Read Tulu 2 ಕೊರಿಂಥ್ಯೆರೆಗ್ 7 Bible Online

2 ಕೊರಿಂಥ್ಯೆರೆಗ್ 7 - Tulu bible

2 ಕೊರಿಂಥ್ಯೆರೆಗ್ 7

¹ಪ್ರೀತಿದಾಕುಲೇ, ಈ ವಾಗ್ದಾನೊಲು ನಂಕುಪ್ಪುನೆಡ್ದ್, ನಮ ಶರೀರದ ಬೊಕ್ಕ ಆತ್ಮದ ಮೈಲೆನ್ ಶುದ್ಧ ಮಲ್ತೊಂದು, ಪರಿಶುದ್ಧೆರಾಪಿಲೆಕ್ಕ ದೇವೆರೆ ಪೋಡಿಗೆಡ್ ಉಪ್ಪೆರೆ ಪ್ರಯತ್ನ ಮಲ್ಪುಗ.

²ನಿಕ್ಲೆ ಉಡಲ್‌ಡ್ ಎಂಕ್ಲೆಗ್ ಜಾಗ್ ಕೊರ್ಲೆ; ಎಂಕುಲು ನಿಕ್ಲೆಗ್ ಏರೆಗ್ಲಾ ಅನ್ಯಾಯ ಮಲ್ತ್‌ದಿಜ; ಏರೆನ್ಲಾ ಹಾಳ್ ಮಲ್ತ್‌ದಿಜ; ಏರೆಗ್ಲಾ ಮೋಸ ಲಾಭ ಮಲ್ತ್‌ದಿಜ.

³ನಿಕ್ಲೆನ್ ದೂಷಣೆ ಮಲ್ಪೊಡು ಅಂದ್‌ದ್ ಉಂದೆನ್ ಪನ್ಪುಜಿ. ಒಟ್ಟುಗೇ ಸೈಯೆರೆಗ್ಲಾ ಒಟ್ಟುಗೇ ಬದುಕೆರೆಗ್ಲಾ ನಿಕುಲು ಎಂಕುಲೆ ಉಡಲ್‌ಡ್ ಉಲ್ಲರ್ ಅಂದ್‌ದ್ ಯಾನ್ ದುಂಬೇ ಪಂಡ್ದಿತ್ತೆ.

⁴ಎಂಕ್ ನಿಕ್ಲೆಡ್ ಎಡ್ಡೆ ಭರವಸೆ ಉಂಡು; ನಿಕ್ಲೆ ಸಂಗತಿಡ್ ಹೆಮ್ಮೆ ಉಂಡು. ಎಂಕುಲೆ ಮಾತ ಸಂಕಟೊಲೆಡ್ಲಾ ಆಧಾರಣೆಡ್ದ್ ದಿಂಜಿದುಲ್ಲ ಬೊಕ್ಕ ಮಾತ ಭಂಗೊಲೆಡ್ದ್‌ಲಾ ಎನ ಸಂತೋಷ ಹೆಚ್ಚಾಪುಂಡು.

⁵ಎಂಕುಲು ಮಕೆದೋನ್ಯೊಗು ಬತ್ತಿನಪಗ ಎಂಕುಲೆ ಶರೀರೊಗು ಸುಖ ಇಜ್ಜಾಂಡ್. ಮಾತ ಕಡೆಟ್ಲಾ ಭಂಗ ಆಂಡ್. ಪಿದಯಿಡ್ ಲಡಾಯಿಲು; ಉಲಯಿಡ್ ಪೋಡಿಗೆ ಇತ್ತ್ಂಡ್.

⁶ಆಂಡ ಕುಗ್ಗು ಪೋಯಿನಾಕುಲೆನ್ ಆದರಿಪುನ ದೇವೆರ್, ತೀತೆ ಬರ್ಪಿನೆಡ್ದ್ ಎಂಕ್ಲೆನ್ ಆದರಿತೆ.

