Read Tulu 1 ಥೆಸಲೋನಿಕೆರೆಗ್‌ 5 Bible Online

1 ಥೆಸಲೋನಿಕೆರೆಗ್‌ 5 - Tulu bible

1 ಥೆಸಲೋನಿಕೆರೆಗ್‌ 5

¹ಆಮೆನ್.ಸಹೋದ್ರೆರೇ, ಈ ಸಂಗತಿಲು ಆಪಿನ ಕಾಲೊಲು ಬೊಕ್ಕ ಗಳಿಗೆದ ಸಂಗತಿಡ್ ನಿಕ್ಲೆಗ್ ಬರೆಪಿನ ಅಗತ್ಯ ಇಜ್ಜಿ.

²ರಾತ್ರೆಡ್ ಕಲ್ವೆ ಬರ್ಪಿಲೆಕ್ಕನೇ, ಕರ್ತವ ದಿನಲ ಬರ್ಪುಂಡು ಅಂದ್‌ದ್ ನಿಕುಲು ಸರಿಯಾದ್ ತೆರಿದರತ್ತಾ.

³ಜನೊಕುಲು ಸಮಾಧಾನೊಡ್ಲಾ ಪೋಡಿಗೆದಾಂತೆಲಾ ಉಲ್ಲ ಅಂದ್‌ದ್ ಪನೊಂದುಪ್ಪುನಪಗನೇ, ಬಂಜಿನಲೆಗ್ ಪೆದ್ಪಿಬೇನೆ ಬರ್ಪಿಲೆಕ್ಕ ಅಕ್ಲೆ ಮಿತ್ತ್ ನಾಶನ ಬರು. ಐಡ್ದ್ ತಪ್ಪಾವೆರೆ ಸಾದ್ಯೆನೇ ಇಜ್ಜಿ.

⁴ಸಹೋದ್ರೆರೇ, ಕಲ್ವೆ ಬರ್ಪಿಲೆಕ್ಕನೇ ಆ ದಿನ ನಿಕ್ಲೆ ಮಿತ್ತ್ ಬರಿಯೆರೆ ಬಲ್ಲಿ. ಕಾರಣ ನಿಕುಲು ಕತ್ತಲೆಡ್ ಇತ್ತಿನಾಕುಲತ್ತ್.

⁵ನಿಕುಲು ಬೊಲ್ಪುದಾಕುಲುಲಾ ಪಗೆಲ್‌ದಾಕುಲುಲಾ ಆದುಲ್ಲರ್, ನಮ ರಾತ್ರೆದಾಕುಲುಲಾ ಅತ್ತ್, ಕತ್ತಲೆದಾಕುಲುಲಾ ಅತ್ತ್.

⁶ಐಡ್ದಾವರ ನಮ ಬೇತೆಕ್ಲೆ ಲೆಕ್ಕ ನಿದ್ರೆಡ್ ಜೆತೊಂದುಪ್ಪುನ ಬೊಡ್ಚಿ. ನಮ ಎಚ್ಚರಿಕೆಡಿತ್ತ್‌ದ್ ಸ್ವಸ್ಥಚಿತ್ತೊಡುಪ್ಪುಗ.

⁷ನಿದ್ರೆ ಮಲ್ಪುನಾಕುಲು ರಾತ್ರೆಡ್ ನಿದ್ರೆ ಮಲ್ಪುವೆರ್, ಅಮಲಾಪಿನಾಕುಲು ರಾತ್ರೆಡ್ ಅಮಲಾಪೆರತ್ತಾ.

⁸ನಮ ದಿನೊಕು ಸೇರ್ದಿನಾಕುಲು ಬೊಲ್ಪುದಾಕುಲು ಆದಿತ್ತಿನೆಡ್ದಾವರ ಸ್ವಸ್ಥಚಿತ್ತೊಡು ಉಪ್ಪೊಡು. ನಂಬಿಕೆ ಬೊಕ್ಕ ಪ್ರೀತಿ ಪನ್ಪಿ ತಿಗಲೆದ ಕವಚೊನ್ಲಾ ರಕ್ಷಣೆದ ಭರವಸ ಪನ್ಪಿನ ಟೊಪ್ಪಿನ್ಲಾ ಪಾಡೊಂದು ಎಚ್ಚರಿಕೆಡುಪ್ಪುಗ.

