Read Tulu ಗಲಾತ್ಯೆರೆಗ್ 4 Bible Online

ಗಲಾತ್ಯೆರೆಗ್ 4 - Tulu bible

ಗಲಾತ್ಯೆರೆಗ್ 4

¹ಆಂಡ ಯಾನ್ ಪನ್ಪಿನಿ ದಾನೆಂದ್ಂಡ, ಒರಿ ಬಾಲೆ ತನ ಅಮ್ಮೆರೆನ ಮಾತ ಬಾಧ್ಯಸ್ತಿಗೆಗ್ ಹಕ್ಕ್‌ದಾರೆ ಆದಿತ್ತ್‌ಂಡಲಾ, ಆಯೆ ಪ್ರಾಯೊಗು ಬನ್ನಮುಟ್ಟ ಆ ಬಾಧ್ಯಸ್ತಿಗೆಗ್ ಗುಲಾಮಲೆಕ್ಕನೇ ಉಪ್ಪುವೆ.

²ಅಕ್ಲೆನ ಅಮ್ಮೆ ನೇಮಕ ಮಲ್ತ್‌ದಿನ ಪ್ರಾಯ ಬನ್ನಮುಟ್ಟ ಅಕುಲು ತನ್ಕುಲೆನ ಯಜಮಾನಗ್ ಬೊಕ್ಕ ಪಾರುಪತ್ಯಗಾರೆರೆಗ್ ಸರಿಯಾದ್ ನಡತೊಂದುಪ್ಪೊಡು.

³ಅಂಚೆನೇ ನಮಲಾ ಬಾಲೆಲ್ ಆದುಪ್ಪುನಗ ಲೋಕದ ಕಟ್ಟ್‌ಕಟ್ಟಲೆಗ್ ಗುಲಾಮೆರಾದಿತ್ತ.

⁴ಆಂಡ ಕಾಲ ದಿಂಜಿದ್ ಬನ್ನಗ ದೇವೆರ್ ತನ ಮಗನ್ ಕಡಪುಡ್ದು ಕೊರಿಯೆ. ನ್ಯಾಯಕಟ್ಟ್‌ಗ್ ಒಳಗಾದ್ ಒಂಜಿ ಪೊಂಜೊವುಡು ಪುಟ್ಟುದು ಬರ್ಪಿಲೆಕ್ಕ ಮಲ್ತೆ.

⁵ನ್ಯಾಯಕಟ್ಟ್‌ಗ್ ಗುಲಾಮೆರಾದಿತ್ತಿ ನಮನ್ ಬುಡ್ಪಾದ್, ಮಗಕ್ಕ್ ಅಮ್ಮೆರೆಡ್ದ್ ತಿಕ್ಕುನ ಮಾತ ಪಾಲ್‌ದ ಅಧಿಕಾರ ತಿಕ್ಕೆರೆ ಬೋಡಾದ್ ದೇವೆರ್ ಇಂಚ ಮಲ್ತೆ.

⁶ನಿಕುಲು ಇತ್ತೆ ದೇವೆರೆ ಬಾಲೆಲು ಆದುಪ್ಪುನೆಡ್ದ್, ದೇವೆರ್, “ಅಮ್ಮೆರೇ, ಎನ ಅಮ್ಮೆರೇ,” ಅಂದ್‌ದ್ ಲೆಪ್ಪು ತನ ಮಗನ ಆತ್ಮೊನು ನಿಕ್ಲೆ ಉಡಲ್‌ದ ಉಲಯಿ ಕಡಪುಡ್ದು ಕೊರಿಯೆ.

⁷ಅಂಚಾಯಿನೆಡ್ದ್ ಇತ್ತೆ ಈ ಗುಲಾಮೆ ಅತ್ತ್, ಮಗೆ ಆದುಲ್ಲ. ಮಗೆ ಆದುಪ್ಪುನೆಡ್ದ್ ದೇವೆರೆಡ್ದ್ ಪೂರ ಆಸ್ತಿಗ್ಲಾ ಸಂಪೊತ್ತುಗ್ಲಾ ಬಾಧ್ಯಸ್ತೆ ಆದುಲ್ಲ.

⁸ಪೂರ್ವಕಾಲೊಡು ನಿಕುಲು ದೇವೆರೆನ್ ತೆರಿಯಂದೆ ಉಪ್ಪುನಗ, ದೇವೆರೆ ಗುಣಲಕ್ಷಣದಾಂತಿನೆಡ್ದ್ ಗುಲಾಮೆರಾದಿತ್ತರ್.