⁷ಆಯೆ ಬತ್ತಿನೆಡ್ದ್ ಮಾತ್ರ ಅತ್ತ್, ನಿಕ್ಲೆಡ್ದ್ ಆಯಗ್ ಮಸ್ತ್ ಆಧರಣೆ ತಿಕ್ಕ್‌ದ್ಂಡ್ ಪಂಡ್ದ್ ಪಂಡಿನೆಡ್ದ್‌ಲಾ ಎಂಕ್ಲೆಗ್ ಸಮಾಧಾನ ಕೊರಿಯೆ, ನಿಕ್ಲೆ ಆಸೆಲಾ, ನಿಕುಲು ಮಲ್ತಿನ ದುಃಖಲಾ, ಎನ ಕಡೆಕ್ಕ್ ನಿಕ್ಲೆಡಿತ್ತಿನ ಆಸಕ್ತಿನ್ ತೆರಿಪಾಯಿನೆಡ್ದ್‌ಲಾ ಎಂಕ್ ಮಸ್ತ್ ಸಂತೋಷ ಆಂಡ್.

⁸ಯಾನ್ ಬರೆತಿ ಪತ್ರಿಕೆಡ್ ನಿಕ್ಲೆಗ್ ದುಃಖ ಆಂಡಲಾ ಎಂಕ್ ಪಶ್ಚಾತಾಪ ಇಜ್ಜಿ. ಅವು ಒಂತೆ ಸಮಯ ನಿಕ್ಲೆನ್ ದುಃಖ ಮಲ್ತ್ಂಡ್ ಅಂದ್‌ದ್ ಯಾನ್ ದುಂಬು ಪಶ್ಚಾತಾಪ ಪಡೆದಿತ್ತ್‌ಂಡಲಾ ಇತ್ತೆ ಸಂತೋಷ ಮಲ್ಪುವೆ.

⁹ಇತ್ತೆ ಎಂಕ್ ಸಂತೋಷ ಆಂಡ್, ನಿಕ್ಲೆಗ್ ದುಃಖ ಆಂಡ್ ಪನ್ಪಿನೆಕ್ಕಾದ್ ಅತ್ತ್; ಆಂಡ ನಿಕ್ಲೆ ದುಃಖ ನಿಕ್ಲೆನ್ ಪಶ್ಚಾತಾಪೊಗು ನಡಪುಡಿನೆಕ್ಕಾದ್, ನಿಕುಲು ದೇವೆರೆ ಚಿತ್ತದ ಪ್ರಕಾರ ದುಃಖ ಮಲ್ತಿನೆಡ್ದ್ ಎಂಕ್ಲೆಡ್ದ್ ನಿಕ್ಲೆಗ್ ದಾಲಾ ನಷ್ಟ ಆದುಪ್ಪುಜಿ.

¹⁰ದೇವೆರೆ ಚಿತ್ತಾನುಸಾರ ದುಃಖ ಮನಸ್‌ನ್ ತಿರ್ಗಾದ್ ರಕ್ಷಣೆಗ್ ಕಾರಣ ಆಪುಂಡು; ಐಟ್ಟ್ ಪಶ್ಚಾತಾಪ ಬರ್ಪುಂಡು: ಆಂಡ ಲೋಕದ ರೀತಿದ ದುಃಖ ಮರಣೊಗು ಕಾರಣ ಆಪುಂಡು.

¹¹ದೇವೆರೆ ಚಿತ್ತಾನುಸಾರ ದುಃಖ ನಿಕ್ಲೆಗಾಯಿನೆಡ್ದ್, ನಿಕ್ಲೆಗ್ ಎಂಚಿತ್ತಿ ಆಸಕ್ತಿ, ನಿಕ್ಲೆನ್ ನಿರಾಪರಾಧಿ ಮಲ್ತೊನಿಯೆರೆ ಎಂಚಿತ್ತಿ ಉಮೇದ್, ಎಂಚಿತ್ತಿ ಕೋಪ, ಎಂಚಿತ್ತಿ ಎಚ್ಚರಿಕೆ, ಎಂಚಿತ್ತಿ ಮನೊವ್ಯಥೆ, ಎಂಚಿತ್ತಿ ಕಾಳಜಿ, ತಪ್ಪು ಮಲ್ತಿನಾಕುಲೆಗ್ ಶಿಕ್ಷೆ ಕೊರಿಯೆರೆಗ್ ಎಂಚಿತ್ತಿ ಕಟ್ಟ್‌ನಿಟ್ಟ್ ಉಂಡಾಂಡ್; ಉಂದೆಟ್ಟ್ ಮಾತ ನಿಕುಲು ನಿರಾಪರಾಧಿಲು ಅಂದ್‌ದ್ ಮಾತ ರೀತಿಡ್ಲಾ ತೋಜಾವೊನಿಯೆರೆ ಪ್ರಯಾಸ ಬುಡಿಯರ್.

