Read Tulu ಗಲಾತ್ಯೆರೆಗ್ 5 Bible Online

ಗಲಾತ್ಯೆರೆಗ್ 5 - Tulu bible

ಗಲಾತ್ಯೆರೆಗ್ 5

¹ಕ್ರಿಸ್ತೆ ನಮನ್ ಸ್ವತಂತ್ರದಾಕುಲು ಆದುಪ್ಪೆರೆ ಬುಡುಗಡೆ ಮಲ್ತ್‌ದೆ. ನಿಕುಲು ಐಟ್ಟೇ ನಿಲೆ ಆದುಪ್ಪುಲೆ, ಕುಡೊರ ಗುಲಾಮತನತ ನುಗೊಟು ತಿಕ್ಕ್‌ದ್ ಬೂರಡೆ.

²ಕೇನ್ಲೆ, ಪೌಲು ಇನ್ಪಿ ಯಾನ್ ಪನೊಂದುಲ್ಲೆ, ನಿಕುಲು ಸುನ್ನತಿ ಮಲ್ತೊಂಡರ್ಡ ಕ್ರಿಸ್ತಡ್ದ್ ನಿಕ್ಲೆಗ್ ವಾ ಪ್ರಯೋಜನಲಾ ಇಜ್ಜಿ.

³ಏರ್ ಸುನ್ನತಿ ಮಲ್ತೊನುವೆನಾ, ಆಯೆ ನ್ಯಾಯಕಟ್ಟ್‌ಡ್ ಬರೆತಿ ಪ್ರತಿಯೊಂಜೆನ್ ಕೈಕೊನುನ ಹಂಗ್‌ಗ್ ಬೂರ್ವೆ ಅಂದ್‌ದ್ ಕುಡೊರ ಎಚ್ಚರಿಕೆ ಪನ್ಪೆ.

⁴ದಾಯೆಗಂದ್ಂಡ ನಿಕ್ಲೆಡ್ ಏರಾಂಡಲಾ ನ್ಯಾಯಕಟ್ಟ್‌ನ್ ಕೈಕೊನುನೆಡ್ದಾದ್ ನೀತಿವಂತೆರ್ ಆವೆರೆ ಬಯಕುವರ್ಡ ಅಕುಲು ಕ್ರಿಸ್ತಡ್ದ್ ದೂರ ಆಪೆರ್. ಬೊಕ್ಕ ದೇವೆರೆ ದಯೊಡ್ದು ತತ್ತ್‌ದ್ ಬೂರ್ವೆರ್.

⁵ಆಂಡ ನಮ ದೇವೆರಾತ್ಮಡ್ದ್ ದೇವೆರೆನ ಮಿತ್ತ್ ನಂಬಿಕೆ ದೀದ್ ದೇವೆರೆ ಒಟ್ಟುಗು ನೀತಿವಂತೆರ್ ಆಪ ಇನ್ಪಿನ ನಿರೀಕ್ಷೆಡ್ ಉಲ್ಲ. ಈ ನಿರೀಕ್ಷೆ ಸಫಲ ಆವು ಅಂದ್‌ದ್ ಎದುರು ತೂವೊಂದುಲ್ಲ.

⁶ದಾಯೆಗಂದ್ಂಡ ನಮ ಕ್ರಿಸ್ತ ಯೇಸುಡು ಉಪ್ಪುನಗ, ಸುನ್ನತಿ ಆಂಡಲಾ ಪ್ರಯೋಜನ ಇಜ್ಜಿ. ಸುನ್ನತಿದಾಂತೆಲಾ ಪ್ರಯೋಜನ ಇಜ್ಜಿ, ಪ್ರೀತಿಡ್ ಯೇಸುನ ಮಿತ್ತ್ ನಂಬಿಕೆ ದೀದ್ ನಡಪುನವೇ ಪ್ರಯೋಜನ ಆದುಂಡು.

⁷ನಿಕುಲು ಎಡ್ಡೆಡ್ ಬಲ್ತೊಂದಿತ್ತರ್. ಸತ್ಯೊಗು ಒಳಗಾವಂದಿಲೆಕ್ಕ ನಿಕ್ಲೆನ್ ಏರ್ ತಡೆತೆರ್?

