Read Tulu ಇಬ್ರಿಯೆರೆಗ್ 1 Bible Online

ಇಬ್ರಿಯೆರೆಗ್ 1 - Tulu bible

ಇಬ್ರಿಯೆರೆಗ್ 1

¹ದೇವೆರ್ ಆದಿ ಕಾಲೊಡು ಎಂಕ್ಲೆನ ಪಿತೃಲೆ ಒಟ್ಟುಗು ಪ್ರವಾದಿಲೆ ಬಾಯಿಡ್ದ್ ದಿಂಜ ಸರ್ತಿ ಬೇತೆ ಬೇತೆ ರೀತಿಡ್ ಪಾತೆರ್ದೆರ್.

²ಆಂಡ ಈ ಕಡೇ ದಿನೊಕುಲೆಡ್ ಆಯೆ ತನ ಮಗಡ್ದ್ ನಮಡ ಪಾತೆರ್ವೆ. ಆಯನ್‌ ಮಾತೆತ್ತಲಾ ಹಕ್ಕ್‌ದಾಯೆ ಮಲ್ತ್‌ದ್ ಆಯಡ್ದೇ ಮಾತ ಲೋಕೊನು ಉಂಡು ಮಲ್ತ್‌ದೆ.

³ಇಂಬೆ ದೇವೆರೆ ಮೈಮೆದ ಬೊಲ್ಪುಲಾ ಆಯ ಸ್ವಭಾವದ ಪ್ರತಿರೂಪಲಾ ಆದಿತ್ತ್‌ದ್ ತನ ಬಾಯಿ ಪಾತೆರದ ಶಕ್ತಿಡ್ದ್ ಮಾತೆಕ್ ಆಧಾರ ಆದುಲ್ಲೆ. ಆಯೆ ಜನೊಕುಲೆನ್ ಪಾಪೊಲೆಡ್ದ್ ಶುದ್ಧ ಮಲ್ತಿ ಬೊಕ್ಕ ಪರಲೋಕೊಡು ಮಲ್ಲಾದಿಗೆದ ಸ್ಥಾನೊಡು ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂಡೆ.

⁴ಆಯೆ ದೂತೆರೆಡ್ದ್‌ಲಾ ಏತೋ ಮಲ್ಲಾಯೆ. ಅಕ್ಲೆಡ್ದ್ ಏತೋ ಮಲ್ಲ ಪುದರ್‌ನ್ಲಾ ದೆತ್ತೊಂದೆ ಅತ್ತಾ?

⁵ದಾಯೆಗಂದ್ಂಡ, “ಎಂಕ್ ಈಯೇ ಮಗೆ; ಇನಿ ಯಾನೇ ನಿನನ್ ಪಡೆತೆ.” ಅಂದ್‌ದ್‌ಲಾ ಕುಡ “ಯಾನ್ ಆಯಗ್ ಅಮ್ಮೆ ಆದುಪ್ಪುವೆ; ಆಯೆ ಎಂಕ್ ಮಗೆ ಆದುಪ್ಪುವೆ.” ಅಂದ್‌ದ್‌ಲಾ ದೇವೆರ್ ವಾ ದೂತಡಲಾ ಏಪಾಂಡಲಾ ಪಂಡಿನವು ಉಂಡಾ?

⁶ಬೊಕ್ಕ ಆಯೆ ತನ ಸುರುತ್ತ ಮಗನ್ ಈ ಲೋಕೊಗು ಕಡಪುಡುನಗ “ದೇವೆರೆ ದೂತೆರ್ ಮಾತೆರ್ಲಾ ಆಯಗ್ ಅಡ್ಡಬೂರಡ್,” ಅಂದ್‌ದ್ ಪನ್ಪೆ.

⁷ದೂತೆರೆನ ಸಂಗತಿಡ್, “ಆಯೆ ತನ ದೂತೆರೆನ್ ಗಾಳಿದ ಲೆಕ್ಕಲಾ ತನ ಸೇವಕೆರೆನ್ ತೂತ ನಾಲಯಿದ ಲೆಕ್ಕಲಾ ಕಡಪುಡ್ವೆ.”

⁸ಆಂಡ ಮಗನ ಸಂಗತಿಡ್, “ದೇವೆರೇ, ನಿನ ಗದ್ದಿಗೆ ಸದಾಕಾಲೊಗು ಉಪ್ಪುನವು, ನಿನ ರಾಜ್ಯದ ಕೋಲು ನೀತಿದ ಕೋಲು ಆದುಂಡು.”

⁹ಈ ನೀತಿನ್ ಪ್ರೀತಿ ಮಲ್ತ್‌ದ, ಅನ್ಯಾಯೊನು ಪಗೆ ಮಲ್ತ. ಅಂಚಾದ್ ದೇವೆರ್ ನಿನ ದೇವೆರೇ, ನಿನನ್ ನಿನ ಪಾಸಡಿದಾಕುಲೆಡ್ದ್ ಮಲ್ಲ ಸ್ಥಾನೊಗು ಏರಾದ್ ಸಂತೋಷದ [1]ಎಣ್ಣೆನ್ ಮೈತ್‌ದ್ ನಿನನ್ ಅಭಿಷೇಕ ಮಲ್ತ್‌ದೆ.

¹⁰ಉಂದತ್ತಂದೆ, “ಕರ್ತವಾ, ಈ ಆದಿಡ್ ಭೂಮಿಗ್ ಅಡಿಪಾಯೊನು ಪಾಡ್ದ್ ಪರಲೋಕ ನಿನ ಕೈಬೇಲೆ ಆದುಂಡು.

¹¹ಅವು ಆಳಿದ್ ಪೋವು; ಆಂಡ ಈ ಮಾತ್ರ ಏನಿತ್ಯೇನಿಗ್ಲಾ ಉಪ್ಪುವ. ಅವು ಮಾತಲಾ ಕುಂಟುದಲೆಕ್ಕನೇ ಪರತ್ತಾವು.

¹²ಈ ಅವೆನ್ ಅಂಗಿದಲೆಕ್ಕ ಮಡ್ತ್‌ದ್ ದಕ್ಕ್‌ದ್ ಪೊಸತ್ತ್ ಅಂಗಿನ್ ಪಾಡಿಲೆಕ್ಕ ಆವು. ಆಂಡ ಈ ಏಪಲಾ ಇತ್ತಿಲೆಕ್ಕನೆ ಉಪ್ಪುವ; ನಿನ ವರ್ಸೊಲು ಮುಗಿಯಂದ್,” ಅಂದ್‌ದ್ ಪನ್ಪೆ.

¹³ಬೊಕ್ಕ ದೇವೆರ್ ವಾ ದೂತೆರೆಗ್ಲಾ ಇಂಚ ಪನ್ತಿಜೆ, “ಯಾನ್ ನಿನ ವೈರಿಲೆನ್ ನಿಕ್ಕ್ ಪಾದಪೀಠ ಮಲ್ಪುನ ಮುಟ್ಟ, ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ, ಇನ್ಪಿನೆನ್ ಏಪಲಾ ಪನ್ತಿನ ಉಂಡಾ?”

¹⁴ಅಕುಲು ಮಾತೆರ್ಲಾ ಬುಡುಗಡೆ ತಿಕ್ಕುನಾಕುಲೆನ ಸೇವೆಗಾದ್ ಕಡಪುಡ್ದಿನ ಸೇವಾತ್ಮೊಲು ಆದುಲ್ಲೆರತ್ತಾ?