⁹ದಾಯೆಗಂದ್ಂಡ, ದೇವೆರ್ ನಮನ್ ಕೋಪೊಗು ಗುರಿ ಆವೊಡು ಅಂದ್‌ದ್ ನೇಮಕ ಮಲ್ಪಂದೆ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ರಕ್ಷಣೆನ್ ಸಂಪಾದನೆ ಮಲ್ಪೊಡಂದ್‌ದ್ ನೇಮಕ ಮಲ್ತ್‌ದೆ.

¹⁰ನಮ ಎಚ್ಚರಿಕೆಡಿತ್ತ್‌ಂಡಲಾ ಸರಿ, ನಿದ್ರೆಡಿತ್ತ್‌ಂಡಲಾ ಸರಿ, ತನ ಒಟ್ಟುಗೇ ಬದುಕೊಡು ಅಂದ್‌ದ್ ಆಯೆ ನಂಕಾದ್ ಸೈತೆ.

¹¹ಅಂಚಾಯಿನೆಡ್ದ್ ನಿಕುಲು ಇತ್ತೆ ಉಪ್ಪುಲೆಕ್ಕನೇ ಒರಿಯಗ್ ಒರಿ ಉಮೇದ್ ಕೊರ್ದು ಒರಿಯನ್ ಒರಿ ಭಕ್ತಿಡ್‌ ವೃದ್ಧಿ ಮಲ್ತೊಂದುಪ್ಪುಲೆ.

¹²ಸಹೋದ್ರೆರೇ, ಎಂಕುಲು ನಿಕ್ಲೆಡ ನಟ್ಟೊಂದುಲ್ಲ ದಾನೆಂದ್ಂಡ, ಏರ್ ನಿಕ್ಲೆಡ್ ಪ್ರಯಾಸ ಮಲ್ತ್‌ದ್ ಕರ್ತವ ಕಾರ್ಯೊಡು ನಿಕ್ಲೆ ಮಿತ್ತ್ ಮುಖ್ಯಸ್ಥೆರಾದ್ ನಿಕ್ಲೆಗ್ ಬುದ್ಧಿ ಪನ್ಪೆರ್ಡ ಅಕ್ಲೆ ಮಿತ್ತ್ ಹೆಚ್ಚಿನ ಗಮನ ಕೊರ್ಲೆ.

¹³ಅಕ್ಲೆನ ಬೇಲೆದ ಸಂಗತಿಡ್ ಅಕ್ಲೆನ್ ಪ್ರೀತಿಡ್ ಮಸ್ತ್ ಸನ್ಮಾನ ಮಲ್ಪೊಡು ಅಂದ್‌ದ್ ನಿಕ್ಲೆಡ ನಟ್ಟೊನ್ವ. ನಿಕ್ಲೆನಿಕ್ಲೆ ನಡುಟು ಸಮಾಧಾನೊಡುಪ್ಪುಲೆ.

¹⁴ಸಹೋದ್ರೆರೇ, ಸೋಮಾರಿತನೊಟು ಉಪ್ಪುನಾಕುಲೆಗ್ ಬುದ್ಧಿ ಪನ್ಲೆ, ಮನಸ್ ಕುಂದುದು ಪೋಯಿನಾಕುಲೆಗ್ ಧೈರ್ಯ ಕೊರ್ಲೆ, ಬಲಹೀನೆರೆಗ್ ಆಧಾರ ಕೊರ್ಲೆ, ಮಾತೆರೆ ಒಟ್ಟುಡ್ಲಾ ತೀರುನಾತ್ ತಾಳ್ಮೆಡುಪ್ಪುಲೆ ಅಂದ್‌ದ್ ನಿಕ್ಲೆನ್ ಕೇನೊನ್ವೆ.

