Read Tulu 1 ತಿಮೋಥಿ 6 Bible Online

1 ತಿಮೋಥಿ 6 - Tulu bible

1 ತಿಮೋಥಿ 6

¹ದಾಸೆರಾದ್ ಬೊಕ್ಕೊರಿಯನ ಅಧೀನೊಡು ಉಪ್ಪುನಾಕುಲು ತನ್ಕುಲೆನ ಯಜಮಾನೆರೆಗ್ ಮಾತ ಮಾನೊಗು ಯೋಗ್ಯದಾಕುಲು ಅಂದ್‌ದ್ ಎನ್ನಡ್. ಇಜ್ಜಾಂಡ ದೇವೆರೆ ಪುದರ್‌ಗ್ಲಾ ನಮ ಬೋಧನೆಗ್ಲಾ ದೂಷಣೆ ಆವು.

²ಏರೆಗಾಂಡಲಾ ಕ್ರಿಸ್ತನ್ ನಂಬುನ ಯಜಮಾನೆರ್ ಇತ್ತೆರ್ಡ ಅಕುಲು ಆ ಯಜಮಾನನ್ ಸಹೋದರೆ ಅಂದ್‌ದ್ ಉದಾಸೀನ ಮಲ್ಪಂದೆ, ತನ್ಕುಲೆನ ಬೇಲೆದ ಫಲೊನು ಹೊಂದುನಾಕುಲುಲಾ ನಂಬುನಾಕುಲುಲಾ ಪ್ರೀತಿದಾಕುಲುಲಾ ಆದುಲ್ಲೆರಂದ್‌ದ್ ತೆರಿದ್ ಅಕ್ಲೆ ಸೇವೆನ್ ಹೆಚ್ಚಾದ್ ಮಲ್ಪಡ್. ಈ ಬೋಧನೆ ಕೊರ್ದು ಎಚ್ಚರಿಕೆ ಮಲ್ಪುಲ.

³ಏರಾಂಡಲಾ ಒರಿ ಬೇತೆ ಬೋಧನೆ ಕೊರ್ದು ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಸರಿ ಇತ್ತಿ ಪಾತೆರೊಗ್ಲಾ ಭಕ್ತಿಗ್ ತಕ್ಕಾದುಪ್ಪು ಬೋಧನೆಗ್ಲಾ ಒಪ್ಪಿಯಂದೆ ಪೋಂಡ,

⁴ಆಯೆ ಒಂಜೆನ್ಲಾ ತೆರಿಯಂದೆ ತರ್ಕಲಾ ಚರ್ಚೆಲಾ ಮಲ್ಪುನಾಯೆ ಆದ್ ಅಹಂಕಾರೊಡು ಕಣ್ಣ್ ತೋಜಂದಿನಾಯೆ ಆದುಲ್ಲೆ. ಉಂದೆಡ್ದಾದ್ ಮಚ್ಚರ, ಲಡಯಿ, ದೂಷಣೆ, ಹಾಳ್ ಸಂಶಯೊಲು ಮಾತ ಪುಟ್ಟುಂಡು.

⁵ಅತ್ತಂದೆ ಬುದ್ಧಿಕೆಟ್ಟ್‌ದ್ ಸತ್ಯೊನು ಬುಡ್ತಿನಾಕುಲಾದ್, ದೇವಭಕ್ತಿನ್ ಒಂಜಿ ಲಾಭದ ಉದ್ಯೋಗ ಅಂದ್‌ದ್ ಎನ್ನುನ ಈ ನರಮಾನಿಲೆಡ ನಿತ್ಯದ ಕಚ್ಚಾಟ ಆವೊಂದುಪ್ಪುಂಡು.

⁶ತೃಪ್ತಿ ಕೊರ್ಪಿನ ಭಕ್ತಿ ಮಲ್ಲ ಲಾಭ ಇತ್ತಿನವೇ ಆದುಂಡು.

⁷ನಮ ಲೋಕೊಗು ಬನ್ನಗ ದಾಲಾ ಪತ್ತೊಂದು ಬೈದ್‌ಜ, ಅಂಚೆನೇ ಲೋಕೊಡ್ದು ಪೋನಗ ದಾಲಾ ದೆತ್ತೊಂದು ಪೋಪುಜ.

