Read Tulu 1 ತಿಮೋಥಿ 5 Bible Online

1 ತಿಮೋಥಿ 5 - Tulu bible

1 ತಿಮೋಥಿ 5

¹ಪ್ರಾಯದಾಕುಲೆನ್ ಜೋರ್ ಮಲ್ಪಂದೆ ನಿನ ಸ್ವಂತ ಅಮ್ಮೆ ಅಂದ್‌ದ್ ಎನ್ನ್‌ದ್ ಬುದ್ಧಿ ಪನ್ಲ. ಜವನ್ಯೆರೆನ್ ಮೆಗ್ಯೆಪಲಯೆ ಅಂದ್‌ದ್ ಎನ್ನೊನ್ಲ.

²ಪ್ರಾಯದ ಪೊಂಜೊವುಲೆನ್ ಅಪ್ಪೆ ಪಂಡ್ದ್, ಜವ್ವಂದಿ ಪೊಣ್ಣುಲೆನ್ ಮೆಗ್ದಿ ಪಲ್ದಿ ಪಂಡ್ದ್‌ಲಾ ಶುದ್ಧ ಭಾವೊಡು ತೂಲ.

³ದಿಕ್ಕ್‌ದಾಂತಿ ಕಂಡನಿ ಸೈತಿನಾಕುಲೆಗ್ ಆಶ್ರಯ ಕೊರ್ಲ. ಆಂಡ ಒರ್ತಿ ವಿಧವೆಗ್ ಬಾಲೆಲು ಪುಲ್ಲಿಯಾಡ್ಲು ಇತ್ತ್ಂಡ ದುಂಬತ್ತ ಇಲ್ಲದಾಕುಲೆನ್ ಭಕ್ತಿಡ್ ನಡಪಾವುನೆನ್ಲಾ ತನ್ಕುಲೆನ ಅಪ್ಪೆಅಮ್ಮಾಡ್ಲೆಗ್‌ ಉಪಕಾರ ಮಲ್ಪುನೆನ್ಲಾ ಕಲ್ತೊನಡ್. ಉಂದು ದೇವೆರೆನ ದೃಷ್ಟಿಡ್ ಮೆಚ್ಚಿಗೆದವು ಆದುಂಡು.

⁵ದಿಕ್ಕ್‌ದಾಂತಿ ಒಂಟಿ ವಿಧವೆ, ದೇವೆರೆನ ಮಿತ್ತ್ ಭರವಸೆ ದೀದ್, ರಾತ್ರೆ ಪಗೆಲ್ ನಟ್ಟೊನುನೆಟ್ಲಾ ಪ್ರಾರ್ಥನೆಡ್ಲಾ ನಿಲೆ ಆದುಪ್ಪುವಲ್.

⁶ಆಂಡ ಸುಖ ಬೋಗೊಡು ಉಪ್ಪುನ ವಿಧವೆ ಬದ್‌ಕ್‌ದುಪ್ಪುನಗನೆ ಸೈತ್ ಪೋಯಿನಾಲ್ ಆದುಲ್ಲಲ್.

⁷ವಿಧವೆ ತಪ್ಪುದಾಂತಿನಾಕುಲು ಆದುಪ್ಪುಲೆಕ್ಕ ಈ ಅಪ್ಪಣೆನ್ ಕೊರ್ಲ.

⁸ಆಂಡ ತನ್ಕುಲೆ ಸಮ್ಮಂಧದಾಕುಲೆನ್, ಐಟ್ಟ್‌ಲಾ ಸ್ವಂತ ಇಲ್ಲದಾಕುಲೆನ್ ತೂವಂದಿನಾಕುಲು ನಿಜ ನಂಬಿಕೆನ್ ತಿರಸ್ಕಾರ ಮಲ್ಪುನಾಕುಲು ಆದುಲ್ಲೆರ್. ಇಂಚಿತ್ತಿನಾಕುಲು ನಂಬಿಕೆದಾಂತಿನಾಕುಲೆಡ್ದ್‌ಲಾ ಕಡೆ ಆದುಲ್ಲೆರ್.

⁹ಒರಿಯಗೇ ಬೊಡೆದಿ ಆದಿತ್ತ್‌ದ್ ಅಜ್ಪ ವರ್ಸೊಡ್ದು ಮಿತ್ತ್ ಇತ್ತಿನ ಪ್ರಾಯದ ವಿಧವೆನ್ ವಿಧವೆರೆನ ಪಟ್ಟಿಗ್ ಸೇರಾವೊನೊಲಿ.

