Read Tulu ಎಫೆಸ್ಯೆರೆಗ್ 4 Bible Online

ಎಫೆಸ್ಯೆರೆಗ್ 4 - Tulu bible

ಎಫೆಸ್ಯೆರೆಗ್ 4

¹ನಿಕುಲು ದೇವೆರೆಡ್ ಲೆಪ್ಪು ಆದಿತ್ತಿನಕುಲಾದ್ ಆ ಲೆಪ್ಪುಗು ಯೋಗ್ಯೆರಾದ್ ನಡಪುಡೊಡು ಅಂದ್‌ದ್ ಕರ್ತವನ ಸೇವೆಗ್ ಸೆರೆಮನೆಟುಪ್ಪು ಯಾನ್ ನಿಕ್ಲೆಡ ನಟ್ಟೊನ್ವೆ.

²ನಿಕುಲು ಏಪಲಾ ತಗ್ಗ್‌ತನೊಟ್ಲಾ ಸಜ್ಜನಿಗೆಡ್ಲಾ ತಾಳ್ಮೆಡ್ಲಾ ನಡತೊಂದು ಒರಿಯನ್ ಒರಿ ಪ್ರೀತಿಡ್ ತಾಳೊನ್ಲೆ.

³ಸಮಾಧಾನದ ಬಂಧನೊಡು ಕಟ್ಟ್‌ದಿನಕುಲಾದ್ ಪರಿಶುದ್ಧಾತ್ಮಡ್ದ್ ಉಂಡಾಯಿ ಒಗ್ಗಟ್ಟ್‌ನ್ ಕಾತೊನಿಯೆರೆ ಪ್ರಯತ್ನ ಮಲ್ಪುಲೆ.

⁴ನಿಕುಲು ಒಂಜೇ ಶರೀರ, ಒಂಜೇ ಆತ್ಮನ್ ಪಡೆಯಿನಾಕುಲು ಒಂಜೆ ಪಧವಿನ್ ನಿರೀಕ್ಷೆ ಮಲ್ಪೆರೆ ಲೆಪ್ಪು ಇತ್ತಿನಾಕುಲಾದುಲ್ಲರ್. ನಿಕ್ಲೆಗ್ ಕರ್ತವೆ ಒರಿಯೆ, ಭರವಸೆ ಒಂಜೆ, ದೀಕ್ಷಾಸ್ನಾನ ಒಂಜೆ.

⁶ಮಾತೆರೆಗ್ ಅಮ್ಮೆ ಆದುಪ್ಪು ದೇವೆರ್ ಒರಿಯೇ. ಆಯೆ ಮಾತೆರೆ ಮಿತ್ತ್ ಉಪ್ಪುನಾಯೆಲಾ ಮಾತೆರೆಡ್ದ್ ಕಾರ್ಯ ಮಲ್ಪುನಾಯೆಲಾ ಮಾತೆರೆಡೊಪ್ಪ ಉಪ್ಪುನಾಯೆಲಾ ಆದುಲ್ಲೆ.

⁷ಆಂಡ ಕ್ರಿಸ್ತನ ದಯೊಡ್ದಾದ್ ಆಯೆ ನಂಕ್ ಪ್ರತಿ ಒರಿಯಗ್ ಒಂಜಿ ವಿಶೇಷ ವರೊನು ಕೊರ್ತೆ.

⁸ಅಂಚಾದೇ ಶಾಸ್ತ್ರ ಪನ್ಪುಂಡು, “ಆಯೆ ಮಿತ್ತ್ ಏರ್ದ್ ಪೋನಗ, ತಾನ್ ಜೈಸಿನ ದಿಂಜ ಸೆರೆತ್ತಾಕುಲೆಡೊಪ್ಪ ಪೋದು ತನ ಜನೊಕುಲೆಗ್ ಉಡಿಗೆರೆಲೆನ್ ಕೊರಿಯೆ.”

