Read Tulu ಎಫೆಸ್ಯೆರೆಗ್ 6 Bible Online

ಎಫೆಸ್ಯೆರೆಗ್ 6 - Tulu bible

ಎಫೆಸ್ಯೆರೆಗ್ 6

¹ಜೋಕುಲೇ, ನಿಕುಲು ಕರ್ತವಗ್ ಸೇರ್ದಿನಾಕುಲು ಆದುಪ್ಪುನೆಡ್ದ್ ನಿಕ್ಲೆನ ಅಪ್ಪೆಅಮ್ಮಾಡ್ಲೆಗ್ ಒಳಗಾದುಪ್ಪುಲೆ. ಉಂದು ನೀತಿ ಆದುಂಡು.

²ಉಂದು ವಾಗ್ದಾನ ಇತ್ತಿನ ಸುರುತ್ತ ಅಪ್ಪಣೆ ಇಂಚ ಉಂಡು, “ನಿನ ಅಪ್ಪೆಅಮ್ಮಾಡ್ಲೆಗ್ ಸನ್ಮಾನ ಮಲ್ಪುಲ.

³ಸನ್ಮಾನ ಮಲ್ತಡ ನಿಕ್ಕ್ ಮಾತಲಾ ಎಡ್ಡೆ ಆಪುಂಡು ಬೊಕ್ಕ ಈ ಭೂಮಿದ ಮಿತ್ತ್ ದಿಂಜಕಾಲ ಬದುಕುವ.”

⁴ಅಪ್ಪೆಅಮ್ಮಾಡ್ಲೇ, ನಿಕ್ಲೆ ಜೋಕುಲೆಗ್ ಕೋಪ ಲಕ್ಕಾವಂದೆ, ಕರ್ತವಡ್ದ್ ಬರ್ಪಿನ ಬೋಧನೆನ್ಲಾ ಶಿಸ್ತ್‌ನ್ಲಾ ಅಕ್ಲೆಗ್ ಕಲ್ಪಾದ್ ತಾಂಕ್ಲೆ.

⁵ಚಾಕ್ರಿದಾಕುಲೇ, ಈ ಲೋಕದ ನಿಕ್ಲೆ ಯಜಮಾನೆರೆಗ್ ಮಾರ್ಯಾದಿಡ್ಲಾ, ಪೋಡಿಗೆಡ್ಲಾ ತಗ್ಗ್‌ಬಗ್ಗ್‌ದಿನಾಕುಲಾದ್‌ಲಾ ಉಪ್ಪುಲೆ. ಕ್ರಿಸ್ತಗ್ ಸೇವೆ ಮಲ್ಪುಲೆಕ್ಕನೇ ಅಕ್ಲೆನ ಸೇವೆನ್ ಉಡಲ್ ದಿಂಜಿದ್ ಮಲ್ಪುಲೆ.

⁶ನರಮಾನಿಲೆನ್ ಮೆಚ್ಚಾವುನಾಕುಲು ಮಲ್ಪುಲೆಕ್ಕ ಯಜಮಾನ್ಯೆರ್ ತೂವೊಂದುಪ್ಪುನಗ ಮಾತ್ರ ಚಾಕ್ರಿ ಮಲ್ಪಂದೆ ಕ್ರಿಸ್ತನ ಚಾಕ್ರಿದಾಕುಲಾದ್ ದೇವೆರೆನ ಚಿತ್ತೊಗು ಸರಿಯಾದ್ ಉಡಲ್ ದಿಂಜಿದ್ ಚಾಕ್ರಿ ಮಲ್ಪುಲೆ.

⁷ನರಮಾನಿಲೆಗಾದ್ ಅತ್ತ್, ಕರ್ತವನ ಚಿತ್ತೊಗು ಸರಿಯಾದ್ ದಿಂಜಿದಿ ಉಡಲ್‌ಡ್ದ್ ಸೇವೆ ಮಲ್ಪುಲೆ.

⁸ದಾಯೆಗಂದ್ಂಡ, ನಮ ಚಾಕ್ರಿದಾಕುಲಾಂಡಲಾ, ಯಜಮಾನೆರಾಂಡಲಾ ನಮ ಮಲ್ತಿನ ಎಡ್ಡೆ ಬೇಲೆಗಾದ್ ಕರ್ತವೆ ನಂಕ್ ಉಡಿಗೆರೆ ಕೊರ್ಪೆ ಇನ್ಪಿನೆನ್ ಮದಪಡೆ.

