Read Tulu 2 ಥೆಸಲೋನಿಕೆರೆಗ್‌ 2 Bible Online

2 ಥೆಸಲೋನಿಕೆರೆಗ್‌ 2 - Tulu bible

2 ಥೆಸಲೋನಿಕೆರೆಗ್‌ 2

¹ಸಹೋದ್ರೆರೇ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಬರ್ಪಿನೆತ್ತ ವಿಷಯೊಡ್ಲಾ ನಮ ಆಯ ಕೈತಲ್‌ ಒಟ್ಟು ಆಪಿನ ವಿಷಯೊಡ್ಲಾ ನಿಕ್ಲೆಡ ನಟ್ಟೊಂದುಲ್ಲ ದಾನೆಂದ್ಂಡ,

²ಕರ್ತವೆ ಬರ್ಪಿನ ದಿನ ಕೈತಲಾತ್ತ್ಂಡ್ ಅಂದ್‌ದ್ ಕೆಲೆವೆರ್ ಆತ್ಮೊಡ್ದುಲಾ ಕೆಲೆವೆರ್ ಪಾತೆರೊಡ್ದುಲಾ, ಕೆಲೆವೆರ್ ಎಂಕುಲು ಇಂಚ ಪತ್ರಿಕೆ ಬರೆತ ಪಂಡ್ದ್‌ಲಾ ಪನ್ವೆರ್. ಉಂದೆನ್ ಕೇಂಡ್ದ್ ನಿಕ್ಲೆ ಮನಸ್‌ಡ್ ಬೇಗನೆ ಬುದ್ಧಿಕೆಟ್ಟ್‌ದ್ ಚಂಚಲ ಆವಡೆ.

³ಏರ್ಲಾ ನಿಕ್ಲೆನ್ ವಾ ವಿಷಯೊಡ್ಲಾ ಮೋಸೊಡು ಪಾಡಂದೆ ಉಪ್ಪಡ್. ದಾಯೆಗಂದ್ಂಡ, ದೇವೆರೆಗ್ ವಿರೋಧ ಆಪಿ ಸಮಯ ಬತ್ತಿ ಬೊಕ್ಕ ನಿತ್ಯನಾಶನ ಕನಪಿನ ಅನ್ಯಾಯಗಾರೆ ಬೈಲ್‌ಗ್ ಬರ ಮುಟ್ಟ ಆ ದಿನ ಬರ್ಪುಜಿ.

⁴ಆ ಅನ್ಯಾಯಗಾರೆ ಪ್ರತಿಯೊಂಜೆನ್ ವಿರೋಧ ಮಲ್ತ್‌ದ್ ತಾನೇ ಮಲ್ಲಾಯೆ ಅಂದ್‌ದ್ ಮೆಚ್ಚಾವೊಂದು, ತಾನೇ ದೇವೆರ್ ಪನೊಂದು, ಪೂಜೆಗ್ ತಕ್ಕದಾಯೆ ಅಂದ್‌ದ್ ದೇವೆರೆನ ಗರ್ಭಗುಡಿಟೇ ಕುಲ್ಲುವೆ.

⁵ಯಾನ್ ನಿಕ್ಲೆ ಒಟ್ಟುಗು ಉಪ್ಪುನಗ ಈ ಸಂಗತಿನ್ ಪಂಡ್ದಿತ್ತೆ, ಅವು ನಿಕ್ಲೆಗ್ ನೆನೆಪು ಇಜ್ಜಾ?

⁶ಆ ನರಮಾನಿ ನೇಮಕ ಆತಿನ ಸಮಯೊಡೇ ತೋಜಿದ್ ಬರ್ಪಿನೆಕ್ಕ್ ಎಂಚಿನ ತಡೆ ಮಲ್ಪುಂಡು ಅಂದ್‌ದ್ ಅವು ನಿಕ್ಲೆಗ್ ತೆರಿದೇ ಉಂಡು.

⁷ಅನ್ಯಾಯ ಇತ್ತೆಲಾ ಗುಟ್ಟುಡು ನಡತೊಂದು ಉಂಡು. ಉಂದೆಕ್ಕ್ ಅಡ್ಡಿ ಮಲ್ಪುನಾಯನ್ ದೆತ್ತೊನುನ ಮುಟ್ಟ ಅನ್ಯಾಯದ ಕೆಲಸೊನು ಆಯೆ ಗುಟ್ಟುಡೆ ಮಲ್ತೊಂದುಪ್ಪುವೆ.

