Read Tulu 1 ಥೆಸಲೋನಿಕೆರೆಗ್‌ 2 Bible Online

1 ಥೆಸಲೋನಿಕೆರೆಗ್‌ 2 - Tulu bible

1 ಥೆಸಲೋನಿಕೆರೆಗ್‌ 2

¹ಸಹೋದ್ರೆರೇ, ಎಂಕುಲು ಪೊಕ್ಕಡೆ ನಿಕ್ಲೆ ಕೈತಲ್‌ ಬೈದಿಜ ಇನ್ಪಿನೆನ್ ನಿಕುಲು ತೆರಿದರ್.

²ಎಂಕುಲು ದೇವೆರೆ ಬೇಲೆ ಮಲ್ಪೆರೆ ಥೆಸ್ಸಲೋನಿಕಗ್ ಬರ್ಪಿನೆಕ್ಕ್ ದುಂಬು, ಫಿಲಿಪ್ಪಿ ಪಟ್ಟಣೊಡು ಭಂಗ ಬೊಕ್ಕ ಅವಮಾನ ಆತಿನವು ನಿಕ್ಲೆಗ್ ತೆರಿದೇ ಉಂಡು. ಮಸ್ತ್ ವಿರೋಧ ಇತ್ತ್ಂಡಲಾ ದೇವೆರ್ ಎಂಕ್ಲೆಗ್ ಬಲ ಕೊರಿನೆಡ್ದ್ ನಿಕ್ಲೆಗ್ ಧೈರ್ಯೊಡು ಸುವಾರ್ತೆ ತೆರಿಪಾಯ.

³ಐಡ್ದಾವರ ಎಂಕ್ಲೆನ ಬೋಧನೆ ಕಪಟದವುಲಾ ಅತ್ತ್, ಅಶುದ್ಧವಾಯಿನವುಲಾ ಅತ್ತ್, ಮೋಸದವುಲಾ ಅತ್ತ್,

⁴ಆಂಡ ದೇವೆರ್ ಎಂಕ್ಲೆನ್ ತಕ್ಕದಾಕುಲು ಪಂಡ್ದ್, ಈ ಸುವಾರ್ತೆ ಎಂಕ್ಲೆನ ವಶೊಕ್ಕು ಕೊರಿಯೆ. ಎಂಕುಲು ನರಮಾನಿರೆನ್ ಮೆಚ್ಚಾವಂದೆ ಉಡಲ್‌ನ್ ಪರೀಕ್ಷೆ ಮಲ್ಪುನ ದೇವೆರೆನ್ ಮೆಚ್ಚಾವೊಡು ಅಂದ್‌ದ್ ಪಾತೆರೊಂದುಲ್ಲ.

⁵ಉಂದು ನಿಕ್ಲೆಗ್ ಸರಿಯಾದ್ ತೆರಿದುಪ್ಪುಲೆಕ್ಕ ಎಂಕ್ಲೆನ ಈ ಬೋಧನೆ ಕಾಲಿ ಬಡಾಯಿ ಕೊಚ್ಚುನ ಪಾತೆರೊಲೆಡ್ದ್‌ಲಾ ಕಾಸ್‌ದ ಆಸೆಗ್ ಬೋಡಾದ್ ವೇಷ ಪಾಡೊಂದುಲಾ ಬೈದಿನಿ ಅತ್ತ್, ಉಂದೆಕ್ಕ್ ದೇವೆರೇ ಸಾಕ್ಷಿ.

⁶ಉಂದತ್ತಂದೆ ಎಂಕುಲು ಕ್ರಿಸ್ತನ ಅಪೊಸ್ತಲೆರಾದುಪ್ಪುನೆಡ್ಡ್ ಎಂಕ್ಲೆಗ್ ಮರ್ಯಾದಿ ಕೊರೊಡು ಅಂದ್‌ದ್ ಪನೊಲಿಯಾಂಡಲಾ ನರಮಾನಿಲೆಡ್ದ್ ಬರ್ಪಿ ಮೈಮೆನ್ ನಿಕ್ಲೆಡ್ದಾವಡ್, ಬೇತೆಕ್ಲೆಡ್ದಾವಡ್ ಆಸೆ ಮಲ್ಪುನಾಕುಲು ಆದಿಜ್ಜ. ಆಂಡ ಅಪ್ಪೆ ತನ ಜೋಕುಲೆನ್ ತಾಂಕುಲೆಕ್ಕನೇ ಎಂಕುಲು ನಿಕ್ಲೆ ನಡುಟು ಸಮಾಧಾನಿಲಾದ್ ಇತ್ತ.