⁸ನಂಕ್ ನುಪ್ಪು ಕುಂಟು ಇತ್ತ್ಂಡ ಯಾವು, ಐಟ್ಟ್ ತೃಪ್ತೆರಾದುಪ್ಪುಗ.

⁹ಐಶ್ವರ್ಯವಂತೆ ಆವೊಡು ಅಂದ್‌ದ್ ಆಸೆ ಮಲ್ಪುನಾಕುಲು ಶೋಧನೆಗ್ ಬೂರ್ದು ನಾನಾ ರೀತಿದ ಬುದ್ಧಿದಾಂತಿನ ಬೊಕ್ಕ ನಾಶಾಪಿನ ದುರಾಶೆಲೆಗ್ ತಿಕ್ಕ್‌ದ್ ಬೂರ್ವೆರ್. ಇಂಚಿತ್ತಿ ಆಸೆಲು ನರಮಾನಿಲೆನ್ ಕೇಡ್‌ಗ್ಲಾ ನಾಶೊನೊಗ್ಲಾ ಪಾಡುಂಡು.

¹⁰ದಾಯೆಗಂದ್ಂಡ ಕಾಸ್‌ದಾಸೆ ಮಾತ ದುಷ್ಟತನೊಕು ಬೇರ್ ಆದುಂಡು. ಐಕ್ ಕೆಲೆವೆರ್ ಮನಸ್ ದೀದ್ ಕ್ರಿಸ್ತನ ಮಿತ್ತ್‌ದ ನಂಬಿಕೆಡ್ ಸಾದಿ ತತ್ತ್ ಪೋಯಿನಕುಲಾದ್, ತನ್ಕುಲೆಗ್ ದಿಂಜ ಬೇನೆ ಮಲ್ತೊಂಡೆರ್.

¹¹ಆಂಡ ತಿಮೋಥಿ, ಈ ಒರಿ ದೇವೆರೆ ನರಮಾನಿ. ಈ ಮಾತ ಪಡಿಕೆಂತಿನೆಡ್ದ್ ದೂರ ಪಾರ್ದ್ ನೀತಿಗ್, ಭಕ್ತಿಗ್, ನಂಬಿಕೆಗ್, ಪ್ರೀತಿಗ್, ತಾಳ್ಮೆಗ್, ಸಜ್ಜನಿಗೆಗ್ ಪ್ರಯತ್ನ ಮಲ್ಪುಲ.

¹²ಕ್ರಿಸ್ತ ನಂಬಿಕೆದಾಕುಲು ಮಲ್ಪುನ ಎಡ್ಡೆ ಉರ್ಡಾಟೊನು ಮಲ್ಪುಲ, ನಿತ್ಯಜೀವೊನು ಗಟ್ಟಿಯಾದ್ ಪತ್ತೊನ್ಲ. ಐಕಾದ್ರನೆ ದೇವೆರ್ ನಿನನ್ ಲೆತ್ತ್‌ದೆ. ಬೊಕ್ಕ ಈ ದಿಂಜ ಸಾಕ್ಷಿಲೆ ಎದುರುಡು ಎಡ್ಡೆ ಅರಿಕೆ ಮಲ್ತ್‌ದ.

¹³ಮಾತ ಸೃಷ್ಟಿಗ್ಲಾ ಜೀವ ಕೊರ್ಪಿನ ದೇವೆರೆ ದುಂಬುಲಾ, ಪೊಂತ್ಯ ಪಿಲಾತನ ಎದುರುಡು ಎಡ್ಡೆ ಅರಿಕೆನ್ ಸಾಕ್ಷಿ ಆದ್ ಕೊರಿನ ಕ್ರಿಸ್ತ ಯೇಸುನ ಎದುರುಡ್ಲಾ ಯಾನ್ ನಿಕ್ಕ್ ಕಂಡಿತಾದ್ ಪನ್ಪಿನಿ ದಾನೆಂದ್ಂಡ,

¹⁴ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ತೋಜಿದ್ ಬನ್ನೆಂಗೆ ಈ ಸುವಾರ್ತೆದ ಅಪ್ಪಣೆನ್ ಕುರೆದಾಂತೆ ತಪ್ಪುದಾಂತೆ ಕೈಕೊನ್ಲ.