⁹“ಆಯೆ ಏರ್ದ್ ಪೋತಿನಾಯೆ” ಪನ್ಪಿನಾಂಡ ಭೂಮಿದ ತಿರ್ತ್‌ಲಾ ಜತ್ತ್‌ದಿನಾಯೆಲಾ ಆದುಲ್ಲೆ ಅತ್ತಾ?

¹⁰ಬೊಕ್ಕ ತಿರ್ತ್ ಜತ್ತ್‌ದ್ ಬೈದಿನಾಯೆ ಇಡೀ ಲೋಕೊನು ತಾನೇ ತನ ಬಲೊಡ್ದು ದಿಂಜಾವೆರೆಗಾದ್ ಮಾತ ಮಿತ್ತ್‌ದ ಲೋಕೊಡ್ದು ಪರಲೋಕೊಲೆಗ್ ಏರ್ದ್ ಪೋತಿನಾಯೆಲಾ ಆದುಲ್ಲೆ.

¹¹ಸಭೆಕ್ ಕ್ರಿಸ್ತೆ ಕೊರ್ತಿನ ವರೊಕ್ಲು ಉಂದೇ. ಕೆಲೆವೆರೆನ್ ಅಪೊಸ್ತಲೆರ್, ಕೆಲೆವೆರೆನ್ ಪ್ರವಾದಿಲು, ಕೆಲೆವೆರೆನ್ ಸುವಾರ್ತಿಕೆರ್, ಬೊಕ್ಕ ಕೆಲೆವೆರೆನ್ ಸಭಾಸೇವಕೆರ್ ಬೊಕ್ಕ ಕೆಲೆವೆರೆನ್ ಬೋಧಕೆರ್ ಮಲ್ತ್‌ದ್ ಕೊರಿಯೆ.

¹²ನಮ ನಂಬಿಕೆಡ್ ಐಕ್ಯತೆ ಉಂಡಾದ್ ದೇವೆರೆ ಮಗನ ಗೇನೊಡು ವೃದ್ಧಿ ಆದ್ ನಮ ಕರ್ತವಡ್ ಬಲ ಹೊಂದುದು ಕ್ರಿಸ್ತನ ಪೂರ್ತಿ ಯೋಗ್ಯತೆಗ್ ತಕ್ಕದಕುಲಾನ ಮುಟ್ಟ ಅಕ್ಲೆ ಸೇವೆಲು ದುಂಬು ಪೋಪುಂಡು. ದಾಯೆಗಂದ್ಂಡ ದೇವಜನೊಕುಲು ದೇವೆರೆ ಸೇವೆಗ್ ತನ್ಕುಲೆನ್ ತಯಾರ್ ಮಲ್ಪೆರೆ, ಬೊಕ್ಕ ಕ್ರಿಸ್ತನ ಶರೀರ ಆದುಪ್ಪು ಸಭೆನ್ ವೃದ್ಧಿ ಮಲ್ಪೆರೆ ಅಕ್ಲೆನ್ ಕೊರಿಯೆ.

¹⁴ಅಂಚಾದ್ ಎಂಕುಲು ನನ ಮಿತ್ತ್ ಬಾಲೆಲೆಕ್ಕ ಉಪ್ಪೆರೆ ಬಲ್ಲಿ, ನರಮಾನಿ ಮೋಸೊಡು ಕಲ್ಪಾವುನ ಬೋಧನೆ, ಮೋಸಗಾರಿಕೆಡ್ ಬೂರ್ದು ಕಡಲ್ದ ಸೆರೆತ್ತ ಲೆಕ್ಕ ಅಂಚಿಂಚಿ ಮಾಲೊಂದು ಉಪ್ಪೆರೆ ಬಲ್ಲಿ.

¹⁵ಐತ ಪಗತೆಗ್ ಪ್ರೀತಿಡ್ ಸತ್ಯೊನೇ ಪಾತೆರೊಂದು ಸಭೆತ ತರೆ ಆದುಪ್ಪು ಕ್ರಿಸ್ತಡ್ ಬಲಪೊಡು.