⁸ನಿಕುಲು ಎಂಕ್ಲೆಗ್ ಬಾರಿ ಪ್ರೀತಿದಾಕುಲು ಆದಿತ್ತಿನೆಡ್ದಾವರ ಎಂಕುಲು ನಿಕ್ಲೆಗ್ ಪ್ರೀತಿಡ್ ದೇವೆರೆನ ಸುವಾರ್ತೆ ಪನಿಯೆರೆ ಮಾತ್ರತ್ತಂದೆ ನಿಕ್ಲೆಗಾದ್ ಎಂಕ್ಲೆನ ಇಡೀ ಪ್ರಾಣೊನೇ ಕೊರಿಯೆರೆ ತಯಾರಾದಿತ್ತ.

⁹ಸಹೋದ್ರೆರೇ, ಎಂಕುಲು ನಿಕ್ಲೆಡ್ ಏರೆಗ್ಲಾ ದುನ್ನ ಆವಂದಿಲೆಕ್ಕ ರಾತ್ರೆ ಪಗೆಲ್ ಬೆಂದ್‌ದ್ ಜೀವನ ಮಲ್ತೊಂದು, ದೇವೆರೆ ಸುವಾರ್ತೆ ನಿಕ್ಲೆಗ್ ಸಾರಿಯ. ಎಂಕ್ಲೆನ ಭಂಗಲಾ ಪ್ರಯಾಸಲಾ ನಿಕುಲು ನೆನೆಪು ಮಲ್ತೊಂದುಪ್ಪರ್.

¹⁰ನಂಬುನಾಕುಲಾಯಿ ನಿಕ್ಲೆಡ್ ಎಂಕುಲು ಎಂಚ ಭಕ್ತಿಡ್ ನೀತಿವಂತೆರಾದ್, ತಪ್ಪುದಾಂತೆ ಇತ್ತ ಇನ್ಪಿನೆಕ್ಕ್ ನಿಕುಲುಲಾ ದೇವೆರ್‌ಲಾ ಸಾಕ್ಷಿ.

¹¹ಅಮ್ಮೆ ತನ ಜೋಕುಲೆಗ್ ಬುದ್ಧಿ ಪಂಡಿಲೆಕ್ಕನೇ ಎಂಕುಲುಲಾ ನಿಕ್ಲೆಗ್ ಬುದ್ಧಿ ಪನೊಂದು ಧೈರ್ಯ ಕೊರೊಂದುಲ್ಲ.

¹²ನಿಕ್ಲೆನ್ ತನ ರಾಜ್ಯೊಗ್ಲಾ ಮೈಮೆಗ್ಲಾ ಪಾಲ್‌ದಾರೆರ್ ಆಯೆರೆ ಲೆತ್ತಿ ದೇವೆರೆಗ್ ಯೋಗ್ಯಾದ್ ನಡತೊನೊಡು ಅಂದ್‌ದ್ ಕಂಡಿತಾದ್ ಪನ್ಪಿನೆನ್ ನಿಕುಲು ತೆರಿದುಲ್ಲರ್.

¹³ಎಂಕುಲು ದೇವೆರೆನ್ ಏಪಲಾ ಪುಗರೊಂದುಲ್ಲ ದಾಯೆಗ್ ಪಂಡ ನಿಕುಲು ದೇವೆರೆನ ಪಾತೆರೊನು ಎಂಕ್ಲೆಡ್ದ್ ಕೇಂಡ್ದ್, ಅವೆನ್ ನರಮಾನಿಲೆ ಪಾತೆರೊಲು ಅತ್ತ್; ಉಂದು ಕಂಡಿತಾದ್ ದೇವೆರೆ ಪಾತೆರೊಲೆ ಅಂದ್‌ದ್ ನಂಬಿನೆಡ್ದಾವರ ನಿಕ್ಲೆ ಉಲಯಿ ಎಡ್ಡೆ ಕೆಲಸೊಲು ನಡತೊಂದುಂಡು.