⁸ಐಡ್ದ್ ಬೊಕ್ಕ ಆ ಅನ್ಯಾಯಗಾರೆ ತೋಜಿದ್ ಬರ್ಪೆ. ಅಪಗ ಕರ್ತವೆ ಆದುಪ್ಪು ಯೇಸು ತನ ಬಾಯಿದ ಶ್ವಾಸೊಡ್ದು ಆಯನ್ ಕೆರ್ದ್, ತನ ಮೈಮೆದ ಬೊಲ್ಪುಡು ಬನ್ನಗ ಆಯನ್ ನಾಶ ಮಲ್ಪುವೆ. ಆ ಅನ್ಯಾಯದ ನರಮಾನಿ ಬನ್ನಗ ಸೈತಾನನ ಕಾರ್ಯೊಲು ಬಲೊಟ್ಲಾ ಗುರ್ತ ಕಾರ್ನಿಕೊಲೆಡ್ಲಾ ನಡಪು.

¹⁰ಬೊಕ್ಕ ನಾಶಾದ್ ಪೋಪಿನಾಕುಲೆನ್ ಆಯೆ ಅನ್ಯಾಯದ ವಂಚನೆಡ್ ತಿಕ್ಕಾವೆ. ದಾಯೆಗಂದ್ಂಡ, ಅಕುಲು ಸತ್ಯದ ಮಿತ್ತ್ ಪ್ರೀತಿ ದೀವಂದಿನೆಡ್ದಾವರ ರಕ್ಷಣೆ ಹೊಂದಂದೆ ನಾಶ ಆಪೆರ್.

¹¹ಆ ಕಾರಣೊಡ್ದಾವರ, ದೇವೆರ್ ಅಕ್ಲೆಗ್ ಸುಳ್ಳುನು ನಂಬಿಯೆರೆ ಭ್ರಮೆನ್ ಕಡಪುಡ್ದು ಆ ಸುಳ್ಳುನು ನಂಬಿಯೆರೆ ಅಕ್ಲೆನ್ ಬುಡ್ಪೆ.

¹²ಉಂದೆಡ್ದ್ ಅಕುಲು ಸತ್ಯೊನು ನಂಬಂದೆ, ಇಂಚಿನ ಅನ್ಯಾಯೊಡು ಸಂತೋಷ ಮಲ್ಪುನಾಕುಲಾದ್ ನ್ಯಾಯತೀರ್ಪುಗು ಗುರಿ ಆಪೆರ್.

¹³ಆಂಡ ಕರ್ತವಗ್ ಪ್ರೀತಿ ಇತ್ತಿ ಸಹೋದ್ರೆರೇ, ದೇವೆರ್ ಸುರುಡ್ದು ನಿಕ್ಲೆನ್ ಪರಿಶುದ್ಧಾತ್ಮಡ್ ಶುದ್ಧ ಮಲ್ತ್‌ದ್ ಸತ್ಯದ ನಂಬಿಕೆಡ್ ತಿಕ್ಕು ರಕ್ಷಣೆಗ್ ಆದಿಡ್ದ್ ಅಜತ್‌ದ್ ದೆತ್ತೊಂಡಿನೆಡ್ದ್ ಎಂಕುಲು ನಿಕ್ಲೆನ ಸಂಗತಿಡ್ ದೇವೆರೆಗ್ ಏಪಲಾ ಉಪಕಾರ ಮಲ್ಪುನವು ಅಗತ್ಯ ಆದುಂಡು.

¹⁴ಎಂಕ್ಲೆನ ಸುವಾರ್ತೆಡ್ದ್ ದೇವೆರ್ ನಿಕ್ಲೆನ್ ರಕ್ಷಣೆಗ್ ಲೆತ್ತೆ, ಐಡ್ದಾವರ ನಿಕುಲು ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಮೈಮೆಡ್ ಪಾಲ್‌ದಾರೆರಾದುಲ್ಲರ್.

¹⁵ಅಂಚಾದ್ ಸಹೋದ್ರೆರೇ, ನಿಕುಲು ಎಂಕುಲೆ ಪಾತೆರೊಡ್ದುಲಾ ಪತ್ರಿಕೆಡ್ದ್‌ಲಾ ನಿಕ್ಲೆಗ್ ಕಲ್ಪಾದಿನ ಸತ್ಯೊನು ಪತ್ತೊಂದು ಐತ ಮಿತ್ತ್ ಗಟ್ಟಿಯಾದ್ ಉಂತುಲೆ.

¹⁶ನಮ ಅಮ್ಮೆ ಆದುಪ್ಪು ದೇವೆರ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆಲಾ ನಮನ್ ಮಸ್ತ್ ಪ್ರೀತಿ ಮಲ್ತ್‌ದ್ ದಯೊಟು ನಂಕ್ ನಿತ್ಯದ ಆಧಾರಣೆನ್ಲಾ, ಎಡ್ಡೆ ನಿರೀಕ್ಷೆನ್ಲಾ ಕೊರ್ದು

¹⁷ನಿಕ್ಲೆನ ಉಡಲ್‌ನ್ ಸಂತೈಸಿದ್ ಮಾತ ಎಡ್ಡೆ ಕೆಲಸೊಡ್ಲಾ ಪಾತೆರೊಡ್ಲಾ ಗಟ್ಟಿ ಮಲ್ಪಡ್.