Read Tulu ಇಬ್ರಿಯೆರೆಗ್ 3 Bible Online

ಇಬ್ರಿಯೆರೆಗ್ 3 - Tulu bible

ಇಬ್ರಿಯೆರೆಗ್ 3

¹ಅಂಚಾಯಿನೆಡ್ದ್ ದೇವಜನೊಕುಲಾಯಿ ಸಹೋದ್ರೆರೇ ಪರಲೋಕದ ಭಾಗ್ಯೊಡು ಪಾಲ್‌ದಾರೆರಾವೆರೆ ಲೆಪ್ಪು ಪಡೆತಿನಾಕುಲೆ, ನಮ ನಿಗಂಟ್ ಮಲ್ತೊಂದು ಒಪ್ಪಿಯೊಂಡಿನ ಅಪೊಸ್ತಲೆಲಾ ಪ್ರಧಾನಯಾಜಕೆಲಾ ಆಯಿ ಯೇಸುನು ಗೇನ ಕೊರ್ದು ಯೋಚನೆ ಮಲ್ಪುಲೆ.

²ಮೋಶೆ ದೇವೆರೆ ಇಡೀ ಇಲ್ಲಡ್ ನಂಬಿಗಸ್ತೆ ಆದಿತ್ತಿಲೆಕ್ಕನೇ, ಯೇಸುಲಾ ತನನ್ ನೇಮಕ ಮಲ್ತ್‌ದಿನಾಯಗ್ ನಂಬಿಗಸ್ತೆ ಆದುಲ್ಲೆ.

³ಇಲ್ಲ್‌ಡ್ದ್‌ಲಾ ಇಲ್ಲ್ ಕಟ್ಟಿನಾಯಗ್ ಹೆಚ್ಚಿಗೆದ ಮಾನ ಉಪ್ಪುನೆಡ್ದ್ ಮೋಶೆಡ್ದ್ ಯೇಸು ಏತೋ ಹೆಚ್ಚಿಗೆದ ಮಾನೊಗು ತಕ್ಕದಾಯೆ ಅಂದ್‌ದ್ ತೋಜಿದ್ ಬೈದೆ.

⁴ಪ್ರತಿಯೊಂಜಿ ಇಲ್ಲನ್ ಏರಾ ಒರಿ ಕಟ್ಟ್‌ದುಪ್ಪುವೆ. ಆಂಡ ಮಾತೆನ್ಲಾ ಕಟ್ಟಿನಾಯೆ ದೇವೆರೇ.

⁵ಮೋಶೆ ಒರಿ ಸೇವಕೆ ಆದ್ ದೇವೆರೆ ಇಲ್ಲಡ್ ಮಾತ ಸಂಗತಿಡ್ ನಂಬಿಗೆದಾಯೆ ಆದಿತ್ತೆ, ಆಯೆ ದುಂಬಗ್ ತೋಜಿದ್ ಬರ್ಪಿನ ಸಂಗತಿಲೆಗ್ ಸಾಕ್ಷಿ ಆದಿತ್ತೆ.

⁶ಆಂಡ ಕ್ರಿಸ್ತೆ ಮಗೆ ಆದ್ ದೇವೆರೆನ ಇಲ್ಲದ ಮಿತ್ತ್ ಅಧಿಕಾರಿ ಆದುಲ್ಲೆ. ನಮ, ನಮ್ಮ ಧೈರ್ಯೊನ್ಲಾ ನಮ ನಂಬಿಕೆಡ್ದ್ ಉಂಡಾಪಿ ಭರವಸೊನ್ಲಾ ಕಡೇ ಮುಟ್ಟ ಗಟ್ಟಿಯಾದ್ ಪತ್ತೊಂಡಿನಕುಲಾಂಡ ನಮನೇ ದೇವೆರೆ ಇಲ್ಲದಾಕುಲು.

⁷ಅವೆಡ್ದಾವರ ಪರಿಶುದ್ಧಾತ್ಮೆ ಪನ್ಪಿನ ಪ್ರಕಾರ “ಇನಿ ನಿಕುಲು ದೇವೆರೆನ ಸ್ವರೊಕ್ಕು ಕೆಬಿ ಕೊರಿಯರ್ಡ

⁸ನಿಕ್ಲೆನ ಹಿರಿಯಾಕುಲು ದೇವೆರೆನ್ ಕೋಪ ಲಕ್ಕಾದಿ ಜಾಗ್‌ಡ್ ಕಾಡ್‌ದುಲಯಿ, ದೇವೆರೆನ್ ಪರೀಕ್ಷೆ ಮಲ್ತಿನ ದಿನೊಕುಲೆಡ್ ಮಲ್ತಿಲೆಕ್ಕ ನಿಕ್ಲೆನ ಉಡಲ್‌ನ್ ಕಠಿಣ ಮಲ್ತೊನಡೆ.”

⁹ಅಕುಲು ಕಾಡ್‌ಡ್ ಎನನ್ ಶೋಧಿದ್ ಪರೀಕ್ಷೆ ಮಲ್ತ್‌ದ್ ನಲ್ಪ ವರ್ಸ ಮುಟ್ಟ ಯಾನ್ ಮಲ್ತೊಂದಿತ್ತಿ ಕೆಲಸೊಲೆನ್ ತೂಯೆರ್.