¹⁰ಆಲ್ ಎಡ್ಡೆ ಕೆಲೊಸೊಡು ಪುದರ್ ಪಡೆಯಿನಾಲ್ ಆದುಪ್ಪೊಡು, ಪಂಡ ಜೋಕುಲೆನ್ ತಾಂಕ್‌ದಿನಾಲ್‌ಲಾ, ಬಿನ್ನೆರೆನ್ ಸುದರಿಪುನಾಲ್‌ಲಾ, ದೇವಜನೊಕುಲೆನ್ ಸತ್ಕಾರ ಮಲ್ಪುನಾಲ್‌ಲಾ, ಭಂಗೊಡು ಇತ್ತಿನಾಕುಲೆಗ್ ಸಹಾಯ ಮಲ್ಪುನಾಲ್‌ಲಾ ಮಾತ ಎಡ್ಡೆ ಕೆಲೊಸೊಡು ಆಸಕ್ತಿದಾಲ್‌ಲಾ ಆದುಪ್ಪೊಡು.

¹¹ಆಂಡ ಜವ್ವನ ಪ್ರಾಯದ ವಿಧವೆನ್ ಪಟ್ಟಿಡ್ ಸೇರಾವೊನೊಡ್ಚಿ. ದಾಯೆಗಂದ್ಂಡ ಅಕುಲು ಶರೀರದ ಆಸೆಡ್ ಕ್ರಿಸ್ತಗ್ ವಿರೋಧಾದ್ ದುಂಬಗ್ ಮದ್ಮೆ ಆವೆರ್.

¹²ಇಂಚಿತ್ತಿನಾಕುಲು ದುಂಬು ಕೊರ್ತಿನ ನಂಬಿಕೆದ ಪಾತೆರೊಗು ತತ್ತ್‌ದ್ ತೀರ್ಪುಗು ಗುರಿ ಆಪೆರ್.

¹³ಉಂದತ್ತಂದೆ ಅಕುಲು ಸೋಮಾರಿಲು ಆದ್ ಇಲ್ಲ್ ಇಲ್ಲಗ್ ತಿರ್ಗೊಂದುಪ್ಪುವೆರ್. ಸೋಮಾರಿಲು ಆದುಪ್ಪುನು ಅತ್ತಂದೆ ಹರಟೆ ಪಾತೆರುನೆಟ್ಲಾ, ಬೇತೆಕ್ಲೆ ವ್ಯವಹಾರೊಲೆಡ್ ಕೈ ಪಾಡ್ದ್ ಅತ್ತಂದಿನ ಪಾತೆರೊಂದು ಸಮಯ ದೆಪ್ಪುವೆರ್.

¹⁴ಅಂಚಾದ್ ಜವ್ವಂದಿ ವಿಧವೆ ಮದ್ಮೆ ಆದ್ ಜೋಕುಲೆನ್ ಪೆದ್ದ್‌ದ್ ಇಲ್ಲದ ಯಜಮಾನಿ ಆದುಪ್ಪುನ ಎಡ್ಡೆ ಅಂದ್‌ದ್ ಎಂಕ್ ತೋಜುಂಡು. ಅಪಗ ಅಕ್ಲೆಗ್ ವಿರೋಧಿಲೆನ ನಿಂದನೆಗ್ ಅವಕಾಸ ಉಪ್ಪುಜಿ.

¹⁵ಇದ ಮುಟ್ಟ ಕೆಲೆವೆರ್ ಸಾದಿ ತತ್ತ್‌ದ್ ಸೈತಾನ ಬೆರಿ ಪೋತೆರ್.

¹⁶ಕ್ರಿಸ್ತನ್ ನಂಬುನ ಪೊಂಜೊವುನ ಅಧೀನೊಡು ವಿಧವೆ ಇತ್ತಲ್‌ಡ ಆಲ್ ಆಲೆನ್ ತೂವೊನಡ್, ಈ ಭಾರೊನು ಸಭೆತ ಮಿತ್ತ್ ಪಾಡಿಯೆರೆ ಬಲ್ಲಿ. ಅಂಚಾಂಡ ಸಭೆ ನಿಜಾದ್‌ಲಾ ದಿಕ್ಕ್‌ದಾಂತಿ ವಿಧವೆರೆನ್ ತೂವೊನಿಯೆರೆಗ್ ಆಪುಂಡು.

¹⁷ಎಡ್ಡೆ ರೀತಿಡ್ ಅಧಿಕಾರ ಮಲ್ಪುನ ಸಭಾ ಹಿರಿಯೆರೆಗ್ ಮುಖ್ಯಾದ್ ಬೋಧನೆಡ್ಲಾ ಪ್ರಸಂಗೊಡ್ಲಾ ಭಂಗ ಬರ್ಪಿನಾಕುಲೆಗ್ ರಡ್ಡ್ ಪಾಲ್ ದಾತ್ ಮಾನೊಗು ಯೋಗ್ಯೆರಂದ್ ಎನ್ನೊಡು.

