Read Tulu 2 ತಿಮೋಥಿ 4 Bible Online

2 ತಿಮೋಥಿ 4 - Tulu bible

2 ತಿಮೋಥಿ 4

¹ದೇವೆರೆ ಎದುರುಲಾ ಬೊಕ್ಕ ಬದುಕುನಾಕುಲೆಗ್ಲಾ ಸೈತಿನಾಕುಲೆಗ್ಲಾ ನ್ಯಾಯತೀರ್ಪೆರೆ ಉಪ್ಪು ಯೇಸು ಕ್ರಿಸ್ತ ಎದುರುಲಾ ಆಯೆ ಬರ್ಪಿನೆನ್ಲಾ ಆಯನ ರಾಜ್ಯದ ಮಿತ್ತ್‌ಲಾ ಆಜ ದೀದ್ ಯಾನ್ ನಿಕ್ಕ್ ಪನ್ಪಿನಿ ದಾನೆಂದ್ಂಡ,

²ದೇವೆರೆ ಪಾತೆರೊನು ಸಾರಿಲ, ಅನುಕೂಲದ ಸ್ಥಿತಿ ಇತ್ತ್ಂಡಲಾ ಇಜ್ಜಿಡಲಾ ಐಟ್ಟ್ ಆಸಕ್ತಿಡುಪ್ಪುಲ. ತಾಳ್ಮೆಡ್ ತಿದ್ದ್‌ಲ, ಶಿಕ್ಷೆ ಕೊರ್ಲ, ಎಚ್ಚರಿಕೆ ಕೊರ್ಲ, ಬೊಕ್ಕ ಎಡ್ಡೆ ಬೋಧನೆನ್ ಕೊರ್ದು ಅಕ್ಲೆಗ್ ಉಮೇದ್ ಕೊರ್ಲ.

³ದಾಯೆಗಂದ್ಂಡ ಜನೊಕುಲು ಸತ್ಯ ಇತ್ತಿ ಬೋಧನೆಗ್ ಕೆಬಿ ಕೊರಂದಿನಾಕುಲಾದ್, ತನ್ಕುಲೆಗ್ ಬೋಡಿತ್ತಿನೆನ್ ಕೇನುಲೆಕ್ಕ ಇತ್ತಿ ದುರಾಶೆಲೆಗ್ ಅನುಕೂಲವಾಯಿ ಬೋಧಕರೆನ್ ದೀವೊನ್ವೆರ್.

⁴ಅಕುಲು ಸತ್ಯ ಬೋಧನೆಗ್ ಕೆಬಿ ಕೊರಂದೆ ಕಟ್ಟ್ ಕತೆಕ್ಲೆನ್ ಕೇನರೆ ಪೋವೆರ್.

⁵ಆಂಡ ಈ ಮಾತೆಟ್ಟ್ ಜಾಗ್ರತೆದಾಯೆ ಆದುಪ್ಪುಲ. ಕಷ್ಟ ತಾಳೊಂದು ಸುವಾರ್ತೆದ ಕೆಲಸೊನು ಮಲ್ಪುಲ. ನಿಕ್ಕ್ ಒಚ್ಚಿದ್ ಕೊರಿನ ಸೇವೆನ್ ಸರಿಯಾದ್ ಮಲ್ಪುಲ.

⁶ಯಾನಾಂಡ ಇತ್ತೆನೇ ನೀರ್‌ದ ಲೆಕ್ಕ ಅರ್ಪಣೆ ಆವೊಂದುಲ್ಲೆ. ಯಾನ್ ಈ ಲೋಕೊಡ್ದು ಪೋಪಿನ ಸಮಯ ಕೈತಲ್‌ ಬತ್ತ್ಂಡ್.

⁷ಯಾನ್ ಎಡ್ಡೆ ಉರ್ಡಾಟೊನು ಮಲ್ತ್‌ದೆ. ಎನ ಬಲ್ಪಾಟೊನು ಮುಗಿಪಾದೆ ಬೊಕ್ಕ ಕ್ರಿಸ್ತ ನಂಬಿಕೆನ್ ಒರಿಪಾವೊಂದೆ.

⁸ನೀತಿವಂತೆರೆಗ್ ತಿಕ್ಕುನ ಜಯಮಾಲೆ ಎಂಕ್ ದುಂಬಗ್ ತಯಾರಾದುಂಡು. ಅವೆನ್ ನೀತಿಡ್ ನ್ಯಾಯತೀರಿಸುನ ಕರ್ತವೆ ಆ ದಿನೊಟು ಎಂಕ್ ಕೊರ್ಪೆ. ಎಂಕ್ ಮಾತ್ರತ್ತಂದೆ ಆಯೆ ಬರ್ಪಿನೆನ್ ಪ್ರೀತಿಡ್ ಎದುರು ತೂವೊಂದುಪ್ಪುನ ಪ್ರತಿ ಒರಿಯಗ್ಲಾ ಕೊರ್ಪೆ.

⁹ಎನ ಕೈತಲ್‌ ಬೇಗ ಬರಿಯೆರೆಗ್ ಪ್ರಯತ್ನ ಮಲ್ಪುಲ.

¹⁰ದಾಯೆಗಂದ್ಂಡ ದೇಮೆ ಈ ಲೋಕೊನು ಪ್ರೀತಿ ಮಲ್ತ್‌ದ್ ಎನನ್ ಬುಡ್ದು ಥೆಸ್ಸಲೋನಿಕೊಗು ಪೋಯೆ. ಕ್ರೆಸ್ಕೆ ಗಲಾತ್ಯೊಗ್ಲಾ ತೀತೆ ದಲ್ಮಾತ್ಯೊಗ್ಲಾ ಪೋಯೆರ್.

