Read Tulu ಎಫೆಸ್ಯೆರೆಗ್ 2 Bible Online

ಎಫೆಸ್ಯೆರೆಗ್ 2 - Tulu bible

ಎಫೆಸ್ಯೆರೆಗ್ 2

¹ನಿಕುಲು ಅಪರಾಧ ಬೊಕ್ಕ ಪಾಪದ ದಿಸೆಡ್ದ್ ಒರ ಸೈತಿನಾಕುಲು ಆದಿತ್ತಿ ನಿಕ್ಲೆನ್ಲಾ ಬದ್‌ಕಾಯೆ.

²ನಿಕುಲು ದುಂಬು ಅಪರಾಧೊನ್ಲಾ ಪಾಪೊನ್ಲಾ ಮಲ್ಪುನಾಕುಲು ಆದಿತ್ತ್‌ದ್ ಲೋಕದ ರೀತಿ ರಿವಾಜ್‌ಗ್ ತಕ್ಕ ನಡತೊಂಡರ್. ಬಾನಮಂಡಲೊಡು ಅಧಿಕಾರ ನಡಪಾವುನ ಅಧಿಪತಿಗ್, ಅಂದ್ಂಡ ನಂಬೊಲ್ಕೆದಾಂತಿನಾಕುಲೆನ್ ಈ ಲೋಕೊಡು ದಂಕ್‌ದ್ ನಡಪುಡುನ ಆತ್ಮೊಗು ಸರಿಯಾದ್ ನಡತೊಂಡರ್.

³ಮೊಕ್ಲೆಡ್ ನಮ ಮಾತೆರ್ಲಾ ಒಂಜಿ ಸಮಯೊಡು ದಂಕ್‌ದ್ ನಡಪುನಾಕುಲಾದಿತ್ತ್‌ದ್ ಶರೀರದ ಆಸೆಲೆಗ್ ಉಲಯಿ ಆದ್, ಶರೀರೊಗ್ಲಾ ಮನಸ್‌ಗ್ಲಾ ಸಮ್ಮಂಧ ಇತ್ತಿನ ಇಚ್ಚೆಲೆಡ್ ನಡತೊಂದು ನಮ ಈ ಸ್ವಭಾವೊಡ್ದಾದ್ ಬೇತೆಕ್ಲೆಲೆಕ್ಕನೇ ದೇವೆರೆ ಕೋಪೊಗು ಗುರಿ ಆದಿತ್ತ.

⁴ಆಂಡ ದೇವೆರ್ ಏತೋ ಕನಿಕರದಾಯೆ ಆದಿತ್ತ್‌ದ್ ನಮನ್ ಏತೋ ಹೆಚ್ಚಾದ್ ಪ್ರೀತಿ ಮಲ್ತ್‌ದೆ.

⁵ಅಂಚಾದೇ, ಅಪರಾಧದ ದಿಸೆಡ್ದ್ ಸೈತಿನಾಕುಲು ಆದಿತ್ತಿ ನಮನ್ ಕ್ರಿಸ್ತ ಒಟ್ಟುಗು ಬದ್‌ಕಾಯೆ. (ದೇವೆರೆ ದಯೊಡ್ದೇ ನಿಕ್ಲೆಗ್ ರಕ್ಷಣೆ ತಿಕ್ಕ್ಂಡ್.)

⁶ಸೈತಿನಾಕುಲೆಡ್ದ್ ಲಕ್ಕಾಯಿನಿ ಮಾತ್ರ ಅತ್ತ್ ನಮ ಕ್ರಿಸ್ತ ಯೇಸುಡು ಒಂಜಾದ್ ಇತ್ತಿನೆಡ್ದ್ ದೇವೆರ್ ದುಂಬು ಬರ್ಪಿ ಯುಗತ್ತ ಜನೊಕುಲೆಗ್ ಕ್ರಿಸ್ತ ಯೇಸುಡು ಗೆನ್ಪೆರೆ ತೀರಂದಿನಾತ್ ತನ ದಯ ಪನ್ಪಿ ಐಶ್ವರ್ಯೊನು ಒದಗಾದ್ ನಮನ್ ಸೈತಿನಾಕುಲೆಡ್ದ್ ಲಕ್ಕಾದ್ ಪರಲೋಕೊಡು ಆಯಡೊಪ್ಪ ಕುಲ್ಲಾವೆ.

