Read Tulu 2 ಕೊರಿಂಥ್ಯೆರೆಗ್ 5 Bible Online

2 ಕೊರಿಂಥ್ಯೆರೆಗ್ 5 - Tulu bible

2 ಕೊರಿಂಥ್ಯೆರೆಗ್ 5

¹ದಾಯೆಗಂದ್ಂಡ ಈ ಭೂಮಿದ ಮಿತ್ತ್ ನಮ ಶರೀರ ಪನ್ಪಿ ಗುಡಾರ ನಾಶಾಂಡ ದೇವೆರೆಡ್ದ್ ಉಂಡಾಯಿನ ಒಂಜಿ ಇಲ್ಲ್ ಪರಲೋಕೊಡು ಎಂಕ್ಲೆಗುಂಡು ಅಂದ್‌ದ್ ನಂಕ್ ಗೊತ್ತುಂಡು. ಅವು ಕೈಟ್ ಕಟ್ಟ್‌ದಿನವು ಆದುಪ್ಪಂದೆ ನಿತ್ಯದವು ಆದುಂಡು.

²ಅಂದ್, ಇತ್ತೆ ಈ ಶರೀರೊಡು ಎಂಕುಲು ನರಕೊಂದುಪ್ಪುವ. ಪೊಸ ಕುಂಟು ಪಾಡೊಂಡಿಲೆಕ್ಕ ಪರಲೋಕೊಡುಪ್ಪು ಆ ಇಲ್ಲ್ ಏಪ ತಿಕ್ಕುಂಡು ಅಂದ್‌ದ್ ಬಯಕೊಂದುಲ್ಲ.

³ಅಂಚಾದ್ ಆ ಕುಂಟು ಪಾಡೊಂಡಿನಪಗ ನಮ ಬತ್ತಲೆತನ ಪೋಪುಂಡು.

⁴ಎಂಕುಲು ಭೂಮಿದ ಗುಡಾರೊಡು ಉಪ್ಪುನಾತ್ ದಿನ ದುನ್ನ ತುಂಬೊಂದು ನರಕೊಂದು ಬದುಕುವ. ಅಂಚಾದ್ ಈ ಶರೀರೊಡ್ದು ಬುಡುಗಡೆ ಆವೊಡು ಅಂದ್‌ದ್ ಎಂಕ್ಲೆನ ಆಸೆ ಅತ್ತ್. ಅವತ್ತಂದೆ ಪರಲೋಕದ ಶರೀರೊನು ಪಾಡೊನಿಯೆರೆ ಆಸೆ ಮಲ್ಪುವ. ಅಂಚಾಯಿನೆಡ್ದ್ ಈ ಸೈಪಿನ ಶರೀರೊನು ಜೀವೊಡುಪ್ಪು ಶರೀರೊಗು ಬದಲಾವಣೆ ಮಲ್ಪುವೆ.

⁵ಎಂಕ್ಲೆನ್ ಈ ಸ್ಥಿತಿಕ್ಕ್ ತಯಾರ್ ಮಲ್ತ್‌ದ್ ತನ ಪರಿಶುದ್ಧಾತ್ಮೊನು ಸಂಚಿಕಾರ ಆದ್ ಕೊರಿನಾಯೆ ದೇವೆರೇ.

⁶ಅಂಚಾಯಿನೆಡ್ದ್ ನಮ ಏಪಲಾ ಧೈರ್ಯೊಡೇ ಉಪ್ಪುವ. ಈ ಶರೀರೊಡು ಉಪ್ಪುನೆಂಗೆ ಕರ್ತವಡ್ ದೂರೊಡುಪ್ಪುವ ಅಂದ್‌ದ್ ಎಂಕುಲು ತೆರಿದ.

⁷ನಮ ತೂಪಿನಾಕುಲಾದ್ ಉಪ್ಪಂದೆ ನಂಬುನಕುಲಾದೇ ಬದುಕುವ.