⁸ಈ ಬೋಧನೆ ನಿಕ್ಲೆಗ್ ಲೆತ್ತಿನಾಯಡ್ದ್ ಬೈದಿನವು ಅತ್ತಾ?

⁹ಈ ಸುಳ್ಳು ಬೋಧನೆ ಒಂತೆ ಪುಳಿಬಂದದ ಲೆಕ್ಕನೆ ಇಡೀ ಬಂದೊನು ಪುಳಿ ಮಲ್ಪುಂಡು.

¹⁰ನಿಕುಲು ಬೇತೆ ಸಾದಿಡ್ ಪೋಪುಜರ್ ಅಂದ್‌ದ್ ಕರ್ತವಡ್ ಎಂಕ್ ಭರವಸೆ ಉಂಡು. ನಿಕ್ಲೆಡ್ ಗಲಿಬಿಲಿ ಪುಟ್ಟಾವುನಾಯೆ ಏರೇ ಆವಡ್, ಆಯೆ ನ್ಯಾಯತೀರ್ಪುಗು ಗುರಿ ಆಪೆ.

¹¹ಸಹೋದ್ರೆರೇ, ಸುನ್ನತಿ ಮಲ್ಪೊಡಂದ್‌ದ್ ನನಲಾ ಸಾರಿಯುವೆಡ ಎಂಕ್ ನನಲಾ ಭಂಗ ದಾಯೆಗ್? ಅಂಚಾದಿತ್ತ್ಂಡ ಕ್ರುಸ್ಸುದ ದಿಸೆಡ್ದ್ ಉಂಡಾತಿನ ಆತಂಕ ಪೋಂಡತ್ತಾ?

¹²ನಿಕ್ಲೆನ್ ಏರ್ ಗಲಿಬಿಲಿ ಮಲ್ಪುವೆರಾ, ಅಕುಲು ಅಕ್ಲೆನ ಅಂಗೊನು ಕಡ್ತ್ ಪಾಡುನನೇ ಎಡ್ಡೆ.

¹³ಎನ ಸಹೋದ್ರೆರೇ, ನಿಕುಲು ಸ್ವತಂತ್ರೆರಾದುಪ್ಪೊಡು ಅಂದ್‌ದ್ ದೇವೆರೆ ಲೆಪ್ಪು ಆತಿನಾಕುಲು. ಆಂಡ ನಿಕ್ಲೆ ಸ್ವತಂತ್ರೊನು ಶರೀರಭಾವೊಗು ತೃಪ್ತಿ ಮಲ್ಪೆರೆಗಾದ್ ಬಳಕೆ ಮಲ್ಪಂದೆ, ಪ್ರೀತಿಡ್ ಒರಿ ಒರಿಯಗ್ ಸೇವೆ ಮಲ್ತೊಂದುಪ್ಪುಲೆ.

¹⁴“ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪುಲ.” ಅಂದ್‌ದ್ ಇಡೀ ನ್ಯಾಯಕಟ್ಟ್‌ಡ್ ಒಂಜಿ ಪಾತೆರೊಡೇ ತೋಜಾವುಂಡು.

¹⁵ನಿಕುಲು ಒರಿಯಗ್ ಒರಿ ತುಚ್ಚಿದ್ ಪರ್ತೊಂದು ದಿಂಗುನಾಕುಲಾಯರ್ಡ ಒರಿಯಡ್ದೊರಿ ನಾಶ ಆಪರ್, ತೂವೊನ್ಲೆ.

¹⁶ಅಂಚಾದ್ ನಿಕ್ಲೆ ಜೀವನೊನು ಪರಿಶುದ್ಧಾತ್ಮ ನಡಪುಡಡ್ ಅಂದ್‌ದ್ ಯಾನ್ ಪನ್ಪೆ. ಅಪಗ ನಿಕುಲು ನಿಕ್ಲೆನ ಶರೀರಭಾವದ ಇಚ್ಚೆನ್ ಏತ್ ಮಾತ್ರೊಗ್ಲಾ ಮಲ್ಪಯರ್.

