Read Tulu 1 ಥೆಸಲೋನಿಕೆರೆಗ್‌ 4 Bible Online

1 ಥೆಸಲೋನಿಕೆರೆಗ್‌ 4 - Tulu bible

1 ಥೆಸಲೋನಿಕೆರೆಗ್‌ 4

¹ಕಡೆಕ್ಕ್ ಸಹೋದ್ರೆರೇ, ದೇವೆರೆಗ್ ಮೆಚ್ಚಿಗೆ ಆಪಿನ ಜೀವನ ಎಂಚ ಮಲ್ಪೊಡಂದ್‌ದ್ ಎಂಕ್ಲೆಡ್ದ್ ಕಲ್ತೊಂಡರ್. ಅಂಚೆನೇ ನಡತೊಂದುಲ್ಲರ್; ನನಲಾ, ಹೆಚ್ಚೆಚ್ಚಾದ್ ನಡಪುಡೊಡು ಅಂದ್‌ದ್ ಎಂಕುಲು ಕರ್ತವೆ ಆದುಪ್ಪು ಯೇಸುಡ ನಟ್ಟೊಂದು ಬುದ್ಧಿ ಪನ್ಪ.

²ಅಂಚೆನೇ ಎಂಕುಲು ಕರ್ತವೆ ಆದುಪ್ಪು ಯೇಸುನ ಅಧಿಕಾರೊಡು ನಿಕ್ಲೆಗ್ ಕೊರ್ತಿನ ಅಪ್ಪಣೆಲೆನ್ ನಿಕುಲು ತೆರಿದರತ್ತಾ.

³ದೇವೆರೆನ ಚಿತ್ತ ನಿಕುಲು ಪರಿಶುದ್ಧೆರಾದ್ ಉಪ್ಪೊಡು ಪಂಡ್ದೇ. ಅಂಚಾಯಿನೆಡ್ದ್ ನಿಕುಲು ಹಾದ್ರೊಗು ದೂರ ಆದುಪ್ಪೊಡು.

⁴ದೇವೆರೆನ್ ತೆರಿಯಂದಿನ ಪಿದಯಿದ ಜನೊಕುಲೆ ಲೆಕ್ಕ ಕಾಮದಾಶೆಗ್ ಒಳಗಾವೆರೆ ಬಲ್ಲಿ. ಪ್ರತಿ ಒರಿಲಾ ಮದ್ಮೆ ಆದ್ ಬೊಡೆದಿ ಒಟ್ಟುಗು ಪರಿಶುದ್ಧತೆಡ್ಲಾ ಮರ್ಯಾದಿಡ್ಲಾ ಉಪ್ಪೊಡು.

⁶ಈ ವಿಷಯೊಲೆಡ್ ನಿಕ್ಲೆಡ್ ಏರ್ಲಾ ತನ ಸಹೋದ್ರನ್ ಮೋಸ ಮಲ್ತ್‌ದ್ ಆಯಗ್ ಪಗೆ ಮಲ್ಪೆರೆ ಬಲ್ಲಿ. ಎಂಕುಲು ದುಂಬೇ ನಿಕ್ಲೆಗ್ ಎಚ್ಚರಿಕೆ ಕೊರ್ತಿನಂಚೆನೇ ಕುಡಲಾ ಪನ್ಪ, ಇಂಚಿತ್ತಿ ಪಾಪ ಕೃತ್ಯೊಲೆನ್ ಮಲ್ತಿನಾಕುಲೆಗ್ ಕರ್ತವೆ ಪಗತೆ ಕೊರ್ಪಿನಾಯೆ ಆದುಲ್ಲೆ.

⁷ದೇವೆರ್ ನಮನ್ ಅಶುದ್ಧ ಜೀವನ ಮಲ್ಪೆರೆ ಲೆಯ್ದಿನಿ ಅತ್ತ್, ಪರಿಶುದ್ಧ ಜೀವನ ಮಲ್ಪೆರೆ ಲೆಯ್ದಿನಿ.

⁸ಇಂಚ ಉಪ್ಪುನಗ ಈ ಪಾತೆರೊಲೆನ್ ತಿರಸ್ಕಾರ ಮಲ್ಪುನಾಯೆ ನರಮಾನಿಲೆನ್ ತಿರಸ್ಕಾರ ಮಲ್ಪುನು ಮಾತ್ರತ್ತಂದೆ, ನಿಕ್ಲೆಗ್ ಪರಿಶುದ್ಧಾತ್ಮ ವರ ಕೊರ್ಪಿನ ದೇವೆರೆನ್ಲಾ ತಿರಸ್ಕಾರ ಮಲ್ಪುನಾಯೆ ಆದುಲ್ಲೆ.

⁹ಸಹೋದ್ರ ಪ್ರೀತಿದ ಬಗೆಟ್ ನಿಕ್ಲೆಗ್ ಬರೆಪಿನ ಅಗತ್ಯ ಇಜ್ಜಿ, ಒರಿಯನ್ ಒರಿ ಪ್ರೀತಿ ಮಲ್ಪೊಡು ಪನ್ಪಿನೆನ್ ನಿಕುಲೇ ದೇವೆರೆಡ್ದ್ ಕಲ್ತ್‌ದ್‌ರ್‌.

