Read Tulu 2 ಥೆಸಲೋನಿಕೆರೆಗ್‌ 1 Bible Online

2 ಥೆಸಲೋನಿಕೆರೆಗ್‌ 1 - Tulu bible

2 ಥೆಸಲೋನಿಕೆರೆಗ್‌ 1

¹ನಮ ಅಮ್ಮೆ ಆದುಪ್ಪು ದೇವೆರೆಡ್ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ಲಾ ಉಪ್ಪು ಥೆಸ್ಸಲೋನಿಕೆರೆ ಸಭೆಕ್ ಪೌಲು, ಸೀಲೆ, ತಿಮೋಥಿಯೆರೊಡೊಪ್ಪ ಬರೆಪಿನ ದಾನೆಂದ್ಂಡ,

²ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.

³ಸಹೋದ್ರೆರೇ, ನಿಕ್ಲೆನ ನಂಬಿಕೆ ದಿನೊಡ್ದು ದಿನ ಬುಲೆವೊಂದುಂಡು. ಬೊಕ್ಕ ನಿಕ್ಲೆ ಉಲಯಿದ ಪ್ರೀತಿ ನಿಕ್ಲೆ ಮಾತೆರೆಡ್ ಹೆಚ್ಚೊಂದು ಬರ್ಪಿನೆಡ್ದ್ ಎಂಕುಲು ನಿಕ್ಲೆನ ಸಂಗತಿಡ್ ದೇವೆರೆಗ್ ಏಪಲಾ ಉಪಕಾರ ಮಲ್ಪುನವು ಅಗತ್ಯ ಆದುಂಡು.

⁴ನಿಕ್ಲೆಗ್ ಬೈದಿನ ಮಾತ ಭಂಗದ ನಡುಟ್ಲಾ ನಿಕ್ಲೆ ತಾಳ್ಮೆನ್ಲಾ ನಂಬಿಕೆನ್ಲಾ ನೆನೆತ್‌ದ್ ದೇವೆರೆ ಸಭೆಟ್ ನಿಕ್ಲೆ ಸಂಗತಿಡ್ ಪುಗರೊನ್ವ.

⁵ನಿಕುಲು ದೇವೆರೆ ರಾಜ್ಯೊಗು ಯೋಗ್ಯೆರಾವೊಡಂದ್ದೇ ದೇವೆರೆನ ಆಸೆ. ಐಕಾದ್ ತಾಳ್ಮೆಡ್ ಇತ್ತ್‌ದ್ ಕಷ್ಟ ತಾಳೊಡು, ಉಂದು ಮಾತ ದೇವೆರೆನ ನೀತಿದ ನ್ಯಾಯೊಗು ಸರಿ ಆದುಂಡು. ನಿಕ್ಲೆಗ್ ಭಂಗ ಕೊರ್ಪಿನಾಕುಲೆಗ್ ಅಂಚೆನೇ ಭಂಗ ಕೊರ್ಪಿನವು ದೇವೆರೆನ ನ್ಯಾಯದ ಸಾಕ್ಷಿ ಆದುಂಡು.

⁷ಬೊಕ್ಕ ತೊಂದರೆಡುಪ್ಪು ನಿಕ್ಲೆಗ್ ನೆಮ್ಮದಿಗೆನ್ ಒದಗಾವು ಲೆಕ್ಕನೆ ನಿಕ್ಲೆ ಒಟ್ಟುಗು ಎಂಕುಲೆಗ್ಲಾ ಒದಗಾವೆ. ಅವು ಯೇಸು ಕ್ರಿಸ್ತೆ ತನ ಬಲೊಟು ದೂತೆರೆಡೊಪ್ಪ ಅರ್ಲುನ ತೂತ ನಡುಟು ಬಾನೊಡು ತೋಜಿದ್ ಬನ್ನಗ ಆವು. ಆಯೆ ದೇವೆರೆನ್ ತೆರಿಯಂದಿನಾಕುಲೆಗ್ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಸುವಾರ್ತೆಗ್ ಒಳಗಾವಂದಿನಾಕುಲೆಗ್ಲಾ ಶಿಕ್ಷೆನ್ ಕೊರ್ಪೆ.

⁹ಅಂಚಿತ್ತಿನಾಕುಲು ಕರ್ತವ ಸನ್ನಿಧಾನೊಡ್ದುಲಾ ಮಾನ ಮೈಮೆಡ್ದ್‌ಲಾ ದೂರ ಆದ್ ನಿತ್ಯನಾಶನದ ಶಿಕ್ಷೆಗ್ ಗುರಿ ಆಪೆರ್.

¹⁰ಆ ದಿನೊಟು ಆಯೆ ತನ ಪರಿಶುದ್ಧವಂತೆರೆಡ್ ಮೈಮೆ ಪಡೆವೊಂದು ಮಾತ ನಂಬುನಾಕುಲೆಗ್ ಮೆಚ್ಚಿಗೆದಾಯೆ ಆದ್ ತೋಜಿದ್ ಬರುವೆ. ಇಂಚ ಉಪ್ಪುನಗ ಎಂಕುಲು ಕೊರಿ ಸಾಕ್ಷಿನ್ ನಂಬಿ ನಿಕುಲುಲಾ ಅಕ್ಲೆಡೊಪ್ಪ ಉಪ್ಪರ್.

¹¹ಉಂದೆನ್ ನೆನೆತೊಂದು ಎಂಕುಲು ಏಪಲಾ ನಿಕ್ಲೆಗ್ ಬೋಡಾದ್ ಇಂಚ ಪ್ರಾರ್ಥನೆ ಮಲ್ತೊಂದುಲ್ಲ. ನಮ ದೇವೆರ್ ನಿಕ್ಲೆನ್ ಆಯನ ರಾಜ್ಯೊಗು ಯೋಗ್ಯೆರಾದ್ ಮಲ್ಪಡ್, ತನ ಎಡ್ಡೆಂತಿನ ಚಿತ್ತೊನ್ಲಾ ನಂಬಿಕೆದ ಕೆಲಸೊನ್ಲಾ ತನ ಬಲೊಟು ತೀರಿಸಾವಡ್.

¹²ಇಂಚ ನಮ ದೇವೆರೆನಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನಲಾ ದಯೆಡ್ದ್ ನಮ ಕರ್ತವೆ ಆದುಪ್ಪು ಯೇಸು ಪುದರ್‌ಗ್ ಮೈಮೆ ಆವಡ್ ಬೊಕ್ಕ ಆಯಡ್ದ್ ನಿಕ್ಲೆಗ್ಲಾ ಮೈಮೆ ಆವಡ್. ಆಮೆನ್.