¹⁷ದಾಯೆಗಂದ್ಂಡ ಶರೀರಭಾವದ ಇಚ್ಚೆ ಆತ್ಮೊಗು ವಿರೋಧ ಆದುಂಡು. ಆತ್ಮ ಶರೀರಭಾವದ ಇಚ್ಚೆಗ್ ವಿರೋಧ ಆದುಂಡು. ಈ ರಡ್ಡ್ ಶಕ್ತಿಲು ನಿಕುಲು ಬಯಕುನೆನ್ ಮಲ್ಪಂದಿಲೆಕ್ಕ ಒಂಜೆಕ್ಕೊಂಜಿ ವಿರೋಧ ಆದ್ ಹೋರಾಟ ಮಲ್ತೊಂದೇ ಉಪ್ಪುವ.

¹⁸ಆಂಡ ನಿಕುಲು ಆತ್ಮೊಡ್ದು ನಡತೊಂದು ಉಪ್ಪುನಾಕುಲಾಂಡ ನ್ಯಾಯಕಟ್ಟ್‌ದ ಅಧೀನೆರತ್ತ್.

¹⁹ಶರೀರಭಾವದ ಸ್ವಭಾವೊಲು ಬಯಲಾದುಂಡು; ಅವು ಒವು ಪಂಡ, ಹಾದ್ರ, ಬಂಡ್‌ತನ, ನಾಚಿಗೆದಾಂತಿನವು

²⁰ಮೂರ್ತಿಪೂಜೆ, ಮಾಟಮಂತ್ರ, ವೈರತ್ವ, ಪೆಟ್ಟ್‌ಪುಡೆ, ಕಿಚ್ಚಿ, ಎದುರು ಕೋಪ, ಸ್ವಾರ್ಥ, ತರ್ಕ, ಜಾತಿಭೇದ,

²¹ದ್ವೇಷ, ಕುಡ್ಚೆಲ್, ದರ್ಬಾರ್, ಇಂಚಿತ್ತಿನವೇ. ಇಂಚಿತ್ತಿನೆನ್ ಮಲ್ಪುನಾಯಗ್ ದೇವೆರೆ ರಾಜ್ಯೊಡು ಬಾಧ್ಯಸ್ತಿಗೆ ತಿಕ್ಕಂದ್ ಅಂದ್‌ದ್ ಯಾನ್ ದುಂಬು ಪಂಡಿಲೆಕ್ಕನೆ ಇತ್ತೆಲಾ ಪನ್ಪೆ.

²²ಆಂಡ ದೇವೆರಾತ್ಮೊಡ್ದು ಉಂಡಾಪಿನ ಫಲ ದಾನೆಂದ್ಂಡ ಪ್ರೀತಿ, ಸಂತೋಷ, ಸಮಾಧಾನ, ತಾಳ್ಮೆ, ಉಪಕಾರ, ಎಡ್ಡೆತನ, ನಂಬಿಕೆ, ಸಜ್ಜನಿಗೆ, ಬೊಕ್ಕ ಕಷ್ಟ ತಡೆತೊನುನವು ಇಂಚಿತ್ತಿನವೇ.

²³ಇಂಚಿತ್ತಿನೆಕ್ಕ್ ವಾ ನ್ಯಾಯಕಟ್ಟ್‌ಲಾ ವಿರೋಧ ಮಲ್ಪುಜಿ.

²⁴ಕ್ರಿಸ್ತ ಯೇಸುಗು ಸೇರ್ದಿನಾಕುಲು ತನ್ಕುಲೆ ಶರೀರಭಾವದ ಇಚ್ಚೆಲೆನ್ ಕ್ರುಸ್ಸುಗು ಪಾಡ್ದಿನಾಕುಲಾದುಲ್ಲೆರ್.

²⁵ನಮ ಆತ್ಮಡ್ದ್ ಬದುಕುನಾಕುಲಾದ್ ಆತ್ಮಗ್ ಸರಿಯಾದ್ ನಡಪುಗ.

²⁶ನಮ ಪೊಕ್ಕಡೆದ ಪುಗರಿಕೆಗ್ ಆಸೆ ಮಲ್ಪಂದೆ ಒರಿ ಒರಿಯಗ್ ಕೋಪ ಲಕ್ಕಾವಂದೆ, ಒರಿ ಒರಿಯಗ್ ಮಚ್ಚರ ಮಲ್ಪಂದೆ ಉಪ್ಪುಗ.