⁹ಆಂಡ ಇತ್ತೆ ದೇವೆರೆನ್ ತೆರಿಯೊಂದುಲ್ಲರ್, ಅಂಚೆನೇ ದೇವೆರ್‌ಲಾ ನಿಕ್ಲೆನ್ ತೆರಿಯೊಂದುಲ್ಲೆ. ಅಂಚ ಆದುಪ್ಪುನಗ ಕುಡ ಪಿರ ಪೋದು, ನಿಕುಲು ಕೆಲಸೊಗು ಬರಂದಿನ ದರಿದ್ರ ಲೋಕದ ಕಟ್ಟ್‌ಕಟ್ಟಲೆಗ್ ಗುಲಾಮೆರಾದುಪ್ಪೆರೆ ದಾಯೆಗ್ ಬಯಕುವರ್?

¹⁰ನಿಕುಲು ಪ್ರತಿಯೊಂಜಿ ಎಡ್ಡೆ ದಿನೊನು, ತಿಂಗೊಲೊನು, ಕಾಲೊಲೆನ್, ವರ್ಸ ದಿನೊಕ್ಲೆನ್ ಆಚರಣೆ ಮಲ್ಪುವರ್.

¹¹ಯಾನ್ ನಿಕ್ಲೆ ನಡುಟು ಮಲ್ತಿನ ಪ್ರಯಾಸ ಪೂರ ವ್ಯರ್ಥ ಆಂಡಾ ಪಂಡ್ದ್ ಎಂಕ್ ನಿಕ್ಲೆ ಸಂಗತಿಡ್ ಪೋಡಿಗೆ ಆಪುಂಡು.

¹²ಸಹೋದ್ರೆರೇ, ಯಾನ್ ನಿಕ್ಲೆಲೆಕ್ಕನೆ ಆದುಪ್ಪುನೆಡ್ದ್ ಎನ ಲೆಕ್ಕನೆ ಆಲೆ ಅಂದ್‌ದ್ ನಿಕ್ಲೆಡ ನಟ್ಟೊನ್ವೆ. ನಿಕುಲು ಎಂಕ್ ದಾಲಾ ಅನ್ಯಾಯ ಮಲ್ತ್‌ಜರ್.

¹³ಯಾನ್ ಸುರುತ್ತ ಸರ್ತಿ ಶರೀರೊಡು ಬಲಹೀನೆ ಆದ್ ನಿಕ್ಲೆಗ್ ಸುವಾರ್ತೆ ಸಾರಿದಿನವು ನಿಕುಲು ತೆರಿದುಲ್ಲರ್.

¹⁴ಎನ ಶರೀರದ ಕಷ್ಟೊಡು ನಿಕ್ಲೆಗ್ ತಾಪತ್ರಯ ಆನಗ ನಿಕುಲು ಎನನ್ ಅಸಹ್ಯ ಮಲ್ಪಂದೆ, ತಿರಸ್ಕಾರ ಮಲ್ಪಂದೆ, ಎನನ್ ದೇವೆರೆಡ್ದ್ ಬೈದಿನ ಒರಿ ದೂತಲೆಕ್ಕನೆ, ಕ್ರಿಸ್ತ ಯೇಸು ಇನ್ಪಿಲೆಕ್ಕನೆ ಸೇರಾವೊಂಡರ್.

¹⁵ಆತ್ ಸಂತೋಷಡಿತ್ತಿನಾಕುಲು ಇತ್ತೆ ನಿಕ್ಲೆನ ಸಂತೋಷ ಒಡೆಗ್ ಪೋಂಡು? ಅಪಗ ಸಾದ್ಯ ಇತ್ತ್ಂಡ, ನಿಕ್ಲೆ ಕಣ್ಣ್‌ಲೆನೇ ದೆತ್ತ್‌ದ್ ಕೊರಿಯೆರೆಗ್ಲಾ ತಯಾರಾದಿತ್ತರ್ ಅಂದ್‌ದ್ ಯಾನ್ ಸಾಕ್ಷಿ ಪನ್ಪೆ.

¹⁶ಅಂಚಾದ್ ಯಾನ್ ನಿಕ್ಲೆಗ್ ಸತ್ಯ ಇತ್ತಿನೆನ್ ಪನ್ಪಿನೆಡ್ದಾವರ, ನಿಕ್ಲೆನ ಪಗೆನಾಯೆ ಆಯೆನಾ?

