Read Tulu ಫಿಲಿಪ್ಪಿಯೆರೆಗ್ 4 Bible Online

ಫಿಲಿಪ್ಪಿಯೆರೆಗ್ 4 - Tulu bible

ಫಿಲಿಪ್ಪಿಯೆರೆಗ್ 4

¹ಅಂಚಾಯಿನೆಡ್ದ್ ಎನ ಪ್ರೀತಿದ ಇಷ್ಟೆರಾಯಿ ಸಹೋದ್ರೆರೇ, ಎಂಕ್ ಸಂತೋಷಲಾ ಜಯಮಾಲೆಲಾ ಆದುಪ್ಪುನಾಕುಲೇ, ಯಾನ್ ಪಂಡಿಲೆಕ್ಕ ಕರ್ತವಡ್ ದೃಢವಾದ್ ಉಂತುಲೆ.

²ಕರ್ತವಡ್ ಒಂಜೇ ಮನಸ್‌ದಾಕುಲು ಆದುಪ್ಪೊಡು ಅಂದ್‌ದ್ ಯುವೋದ್ಯಡಲಾ ಸಂತುಕೆಡಲಾ ನಟ್ಟೊನ್ವೆ.

³ಬೊಕ್ಕ ಎನ ನಿಜ ಜತೆಗಾರಾ, ಈ ರಡ್ಡ್ ಪೊಂಜೊವುಲೆಗ್ ಸಹಾಯ ಮಲ್ಪೊಡು ಅಂದ್‌ದ್ ನಿನನ್ಲಾ ಕೇನೊನ್ವೆ. ದಾಯೆಗಂದ್ಂಡ, ಬೇತೆಕ್ಲೆಗ್ ಸುವಾರ್ತೆ ತೆರಿಪಾವುನೆಟ್ ಅಕುಲು ಎನಡೊಪ್ಪ ಎಡ್ಡೆ ಬೇಲೆ ಮಲ್ತ್‌ದೆರ್. ಅಕುಲು ಕ್ಲೆಮೆಂತುಡೊಪ್ಪಲಾ ಎನ ಬೇತೆ ಜತೆಸೇವಕೆರೆಡೊಪ್ಪಲಾ ಎನ ಒಟ್ಟುಗು ಸುವಾರ್ತೆಗಾದ್ ಕಷ್ಟ ಬೈದೆರ್. ಅಕ್ಲೆನ ಮಾತೆರೆನ ಪುದರ್ ಜೀವಬಾಧ್ಯೆರೆ ಪುಸ್ತಕೊಡು ಬರೆದುಂಡು.

⁴ಕರ್ತವಡ್ ಏಪಲಾ ಸಂತೋಷ ಮಲ್ಪುಲೆ. ಕುಡ ಪನ್ಪೆ ಸಂತೋಷ ಮಲ್ಪುಲೆ.

⁵ನಿಕ್ಲೆ ಸಜ್ಜನಿಗೆ ಮಾತ ನರಮಾನಿಲೆಗ್ ತೋಜಿದ್ ಬರಡ್, ಕರ್ತವೆ ಬೇಗ ಬರೊಂದುಲ್ಲೆ.

⁶ವಾ ವಿಷಯೊಡ್ಲಾ ಚಿಂತೆ ಮಲ್ಪಂದೆ, ಮಾತ ಸಂಗತಿಡ್ ದೇವೆರೆನ ದುಂಬು ಉಪಕಾರ ಸ್ತುತಿನ್ಲಾ ಪ್ರಾರ್ಥನೆ ಅರಿಕೆಲೆನ್ಲಾ ಮಲ್ತೊಂದು, ನಿಕ್ಲೆಗ್ ಬೋಡಾಪಿನೆನ್ ತೆರಿಪಾಲೆ.

⁷ಅಪಗ ಮಾತ ಬುದ್ಧಿನ್ ಮೀರುನ ದೇವೆರೆ ಸಮಾಧಾನ ನಿಕ್ಲೆ ಉಡಲ್‌ನ್ಲಾ ನಿಕ್ಲೆ ಆಲೋಚನೆನ್ಲಾ ಕ್ರಿಸ್ತ ಯೇಸುಡು ಕಾತೊಂದುಪ್ಪುಂಡು.