⁸ಅಂದ್, ಎಂಕುಲು ಧೈರ್ಯೊಡಿತ್ತ್‌ದ್ ಶರೀರೊನು ಬುಡ್ದು ಕರ್ತವ ಕೈತಲ್‌ ಸೇರಿಯೆರೆ ಬಯಕುವ.

⁹ಅಂಚಾದ್ ಎಂಕುಲು ಶರೀರೊಡಿತ್ತ್‌ಂಡಲಾ ಐಡ್ದ್ ಬುಡುಗಡೆ ಆಂಡಲಾ ನಮ ಕರ್ತವಗ್ ಮೆಚ್ಚಿಗೆ ಆದ್ ಉಪ್ಪೊಡಂದ್‌ದ್ ಪೇಚಾಡುವ.

¹⁰ದಾಯೆಗಂದ್ಂಡ ಪ್ರತಿ ಒರಿಲಾ ತನ ಭೂಮಿದ ಶರೀರೊಡು ಮಲ್ತಿನ ಎಡ್ಡೆಂತಿನೆಕಾವಡ್ ಪಡಿಕೆಂತಿನೆಕ್ಕಾವಡ್ ದೇವೆರೆಡ್ದ್ ಪ್ರತಿಫಲ ತಿಕ್ಕುಲೆಕ್ಕ ನಮ ಮಾತೆರ್ಲಾ ಕ್ರಿಸ್ತನ ನ್ಯಾಯಾಸನದ ಎದುರುಡು ಉಂತೊಡಾಪುಂಡು.

¹¹ಕರ್ತವ ಪೋಡಿಗೆ ಎಂಕ್ಲೆಗುಪ್ಪುನೆಡ್ದ್ ಜನೊಕುಲು ಒಪ್ಪಿಯೊನುಲೆಕ್ಕ ಮಲ್ಪುವ. ದೇವೆರೆಗ್ ಎಂಕ್ಲೆ ಯಥಾರ್ಥತ್ವ ತೆರಿದುಂಡು; ನಿಕ್ಲೆ ಮನಸ್‌ಗ್ಲಾ ಉಂದು ತೆರಿದುಂಡು ಅಂದ್‌ದ್ ಎನ ಭರವಸ ಆದುಂಡು.

¹²ಎಂಕ್ಲೆನ್ ಎಂಕುಲು ನಿಕ್ಲೆ ಎದುರುಡು ಕುಡೊರ ಪುಗರೊನುಜ; ಆಂಡ ಎಂಕಲೆಗಾದ್ ಪುಗರೊನಿಯೆರೆ ನಿಕ್ಲೆಗ್ ಅವಕಾಸ ಕೊರ್ಪ; ಇಂಚ ಉಡಲ್‌ಡ್ ಕೊಚ್ಚೊನಂದೆ ಪಿದಯಿಡ್ ಕೊಚ್ಚೊಂದು, ನಿಕುಲು ಉತ್ತರ ಕೊರ್ಪಿಲೆಕ್ಕ ಶಕ್ತೆರಾಪರ್.

¹³ಎಂಕುಲೆ ಬುದ್ಧಿ ತತ್ತ್‌ದಿತ್ತ್‌ಂಡ ಅವು ದೇವೆರೆಗಾದುಂಡು; ಎಂಕ್ಲೆಗ್ ಸ್ವಸ್ಥ ಬುದ್ಧಿ ಇತ್ತ್ಂಡ ಅವು ನಿಕ್ಲೆಗಾದುಂಡು.

¹⁴ಕ್ರಿಸ್ತನ ಪ್ರೀತಿ ಎಂಕ್ಲೆಗ್ ಒತ್ತಾಯ ಮಲ್ಪುಂಡು. ದಾಯೆಗಂದ್ಂಡ ಮಾತೆರೆಗಾದ್ ಒರಿ ಸೈತಿನೆಡ್ದಾವರ ಮಾತೆರ್ಲಾ ಸೈತಿ ಲೆಕ್ಕ ಆಂಡ್ ಅಂದ್‌ದ್ ತೆರಿಯೊಂಡ.