¹⁵ಏರ್ಲಾ ಅನ್ಯಾಯ ಮಲ್ತಿನಾಕುಲೆಗ್ ಅನ್ಯಾಯ ಮಲ್ಪೊಡ್ಚಿ. ಏಪಲಾ ನಿಕುಲು ಒರಿ ಒರಿಯಗಾದ್‌ಲಾ ಮಾತೆರೆಗಾದ್‌ಲಾ ಎಡ್ಡೆ ಮಲ್ಪೆರೆ ತೂಲೆ.

¹⁶ಏಪಲಾ ಸಂತೋಷೊಡುಪ್ಪುಲೆ.

¹⁷ಬುಡಂದೆ ಪ್ರಾರ್ಥನೆ ಮಲ್ಪುಲೆ.

¹⁸ಮಾತ ವಿಷಯೊಡ್ಲಾ ಉಪಕಾರ ಸ್ತುತಿ ಮಲ್ಪುಲೆ. ಉಂದೇ ನಿಕ್ಲೆನ ಸಂಗತಿಡ್ ಕ್ರಿಸ್ತ ಯೇಸುಡ್ದು ತೋಜಿದ್ ಬರ್ಪಿನ ದೇವೆರೆನ ಚಿತ್ತ ಆದುಂಡು.

¹⁹ನಿಕ್ಲೆಡಿತ್ತಿನ ಪರಿಶುದ್ಧಾತ್ಮದ ತೂನು ತೆಕ್ಕಾವಡೆ.

²⁰ಪ್ರವಾದನೆನ್ ಹೀನ ಮಲ್ಪಡೆ, ಐಕ್ ಸನ್ಮಾನ ಕೊರ್ಲೆ.

²¹ಆಂಡ ಮಾತೆನ್ಲಾ ಪರೀಕ್ಷೆ ಮಲ್ತ್‌ದ್, ಐಟ್ಟ್ ಎಡ್ಡೆಂತಿನೆನೇ ಗಟ್ಟಿಯಾದ್ ಪತ್ತೊನ್ಲೆ.

²²ಮಾತ ತರತ ಪಡಿಕೆತನೊಡ್ದು ದೂರ ಉಪ್ಪುಲೆ.

²³ಸಮಾಧಾನದ ದೇವೆರ್ ತಾನೇ ನಿಕ್ಲೆನ್ ಪೂರ್ತಿ ಆದ್ ಪರಿಶುದ್ಧ ಮಲ್ಪಡ್. ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಬರ್ಪಿನ ಸಮಯೊಡು, ನಿಕ್ಲೆ ಆತ್ಮ, ಪ್ರಾಣ, ಶರೀರ, ತಪ್ಪುದಾಂತೆ ಪರಿಪೂರ್ಣ ಆದ್ ತೋಜುಲೆಕ್ಕ ಕಾಪಡ್.

²⁴ನಿಕ್ಲೆನ್ ಲೆಪ್ಪುನಾಯೆ ನಂಬಿಗಸ್ತೆ, ಉಂದೆನ್ ಆಯೆನೇ ಮಲ್ಪುವೆ.

²⁵ಸಹೋದ್ರೆರೇ, ಎಂಕ್ಲೆಗಾದ್ ಪ್ರಾರ್ಥನೆ ಮಲ್ಪುಲೆ.

²⁶ಪರಿಶುದ್ಧದ ಮುದ್ದು ಕೊರ್ದು ಸಹೋದ್ರೆರೆನ್ ವಂದಿಪುಲೆ.

²⁷ಈ ಪತ್ರಿಕೆನ್ ಮಾತ ಸಹೋದ್ರೆರೆಗ್ ಓದುದು ತೆರಿಪಾವೊಡು ಅಂದ್‌ದ್ ಕರ್ತವಡ್ ಒತ್ತಾಯ ಮಲ್ಪುವೆ.

²⁸ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ನಿಕ್ಲೆಡೊಪ್ಪ ಉಪ್ಪಡ್. ಆಮೆನ್.