¹²ಯಾನ್ ನಿಕ್ಲೆಗ್ ಬರೆಯಿನವು ಅನ್ಯಾಯ ಮಲ್ತಿನಾಯಗಾದ್ ಅತ್ತ್, ಅತ್ತ್‌ಡ ಅನ್ಯಾಯ ಸಹಿಸೊನುನಾಯಗಾದ್‌ಲಾ ಅತ್ತ್, ಆಂಡ ದೇವೆರೆಡ್ ಎಂಕ್ಲೆಗ್ ನಿಕ್ಲೆ ಕಡೆಕ್ಕ್ ಉಪ್ಪುನ ಆಸಕ್ತಿ ನಿಕ್ಲೆಗ್ ತೋಜಿದ್ ಬರಡ್ ಅಂದ್‌ದ್ ಮಾತ್ರ.

¹³ಉಂದೆಕ್ಕಾದೆ ಎಂಕುಲೆಗ್ಲಾ ಆಧರಣೆ ಆಂಡ್. ಅವ್ವೇ ಅತ್ತಂದೆ ನಿಕ್ಲೆಡ್ದಾದ್ ತೀತಗ್ ಮಸ್ತ್ ಆತ್ಮ ಸಂತೋಷ ಉಂಡಾಂಡ್ ಪಂಡಿನೆನ್ ಯಾನ್ ತೆರಿದ್ ಎಂಕುಲೆಗ್ಲಾ ಮಸ್ತ್ ಸಂತೋಷ ಆಂಡ್.

¹⁴ಯಾನ್ ನಿಕ್ಲೆ ವಿಚಾರ ಆಯಡ ದಾದಾಂಡಲಾ ಪುಗರೊಂದಿತ್ತೆಡಲಾ ಐಕಾದ್ ಎಂಕ್ ನಾಚಿಗೆ ಆಯಿಜಿ. ಯಾನ್ ನಿಕ್ಲೆಡ ಏಪಲಾ ಸತ್ಯನೇ ಪಂಡಿಲೆಕ್ಕ ಯಾನ್ ತೀತನ ಎದುರು ಪುಗರೊಂಡಿನವುಲಾ ಸತ್ಯನೇ ಆದ್ ತೋಜಿದ್ ಬತ್ತ್ಂಡ್.

¹⁵ಆಯನ್ ನಿಕುಲು ಪೋಡಿದ್ ನಡ್‌ಗ್‌ದ್ ಸೇರಾವೊಂಡಿನೆಟ್ಟ್ ನಿಕ್ಲೆ ವಿಧೇಯತೆ ತೋಜಿದ್ ಬತ್ತ್ಂಡ್. ಆಯೆ ಅವೆನ್ ನೆನಪು ಮಲ್ಪುನಗ ಆಯನ ಉಡಲ್‌ಡ್ ನಿಕ್ಲೆ ಮಿತ್ತ್ ಇತ್ತಿನ ಕನಿಕರ ಜಾಸ್ತಿ ಆಂಡ್.

¹⁶ಅಂಚಾದ್ ಎಂಕ್ ನಿಕ್ಲೆಡ ಮಾತ ಸಂಗತಿಡ್ ಭರವಸ ಇತ್ತಿನೆಡ್ದ್ ಯಾನ್ ಸಂತೋಷ ಮಲ್ಪುವೆ.