Read Tulu ಕೊಲೊಸ್ಸಿಯೆರೆಗ್ 4 Bible Online

ಕೊಲೊಸ್ಸಿಯೆರೆಗ್ 4 - Tulu bible

ಕೊಲೊಸ್ಸಿಯೆರೆಗ್ 4

¹ಯಜಮಾನೆರೇ, ನಿಕ್ಲೆಗ್ಲಾ ಪರಲೋಕೊಡು ಒರಿ ಯಜಮಾನೆ ಉಲ್ಲೆ ಇನ್ಪಿನೆನ್ ತೆರಿಯೊಂದು ನಿಕ್ಲೆ ಚಾಕ್ರಿದಾಕುಲೆಗ್ ನ್ಯಾಯವಾಯಿನೆನ್ಲಾ ಎಡ್ಡೆಂತಿನೆನ್ಲಾ ಮಲ್ಪುಲೆ.

²ಪ್ರಾರ್ಥನೆಡ್ ನಿಲೆ ಆದಿತ್ತ್‌ದ್ ಉಪಕಾರ ಸ್ತುತಿ ಮಲ್ತ್‌ದ್ ಎಚ್ಚರಿಕೆ ಆದುಪ್ಪುಲೆ.

³ಉಂದತ್ತಂದೆ ಎಂಕುಲೆಗಾದ್‌ಲಾ ಪ್ರಾರ್ಥನೆ ಮಲ್ಪುಲೆ. ಕ್ರಿಸ್ತ ವಿಚಾರೊಡು ದೇವೆರ್ ತೆರಿಪಾದಿನ ಸತ್ಯಾರ್ಥೊನು ಸಾರಿದ್ ತೆರಿಪಾವೆರೆ ಅನುಕೂಲದ ಸಂದರ್ಭೊನು ಎಂಕ್ಲೆಗ್ ಒದಗಾದ್ ಕೊರ್ಪಿಲೆಕ್ಕಲಾ, ಅವೆನ್ ಪನೊಡಾಯಿ ರೀತಿಡ್ ಪನ್ಪಿಲೆಕ್ಕಲಾ ಸಹಾಯ ಮಲ್ಪೊಡು ಅಂದ್‌ದ್ ನಟ್ಟೊನ್ಲೆ. ಆ ಸತ್ಯೊಗಾದ್ರನೇ ಯಾನ್ ಇತ್ತೆ ಸೆರೆಮನೆಟ್ ಉಲ್ಲೆ.

⁵ಸಮಯೊನು ಪೊಕ್ಕಡೆ ಕಳೆವಂದೆ ತಿಕ್ಕುನ ಪ್ರತಿಯೊಂಜಿ ಗಳಿಗೆನ್ಲಾ ಎಡ್ಡೆ ರೀತಿಡ್ ಉಪಯೋಗ ಮಲ್ತೊನ್ಲೆ. ಪಿದಯಿದಾಕುಲೆ ಎದುರು ಬುದ್ಧಿವಂತೆರಾದ್ ನಡಪುಲೆ.

⁶ನಿಕ್ಲೆನ ಪಾತೆರಕತೆ ಏಪಲಾ ದಯತವುಲಾ ರುಚಿ ಆದುಪ್ಪುನವುಲಾ ಆದುಪ್ಪಡ್. ಇಂಚ ನಿಕುಲು ಏರೇರೆಗ್ ಎಂಚ ಉತ್ತರ ಕೊರೊಡು ಅವೆನ್ ತೆರಿಯೊನ್ವರ್.

⁷ಪ್ರೀತಿದ ಸಹೋದ್ರೆಲಾ, ನಂಬಿಗಸ್ತೆ ಸೇವಕೆಲಾ, ಕರ್ತವಡ್ ಎನಡೊಪ್ಪ ಜತೆಸೇವಕೆಲಾ ಆದುಪ್ಪು ತುಖಿಕೆ ಎನ ಸಂಗತಿಲೆನ್ ನಿಕ್ಲೆಗ್ ತೆರಿಪಾವೆ.

⁸ನಿಕುಲು ಎನ ಸ್ಥಿತಿಗತಿನ್ ತೆರಿಯುಲೆಕ್ಕಲಾ ಆಯೆ ನಿಕ್ಲೆ ಉಡಲ್‌ನ್ ಉಮೇದ್ ಕೊರ್ಪಿಲೆಕ್ಕಲಾ

⁹ಯಾನ್ ಆಯನ್ ನಂಬಿಕೆ ಇತ್ತಿ ಪ್ರೀತಿದ ಸಹೋದರೆ ಆಯಿ ನಿಕ್ಲೆನ ಊರುದ ಒನೇಸಿಮಡೊಪ್ಪ ಕಡಪುಡ್ವೆ. ಅಕುಲು ಮೂಲು ಆಪಿನ ಸಂಗತಿಲೆನ್ ನಿಕ್ಲೆಗ್ ತೆರಿಪಾವೆರ್.