¹⁶ಇಡೀ ಶರೀರ ಸರಿಯಾದ್ ಕೂಡ್ದು ಉಪ್ಪುಲೆಕ್ಕ ಮಲ್ಪುವೆ. ಪ್ರತಿಯೊಂಜಿ ಅಂಗ ತನ ಪ್ರತ್ಯೇಕ ಕೆಲಸೊನು ಮಲ್ಪುನಗ ಬೇತೆ ಅಂಗೊಲು ಬಲಪೆರೆಗ್ಲಾ ಸಹಾಯ ಆಪುಂಡು. ಅಪಗ ಇಡೀ ಶರೀರ ಸೌಖ್ಯೊಡು ಇತ್ತ್‌ದ್ ಪ್ರೀತಿಡ್ ದಿಂಜಿದ್ ಬಲತೊಂದುಪ್ಪುಂಡು.

¹⁷ಅಂಚಾಯಿನೆಡ್ದ್ ಪಿದಯಿದ ಜನೊಕುಲು ನಡಪುಲೆಕ್ಕ ನಿಕುಲು ನನ ಮಿತ್ತ್ ನಡಪೆರೆ ಬಲ್ಲಿ ಅಂದ್‌ದ್ ಕರ್ತವಡ್ ಇತ್ತಿನಾಯೆ ಆದ್ ನಿಕ್ಲೆಗ್ ಕಂಡಿತಾದ್ ಪನ್ಪೆ.

¹⁸ಅಕ್ಲೆ ಉಡಲ್ ಪೂರ್ತಿ ಕತ್ತಲೆಡ್ ದಿಂಜಿದುಂಡು. ಅಕ್ಲೆನ ಮನಸ್ ಬಾರಿ ಕಠಿಣ ಆದಿತ್ತಿನೆಡ್ದ್ ದೇವೆರ್ ಕೊರ್ಪಿನ ಜೀವನೊಡ್ದು ಅಕುಲು ಮಸ್ತ್ ದೂರ ಆದುಲ್ಲೆರ್.

¹⁹ಅಕ್ಲೆಗ್ ವಾ ನಾಚಿಗೆಲಾ ಇಜ್ಜಿ. ತನ್ಕುಲು ಬಂಡ್‌ತನೊಕು ಒಚ್ಚಿದ್ ಕೊರ್ದು ಮಾತ ತರತ ಕೀಳ್ ಕೆಲಸೊಲೆನ್ ನಡಪಾವುನಾಕುಲಾದುಲ್ಲೆರ್.

²⁰ನಿಕುಲಾಂಡಲಾ ಕ್ರಿಸ್ತನ ಬೋಧನೆಡ್ ಅಂಚಿತ್ತಿನೆನ್ ಕಲ್ತ್‌ದಿಜರ್.

²¹ಯೇಸುಡ ಸತ್ಯ ಉಂಡು ಅಂದ್‌ದ್ ನಿಕುಲು ಆಯ ಸಂಗತಿಡ್ ಕೇಂಡ್ದ್ ಬೋಧನೆ ಪಡೆಯರತ್ತಾ.

²²ಅಂಚಾಂಡ ಆಯಡ್ದ್ ಬರ್ಪಿನ ಸತ್ಯೊನು ಕಲ್ತಿನೆಡ್ದ್ ನಿಕ್ಲೆನ ದುಂಬುದ ಪಾಪದ ನಡತೆನ್ ಬುಡ್ದು ಪರ ಸ್ವಭಾವೊನು ದೆತ್ತ್ ಪಾಡ್ಲೆ. ಅವು ಮೋಸೊಡ್ದು ದಿಂಜಿದಿನ ದುರಾಶೆಲೆಡ್ದ್ ತೆಟ್ಟ್‌ದ್ ಪೋಪಿನವು.

²³ಐತ ಪಗತೆಗ್ ದೇವೆರಾತ್ಮೆ ನಿಕ್ಲೆ ಮನಸ್‌ನ್ ಪರಿವರ್ತನೆ ಮಲ್ಪಡ್.