¹⁵ಬೊಕ್ಕ ಆಯೆ ಮಾತೆರೆಗಾದ್ ಸೈತಿನೆಡ್ದಾವರ ಬದುಕುನಾಕುಲು ನನ ದುಂಬು ತನ್ಕುಲೆಗಾದ್ ಬದ್‌ಕಂದೆ, ಅಕ್ಲೆಗಾದ್ ಸೈತ್‌ದ್ ಜೀವೊಡು ಲಕ್ಕ್‌ದಿನ ಕ್ರಿಸ್ತಗಾದ್ ಬದುಕುವೆರ್.

¹⁶ಅಂಚಾಯಿನೆಡ್ದ್ ನನ ದುಂಬು ಎಂಕುಲು ಏರೆನ್ಲಾ ಲೋಕದ ರೀತಿಡ್ ತೆರಿಯುಜ; ಕ್ರಿಸ್ತನ್ ಎಂಕುಲು ಲೋಕದ ರೀತಿಡ್ ತೆರಿಯೊಂಡಲಾ ನನ ಅಂಚ ಮಲ್ಪುಜ.

¹⁷ಅಂಚಾದ್ ಏರಾಂಡಲಾ ಕ್ರಿಸ್ತಡ್ ಉಲ್ಲೆಡ, ಆಯೆ ಪೊಸ ಸೃಷ್ಟಿ ಆದುಲ್ಲೆ; ಪರತ್ತ್‌ದವು ಕಡತ್‌ದ್ ಪೋಂಡು, ಇಂದಾ ಮಾತಲಾ ಪೊಸತಾಂಡ್.

¹⁸ಬೊಕ್ಕ ಉಂದು ಮಾತಲಾ ದೇವೆರೆಡ್ದೇ ಉಂಡಾಯಿನವು. ಆಯೆ ನಮನ್ ಕ್ರಿಸ್ತಡ್ ತನ್ಕ್ ರಾಜಿ ಮಲ್ತೊಂದು ರಾಜಿ ಮಲ್ಪುನ ಸೇವೆನ್ ಎಂಕ್ಲೆಗ್ ಕೊರ್ತೆ.

¹⁹ಅವು ದಾನೆಂದ್ಂಡ ದೇವೆರ್ ನರಮಾನಿನ ಪಾಪೊಲೆನ್ ಅಕ್ಲೆ ಲೆಖ್ಖೊಗು ದೆತ್ತೊನಂದೆ, ಲೋಕೊನು ಕ್ರಿಸ್ತಡ್ ತನ್ಕ್ ರಾಜಿ ಮಲ್ತೊಂಡೆ ಪನ್ಪಿನವೇ. ಆ ರಾಜಿದ ಸೇವೆನ್ ಸಾರಿಯೆರೆ ಎಂಕ್ಲೆನ್ ನೇಮಕ ಮಲ್ತ್‌ದೆ.

²⁰ಎಂಕುಲು ಕ್ರಿಸ್ತನ ರಾಯಭಾರಿಲು ಆದುಲ್ಲ. ಅಂಚಾದ್ ದೇವೆರೇ ಎಂಕ್ಲೆ ಪಗತೆಗ್ ನಟ್ಟೊನ್ವೆ. “ನಿಕುಲು ದೇವೆರೆಡೊಪ್ಪ ರಾಜಿ ಮಲ್ತೊನ್ಲೆ,” ಅಂದ್‌ದ್ ಕ್ರಿಸ್ತನ ಪುದರ್‌ಡ್ ನಿಕ್ಲೆಡ ನಟ್ಟೊನ್ವ.

²¹ದೇವೆರ್ ಪಾಪದಾಂತಿನ ಕ್ರಿಸ್ತನ್ ಎಂಕ್ಲೆಗಾದ್ ಪಾಪಿಯಾದ್ ಮಲ್ತೆ. ನಮ ಕ್ರಿಸ್ತಡ್ದ್ ನೀತಿವಂತೆರ್ ಆವೊಡು ಅಂದ್‌ದ್ ದೇವೆರ್ ಇಂಚ ಮಲ್ತೆರ್.