¹⁰ಎನಡೊಪ್ಪ ಸೆರೆಟುಪ್ಪುನ ಅರಿಸ್ತಾರ್ಕೆಲಾ ಅಂಚೆನೇ ಬಾರ್ನಬನ ಸಹೋದರೆ ಮಾರ್ಕೆಲಾ ತನ್ಕುಲೆ ವಂದನೆಲೆನ್ ತೆರಿಪಾದೆರ್. ಮಾರ್ಕನ ಸಂಗತಿಡ್ ನಿಕ್ಲೆಗ್ ಅಪ್ಪಣೆ ತಿಕ್ಕ್‌ದ್ಂಡತ್ತಾ. ಆಯೆ ನಿಕ್ಲೆ ಕೈತಲ್‌ ಬತ್ತೆಡ ಸೇರಾವೊನ್ಲೆ.

¹¹ಎಂಕುಲು ಯುಸ್ತೆ ಅಂದ್‌ದ್ ಲೆಪ್ಪುನ ಯೇಸುಲಾ ತನ ವಂದನೆ ತೆರಿಪಾದೆ. ಸುನ್ನತಿದಾಕುಲೆಡ್ ಮೊಕುಲು ಮಾತ್ರ ದೇವೆರೆ ರಾಜ್ಯೊಗಾದ್ ಎನ ಜತೆಸೇವಕೆರ್ ಆದುಲ್ಲೆರ್. ಮೊಕ್ಲೆಡ್ದ್ ಎಂಕ್ ದಿಂಜ ಆಧರಣೆ ಉಂಡಾಂಡ್.

¹²ಕ್ರಿಸ್ತ ಯೇಸುನ ಸೇವಕೆ ಆಯಿ ನಿಕ್ಲೆ ಊರುದಾಯೆ ಎಪಫ್ರೆ ತನ ವಂದನೆಲೆನ್ ತೆರಿಪಾದೆ. ಆಯೆ ಪ್ರಾರ್ಥನೆ ಮಲ್ತೊಂದುಪ್ಪುನಗ ನಿಕ್ಲೆಗ್ ಬೋಡಾದ್ ಹೋರಾಟ ಮಲ್ತೊಂದು ನಿಕುಲು ತಿಳುವಳಿಕೆ ಇತ್ತಿನಕುಲಾದ್ ಮಾತೆಟ್ಟ್ ದೇವೆರೆ ಚಿತ್ತೊಗು ಒಳಗಾದ್ ದೃಢ ನಿಚ್ಚಯೊಡು ನಿಲೆ ಆಪಿಲೆಕ್ಕ ಆಸಕ್ತಿಡ್ ನಟ್ಟೊಂದುಲ್ಲೆ.

¹³ಆಯೆ ನಿಕ್ಲೆಗಾದ್‌ಲಾ ಲವೊದಿಕೀಯೊಡು ಅಂಚೆನೆ, ಹಿರಾಪೊಲಿಯೊಡು ಜನೊಕುಲೆಗಾದ್‌ಲಾ ದಿಂಜ ಕಷ್ಟ ದೆತ್ತೊನ್ವೆ ಅಂದ್‌ದ್ ಯಾನ್ ಸಾಕ್ಷಿ ಪನ್ಪೆ.

¹⁴ಪ್ರೀತಿದ ವೈದ್ಯೆ ಆಯಿ ಲೂಕೆಲಾ ದೇಮೆಲಾ ನಿಕ್ಲೆಗ್ ತನ್ಕುಲೆ ವಂದನೆಲೆನ್ ತೆರಿಪಾದೆರ್.

¹⁵ಲವೊದಿಕೀಯೊಡುಪ್ಪು ಎಂಕುಲೆ ಸಹೋದ್ರರೆಗ್ಲಾ, ನುಂಫಗ್ಲಾ, ಆಲೆನ ಇಲ್ಲಡ್ ಕೂಡ್ದು ಬರ್ಪಿನ ಸಭೆತಾಕುಲೆಗ್ಲಾ ಎನ ವಂದನೆಲೆನ್ ತೆರಿಪಾಲೆ.

¹⁶ನಿಕುಲು ಈ ಪತ್ರಿಕೆನ್ ಓದುದು ಆಯಿ ಬೊಕ್ಕ ಲವೊದಿಕೀಯದ ಸಭೆತಾಕುಲೆಗ್ಲಾ ಅವೆನ್ ಓದುಲೆಕ್ಕ ಮಲ್ಪುಲೆ. ಬೊಕ್ಕ ಯಾನ್ ಅಕ್ಲೆಗ್ ಬರೆತಿ ಪತ್ರಿಕೆನ್ ನಿಕುಲುಲಾ ಓದುಲೆ.

¹⁷ಬೊಕ್ಕ ಅರ್ಖಿಪ್ಪಗ್, ಈ ಕರ್ತವಡ್ ಪಡೆಯಿನ ಸೇವೆನ್ ಎಚ್ಚರಿಕೆಡಿತ್ತ್‌ದ್ ತೀರಿಸಾವೆರೆ ಪನ್ಲೆ.

¹⁸ಉಂದು ಪೌಲು ಇನ್ಪಿ ಯಾನ್ ಎನ ಸ್ವಂತ ಕೈಟ್ ವಂದನೆಲೆನ್ ಬರೆತೆ. ಯಾನ್ ಸೆರೆಮನೆಟ್ ಉಲ್ಲೆ ಇನ್ಪಿನೆನ್ ನೆನೆಪು ಮಲ್ತೊಂದುಪ್ಪುಲೆ. ದೇವೆರೆನ ದಯ ನಿಕ್ಲೆಡೊಪ್ಪ ಉಪ್ಪಡ್.