Read Tulu ಇಬ್ರಿಯೆರೆಗ್ 9 Bible Online

ಇಬ್ರಿಯೆರೆಗ್ 9 - Tulu bible

ಇಬ್ರಿಯೆರೆಗ್ 9

¹ಇಂಚ ಇತ್ತ್ಂಡಲಾ ಸುರುತ್ತ ಒಡಂಬಡಿಕೆಡ್ ದೇವಾರಾಧನೆದ ನಿಯಮೊಲು ಬೊಕ್ಕ ದೇವಾಲಯ ಇತ್ತ್ಂಡ್. ಅವು ಈ ಲೋಕೊಗು ಸಮ್ಮಂಧ ಪಡೆಯಿನವು.

²ಅಂದ್ಂಡ ಒಂಜಿ ಗುಡಾರ ಕಟ್ಟ್‌ದ್ಂಡ್. ಐತ ಸುರುತ್ತ ಭಾಗೊಡು ದೀಪಕಂಬ, ಮೇಜಿ, ಅರ್ಪಣೆ ಮಲ್ತಿನ ರೊಟ್ಟಿ ಇತ್ತ್ಂಡ್. ಐಕ್ ಪರಿಶುದ್ಧ ಜಾಗ್ ಅಂದ್‌ದ್ ಪುದರ್.

³ಬೊಕ್ಕ ರಡ್ಡನೆ ಪರದೆದ ಅಂಚಿಡ್ ಬಾರಿ ಪರಿಶುದ್ಧದ ತಂಬು ಇತ್ತ್ಂಡ್.

⁴ಐಟ್ಟ್ ಬಂಗಾರ್‌ದ ಧೂಪಾರತಿ, ಉಲಯಿ ಪಿದಯಿ ಬಂಗಾರ್‌ದ ತಗಡ್ ಮುಚ್ಚಿದಿನ ಒಡಂಬಡಿಕೆದ ಮಂಜೂಷೊಲು ಇತ್ತ್ಂಡ್. ಆ ಮಂಜೂಷದುಲಯಿ ಮನ್ನ ದೀತಿನ ಬಂಗಾರ್‌ದ ಬಾಜನಲಾ ಆರೋನನ ತೆಗ್‍ಲ್ದಿನ ಕೋಲುಲಾ ಒಡಂಬಡಿಕೆ ಬರೆತಿ ಕಲ್ಲ್‌ದ ಪಲಯಿಲುಲಾ ಇತ್ತ್ಂಡ್.

⁵ಐತ ಮಿತ್ತ್ ದೇವೆರೆ ಮೈಮೆನ್ ತೋಜಾವುನ ಕೆರೂಬೆರ್ ದಯತ ಗದ್ದಿಗೆಗ್ ಮಿತ್ತ್ ನಿರೆಲ್‌ದ ಲೆಕ್ಕ ಬುಡ್ಪಾದಿತ್ತ್‌ಂಡ್. ಸದ್ಯೊಗು ಈ ಸಂಗತಿಲೆನ್ ಬುಡ್ಪಾದ್ ಪನಿಯೆರೆ ಆಪುಜಿ.

⁶ಉಂದು ಇಂಚ ತಯಾರ್ ಮಲ್ತಿ ಬೊಕ್ಕ ಯಾಜಕೆರ್ ಏಪಲಾ ಗುಡಾರದ ಎದುರುದ ಅದೆತ್ತುಲಯಿ ಪೋದು ದೇವಾರಾಧನೆನ್ ನಡಪಾವೆರ್.

⁷ಆಂಡ ರಡ್ಡನೆದೆತ್ತ ಉಲಯಿ ಪ್ರಧಾನಯಾಜಕೆ ಒರಿಯೇ ವರ್ಸೊಗು ಒಂಜೇ ಸರಿ ಪೋಪೆ. ಆಯೆ ನೆತ್ತೆರ್‌ನ್ ದೆತ್ತೊನಂದೆ ಪೋಪುಜೆ, ಆ ನೆತ್ತೆರ್‌ನ್ ತನ್ಕಾದ್‌ಲಾ ಜನೊಕುಲೆ ತಪ್ಪುಲೆಗಾದ್‌ಲಾ ಅರ್ಪಣೆ ಮಲ್ಪುವೆ.

