Read Tulu 2 ತಿಮೋಥಿ 3 Bible Online

2 ತಿಮೋಥಿ 3 - Tulu bible

2 ತಿಮೋಥಿ 3

¹ಆಂಡ ಕಡೆ ದಿನೊಕುಲೆಡ್ ಬಾರಿ ಭಂಗದ ಕಾಲ ಬರು ಇನ್ಪಿನೆನ್ ತೆರಿಯೊನ್ಲ

²ಜನೊಕುಲು ತನ್ಕುಲೆನೇ ಪ್ರೀತಿ ಮಲ್ಪುನಾಕುಲು, ಕಾಸ್‌ದಾಸೆದಾಕುಲು, ಬೂಟುಲಾ ಹೆಚ್ಚಾಳ್ಮೆ ಇತ್ತಿನಾಕುಲು, ದೂಷಣೆ ಮಲ್ಪುನಾಕುಲು, ಅಪ್ಪೆಅಮ್ಮೆ ಪಂಡಿನೆನ್ ಕೇನಂದಿನಾಕುಲು, ಉಪಕಾರ ಎನ್ನಂದಿನಾಕುಲು, ಅಶುದ್ಧದಾಕುಲು,

³ಪ್ರೀತಿದಾಂತಿನಾಕುಲು, ಸಮಾಧಾನ ಆವಂದಿನಾಕುಲು, ಚಾಡಿ ಪನ್ಪಿನಾಕುಲು, ಸ್ವಸ್ಥ ಬುದ್ಧಿದಾಂತಿನಾಕುಲು, ಕ್ರೂರೆರ್, ಎಡ್ಡೆಂತಿನೆನ್ ಪ್ರೀತಿ ಮಲ್ಪಂದಿನಾಕುಲು,

⁴ದೇವೆರೆನ ಪೋಡಿಗೆದಾಂತಿನಾಕುಲು, ಹೆಮ್ಮೆದಾಕುಲು, ಮೂರ್ಖೆರ್, ದೇವೆರೆನ್ ಪ್ರೀತಿ ಮಲ್ಪುನೆಡ್ದ್ ಹೆಚ್ಚಾದ್ ಭೋಗೊಲೆನ್ ಪ್ರೀತಿ ಮಲ್ಪುನಾಕುಲು,

⁵ಭಕ್ತಿದ ವೇಷೊಡಿತ್ತ್‌ದ್ ಐತ ಬಲೊನು ತಿರಸ್ಕಾರ ಮಲ್ಪುನಾಕುಲು ಆದುಪ್ಪೆರ್. ಇಂಚಿತ್ತಿನಾಕುಲೆನ ಸಹವಾಸ ಮಲ್ಪಡ.

⁶ಅಕ್ಲೆಡ್ ಕೆಲವು ಜನ ಇಲ್ಲ್ ಇಲ್ಲಗ್ ಪೊಗ್ಗುದು, ಪಾಪೊಲೆಡ್ ದಿಂಜಿದ್ ಬೊಕ್ಕ ತರತರತ ಆಸೆಡ್ ಮುರ್ಕುದಿನ ಬುದ್ಧಿದಾಂತಿ ಪೊಂಜೊವುಲೆನ್ ವಶ ಮಲ್ಪುನಾಕುಲು ಮೊಕ್ಲೆಡೊಪ್ಪ ಸೇರ್ದುಪ್ಪುವೆರ್.

⁷ಇಂಚಿತ್ತಿ ಪೊಂಜೊವುಲು ಏಪಲಾ ಪೊಸ ಬೋಧನೆಲೆ ಪಿರವು ಪೋಪೆರ್. ಆಂಡ ಸತ್ಯೊನು ಏಪೊಗ್ಲಾ ಅರ್ಥ ಮಲ್ತೊನ್ಜೆರ್.

⁸ಯನ್ನ, ಯಂಬ್ರ, ಇನ್ಪಿನಾಕುಲು ಮೋಶೆಗ್ ಎದುರುಂತಿಲೆಕ್ಕನೆ ಮೊಕುಲುಲಾ ಸತ್ಯೊಗು ಎದುರುಂತುವೆರ್, ಬುದ್ಧಿಡ್ ಹಾಳಾಯಿನಾಕುಲುಲಾ ಯೇಸು ಮಿತ್ತ್ ದೀತಿ ನಂಬಿಕೆಡ್ ತೆಟ್ಟ್‌ದ್ ಪೋಯಿನಾಕುಲಾದುಲ್ಲೆರ್.

⁹ಆಂಡ ಅಕ್ಲೆ ಪ್ರಯತ್ನೊಲು ನನ ದುಂಬಗ್ ಹೆಚ್ಚ್ ಬಾಳಂದೆ ಆ ಯನ್ನ ಬೊಕ್ಕ ಯಂಬ್ರೆನ ದುರ್ಬುದ್ಧಿ ಮಾತೆರೆಗ್ಲಾ ತೋಜಿಲೆಕ್ಕ ಮೊಕ್ಲೆನಲಾ ತೋಜಿದ್ ಬರು.