⁸ಕಡೆಕ್ಕ್ ಸಹೋದ್ರೆರೇ, ಒವು ಮಾತ ಸತ್ಯದವು ಮಾರ್ಯಾದಿದವು ನೀತಿದವು, ನಿರ್ಮಲದವು ಪ್ರೀತಿದವು ಬೊಕ್ಕ ಮಾತೆರ್ ಮೆಚ್ಚುನವು ಆದುಂಡಾ ಒವು ಎಡ್ಡೆಂತಿನ ಆದುಂಡಾ ಬೊಕ್ಕ ಪುಗರಿಕೆಗ್ ಯೋಗ್ಯದವು ಆದುಂಡಾ ಅವೆನ್ ಮಾತ ನೆನೆಪುಗು ಕನಲೆ.

⁹ನಿಕುಲು ಎನಡ್ದ್ ಎಂಚಿನ ಕಲ್ತ್‌ದರಾ ಬೊಕ್ಕ ಒವೆನ್ ಎನಡ್ದ್ ಕೇಂಡ್ದ್ ತೂಯರಾ ಅವೆನೇ ಮಲ್ತೊಂದು ಬಲ್ಲೆ. ಇಂಚ ಮಲ್ತರ್ಡ ಸಮಾಧಾನದ ದೇವೆರ್ ನಿಕ್ಲೆಡೊಪ್ಪ ಉಪ್ಪುವೆ.

¹⁰ನಿಕುಲು ಎಂಕಾದ್ ಕುಡೊರ ಚಿಂತೆ ಮಲ್ತಿನೆಕ್ಕಾದ್ ಯಾನ್ ಕರ್ತವಡ್ ಏತೊಂಜಿ ಸಂತೋಷ ಮಲ್ಪುವೆ. ಎನ ಮಿತ್ತ್ ನಿಕ್ಲೆಗ್ ನಿಜಾದ್ ಚಿಂತೆ ಉಂಡು ಅಂದ್‌ದ್ ಎಂಕ್ ಗೊತ್ತಾಂಡ್; ಆಂಡ ಅವೆನ್ ತೋಜಾವೆರೆಗ್ ನಿಕ್ಲೆಗ್ ಅವಕಾಸ ಆದಿತ್ತಿಜಿ.

¹¹ಎಂಕ್ ಕೊರತೆ ಉಂಡು ಅಂದ್‌ದ್ ಉಂದೆನ್ ಪನ್ಪುಜಿ, ಮಾತ ಪರಿಸ್ಥಿತಿಡ್ಲಾ ಯಾನ್ ತೃಪ್ತಿಡುಪ್ಪೆರೆ ಕಲ್ತೊಂದೆ.

¹²ಬಡವೆ ಆದುಪ್ಪೆರೆಗ್ಲಾ ಸಿರಿತನತ ಸ್ಥಿತಿಟ್ಟುಪ್ಪೆರೆಗ್ಲಾ ಗೊತ್ತುಂಡು. ಯಾನ್ ತೃಪ್ತಿಡ್ ಇತ್ತ್ಂಡಲಾ ಬಡವುಡ್ ಇತ್ತ್ಂಡಲಾ ದಾರಾಳ ಇತ್ತಿನಾಯೆ ಆದಿತ್ತ್‌ಂಡಲಾ, ಗತಿದಾಂತಿನಾಯೆ ಆದಿತ್ತ್‌ಂಡಲಾ ವಾ ಸ್ಥಿತಿಟ್ಟುಪ್ಪುನಾಯೆ ಆದಿತ್ತ್‌ಂಡಲಾ ಐತ ಗುಟ್ಟು ಎಂಕ್ ತೆರಿದುಂಡು.

¹³ಎನನ್ ಬಲ ಪಡೆಪಾವು ಕ್ರಿಸ್ತಡ್ ಎಂಕ್ ಮಾತೆನ್ಲಾ ಮಲ್ಪೆರೆ ಸಾದ್ಯ ಉಂಡು.

¹⁴ಆಂಡಲಾ ಎನ ಇತ್ತೆದ ಕಷ್ಟೊಡು ನಿಕುಲು ಸಹಾಯ ಕೊರಿನವು ಎಡ್ಡೆನೇ ಆಂಡ್.