¹⁷ಆ ಸುಳ್ಳು ಬೋಧಕೆರ್ ನಿಕ್ಲೆನ್ ಮೆಚ್ಚಾಯೆರೆಗಾದ್ ಪ್ರಯಾಸ ಬುಡ್ಪೆರ್, ಆಂಡ ಅಕ್ಲೆನ ಉದ್ದೇಶ ಎಡ್ಡೆಂತಿನವು ಅತ್ತ್. ನಿಕುಲು ಅಕ್ಲೆಗ್ ಮಾತ್ರ ಮೆಚ್ಚಿಗೆ ಆದುಪ್ಪೊಡು ಅಂದ್‌ದ್ ಎನಡ್ದ್ ನಿಕ್ಲೆನ್ ದೂರ ಮಲ್ಪೊಡು ಅಂದ್‌ದ್ ಅಕ್ಲೆನ ಆಸೆ.

¹⁸ಯಾನ್ ನಿಕ್ಲೆಡೊಪ್ಪ ಉಪ್ಪುನಗ ಮಾತ್ರ ಅತ್ತ್, ಏಪಲಾ ಎಡ್ಡೆ ವಿಷಯೊಗಾದ್ ಮೆಚ್ಚಿಗೆ ತೋಜಾವುನವು ಎಡ್ಡೆನೇ.

¹⁹ಓ, ಎನ ಪ್ರೀತಿದ ಜೋಕುಲೇ, ಕ್ರಿಸ್ತೆ ನಿಕ್ಲೆ ಜೀವನೊಡು ಸಾರೂಪ್ಯ ಆನಮುಟ್ಟ, ಯಾನ್ ನಿಕ್ಲೆಗಾದ್ ಕುಡೊರ ಪೆದ್ಪಿನ ಬೇನೆ ಸಹಿಸೊಂದುಲ್ಲೆ.

²⁰ನಿಕ್ಲೆ ಸಂಗತಿಡ್ ಎಂಚಿನ ಮಲ್ಪೊಡಂದ್‌ದ್ ಎಂಕ್ ತೆರಿಯುಜಿ. ಯಾನ್ ಇತ್ತೆಲಾ, ನಿಕ್ಲೆಡೊಪ್ಪ ಇತ್ತ್‌ದ್ ಬೇತೆ ಬೇತೆ ನಮೂನೆಡ್ ಪಾತೆರಿಯೆರೆ ಆಸೆ ಮಲ್ಪುವೆ.

²¹ನ್ಯಾಯಕಟ್ಟ್‌ದ ಕೈ ತಿರ್ತ್ ಬದುಕೊಡು ಅಂದ್‌ದ್ ಬಯಕುನಾಕುಲೇ ನ್ಯಾಯಕಟ್ಟ್ ನಿಜಾದ್‌ಲಾ ದಾನೆ ಪನ್ಪುಂಡು ಅಂದ್‌ದ್ ನಿಕುಲು ತೆರಿದರಾ?

²²ನ್ಯಾಯಕಟ್ಟ್‌ಡ್ ಬರೆತ್ಂಡ್, ಅಬ್ರಹಾಮುಗು ರಡ್ಡ್ ಆಣ್ ಬಾಲೆಲು ಇತ್ತೆರ್. ಒರಿ ಆಯನ ಚಾಕ್ರಿದಾಲೆಡ್ದ್ ಪುಟ್ಟಿನಾಯೆ, ಬೊಕ್ಕೊರಿ ಆಯನ ಸ್ವಂತ ಬೊಡೆದಿಡ್ದ್ ಪುಟ್ಟಿನಾಯೆ.

²³ಚಾಕ್ರಿದಾಲೆಡ್ದ್ ಪುಟ್ಟುದಿನ ಮಗೆ ಶರೀರದಾಶೆಡ್ದ್ ಪುಟ್ಟುದಿತ್ತೆ. ಸ್ವಂತ ಬೊಡೆದಿಡ್ದ್ ಪುಟ್ಟುದಿನ ಮಗೆ ದೇವೆರೆ ವಾಗ್ದಾನೊಡ್ದೇ ಪುಟ್ಟುದಿತ್ತೆ.