⁸ಈ ಏರ್ಪಾಡ್‌ಡ್ದ್ ಗುಡಾರೊಡು ಎದುರುದ ಭಾಗ ಉಪ್ಪುನೆಟ್ಟ ದೇವೆರೆ ಸನ್ನಿಧಾನೊಗು ಪೋಪಿನ ಸಾದಿ ಇದ ಮುಟ್ಟಲಾ ತೋಜಿದಿಜಿ ಪನ್ಪಿನೆನ್ ಪರಿಶುದ್ಧಾತ್ಮೆ ತೆರಿಪಾವೆ.

⁹ಆ ಗುಡಾರ ಇತ್ತೆದ ಕಾಲದಾಕುಲೆಗಾದ್ ಒಂಜಿ ಉಲಯಿದ ಅರ್ಥೊನು ತೂಪಾವುಂಡು. ದಾನೆಂದ್ಂಡ ಐತ ಕ್ರಮೊಕಾದ್ ಅರ್ಪಣೆ ಆಪಿನ ಕಾಣಿಕೆನ್ಲಾ, ಯಜ್ಞೊನ್ಲಾ ದೇವಾರಾಧನೆ ಮಲ್ಪುನಾಕುಲೆನ ಮನಸಾಕ್ಷಿ ಒಪ್ಪುಲೆಕ್ಕ ಮಲ್ತ್‌ದ್ ಕನಯೆರೆ ಆವಂದೆ ಪೋಂಡು.

¹⁰ನುಪ್ಪುನೀರ್‌ಲಾ ತರತರತ ಮೀಪಾಟಿಕೆಲುಲಾ ಒಟ್ಟಾದ್ ಶರೀರೊಗು ಮಾತ್ರ ಸಮ್ಮಂಧ ಪಡೆಯಿನ ನಿಯಮೊಲು ಆದಿತ್ತ್‌ದ್ ಸುಧಾರಣೆದ ಕಾಲದ ಮುಟ್ಟ ಮಾತ್ರ ನೇಮಕವಾಯಿನವು ಆದುಂಡು.

¹¹ಆಂಡ ಕ್ರಿಸ್ತೆ ಬರಿಯೆರೆ ಉಪ್ಪು ಎಡ್ಡೆಂತಿನೆತ್ತ ಪ್ರಧಾನಯಾಜಕೆ ಆದ್ ಬತ್ತ್‌ದ್ ಕೈಡ್ದ್ ಕಟ್ಟಂದಿನ ಅಂದ್ಂಡ ಈ ಸೃಷ್ಟಿಗ್ ಸಮ್ಮಂಧ ಪಡೆಯಂದಿ ಘನತವುಲಾ ಪೂರ್ತಿ ಇತ್ತಿನವುಲಾ ಉಪ್ಪುನ ಗುಡಾರೊಡು ಸೇವೆನ್ ಮಲ್ಪುನಾಯೆ ಆಯೆ.

¹²ಏಡ್ ಬೊಕ್ಕ ಆಣ್ ಕಂಜಿಲೆ ನೆತ್ತೆರ್‌ನ್ ದೆತ್ತೊನಂದೆ ಸ್ವಂತ ನೆತ್ತೆರ್‌ನೇ ದೆತ್ತೊಂದು ನಂಕಾದ್ ನಿತ್ಯ ಬುಡುಗಡೆನ್ ಸಂಪಾದನೆ ಮಲ್ತೊಂಡಿನಾಯೆ ಆದ್ ಒಂಜೇ ಸರಿ ದೇವೆರೆ ಪರಿಶುದ್ಧತೆತ ಸನ್ನಿಧಾನೊಗು ಸೇರಿಯೆ.