¹⁵ಭಾಗ್ಯವಂತೆ ಆಯಿ ಒರಿಯೇ ಸರ್ವತ್ರಾಣಿ ದೇವೆರ್‌ಲಾ, ರಾಜಾದಿರಾಜೆಲಾ ಕರ್ತವೆರೆ ಕರ್ತವೆಲಾ ಆದುಪ್ಪು ಯೇಸು ಬರ್ಪಿನೆನ್ ದೇವೆರ್ ತಕ್ಕ ಸಮಯೊಡು ತೋಜಾವೆ.

¹⁶ಆಯೆ ಒರಿಯೇ ಏಪಲಾ ಸೈಯಂದಿನಾಯೆಲಾ ತೀರಂದಿ ಬೊಲ್ಪುಡು ಉಪ್ಪುನಾಯೆಲಾ ಆದುಲ್ಲೆ. ನರಮಾನಿಲೆಡ್ ಏರ್ಲಾ ಆಯನ್ ತೂತುಜೆರ್, ಏರೆಗ್ಲಾ ಆಯನ್ ತೂವೆರೆ ಆವಂದ್; ಆಯಗ್ ಮಾನಲಾ ನಿತ್ಯ ಬಲಲಾ ಉಪ್ಪಡ್ ಆಮೆನ್.

¹⁷ಈ ಲೋಕದ ಐಶ್ವರ್ಯವಂತೆರೆಗ್ ಅಪ್ಪಣೆ ಕೊರೊಡು ದಾನೆಂದ್ಂಡ, ಅಕುಲು ಅಹಂಕಾರಿಲಾವಂದೆ, ತನ್ಕುಲೆ ಸ್ಥಿರದಾಂತಿ ಐಶ್ವರ್ಯದ ಮಿತ್ತ್ ಭರವಸ ದೀವಂದೆ, ನಮ ಸಂತೋಷಗಾದ್ ನಂಕ್ ಮಾತೆನ್ಲಾ ಧಾರಾಳವಾದ್ ಕೊರ್ಪಿನ ದೇವೆರೆ ಮಿತ್ತ್ ಭರವಸ ದೀವೊಡು.

¹⁸ನಿಜವಾಯಿನ ಜೀವೊನು ಪಡೆವೆರೆ ಬೋಡಾದ್ ಅಕುಲು ಎಡ್ಡೆಂತಿನೆನ್ ಮಲ್ಪುನಾಕುಲುಲಾ ಎಡ್ಡೆ ಕಾರ್ಯೊಲೆಡ್ ಐಶ್ವರ್ಯವಂತೆರ್ಲಾ ದಾನಧರ್ಮ ಮಲ್ಪುನಾಕುಲುಲಾ ಉದಾರ ಮನಸ್‌ದಾಕುಲುಲಾ ಆದುಪ್ಪೊಡು.

¹⁹ತನ್ಕುಲು ನಿತ್ಯಜೀವೊನು ಪತ್ತೊನುಲೆಕ್ಕ ಬರ್ಪಿ ಕಾಲೊಗು ಎಡ್ಡೆ ಬುನಾದಿನ್ ತನ್ಕುಲೆಗ್ ಕೂಡಾವೊನೊಡು ಪಂಡ್ದ್ ಅಕ್ಲೆಗ್ ಅಪ್ಪಣೆ ಕೊರ್ಲ.

²⁰ಓ ತಿಮೋಥಿ, ಈ ಗೇನದ ಬೋಧನೆ ಅಂದ್‌ದ್ ಭಕ್ತಿದಾಂತಿ ಬೋಧನೆಗ್ ಸಮ್ಮಂಧ ಆದುಪ್ಪು ಪ್ರಪಂಚದ ವ್ಯರ್ಥ ಪಾತೆರೊಲೆಗ್ಲಾ, ತರ್ಕೊಲೆಗ್ಲಾ ದೂರ ಆದ್, ದೇವೆರ್ ನಿಕ್ಕ್ ಒಚ್ಚಿದ್ ಕೊರಿನೆನ್ ಜೋಕೆಡ್ ಕಾಪುಲ.

²¹ಕೆಲೆವೆರ್ ಆ ಸುಳ್ಳು ಗೇನೊನು ಪತ್ತೊಂದು ಕ್ರಿಸ್ತಡ್ ದೀತಿನ ನಂಬಿಕೆಡ್ದ್ ತತ್ತ್‌ದ್ ಪೋಯೆರ್. ದೇವೆರೆ ದಯ ನಿಕ್ಲೆಡೊಪ್ಪ ಉಪ್ಪಡ್.