¹⁴ಅಂದ್, ಸಹೋದ್ರರೆ, ಯೂದಾಯೊಡು ದೇವೆರೆ ಸಭೆತಾಕುಲು ಕ್ರಿಸ್ತ ಯೇಸುಡು ಇತ್ತ್‌ದ್ ಯೆಹೂದ್ಯೆರೆಡ್ದ್ ಭಂಗೊಲೆನ್ ಅನುಭವ ಮಲ್ತೆರ್ ಅಂಚೆನೇ ನಿಕುಲುಲಾ ನಿಕ್ಲೆನ ಸ್ವಂತ ಜನೊಕುಲೆಡ್ದ್ ಭಂಗೊಲೆನ್ ಅನುಭವ ಮಲ್ತರ್.

¹⁵ಆ ಯೆಹೂದ್ಯೆರ್ ಕರ್ತವೆ ಆದುಪ್ಪು ಯೇಸುನ್ಲಾ ಪ್ರವಾದಿಲೆನ್ಲಾ ಕೆರಿಯೆರ್, ಎಂಕ್ಲೆನ್ಲಾ ಗಿಡ್ತ್ ಬುಡಿಯೆರ್. ಅಕುಲು ದೇವೆರೆನ್ ಮೆಚ್ಚಂದಿನಾಕುಲು, ಮಾತ ನರಮಾನಿಲೆಗ್ಲಾ ವಿರೋಧಿಲು ಆದುಲ್ಲೆರ್.

¹⁶ಪಿದಯಿದ ಜನೊಕುಲೆಗ್ ರಕ್ಷಣೆ ಆಪಿನ ಸುವಾರ್ತೆ ಪನಿಯೆರೆ ಬಲ್ಲಿ ಅಂದ್‌ದ್ ಎಂಕ್ಲೆಗ್ ಮಸ್ತ್ ಅಡ್ಡಿ ಮಲ್ಪುವೆರ್, ಇಂಚ ಅಕುಲು ಅಕ್ಲೆನ ಪಾಪ ಕೃತ್ಯೊಲೆನ್ ಹೆಚ್ಚ್ ಮಲ್ತೊಂದೇ ಪೋಪೆರ್. ಅಂಚಾಯಿನೆಡ್ದ್ ದೇವೆರೆನ ಕೋಪ ಕಡೆಕ್ಕ್ ಅಕ್ಲೆನ ಮಿತ್ತ್ ಬೈದ್‌ಂಡ್.

¹⁷ಸಹೋದ್ರೆರೇ, ಎಂಕುಲಾಂಡಲಾ ಶರೀರೊಡು ಒಂತೆ ಸಮಯ ದೂರ ಆದಿತ್ತ್‌ಂಡಲಾ, ಉಡಲ್‌ಡ್ ಒಂಜಾದುಲ್ಲ. ನಿಕ್ಲೆನ್ ತೂವೊಡು ಪನ್ಪಿ ಆಸೆಡ್ ದಿಂಜ ಪ್ರಯಾಸಲಾ ಮಲ್ತ.

¹⁸ದಾಯೆಗಂದ್ಂಡ, ನಿಕ್ಲೆನ ಕೈತಲ್‌ ಬರಿಯೆರೆ ಎಂಕ್ಲೆಗ್ ಮನಸಿತ್ತ್‌ಂಡ್. ಪೌಲು ಆಯಿ ಯಾನ್ ಒಂಜಿ ರಡ್ಡ್ ಸರ್ತಿ ನಿಕ್ಲೆ ಕೈತಲ್‌ ಬರೊಡೇ ಅಂದ್‌ದ್ ಎನ್ನೊಂದಿತ್ತೆ. ಆಂಡ ಸೈತಾನೆ ಎಂಕ್ಲೆಗ್ ಅಡ್ಡಿ ಮಲ್ತೆ.

¹⁹ನಮ ಕರ್ತವೆ ಆದುಪ್ಪು ಯೇಸು ತೋಜಿದ್ ಬನ್ನಗ, ಆಯನ ದುಂಬು ಎಂಕ್ಲೆನ ಭರವಸಲಾ, ಸಂತೋಷಲಾ, ಪುಗರಿಗೆದ ಕಿರೀಟಲಾ ಏರ್? ಅವು ನಿಕುಲೇ ಅತ್ತಾ.

²⁰ನಿಜಾದ್‌ಲಾ ನಿಕುಲೇ ಎಂಕ್ಲೆನ ಗೌರವಲಾ, ಸಂತೋಷಲಾ ಆದುಲ್ಲರ್.