Read Tulu ಕೊಲೊಸ್ಸಿಯೆರೆಗ್ 3 Bible Online

ಕೊಲೊಸ್ಸಿಯೆರೆಗ್ 3 - Tulu bible

ಕೊಲೊಸ್ಸಿಯೆರೆಗ್ 3

¹ನಿಕುಲು ಕ್ರಿಸ್ತಡ್ ಲಕ್ಕಾದಿನಾಕುಲಾದ್ ಉಪ್ಪುನೆಡ್ದ್, ನಿಕುಲು ಮಿತ್ತ್‌ದ ಸಂಗತಿಲೆಡ್ ಮನಸ್ ದೀಲೆ. ಅವುಲು ಕ್ರಿಸ್ತೆ ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಲ್ಲೆ.

²ಪರಲೋಕದ ಸಂಗತಿಲೆಡ್ ಮನಸ್ ದೀಲೆ. ಲೋಕದ ಸಂಗತಿಲೆಡ್ ಅತ್ತ್.

³ದಾಯೆಗಂದ್ಂಡ ನಿಕುಲು ಸೈತ್‌ದರ್. ಬೊಕ್ಕ ನಿಕ್ಲೆನ ಪೊಸ ಜೀವನ ಕ್ರಿಸ್ತಡೊಪ್ಪ ದೇವೆರೆಡ್ ಮದೆ ಆದುಂಡು.

⁴ನಂಕ್ ಜೀವಾದುಪ್ಪು ಕ್ರಿಸ್ತೆ ತೋಜಿದ್ ಬನ್ನಗ ನಿಕುಲುಲಾ ಆಯ ಒಟ್ಟುಗು ಆಯನ ಮೈಮೆಡ್ ದಿಂಜಿದಿನಾಕುಲಾದ್ ತೋಜಿದ್ ಬರ್ಪರ್.

⁵ಅಂಚಾಯಿನೆಡ್ದ್ ನಿಕ್ಲೆ ಉಡಲ್‌ಡುಪ್ಪು ಲೌಕೀಕ ಆಸೆಲೆನ್ ಕೆರ್ದ್ ಪಾಡ್ಲೆ. ಹಾದ್ರೊನು, ಬಂಡ್‌ತನೊನು, ಕಾಮೊನು, ಹಾಳ್ ಆಸೆನ್ ಬೊಕ್ಕ ಮೂರ್ತಿಪೂಜೆಗ್ ಸಮಾನಾದುಪ್ಪು ಕಾಸ್‌ದ ಆಸೆನ್ ಮಾತೆನ್ಲಾ ದೆತ್ತ್‌ದ್ ಪಾಡ್ಲೆ.

⁶ಉಂದೆಡ್ದಾದ್ ದೇವೆರೆ ಕೋಪ ನಂಬಂದಿನಾಕುಲೆ ಮಿತ್ತ್ ಬರ್ಪುಂಡು.

⁷ಸುರುಟ್ಟು ನಿಕುಲುಲಾ ಈ ಹಾಳ್ ಸ್ವಭಾವೊಡು ಬದುಕೊಂದುಪ್ಪುನಗ ಅಂಚಿನ ಕೆಲಸೊಲೆನ್ ಮಲ್ತೊಂದಿತ್ತರ್.

⁸ಆಂಡ ಇತ್ತೆ ಉಗ್ರ, ಕೋಪ, ದುಷ್ಟತನ, ದೂಷಣೆ, ನಿಕ್ಲೆ ಬಾಯಿಡ್ದ್ ಬರ್ಪಿ ಹಾಳ್ ಪಾತೆರ ಉಂದು ಮಾತೆನ್ ಬುಡ್ದು ಬುಡ್ಲೆ.

⁹ಒರಿ ಒರಿಯಗ್ ಸುಳ್ಳು ಪನಡೆ, ದಾಯೆಗಂದ್ಂಡ ನಿಕುಲು ನಿಕ್ಲೆಡುಪ್ಪು ಹಾಳ್ ಸ್ವಭಾವೊಲೆನ್ ದೆತ್ತ್‌ದ್ ಪಾಡ್ದ್ ಪೊಸ ಸ್ವಭಾವೊನು ಪಾಡೊಂದರತ್ತಾ?

¹⁰ಈ ಸ್ವಭಾವ ದೇವೆರೆಗ್ ಸರಿಯಾದ್ ಉಂಡು. ಆಯನ ಗೇನೊಡ್ದು ಬಲತೊಂದು ಬರ್ಪಿ ಪೊಸ ನರಮಾನಿನ ರೂಪೊನು ಪಾಡೊನ್ಲೆ.

