಲೆನ್ ತೂವೊಂದುಪ್ಪುನಾಕುಲಾದುಲ್ಲ; ತೋಜುನವು ಒಂತೆ ಸಮಯ ಮಾತ್ರ ಉಪ್ಪುಂಡು; ತೋಜಂದಿನವು ನಿತ್ಯೊಗ್ಲಾ ಉಪ್ಪುಂಡು.