⁸ನಿಕುಲು ನಂಬಿನಪಗ ದೇವೆರ್ ನಿಕ್ಲೆನ್ ದಯೊಡ್ದಾದ್ ರಕ್ಷಣೆ ಮಲ್ತೆ. ಉಂದು ನಿಕ್ಲೆ ಸ್ವಂತ ಯೋಗ್ಯತೆ ಕ್ರಿಯೊಲೆಡ್ದಾದ್ ಅತ್ತ್. ಅವು ದೇವೆರೆನ ಒಂಜಿ ಉಡಿಗೆರೆನೇ.

⁹ರಕ್ಷಣೆ ಇನ್ಪಿನವು ನಮ ಮಲ್ತ್‌ದಿನ ಎಡ್ಡೆ ಕೆಲೊಸೊಲೆ ಫಲ ಅತ್ತ್. ಅಂಚಾದ್ ನಮ ಏರ್ಲಾ ಐಕಾದ್ ಪುಗರೊನಿಯೆರೆ ಆಪುಜಿ. ನಮ ದೇವೆರೆನ ಸೃಷ್ಟಿ.

¹⁰ದಾಯೆಗಂದ್ಂಡ ನಮ ದೇವೆರೆ ಕೈಬೇಲೆ. ಕ್ರಿಸ್ತ ಯೇಸುಡು ಎಡ್ಡೆ ಕಾರ್ಯೊಲೆನ್ ಮಲ್ಪೆರೆಗಾದ್ ನಮನ್ ಉಂಡು ಮಲ್ತ್‌ದೆ. ಉಂದೆಟ್ಟ್ ನಡಪುಲೆಕ್ಕ ದೇವೆರ್ ನಮನ್ ದುಂಬೇ ನೇಮಕ ಮಲ್ತ್‌ದೆ.

¹¹ಉಂದೆಕ್ಕಾದ್ ನಿಕುಲು ಪುಟ್ಟುಡ್ದು ಪಿದಯಿದ ಜನೊಕುಲಾದಿತ್ತರ್. ಶರೀರೊಡು ಸುನ್ನತಿ ಆತಿನಾಕುಲು ನಿಕ್ಲೆನ್ ಸುನ್ನತಿ ಆವಂದಿ ಅಧರ್ಮಿಲು ಅಂದ್‌ದ್ ಲೆತ್ತೊಂದಿತ್ತೆರ್.

¹²ಆ ದಿನೊಕುಲೆಡ್ ನಿಕುಲು ಕ್ರಿಸ್ತಡ್ ದೂರ ಆದಿತ್ತರ್. ನಿಕುಲು ಇಸ್ರಾಯೇಲ್ಯೆರೆ ಹಕ್ಕ್‌ಡ್ ಪಾಲ್‌ದಾಂತಿನಾಕುಲುಲಾ ದೇವೆರ್ ಅಕ್ಲೆಡೊಪ್ಪ ಮಲ್ತ್‌ದಿನ ಒಡಂಬಡಿಕೆದ ವಾಗ್ದಾನೊಡು ಪಿದಯಿದಾಕುಲುಲಾ ಆದಿತ್ತರ್. ಈ ಲೋಕೊಡು ದೇವೆರ್‌ದಾಂತೆಲಾ ನಿರೀಕ್ಷೆದಾಂತೆಲಾ ಆದಿತ್ತರ್ ಅಂದ್‌ದ್ ನೆನೆಪು ಮಲ್ತೊನ್ಲೆ.

¹³ಆಂಡ ಇತ್ತೆ ನಿಕುಲು ಕ್ರಿಸ್ತ ಯೇಸುಡು ಸೇರ್ದುಲ್ಲರ್. ಒರ ನಿಕುಲು ದೇವೆರೆಡ್ದ್ ಮಸ್ತ್ ದೂರ ಆದಿತ್ತರ್. ಆಂಡ ಇತ್ತೆ ಕ್ರಿಸ್ತನ ನೆತ್ತೆರೆಡ್ದ್ ಆಯಗ್ ಕೈತಲಾದುಲ್ಲರ್.