⁹ಯಜಮಾನೆರೇ, ನಿಕ್ಲೆ ಚಾಕ್ರಿದಾಕುಲೆನ್ಲಾ ಅಂಚೆನೇ ತೂವೊನ್ಲೆ. ಅಕ್ಲೆನ್ ಪೋಡಿಯಾವಡೆ. ನಿಕ್ಲೆಗ್ ಇರ್ವೆರೆಗ್ಲಾ ಪರಲೋಕೊಡು ಒರಿ ಯಜಮಾನೆ ಉಲ್ಲೆ. ಆಯಡ ಯಜಮಾನೆ ಬೊಕ್ಕ ಚಾಕ್ರಿದಾಯೆ ಪನ್ಪಿನ ಪಕ್ಷಪಾತ ಇಜ್ಜಿ ಇನ್ಪಿನೆನ್ ಮದಪಡೆ.

¹⁰ಕಡೆತ ಪಾತೆರ ದಾನೆಂದ್ಂಡ, ನಿಕುಲು ಕರ್ತವಡ್ಲಾ ಆಯನ ಶಕ್ತಿಡ್ಲಾ ಬಲ ಪಡೆಲೆ.

¹¹ಸೈತಾನನ ಮಾತ ತಂತ್ರೊಲೆನ್ ಎದುರಿಸಾದ್ ಗಟ್ಟಿಯಾದ್ ಉಂತೆರೆ ಆಪಿಲೆಕ್ಕ ದೇವೆರೆನ ಮಾತ ಆಯುಧೊಲೆನ್ ಪಾಡೊನ್ಲೆ.

¹²ನಮ ಲಡಯಿ ಮಲ್ಪುನು ನರಮಾನಿಲೆಡ ಅತ್ತಂದೆ ತೋಜಂದಿನ ದುಷ್ಟ ಲೋಕದ ಅಧಿಕಾರಿಲೆ ವಿರೋಧಲಾ, ಈ ಕತ್ತಲೆದ ಲೋಕದ ಅಧಿಪತಿಲೆ ವಿರೋಧಲಾ, ಪರಲೋಕೊಲೆಡುಪ್ಪು ದುಷ್ಟ ಆತ್ಮೊಲೆ ವಿರೋಧಲಾ ಲಡಯಿ ಮಲ್ಪುನಾಕುಲು ಆದುಲ್ಲ.

¹³ಉಂದೆಕ್ಕಾದ್ ಹಾಳ್ ದಿನೊಟು ವೈರಿಲೆನ ಎದುರು ಉಂತೆರೆ ಬೋಡಿತ್ತಿನೆನ್ ತಯಾರ್ ಮಲ್ತ್‌ದ್ ಜಯಶಾಲಿಲು ಆವೆರೆ, ದೇವೆರ್ ನಂಕ್ ಒದಗಾದಿನ ಪೂರ ಆಯುಧೊಲೆನ್ಲಾ ದೆತ್ತೊನ್ಲೆ.

¹⁴ಸತ್ಯ ಇನ್ಪಿ ಸೊಂಟ ಪಟ್ಟಿನ್ ಕಟ್ಟೊಂದು, ಗಟ್ಟಿಯಾದ್ ಉಂತುಲೆ. ದೇವೆರೆ ನೀತಿ ಇನ್ಪಿ ಶರೀರದ ಕವಚೊನು ಪಾಡೊನ್ಲೆ.

¹⁵ಸುವಾರ್ತೆಡ್ದ್ ಬರ್ಪಿನ ಸಮಾಧಾನ ಇನ್ಪಿ ಜೋಡುಲೆನ್ ಪಾಡೊನ್ಲೆ.

¹⁶ಈ ಹಾಳ್ ದಿನೊಕುಲೆಡ್ ಈತೇ ಅತ್ತ್, ನೆಡ್ದ್ ಬೊಕ್ಕ ನಂಬಿಕೆ ಇನ್ಪಿನ ಅಡ್ಡಣೊನು ಪತ್ತೊಂದುಪ್ಪುಲೆ, ದಾಯೆಗಂದ್ಂಡ ಈ ಅಡ್ಡಣೊಡು ಸೈತಾನೆ ಕಡಪುಡುನ ತೂತ ಬಾಣೊಲೆನ್ ತೆಕ್ಕಾವೆರೆ ಸಾದ್ಯ ಆಪುಂಡು.