¹¹ಲೂಕೆ ಮಾತ್ರ ಎನಡೊಪ್ಪ ಉಲ್ಲೆ. ಈ ಬನ್ನಗ ನಿನಡೊಪ್ಪ ಮಾರ್ಕನ್ ಲೆತ್ತೊಂದು ಬಲ. ಆಯೆ ಎನ ಸೇವೆಡ್ ಪ್ರಯೋಜನದಾಯೆ ಆದುಲ್ಲೆ.

¹²ತುಖಿಕನ್ ಎಫೆಸೊಗು ಕಡಪುಡುದೆ. ತ್ರೋವೊಡು ಯಾನ್ ಕರ್ಪನ ಕೈತಲ್‌ ಬುಡ್ದು ಬೈದಿನ ಎನ ಮೇಲಂಗಿನ್ ಕನವೆರೆ ಮದಪಡ. ಎನ ಪುಸ್ತಕೊನು ಬೊಕ್ಕ ಮುಖ್ಯಾದ್ ಚರ್ಮದ ಪತ್ರಿಕೆನ್ಲಾ ಪತ್ತೊಂದು ಬಲ.

¹⁴ತಾಮ್ರದ ಬೇಲೆದ ಅಲೆಕ್ಸಾಂದ್ರೆ ಎಂಕ್ ಬಾರಿ ಉಪದ್ರ ಕೊರಿಯೆ. ಕರ್ತವೆ ಆಯನ ಕೆಲಸೊಗು ತಕ್ಕ ಪ್ರತಿಫಲ ಕೊರ್ಪೆ.

¹⁵ಈಲಾ ಆಯನ ಸಂಗತಿಡ್ ಎಚ್ಚರಿಕೆ ಆದುಪ್ಪುಲ. ಆಯೆ ಎಂಕುಲೆ ಪಾತೆರೊಲೆಗ್ ದಿಂಜ ಎದುರುಂತಿಯೆ.

¹⁶ಯಾನ್ ಸುರುತ್ತ ಸರ್ತಿ ನ್ಯಾಯಾಧಿಪತಿ ಎದುರು ಉಂತುನಗ ಎನಡೊಪ್ಪ ಏರ್ಲಾ ಬತ್ತಿಜೆರ್. ಮಾತೆರ್ಲಾ ಎನನ್ ಬುಡ್ದು ಪೋಯೆರ್. ಅವೆನ್ ಅಕ್ಲೆ ಲೆಖ್ಖೊಗು ಸೇರಿಸಾವಂದೆ ಉಪ್ಪಡ್.

¹⁷ಆಂಡ ಕರ್ತವೆ ಎನ ಕಡೆಟ್ಟ್ ಉಂತುದು, ಎನನ್ ಬಲ ಪಡೆಪಾದ್, ಎನಡ್ದ್ ಸುವಾರ್ತೆ ಪೂರ್ತಿ ಆದ್ ಸಾರಿಯೆರೆಲಾ ಬೊಕ್ಕ ಪಿದಯಿದ ಜನೊಕುಲೆಗ್ ಕೇನುಲೆಕ್ಕಲಾ ಮಲ್ತೆ. ಅವು ಅತ್ತಂದೆ ಆಯೆ ಎನನ್ ಸಿಮ್ಮದ ಬಾಯಿಡ್ದ್ ತಪ್ಪಾಯೆ.

¹⁸ಯಾನ್ ಒವುಲಾ ಹಾಳ್ ಕಾರ್ಯೊಲೆನ್ ಮಲ್ಪಂದಿಲೆಕ್ಕ ಕರ್ತವೆ ಎನನ್ ತಪ್ಪಾದ್ ತನ ಪರಲೋಕ ರಾಜ್ಯೊಗು ಮುಟ್ಟುನೆಂಗೆ ಕಾಪುವೆ. ಆಯಗ್ ಏನಿತ್ಯೇನಿಗ್ಲಾ ಮೈಮೆ ಆವಡ್, ಆಮೆನ್.

¹⁹ಪ್ರಿಸ್ಕಿಲಗ್ಲಾ, ಅಕ್ವಿಲಗ್ಲಾ ಒನೇಸಿಫೊರನ ಇಲ್ಲದಾಕುಲೆಗ್ಲಾ ವಂದನೆ ತೆರಿಪಾಲ.

²⁰ಎರಸ್ತೆ ಕೊರಿಂಥ್ಯೊಡು ಉಂತಿಯೆ. ತ್ರೋಫಿಮಗ್ ಸೌಖ್ಯದಾಂತಿನೆಡ್ದ್ ಆಯನ್ ಮಿಲೇತುಡು ಬುಡ್ದು ಬತ್ತೆ.

²¹ಚಳಿಕಾಲೊಡ್ದು ದುಂಬು ಇಡೆಗ್ ಬರಿಯೆರೆಗ್ ಪ್ರಯತ್ನ ಮಲ್ಪುಲ. ಯುಬೂಲೆ, ಪೊದೆಯೆ, ಲೀನೆ, ಕ್ಲೌದೀಯೆಲಾ ಅತ್ತಂದೆ ಬೇತೆ ಮಾತ ಸಹೋದ್ರೆರ್‌ಲಾ ನಿಕ್ಕ್ ವಂದನೆ ಮಲ್ಪುವೆರ್.

²²ಕರ್ತವೆ ನಿನ ಆತ್ಮಡೊಪ್ಪ ಉಪ್ಪಡ್. ಆಯನ ದಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್.