¹³ಮೈಲೆ ಆದಿತ್ತಿನಾಯನ ಮಿತ್ತ್ ಏಡ್ ಬೋರಿಲೆ ನೆತ್ತೆರ್‌‌ನ್ಲಾ ಗಡಸ್‌ದ ಬೊನ್ಯೊನ್ಲಾ ತಲ್ತ್‌ದ್ ಶರೀರದ ಮೈಲೆನ್ ಪರಿಶುದ್ಧ ಮಲ್ಪುನಾಂಡ,

¹⁴ನಿತ್ಯ ಆತ್ಮೊಡ್ದು ತನನ್ ದೋಷದಾಂತೆ ದೇವೆರೆಗ್ ಅರ್ಪಣೆ ಮಲ್ತೊಂಡಿ ಕ್ರಿಸ್ತನ ನೆತ್ತೆರ್ ಏತೋ ಹೆಚ್ಚಾದ್ ನಮನ್ ಜೀವದಾಂತಿ ಕರ್ಮೊಲೆಡ್ದ್ ಬುಡ್ಪಾದ್ ನಮ ಜೀವ ಇತ್ತಿ ದೇವೆರೆನ್ ಆರಾಧನೆ ಮಲ್ಪುನಾಕುಲು ಆಪಿಲೆಕ್ಕ ನಮ ಮನಸ್‌ಲೆನ್ ಶುದ್ಧ ಮಲ್ಪುಂಡು.

¹⁵ಬೊಕ್ಕ ಈ ಕಾರಣೊಡ್ದು ಆಯೆ ಒಂಜಿ ಪೊಸ ಒಡಂಬಡಿಕೆಗ್ ಮದ್ಯಸ್ತೆಗಾರೆ ಆದುಲ್ಲೆ. ಸುರುತ್ತ ಒಡಂಬಡಿಕೆದ ಕಾಲೊಡು ನಡತಿನ ಅಕ್ರಮೊಲೆ ಪರಿಹಾರೊಗಾದ್ ಆಯೆ ಮರಣೊನು ಅನುಭವ ಮಲ್ತಿನೆಡ್ದ್ ದೇವೆರೆಡ್ದ್ ಲೆಪ್ಪಾವೊಂಡಿನಾಕುಲು ವಾಗ್ದಾನ ಆದಿತ್ತಿ ನಿತ್ಯ ಬಾಧ್ಯಸ್ತಿಗೆನ್ ಪಡೆಯೆರೆ ಆಯಡ್ದ್ ಸಾದಿ ಆಂಡ್.

¹⁶ವೀಲ್‌ನಾಮೆ ಉಪ್ಪುನವುಲು ಅವೆನ್ ಬರೆಪಾಯಿನಾಯನ ಮರಣಲಾ ಆದುಪ್ಪೊಡು.

¹⁷ವೀಲ್‌ನಾಮೆ ಸೈತಿ ಬೊಕ್ಕ ನಡಪುನವು ಅತ್ತಂದೆ ಬರೆಪಾಯಿನಾಯೆ ಜೀವೊಡು ಉಪ್ಪುನಗ ಏಪೊಗ್ಲಾ ಸಂದುಜಿ.

¹⁸ಇಂಚ ಉಪ್ಪುನಗ ಸುರುತ್ತ ಒಡಂಬಡಿಕೆಯಾಂಡಲಾ ನೆತ್ತೆರ್‌ದಾಂತೆ ಉಂಡಾತಿಜಿ.

¹⁹ಮೋಶೆ ದೇವೆರೆ ಮಾತ ವಿಧಿಲೆನ್ ನ್ಯಾಯಕಟ್ಟ್‌ದ ಪ್ರಕಾರ ಜನೊಕುಲೆಗ್ ಮಾತೆರೆಗ್ ಪಂಡಿ ಬೊಕ್ಕ ನೀರ್, ಕೆಂಪು ಉಣ್ಣೆ, ಹಿಸ್ಸೋಪ್‍ದ ಕಡ್ಡಿ ನೆತ್ತೊಟ್ಟುಗು ಬೋರಿ ಕಂಜಿಲೆ ಬೊಕ್ಕ ಏಡ್‌ಲೆ ನೆತ್ತೆರ್‌ನ್ ದೆತ್ತೊಂದು, ಉಂದು ದೇವೆರ್ ನಿಕ್ಲೆಗ್ ಅಪ್ಪಣೆ ಕೊರಿ ಒಡಂಬಡಿಕೆನ್ ಸ್ಥಿರ ಮಲ್ಪುನ ನೆತ್ತೆರ್ ಆದುಂಡು ಪಂಡ್ದ್ ಅವೆನ್ ಗ್ರಂಥದ ಮಿತ್ತ್‌ಲಾ ಮಾತ ಜನೊಕುಲೆ ಮಿತ್ತ್‌ಲಾ ತಲ್ತೆ.