¹⁷ಉಂದೇ ಅತ್ತ್, ರಕ್ಷಣೆ ಪನ್ಪಿನ ಟೊಪ್ಪಿ ತರೆತ ಮಿತ್ತ್ ದೀವೊನ್ಲೆ. ದೇವೆರೆ ಪಾತೆರ ಇನ್ಪಿನ ಆತ್ಮನ ಕತ್ತಿನ್ ಪತ್ತೊನ್ಲೆ.

¹⁸ಮಾತ ಕಾಲೊಲೆಡ್ಲಾ ಪ್ರತಿಯೊಂಜಿ ಸಂಗತಿಗಾದ್ರಲಾ, ಆತ್ಮಡ್ ಪ್ರಾರ್ಥನೆ ಮಲ್ಪುಲೆ. ಎಚ್ಚರಿಕೆ ಆದಿತ್ತ್‌ದ್ ಮಾತ ದೇವಜನೊಕುಲೆಗಾದ್ ಬುಡಂದೆ ಪ್ರಾರ್ಥನೆ ಮಲ್ಪುನಾಕುಲು ಆದುಪ್ಪುಲೆ.

¹⁹ಯಾನ್ ಬಾಯಿ ಜಪ್ಪುನಗ ಪೂರ್ವಕಾಲೊಡು ದೆಂಗ್‌ದಿತ್ತಿನ ಸುವಾರ್ತೆದ ಸತ್ಯೊನು ಧೈರ್ಯೊಡು ತೆರಿಪಾವೆರೆ ದೇವೆರ್ ಎಂಕ್ ಒದಗಾದ್ ಕೊರಡ್ ಪಂಡ್ದ್‌ಲಾ ಪ್ರಾರ್ಥನೆ ಮಲ್ಪುಲೆ.

²⁰ಯಾನ್ ಸುವಾರ್ತೆಗ್ ಬೋಡಾದ್ ರಾಯಭಾರಿ ಆದ್ ಸಂಕಲೆಡ್ ಉಪ್ಪುನಗ ಯಾನ್ ಎಂಚ ಪಾತೆರೊಡು, ಆ ದೇವೆರೆ ವಿಷಯೊನು ಧೈರ್ಯೊಡು ಎಂಚ ತೆರಿಪಾವೊಡು ಅಂದ್‌ದ್ ಪ್ರಾರ್ಥನೆ ಮಲ್ತೊಂದುಪ್ಪುಲೆ.

²¹ಎನ ಸಂಗತಿಲೆನ್ಲಾ ಕೆಲಸ ಕಾರ್ಯೊಲೆನ್ಲಾ ನಿಕ್ಲೆಗ್ ಗೊತ್ತಾಪಿಲೆಕ್ಕ ಎನ ಪ್ರೀತಿದ ಸಹೋದ್ರೆಲಾ, ಕರ್ತವಡ್ ನಂಬಿಗಸ್ತೆ ಚಾಕ್ರಿದಾಕುಲುಲಾ ಆದುಪ್ಪು ತುಖಿಕೆ ನಿಕ್ಲೆಗ್ ಮಾತ ತೆರಿಪಾವೆ.

²²ನಿಕುಲು ಎಂಕುಲೆ ಸ್ಥಿತಿಗತಿನ್ ತೆರಿಯುಲೆಕ್ಕಲಾ ಆಯೆ ನಿಕ್ಲೆ ಉಡಲ್‌ನ್ ಉಮೇದ್ ಕೊರ್ಪಿಲೆಕ್ಕಲಾ ಯಾನ್ ಆಯನ್ ನಿಕ್ಲೆ ಕೈತಲ್‌ಗ್ ಕಡಪುಡ್ದೆ.

²³ಸಹೋದ್ರೆರೇ, ನಿಕ್ಲೆಡ್ ಸಮಾಧಾನ ಉಪ್ಪಡ್. ಅಮ್ಮೆ ಆದುಪ್ಪು ದೇವೆರ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆಲಾ ನಿಕ್ಲೆಗ್ ಪ್ರೀತಿನ್ಲಾ ಐತ ಒಟ್ಟುಗು ನಂಬೊಲ್ಕೆನ್ಲಾ ಕೊರಡ್.

²⁴ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ್ ಏಪಲಾ ಪ್ರೀತಿ ಮಲ್ಪುನಾಕುಲೆಗ್ ಮಾತೆರೆಗ್ ದೇವೆರೆ ದಯ ಉಪ್ಪಡ್. ಆಮೆನ್.