¹¹ಉಂದೆನ್ ಪಾಡುನೆಡ್ದ್ ಗ್ರೀಕೆರ್, ಯೆಹೂದ್ಯೆರ್ ಇನ್ಪಿ ಭೇದ ಇಜ್ಜಿ; ಸುನ್ನತಿದಾಯೆ, ಸುನ್ನತಿ ಆವಂದಿನಾಯೆ ಇನ್ಪಿ ಭೇದಲಾ ಇಜ್ಜಿ; ನಾಗರಿಕ ಅನಾಗರಿಕ ಇನ್ಪಿ ಭೇದಲಾ ಇಜ್ಜಿ; ಗುಲಾಮೆ, ಸ್ವತಂತ್ರದಾಯೆ ಇನ್ಪಿ ಭೇದಲಾ ಇಜ್ಜಿ. ಆಂಡ ಕ್ರಿಸ್ತೆ ಮಾತೆರೆಡ್ಲಾ ಮಾತಲಾ ಆದುಲ್ಲೆ.

¹²ಅಂಚಾಯಿನೆಡ್ದ್ ನಿಕುಲು ದೇವೆರೆಡ್ದ್ ಅಜತ್‌ದ್ ದೆತ್ತೊಂಡಿನಾಕುಲಾದ್ ಪರಿಶುದ್ಧೆರ್ಲಾ ಪ್ರೀತಿದಾಕುಲುಲಾ ಆದುಪ್ಪುನೆಡ್ದಾವರ ಕನಿಕರ, ದಯ, ತಗ್ಗ್‌ದಿ ಮನಸ್, ಸಜ್ಜನಿಗೆ, ತಾಳ್ಮೆ ಇನ್ಪಿ ಸದ್ಗುಣಲೆನ್ ಪಾಡೊನ್ಲೆ.

¹³ಬೊಕ್ಕೊರಿಯನ ಮಿತ್ತ್ ತಪ್ಪು ಪಾಡಿಯೆರೆ ಕಾರಣ ಇತ್ತ್ಂಡಲಾ ತಪ್ಪು ಪಾಡಂದೆ ಒರಿಯನ್ ಒರಿ ಸೈಸೊಂದು ಮಾಪು ಮಲ್ಪುಲೆ. ಕರ್ತವೆ ನಿಕ್ಲೆನ್ ಮಾಪು ಮಲ್ತಿ ಲೆಕ್ಕನೇ ನಿಕುಲುಲಾ ಮಾಪು ಮಲ್ಪುಲೆ.

¹⁴ಉಂದು ಮಾತೆತ್ತ ಮಿತ್ತ್ ಪ್ರೀತಿನ್ ಪೊದೆತೊನ್ಲೆ; ಅವು ಮಾತೆನ್ಲಾ ಪೂರ್ತಿ ಮಲ್ಪುನ ಕಟ್ಟ್ ಆದುಂಡು.

¹⁵ಬೊಕ್ಕ ಕ್ರಿಸ್ತಡ್ದ್ ಬರ್ಪಿನ ಸಮಾಧಾನ ನಿಕ್ಲೆ ಉಡಲ್‌ನ್ ಆಳಡ್. ನಿಕುಲು ಒಂಜೇ ಶರೀರೊಗು ಸೇರ್ದಿನಾಕುಲಾದುಪ್ಪುನೆಡ್ದ್ ಸಮಾಧಾನೊಡು ಬದುಕುನೆಕ್ಕಾದ್ ಲೆಪ್ಪು ಇತ್ತಿನಾಕುಲಾದುಲ್ಲರ್. ಉಂದತ್ತಂದೆ ಉಪಕಾರ ಎನ್ನುನಾಕುಲಾದುಪ್ಪುಲೆ.

¹⁶ಕ್ರಿಸ್ತನ ಪಾತೆರ ನಿಕ್ಲೆಡ್ ದಿಂಜಿದ್ ಉಪ್ಪಡ್. ಆಯೆ ಕೊರ್ಪಿನ ಮಾತ ಗೇನೊಡ್ದಾದ್ ಒರಿಯಡೊರಿ ಬೋಧನೆ ಮಲ್ಪುಲೆ, ಬುದ್ಧಿ ಪನೊಂದುಪ್ಪುಲೆ. ಕೀರ್ತನೆ, ರಾಗ, ಆತ್ಮಭಾವದ ಪದ ಮಲ್ತೊಂದು ಉಪಕಾರ ದಿಂಜಿದಿ ಉಡಲ್‌ಡ್ದ್ ದೇವೆರೆಗ್ ರಾಗ ಮಲ್ಪುಲೆ.