¹⁵ಉಂದತ್ತಂದೆ ಫಿಲಿಪ್ಪಿದಾಕುಲೇ, ನಿಕ್ಲೆಗ್ ಸುರುಕ್ಕು ಸುವಾರ್ತೆ ಸಾರಿದ್ ಬೊಕ್ಕ ಮಕೆದೋನ್ಯೊಗು ಪೋಯಿನಪಗ ಎಂಕ್ ಕಾಸ್‌ದ ಸಹಾಯ ಕೊರಿನಾಕುಲು ಫಿಲಿಪ್ಪಿ ಸಭೆತಾಕುಲು ಮಾತ್ರ, ಬೇತೆ ವಾ ಸಭೆಲಾ ಪಾಲ್‌ದಾರೆರ್ ಆದಿತ್ತಿಜೆರ್.

¹⁶ಯಾನ್ ಥೆಸ್ಸಲೋನಿಕೊಡುಪ್ಪುನಗ ನಿಕುಲು ಮಸ್ತ್ ಸರ್ತಿ ಅಗತ್ಯ ಇತ್ತಿನಪಗ ಎಂಕ್ ಸಹಾಯ ಕಡಪುಡ್ದರ್.

¹⁷ನಿಕ್ಲೆಡ್ದ್ ಎಂಕ್ ಸಹಾಯ ಬೋಡಂದ್‌ದ್ ಈ ಪಾತೆರ ಪನೊಂದಿಜ್ಜಿ. ಆಂಡ ನಿಕ್ಲೆ ಲೆಖ್ಖೊಗು ಬೂರು ಉಡಿಗೆರೆ ಹೆಚ್ಚಾವೊಡು ಅಂದ್‌ದ್ ಬಯಕುವೆ. ಇತ್ತೆ ಎಂಕ್ ಬೋಡಾಪಿನಾತ್ ಎನಡ ದಾರಾಳ ಆದುಂಡು.

¹⁸ಎಪಫ್ರೊದಿತನ ಕೈಟ್ ನಿಕುಲು ಕೊರ್ದು ಕಡಪುಡ್ದಿನವು ಎಂಕ್ ಬತ್ತ್‌ದ್ ಮುಟ್ಟುದುಂಡು ಅವು ಹೆಚ್ಚಿಗೆದವುಲಾ ಆದುಂಡು. ಅವು ದೇವೆರೆಗ್ ಮೆಚ್ಚಿಗೆದವುಲಾ ಕಮ್ಮೆನದವುಲಾ ಆದುಪ್ಪುನ ಇಷ್ಟ ಬಲಿನೇ ಆದುಂಡು.

¹⁹ದೇವೆರ್ ಕ್ರಿಸ್ತ ಯೇಸುಡು ನಂಕ್ ಕೊರ್ತಿನ ಮೈಮೆದ ಐಶ್ವರ್ಯೊಡು ತಕ್ಕ ಇತ್ತಿ ರೀತಿಡ್ ನಿಕ್ಲೆ ಮಾತ ಅಗತ್ಯೊನು ಬೋಡಿತ್ತಿಲೆಕ್ಕ ತೀರಿಸಾವೆ.

²⁰ನಮ ಅಮ್ಮೆ ಆದುಪ್ಪು ದೇವೆರೆಗ್ ಏನಿತ್ಯೇನಿಗ್ಲಾ ಮೈಮೆ ಆವಡ್, ಆಮೆನ್.

²¹ಕ್ರಿಸ್ತ ಯೇಸುಗು ಸೇರ್ದಿನ ಮಾತ ದೇವಜನೊಕುಲೆಗ್ ವಂದಿಪುಲೆ. ಎನಡೊಪ್ಪ ಉಪ್ಪುನ ಸಹೋದ್ರೆರ್‌ಲಾ ನಿಕ್ಲೆಗ್ ವಂದನೆ ತೆರಿಪಾದೆರ್

²²ಬೊಕ್ಕ ಬೇತೆ ಮಾತ ದೇವಜನೊಕುಲು ಮುಖ್ಯಾದ್ ಚಕ್ರವರ್ತಿನ ಇಲ್ಲಗ್ ಸೇರ್ದಿನಾಕುಲೆಡ್ದ್‌ಲಾ ನಿಕ್ಲೆಗ್ ವಂದನೆಲು.

²³ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ನಿಕ್ಲೆ ಆತ್ಮಡೊಪ್ಪ ಉಪ್ಪಡ್. ಆಮೆನ್.