¹⁴ನಿಕ್ಲೆನ್ಲಾ ನಮನ್ಲಾ ಒಂಜಿ ಮಲ್ತ್‌ದಿನ ಆಯೆನೇ ನಂಕ್ ಸಮಾಧಾನ ಕೊರ್ಪಿನಾಯೆ ಆದುಲ್ಲೆ. ಆಯೆ ತನ ಶರೀರೊನು ಅರ್ಪಣೆ ಮಲ್ತ್‌ದ್ ನ್ಯಾಯಕಟ್ಟ್‌ಡ್ ಬರೆದಿತ್ತಿನ ಅಪ್ಪಣೆಲೆನ್ ದೆತ್ತ್‌ದ್ ಪಾಡ್ದ್ ಇತ್ತಿನ ಪಗೆನ್ ತೀರಿಸಾದ್ ನಮನ್ ದೂರ ಮಲ್ತ್‌ದಿನ ಅಡ್ಡ ಗೋಡೆನ್ ದೆತ್ತ್‌ದ್ ಪಾಡಿಯೆ. ಆಯೆ ಯೆಹೂದ್ಯೆರೆನ್ಲಾ ಪಿದಯಿದಾಕುಲೆನ್ಲಾ ಸಮಾಧಾನ ಮಲ್ತ್‌ದ್ ತನಡ್ ರಡ್ಡ್ ಗುಂಪುಲೆನ್ಲಾ ಒಂಜಿ ಮಲ್ತ್‌ದ್ ಪೊಸ ಜನೊಕುಲೆ ಲೆಕ್ಕ ಮಲ್ತೆ.

¹⁶ನಮಡ್ ಇತ್ತಿನ ಪಗೆತನೊನು ಕ್ರಿಸ್ತೆ ತನ ಕ್ರುಸ್ಸುದ ಮರಣೊಡ್ದು ನಾಶ ಮಲ್ತ್‌ದ್ ರಡ್ಡ್ ಗುಂಪುಲೆನ್ಲಾ ಒಂಜೇ ಶರೀರದ ಲೆಕ್ಕ ಮಲ್ತ್‌ದ್ ದೇವೆರೆಡೊಪ್ಪ ಸಮಾಧಾನ ಮಲ್ತೆ.

¹⁷ಆಯೆ ಬತ್ತ್‌ದ್ ದೂರ ಇತ್ತಿ ನಿಕ್ಲೆಗ್ಲಾ ಕೈತಲಿತ್ತಿ ಯೆಹೂದ್ಯೆರ್‌ಗ್ಲಾ ಸಮಾಧಾನದ ಸುವಾರ್ತೆನ್ ಸಾರಿಯೆ.

¹⁸ಇಂಚ ಆದುಪ್ಪುನೆಡ್ದಾವರ, ಆಯಡ್ದ್ ನಮಲಾ ನಿಕುಲುಲಾ ಒಂಜೇ ಆತ್ಮೊನು ಪಡೆತಿನಾಕುಲಾದ್ ಅಮ್ಮೆರೆ ಕೈತಲ್‌ಗ್ ಸೇರಿಯೆರೆ ಸಾದಿ ಆಂಡ್.

¹⁹ಅಂಚಾದ್ ನಿಕುಲು ನನ ದುಂಬು ಪರದೇಶಿಲುಲಾ ಪಿದಯಿದ ಜನೊಕುಲುಲಾ ಆದುಪ್ಪಂದೆ ದೇವಜನೊಕುಲೆ ಒಟ್ಟುಗು ಒಂಜೇ ಊರುದಾಕುಲುಲಾ ದೇವೆರೆ ಇಲ್ಲದಾಕುಲುಲಾ ಆದುಲ್ಲರ್.

²⁰ಅಪೊಸ್ತಲೆರ್ ಬೊಕ್ಕ ಪ್ರವಾದಿಲು ಇನ್ಪಿ ಪಂಚಾಂಗದ ಮಿತ್ತ್ ಕಟ್ಟ್‌ದಿನ ದೇವೆರೆ ಇಲ್ಲ್ ಆದುಲ್ಲ. ಐತ ಮೂಲೆಕಲ್ಲ್ ಕ್ರಿಸ್ತ ಯೇಸು ತಾನೇ ಆದುಲ್ಲೆ.

²¹ಆಯೆ ಕಟ್ಟ್‌ದಿನ ಈ ಕಟ್ಟೊಣ ಮಾತ ಮರ್ಗಿಲುಲಾ, ಮಾತ ಕೋಣೆಲುಲಾ ಒಂಜೆಕ್ಕ್ ಒಂಜಿ ಕೂಡ್ದು ಉಂಡು, ಆ ಕಟ್ಟೊಣ ವೃದ್ಧಿ ಆದ್ ಕರ್ತವನ ಪರಿಶುದ್ಧ ದೇವಾಲಯ ಆಪುಂಡು.

²²ಆಯಡ್ದಾದ್ ಪಿದಯಿದ ಜನೊಕುಲು ಆದಿತ್ತಿನ ನಿಕುಲುಲಾ ಆತ್ಮಡ್ ದೇವೆರೆ ಇಲ್ಲ್ ಆದುಪ್ಪುಲೆಕ್ಕ ನಮ ಒಟ್ಟುಗು ಕಟ್ಟ್‌ದಿನಾಕುಲು ಆದುಲ್ಲರ್.