¹⁷ಬೊಕ್ಕ ನಿಕುಲು ಬಾಯಿದ ಪಾತೆರೊಡಾವಡ್ ನಡಾವಳಿಕೆಡಾವಡ್ ಎಂಚಿನ ಮಲ್ತರ್ಡಲಾ ಮಾತೆನ್ಲಾ ಕರ್ತವೆ ಆದುಪ್ಪು ಯೇಸುನ ಪುದರ್‌ಡೇ ಮಲ್ಪುಲೆ. ಆಯಡ್ದ್ ಅಮ್ಮೆ ಆದುಪ್ಪು ದೇವೆರೆಗ್ ಉಪಕಾರ ಸ್ತುತಿ ಸಂದಾಲೆ.

¹⁸ಬೊಡೆದಿಯಾಡ್ಲೇ, ನಿಕ್ಲೆ ಕಂಡನಿಯಾಡ್ಲೆಗ್ ವಶ ಆದುಪ್ಪುಲೆ. ಉಂದು ಕರ್ತವಗ್ ಸೇರ್ದಿನಾಕುಲೆಗ್ ಯೋಗ್ಯಾದುಂಡು.

¹⁹ಕಂಡನಿಯಾಡ್ಲೇ, ನಿಕ್ಲೆ ಬೊಡೆದಿಯಾಡ್ಲೆನ್ ಪ್ರೀತಿ ಮಲ್ಪುಲೆ; ಅಕ್ಲೆಗ್ ಕೈಪೆ ಆದುಪ್ಪಡೆ.

²⁰ಜೋಕುಲೇ, ಮಾತ ವಿಚಾರೊಡು ನಿಕ್ಲೆನ ಅಪ್ಪೆಅಮ್ಮಾಡ್ಲೆಗ್ ಒಳಗಾದುಪ್ಪುಲೆ. ಉಂದು ಕರ್ತವಗ್ ಮೆಚ್ಚಿಗೆದವು ಆದುಂಡು.

²¹ಅಪ್ಪೆಅಮ್ಮಾಡ್ಲೇ, ನಿಕ್ಲೆ ಜೋಕುಲೆನ್ ಕೋಪ ಲಕ್ಕಾವಡೆ; ಇಜ್ಜಾಂಡ ಅಕುಲು ಕುಗ್ಗುದು ಪೋವೆರ್.

²²ದಾಸೆರೇ, ನಿಕುಲು ಲೋಕದ ಯಜಮಾನೆರೆಗ್ ಮಾತೆಟ್ಟ್ ತಗ್ಗ್‌ದ್ ನಡಪುಲೆ. ನರಮಾನಿಲೆನ್ ಮೆಚ್ಚಾವುನಾಕುಲು ಮಲ್ಪುಲೆಕ್ಕ ನಿಕ್ಲೆ ಯಜಮಾನ್ಯೆರ್ ತೂವೊಂದುಪ್ಪುನಗ ಮಾತ್ರ ಚಾಕ್ರಿ ಮಲ್ಪಂದೆ ಕರ್ತವಗ್ ಪೋಡಿಯುನಾಕುಲಾದ್ ಸಜ್ಜನಿಗೆದ ಉಡಲ್‌ಡ್ದ್ ಚಾಕ್ರಿ ಮಲ್ಪುಲೆ.

²³ನಿಕುಲು ವಾ ಬೇಲೆ ಮಲ್ತ್ಂಡಲಾ ಅವೆನ್ ನರಮಾನಿಲೆಗಾದ್ ಅತ್ತ್, ಕರ್ತವಗಾದೇ ಮಲ್ತೊಂದುಲ್ಲ ಅಂದ್‌ದ್ ಮನಸ್ ದೀದ್ ಮಲ್ಪುಲೆ.

²⁴ಕರ್ತವೆ ನಿಕ್ಲೆಗ್ ಬಾಧ್ಯಸ್ತಿಗೆನ್ ಉಡಿಗೆರೆ ಆದ್ ಕೊರ್ಪೆ ಇನ್ಪಿನೆನ್ ಎನ್ನೊನ್ಲೆ. ನಿಕುಲು ಕರ್ತವೆ ಆದುಪ್ಪು ಕ್ರಿಸ್ತಗೇ ಚಾಕ್ರಿದಾಕುಲಾದುಲ್ಲರ್.

²⁵ಆಂಡ ನಿಕುಲು ಅನ್ಯಾಯ ಮಲ್ತರ್ಡ, ಆ ಅನ್ಯಾಯೊಗು ತಕ್ಕ ಪ್ರತಿಫಲ ತಿಕ್ಕು. ದೇವೆರೆಡ ಪಕ್ಷಪಾತ ಇಜ್ಜಿ.