²⁴ಆ ಸ್ವಭಾವ ದೇವೆರೆಗ್ ಸರಿಯಾದ್ ಉಂಡು. ಅವು ಸತ್ಯದವುಲಾ ನೀತಿದವುಲಾ ಪರಿಶುದ್ಧದವುಲಾ ಆದ್ ಉಂಡಾತ್ತ್‌ಂಡ್.

²⁵ಅಂಚಾಯಿನೆಡ್ದ್ ಸುಳ್ಳು ಪಾತೆರೊನು ಬುಡ್ದು ಪ್ರತಿ ಒರಿ ತನ ನಿರೆಕರೆತಾಕುಲೆಡ ಸತ್ಯನೇ ಪಾತೆರಡ್. ನಮ ಮಾತೆರ್ಲಾ ಒರಿಯಗ್ ಒರಿ ಅಂಗೊಲು ಆದುಲ್ಲತ್ತಾ.

²⁶ಕೋಪ ಮಲ್ಪೊಡಾಂಡಲಾ ಪಾಪ ಮಲ್ಪೊಡ್ಚಿ, ಸೂರ್ಯ ಕಂತುನೆಡ್ದ್ ದುಂಬು ಕೋಪೊನು ಮದಪುಲೆ.

²⁷ಸೈತಾನಗ್ ಅವಕಾಸ ಕೊರೊಡ್ಚಿ.

²⁸ಕಂಡೊನುನಾಯೆ ನನ ಮಿತ್ತ್ ಕಂಡೊನಂದೆ ಒಂಜಿ ಎಡ್ಡೆ ಬೇಲೆ ಬೆನಡ್. ಅಪಗ ಕಷ್ಟೊಡುಪ್ಪುನಾಕುಲೆಗ್ ಕೊರಿಯೆರೆಗ್ ಆಯಡ್ದ್ ಆಪುಂಡು.

²⁹ನಿಕ್ಲೆನ ಬಾಯಿಡ್ದ್ ವಾ ಕುರ್ತೆಲ್ ಪಾತೆರಲಾ ಬರಿಯೆರೆ ಬಲ್ಲಿ. ಭಕ್ತಿನ್ ವೃದ್ಧಿ ಮಲ್ಪುನ ಕಾಲೊಗು ಸರಿಯಾಯಿನ ಎಡ್ಡೆ ಪಾತೆರ ಇತ್ತ್ಂಡ ಕೇನುನಾಕುಲೆಗ್ ಪ್ರಯೋಜನ ಆಪಿಲೆಕ್ಕ ಪಾತೆರಡ್.

³⁰ದೇವೆರೆ ಪರಿಶುದ್ಧಾತ್ಮೊಗು ದುಃಖ ಬರ್ಪಾವೊಡ್ಚಿ. ಆಯಡ್ದೇ ಬುಡುಗಡೆದ ದಿನೊಕಾದ್ ಮುದ್ರೆ ಪಡೆವೊಂದರತ್ತಾ?

³¹ಅಂಚಾದ್ ಮಾತ ಕೈಪೆ ಮನಸ್, ಉಗ್ರ, ಕೋಪ, ದುಷ್ಟತನ, ದೂಷಣೆ, ಮಾತ ತರತ ಹಾಳ್ ನಡತೆಲೆನ್ ಬುಡ್ದು ಬುಡ್ಲೆ.

³²ಒರಿಯಡ್ದ್ ಒರಿಯಗ್ ಉಪಕಾರ ಮಲ್ಪುನಾಕುಲುಲಾ ಕನಿಕರದಾಕುಲುಲಾ, ಕ್ಷಮಿಪುನಾಕುಲುಲಾ ಆದುಪ್ಪುಲೆ. ದೇವೆರ್ ನಿಕ್ಲೆನ್ ಕ್ರಿಸ್ತಡ್ ಮಾಪು ಮಲ್ತ್‌ದೆ ಅತ್ತಾ?