¹⁰ಈಯಾಂಡಲಾ ಎನ ಬೆರಿ ಬರ್ಪಿನಾಯೆ ಆದ್ ಎನ ಬೋಧನೆ, ನಡತೆ, ಉದ್ದೇಶ, ನಂಬಿಕೆ, ತಾಳ್ಮೆ, ಪ್ರೀತಿ, ಸಹನೆ ಉಂದೆನ್ ಮಾತ ತೆರಿದ.

¹¹ಅಂತಿಯೋಕ್ಯಡ್, ಇಕೋನ್ಯಡ್, ಲುಸ್ತ್ರಡ್ ಯಾನ್ ಏತ್ ಭಂಗೊನ್ಲಾ, ಕಷ್ಟೊನ್ಲಾ ಅನುಭವ ಮಲ್ತ್‌ದೆ ಅಂದ್‌ದ್ ನಿಕ್ಕ್ ಗೊತ್ತುಂಡು. ಈ ಮಾತ ಕಡೆಟ್ಟ್ ಯಾನ್ ಎಂಚೆಂಚಿತ್ತಿನ ಭಂಗೊಲೆನ್ ತಾಳೊಂದು ಉಲ್ಲೆ ಇನ್ಪಿನೆನ್ಲಾ ಈ ತೆರಿದ, ಬೊಕ್ಕ ಈ ಮಾತ ಕಷ್ಟೊಲೆಡ್ ಕರ್ತವೆ ಎನನ್ ಬುಡ್ಪಾಯೆ.

¹²ಅಂದ್, ಕ್ರಿಸ್ತ ಯೇಸುಡು ಭಕ್ತಿದ ಜೀವನ ಮಲ್ಪೊಡು ಅಂದ್‌ದ್ ಆಸೆ ಮಲ್ಪುನ ಪ್ರತಿಯೊರಿಲಾ ಭಂಗೊನು ಅನುಭವ ಮಲ್ಪೊಡೇ.

¹³ಆಂಡ ದುಷ್ಟೆರ್‌ಲಾ, ವಂಚನೆದಾಕುಲುಲಾ, ಬಾಕಿದಾಕುಲೆನ್ ಮೋಸ ಮಲ್ತೊಂದು ಅಕುಲೇ ಕಡೆಕ್ಕ್ ಮೋಸೊಗು ಬೂರ್ದು ಹೆಚ್ಚ್ ಹೆಚ್ಚ್ ಹಾಳ್ ಆದ್ ಪೋಪೆರ್.

¹⁴ಈಯಾಂಡ ಕಲ್ತ್‌ದ್ ದೃಢಾದ್ ನಂಬುನ ಬೋಧನೆಡ್ ನಿಲೆ ಆದುಪ್ಪುಲ. ನಿಕ್ಕ್ ಏರ್ ಕಲ್ಪಾದಿನಿ ಅಂದ್‌ದ್ ಈ ತೆರಿದ. ಈ ಎಲ್ಲಿಡ್ದಿಂಚಿಲಾ ಪರಿಶುದ್ಧ ಗ್ರಂಥೊಲೆನ್ ಕಲ್ತ್‌ದ ಅತ್ತಾ.

¹⁵ಆ ಗ್ರಂಥೊಲು ಕ್ರಿಸ್ತ ಯೇಸುಡುಪ್ಪು ನಂಬಿಕೆಡ್ದ್ ರಕ್ಷಣೆನ್ ಪಡೆಯುನ ಗೇನೊನು ಕೊರ್ಪಿನೆಕ್ಕ್ ಸಾದ್ಯ ಉಂಡು.

¹⁶ದೇವೆರೆ ಆತ್ಮಡ್ದ್ ಉಂಡಾಯಿನ ಒಂಜೊಂಜಿ ವಾಕ್ಯ ನಮನ್ ಬೋಧನೆ ಮಲ್ಪುನೆಕ್ಕ್‌ಲಾ, ನಂಕ್ ಎಚ್ಚರಿಕೆ ಕೊರ್ಪಿನೆಕ್ಕ್‌ಲಾ ನಮನ್ ತಿದ್ದುನೆಕ್ಕ್‌ಲಾ, ನೀತಿದ ಶಿಕ್ಷೆಗ್ಲಾ ಪ್ರಯೋಜನ ಆದುಂಡು.

¹⁷ಅಂಚಾದ್ ದೇವೆರೆ ಜನೊಕುಲು ಮಾತ ಎಡ್ಡೆ ಕೆಲಸೊಗು ಪರಿಪೂರ್ಣೆರಾದ್ ತಯಾರಾದುಪ್ಪುವೆರ್.