¹⁰ಐಕಾದ್ ಯಾನ್ ಈ ಸಂತಾನದ ಮಿತ್ತ್ ಮಸ್ತ್ ಬೇಜಾರ್ ಮಲ್ತ್‌ದ್, ಅಕುಲು ಏಪಲಾ ಉಡಲ್‌ಡ್ ತತ್ತ್ ಪೋಪಿನಾಕುಲು ಅಂದ್‌ದ್ ಪಂಡೆ. ಆಂಡ ಅಕುಲು ಎನ ಮಾರ್ಗೊಲೆನ್ ತೆರಿಯೊಂಡಿಜೆರ್.

¹¹ಇಂಚ ಉಪ್ಪುನಗ, “ಮೊಕುಲು ಎನ ವಿಶ್ರಾಂತಿಡ್ ಸೇರುನೇ ಇಜ್ಜಿ ಪಂಡ್ದ್ ಕೋಪೊಡು ಆಜ ಪಾಡೊಂಡೆ.”

¹²ಸಹೋದ್ರೆರೇ ತೂವೊನ್ಲೆ, ಜೀವದ ನಿಜ ರೂಪ ಆದುಪ್ಪು ದೇವೆರೆನ್ ಬುಡ್ದು ಪೋಪಿನ ಅಪನಂಬಿಕೆ ಇತ್ತಿ ಪಡಿಕೆಂತಿನ ಉಡಲ್ ನಿಕ್ಲೆಡ ಏರೆಡಲಾ ಉಪ್ಪೆರೆ ಬಲ್ಲಿ.

¹³ನಿಕ್ಲೆಡ್ ಒರಿಯಾಂಡಲಾ ಪಾಪೊಡ್ದು ಮೋಸ ಪೋದು ಕಠಿಣ ಆವಂದಿಲೆಕ್ಕ “ಈ ಪೊರ್ತು” ಪನ್ಪಿ ಕಾಲ ಉಪ್ಪುನೆಟ್ಟ ದಿನನಿತ್ಯ ಒರಿ ಒರಿಯಗ್ ಬುದ್ಧಿ ಪಂಡೊನ್ಲೆ.

¹⁴ಸುರುಡ್ದಿಂಚಿ ಇತ್ತಿನ ಭರವಸೊನು ಕಡೆ ಮುಟ್ಟಲಾ ಗಟ್ಟಿಯಾದ್ ಪತ್ತೊನುವಡ ಕ್ರಿಸ್ತಡ ಪಾಲ್‌ದಾರೆರ್ ಆದುಲ್ಲತ್ತಾ.

¹⁵ಶಾಸ್ತ್ರ ಇಂಚ ಪನ್ಪುಂಡು, “ಇನಿ ನಿಕುಲು ದೇವೆರೆನ ಸ್ವರೊಕ್ಕು ಕೆಬಿ ಕೊರಿಯರ್ಡ, ನಿಕ್ಲೆನ ಹಿರಿಯಾಕುಲು ದೇವೆರೆನ್ ಕೋಪ ಲಕ್ಕಾದಿ ಜಾಗ್‌ಡ್ ಮಲ್ತಿಲೆಕ್ಕ ನಿಕ್ಲೆನ ಉಡಲ್‌ನ್ ಕಠಿಣ ಮಲ್ತೊನಡೆ.”

¹⁶ಆಯೆ ಪನ್ಪಿನೆನ್ ಕೇಂಡ್ದ್ ಕೋಪ ಲಕ್ಕಾಯಿನಾಕುಲು ಏರ್? ಮೋಶೆ ಕೈ ತಿರ್ತ್ ಇತ್ತ್‌ದ್ ಐಗುಪ್ತದ ಉಲಯಿಡ್ದ್ ಪಿದಾಡ್ದ್ ಬತ್ತಿನ ಮಾತೆರ್ಲಾ ಅತ್ತಾ.

¹⁷ಬೊಕ್ಕ ನಲ್ಪ ವರ್ಸ ಆಯೆ ಏರೇ ಮಿತ್ತ್ ದಿಂಜ ಕೋಪ ಮಲ್ತೊಂಡೆ? ಪಾಪ ಮಲ್ತಿನಾಕುಲೆ ಮಿತ್ತೆ ಅತ್ತಾ? ಅಕ್ಲೆನ ಪುಣೊಕುಲು ಕಾಡ್‌ಡ್ ಬೂರ್ದುಂಡತ್ತಾ?

¹⁸ಎನ ವಿಶ್ರಾಂತಿಡ್ ನಿಕುಲು ಸೇರುನೇ ಇಜ್ಜಿ ಅಂದ್‌ದ್ ಏರೆನ ಸಂಗತಿಡ್ ಆಜ ಪಾಡೊಂಡೆ? ಆಯನ ಪಾತೆರೊನು ಕೇನಂದಿನಾಕುಲೆಗ್ ಅತ್ತಾ?

¹⁹ಅಕುಲು ಸೇರಂದೆ ಪೋಯಿನಿ ಅಪನಂಬಿಕೆಡ್ದೇ ಅಂದ್‌ದ್ ತೆರಿಯೊನ್ವ.