¹⁰ಉಂದೆನ್ ನಿಕುಲು ಇಡೀ ಮಕೆದೋನ್ಯೊಡುಪ್ಪು ಮಾತ ಸಹೋದ್ರೆರೆಗ್ ಮಲ್ಪುನಾಕುಲು ಆದುಲ್ಲರ್. ಆಂಡಲಾ ಸಹೋದ್ರೆರೇ, ನಿಕುಲು ಪ್ರೀತಿಡ್ ನನಲಾ ಬುಲೆವೊಂದು ಬರೊಡು ಅಂದ್‌ದ್ ನಿಕ್ಲೆಡ ಕೇನೊನ್ವ.

¹¹ನಿಕ್ಲೆಗ್ ಅಪ್ಪಣೆ ಕೊರ್ತಿ ಪ್ರಕಾರ, ನನೊರಿಯನ ಕೆಲಸೊಡು ತರೆ ಪಾಡಂದೆ ಶಾಂತೊಡು ಬದ್‌ಕ್‌ದ್ ಸ್ವಂತ ಕೆಲಸೊನು ಮಲ್ತೊಂದು ಉಪ್ಪುನವೇ ಎಡ್ಡೆ.

¹²ಇಂಚ ಇತ್ತರ್ಡ ನಿಕುಲು ಪಿದಯಿದ ಜನೊಕುಲೆ ಎದುರುಡು ಮರ್ಯಾದಿಡ್ ನಡತೊಂದುಪ್ಪುವರ್, ನಿಕ್ಲೆಗ್ ಒಯಿಕ್‌ಲಾ ಕಡಿಮೆ ಆವಂದ್.

¹³ಸಹೋದ್ರೆರೇ ನಿಕುಲು ಈ ಸತ್ಯೊನು ತೆರಿಯೊನೊಡು, ಸೈತ್ ಪೋತಿನಾಕುಲೆನ ಸಂಗತಿಡ್ ಭರವಸೆದಾಂತಿ ಜನೊಕುಲೆ ಲೆಕ್ಕ ದುಃಖ ಮಲ್ಪೊಡ್ಚಿ.

¹⁴ಯೇಸು ಸೈತ್ ಪೋದು ಲಕ್ಕಿಯೆ ಅಂದ್‌ದ್ ನಮ ನಂಬುವಡ, ಅಂಚೆನೇ ದೇವೆರ್ ಯೇಸುಡೊಪ್ಪ ಇತ್ತಿನಾಕುಲು ಸೈತ್ ಪೋಯೆರ್ಡಲಾ ಅಕ್ಲೆನ್ ಲೆತ್ತೊಂದು ಬರುವೆ ಪನ್ಪಿ ವಿಷಯೊನ್ಲಾ ನಂಬೊಡು.

¹⁵ಎಂಕುಲು ಕರ್ತವ ಪಾತೆರದ ಆಧಾರೊಡು ನಿಕ್ಲೆಗ್ ಬೋಧನೆ ಕೊರ್ಪಿನಿ ದಾನೆ ಪಂಡ ಕರ್ತವೆ ಬನ್ನಮುಟ್ಟ ಜೀವೊಡುಪ್ಪುನಾಕುಲು ಸೈತಿನಾಕುಲೆಡ್ದ್ ದುಂಬು ಏರ್ದ್ ಪೋವಯ.

¹⁶ಕರ್ತವೆ ಸ್ವತಃ ಬನ್ನಗ ಮಲ್ಲ ಘೋಷಣೆಡ್ಲಾ ಮುಂದೂತನ ಶಬ್ಧದೊಟ್ಟುಡ್ಲಾ ದೇವೆರೆ ತುತೂರಿದ ಸ್ವರತ್ತ ಒಟ್ಟುಗು ಬಾನೊಡ್ದು ಜತ್ತ್‌ದ್ ಬರುವೆ, ಅಪಗ ಕ್ರಿಸ್ತಗಾದ್ ಸೈದಿನಾಕುಲು ದುಂಬತ್ತ ಲಕ್ಕುವೆರ್.

¹⁷ಜೀವೊಡುಪ್ಪು ನಮಲಾ ಅಕ್ಲೆಡೊಪ್ಪ ಒಟ್ಟುಗು ಮುಗಲ್‌ದ ಮದ್ಯೊಡು, ಬಾನೊಡು ಕರ್ತವನ್ ಎದುಕೊನಿಯೆರೆ ದೆರ್ತಿನಾಕುಲಾದುಪ್ಪುವ, ಬೊಕ್ಕ ನಮ ಏಪಲಾ ಕರ್ತವಡೊಪ್ಪ ಉಪ್ಪುವ.

¹⁸ಅಂಚಾಯಿನೆಡ್ದ್ ಈ ಪಾತೆರೊಲೆಡ್ದ್ ಒರಿಯನ್ ಒರಿ ಉಮೇದ್ ಕೊರ್ಲೆ.