¹⁸“ಕೆಯಿ ದೊಂಕುನ ಬೋರಿದ ಬಾಯಿನ್ ಕಟ್ಟಿಯೆರೆ ಬಲ್ಲಿ,” ಬೊಕ್ಕ “ಬೇಲೆದಾಯೆ ತನ ಸಂಬಳೊಗು ತಕ್ಕದಾಯೆ,” ಅಂದ್‌ದ್ ಶಾಸ್ತ್ರೊಡು ಪನ್ಪುಂಡತ್ತಾ.

¹⁹ಒರಿ ಸಭಾ ಹಿರಿಯಾಯಗ್ ವಿರೋಧಾದ್ ದೂರು ಬತ್ತ್ಂಡ ರಡ್ಡ್ ಇಜ್ಜಿಡ ಮೂಜಿ ಸಾಕ್ಷಿಲೆ ಬಾಯಿಡ್ ಅವೆನ್ ಕಂಡಿತ ಮಲ್ತೊನಂದೆ ಐಕ್ ಕೆಬಿ ಕೊರಡ.

²⁰ಪಾಪೊಡು ನಡಪುನಾಕುಲೆಗ್ ಮಾತೆರೆನ ಎದುರುಡೇ ಜೋರ್ ಮಲ್ಪು, ಅಂಚಾಂಡ ಬಾಕಿದಾಕುಲು ಪೋಡಿವೆರ್.

²¹ಈ ವಿಚಾರಣೆ ಮಲ್ಪುನೆಡ್ದ್ ದುಂಬೇ ಅಕ್ಲೆನ ಮಿತ್ತ್ ತಪ್ಪು ಪನಂದೆ, ಭೇದಭಾವೊಡು ದಾಲಾ ಮಲ್ಪಂದೆ, ಯಾನ್ ನಿಕ್ಕ್ ಪಂತಿನ ಪಾತೆರೊನು ಕೈಕೊನೊಡು ಅಂದ್‌ದ್ ದೇವೆರೆ ದುಂಬುಲಾ, ಕ್ರಿಸ್ತ ಯೇಸುನ ದುಂಬುಲಾ, ಅಜತ್ ದೆತ್ತೊಂದಿನ ದೂತೆರೆನ ದುಂಬುಲಾ ಅಪ್ಪಣೆ ಕೊರ್ಪೆ.

²²ಏರೆನ ತರೆತ ಮಿತ್ತ್‌ಲಾ ಅಮಸರೊಡು ಕೈ ದೀದ್ ಸಭೆತ ಕೆಲಸೊಗು ನೇಮಕ ಮಲ್ಪಡ. ಈ ಅಂಚ ಮಲ್ಪುನಾಂಡ ಬೇತೆಕ್ಲು ಮಲ್ತಿನ ಪಾಪೊಡು ಈ ಪಾಲ್‌ದಾರೆ ಅಂದ್‌ದ್ ತೋಜಿದ್ ಬರು. ಈ ಶುದ್ಧದಾಯೆ ಆದುಪ್ಪುಲೆಕ್ಕ ತೂಲ.

²³ನನ ಮಿತ್ತ್ ನೀರ್‌ನ್ ಮಾತ್ರ ಪರ್ಪಿನಾಯೆ ಆದುಪ್ಪಂದೆ, ನಿನ ಬಂಜಿದ ಅಜೀರ್ಣೊಗ್ಲಾ ಅಪಗಪಗ ಬರ್ಪಿನ ಸೀಕ್‌ಗ್ ಬೂರಂದಿಲೆಕ್ಕ ಒಂತೆ ದ್ರಾಕ್ಷಾರಸೊನು ದೆತ್ತೊನ್ಲ.

²⁴ಕೆಲೆವೆರೆನ ಪಾಪೊಲು ದುಂಬೇ ತೆರಿದ್ ಬರ್ಪುಂಡು, ಅಕುಲು ನ್ಯಾಯತೀರ್ಪುಗು ಗುರಿ ಆಪೆರ್. ಬೇತೆ ಕೆಲೆವೆರೆನ ಪಾಪೊಲು ದೆಂಗ್‌ದಿತ್ತ್‌ದ್ ಅವು ಬೊಕ್ಕ ತೋಜಿದ್ ಬರ್ಪುಂಡು.

²⁵ಅಂಚೆನೇ ಕೆಲೆವೆರೆನ ಎಡ್ಡೆ ಕೆಲಸೊಲು ತೋಜಿದ್ ಬರ್ಪುಂಡು. ಬೊಕ್ಕ ಬೇತೆ ಕೆಲೆವೆರೆನ ಎಡ್ಡೆ ಕೆಲಸೊಲು ತೋಜಿದ್ ಬತ್ತಿಜಿಡಲಾ ಒಂಜಿ ದಿನ ಬೈಲ್‌ಗ್ ಬರಂದೆ ಉಪ್ಪಂದ್.