²⁴ಈ ರಡ್ಡ್ ಪೊಂಜೊವುಲು ದೇವೆರೆನ ರಡ್ಡ್ ಒಡಂಬಡಿಕೆಗ್ ಸೂಚನೆ ಆದುಲ್ಲೆರ್. ಒಂಜಿ ಸೀನಾಯಿ ಪರ್ವತೊಡು ಆದ್. ಸುರು ಗುಲಾಮತನೊಟು ಉಪ್ಪುನ ಜೋಕುಲೆನ್ ಪುಟ್ಟಾವುನವು. ಅವ್ವೇ ಹಾಗರ್.

²⁵ಹಾಗರ್ ಇನ್ಪಿನವು ಅರೇಬಿಸ್ಥಾನೊಡು ಉಪ್ಪು ಸೀನಾಯಿ ಪರ್ವತ ಆದುಂಡು; ಆಲ್ ಇತ್ತೆದ ಯೆರೂಸಲೇಮುಗು ಸರಿ ಆದ್, ತನ ಬಾಲೆಲೆಡೊಪ್ಪ ನ್ಯಾಯಕಟ್ಟ್‌ದ ಗುಲಾಮತನೊಟು ಉಲ್ಲಲ್.

²⁶ಆಂಡ ಅಬ್ರಹಾಮುನ ಸ್ವಂತ ಬೊಡೆದಿ ಸಾರಾ, ಪರಲೋಕದ ಯೆರೂಸಲೇಮುಗು ಸೂಚನೆ ಆದುಲ್ಲಲ್. ಆಲ್ ನ್ಯಾಯಕಟ್ಟ್‌ಗ್ ಸ್ವತಂತ್ರದಾಲ್ ಆದಿತ್ತ್‌ದ್ ನಮ ಅಪ್ಪೆ ಆದುಲ್ಲಲ್.

²⁷ಶಾಸ್ತ್ರೊಡು ಬರೆತಿಲೆಕ್ಕ, “ಪೆದ್ದಂದಿನಾಲೆ, ಈ ಸಂತೋಷ ಮಲ್ಪುಲ. ಪೆದ್ದುನ ಬೇನೆ ತಿನಂದಿನಾಲೇ, ಸ್ವರ ಲಕ್ಕಾದ್, ಅರ್ಭಟ ಮಲ್ಪುಲ. ದಾಯೆಗ್ ಪಂಡ ಕಂಡನಿ ಇತ್ತಿನಲೆಡ್ದ್ ಕಂಡನಿ ಬುಡ್ತಿನಲೆಗ್ ಜೋಕುಲು ಜಾಸ್ತಿ.” ಪಂಡ್ದ್ ಬರೆತ್ಂಡತ್ತಾ.

²⁸ಬೊಕ್ಕ ಸಹೋದ್ರೆರೇ, ನಮ ಇಸಾಕಲೆಕ್ಕನೆ ವಾಗ್ದಾನೊಡು ಪುಟ್ಟಿದಿನ ಜೋಕುಲಾದುಲ್ಲ.

²⁹ಆಂಡ ದುಂಬು ಶರೀರದ ಆಸೆಡ್ ಪುಟ್ಟುದಿನಾಯೆ, ದೇವೆರಾತ್ಮದ ಬಲೊಟು ಪುಟ್ಟುದಿನಾಯಗ್ ಭಂಗ ಕೊರಿಲೆಕ್ಕನೆ ಇತ್ತೆಲಾ ಉಂಡು.

³⁰ಆಂಡ ಶಾಸ್ತ್ರೊಡು ನೆತ್ತ ಸಂಗತಿಡ್ ದಾನೆ ಪನ್ಪುಂಡು? “ಚಾಕ್ರಿದಾಲೆನ್ಲಾ ಆಲೆನ ಮಗನ್ಲಾ ಪಿದಯಿ ಪಾಡ್ಲ. ದಾಯೆಗಂದ್ಂಡ ಚಾಕ್ರಿದಲೆಗ್ ಪುಟ್ಟಿ ಮಗಕ್ಕ್ ಸ್ವಂತ ಬೊಡೆದಿ ಮಗಡೊಪ್ಪ ಬಾಧ್ಯಸ್ತಿಗೆ ತಿಕ್ಕಂದ್.”

³¹ಅಂಚಾದ್ ಸಹೋದ್ರೆರೇ, ನಮ ಚಾಕ್ರಿದಾಲೆನ ಜೋಕುಲು ಅತ್ತ್. ನಮ ಸ್ವಂತ ಬೊಡೆದಿನ ಜೋಕುಲೇ ಅಂದ್‌ದ್ ತೆರಿಯೊನ್ಲೆ.