²¹ಉಂದತ್ತಂದೆ ಗುಡಾರದ ಮಿತ್ತ್‌ಲಾ ದೇವೆರೆ ಕೆಲಸೊಗು ಬೋಡಾಪಿ ಮಾತ ವಸ್ತುಲೆ ಮಿತ್ತ್‌ಲಾ ಅವ್ವೇ ರೀತಿಡ್ ನೆತ್ತೆರ್‌ನ್ ತಲ್ತೆ.

²²ನಿಜಾದ್ ನ್ಯಾಯಕಟ್ಟ್‌ದ ಪ್ರಕಾರ ಹೆಚ್ಚಿಕಡಿಮೆ ಮಾತ ವಸ್ತುಲು ನೆತ್ತೆರ್‌ಡ್ದೇ ಶುದ್ಧ ಆಪುಂಡು. ನೆತ್ತೆರ್ ಗುಪ್ಪಂದೆ ಪಾಪ ಪರಿಹಾರ ಉಂಡಾಪುಜಿ.

²³ಪರಲೋಕದ ವಸ್ತುಲೆಗ್ ಪ್ರತಿರೂಪ ಆದುಪ್ಪು ವಸ್ತುಲೆ ಶುದ್ಧೀಕರಣೊಗಾದ್ ಇಂಚಿತ್ತಿ ಬಲಿಲು ಅವಶ್ಯ ಆದಿತ್ತಿನೆಡ್ದ್ ಪರಲೋಕದೆಕ್ಕ್ ಉಂದೆಡ್ದ್ ಹೆಚ್ಚಿದ ಯಜ್ಞೊಲು ಬೋಡು.

²⁴ದಾಯೆಗಂದ್ಂಡ ಕ್ರಿಸ್ತೆ ನಿಜವಾಯಿನ ದೇವಾಲಯೊಗು ತಕ್ಕದಾಯೆ ಆದಿತ್ತ್‌ದ್ ಕೈಡ್ದ್ ಕಟ್ಟ್‌ದುಪ್ಪುನ ಆಲಯೊಡು ಪೊಗ್ಗಂದೆ ದೇವೆರೆ ಎದುರುಡು ನಂಕಾದ್ ತೋಜಾವೊನಿಯೆರೆ ಇತ್ತೆ ಪರಲೋಕೊಗು ಸೇರಿಯೆ.

²⁵ಉಂದತ್ತಂದೆ ಪ್ರಧಾನಯಾಜಕೆ ವರ್ಸ ವರ್ಸಲಾ ಬಾಕಿದ ನೆತ್ತೆರ್‌ನ್ ದೆತ್ತೊಂದು ಪರಿಶುದ್ಧ ಆಲಯೊಡು ಪೋಪಿಲೆಕ್ಕನೆ ಆಯೆ ತನನ್ ದಿಂಜ ಸರ್ತಿ ಅರ್ಪಣೆ ಮಲ್ಪುನೆಕ್ಕಾದ್ ಪರಲೋಕೊಗು ಪೋಯಿಜೆ.

²⁶ಅಂಚ ಅರ್ಪಣೆ ಮಲ್ಪೊಡಾಯಿ ಪಕ್ಷೊಡು ಆಯೆ ಲೋಕಾದಿಡ್ದೇ ಏತೋ ಸರಿ ಸಂಕಟೊನು ಅನುಭವ ಮಲ್ತ್‌ದ್ ಸೈಯೊಡಿತ್ತ್‌ಂಡ್. ಆಂಡ ಅಂಚತ್ತ್, ಒಂಜೇ ಸರ್ತಿಗ್ ಯುಗಾಂತ್ಯಕಾಲೊಡೇ ಆಯೆ ಪಾಪೊಲೆನ್ ದೆತ್ತ್ ಪಾಡುನೆಕ್ಕಾದ್ ತನನ್ ಯಜ್ಞಮಲ್ಪುನಾಯೆ ಆದ್ ತೋಜಿದ್ ಬತ್ತೆ.

²⁷ಒಂಜೇ ಸರಿ ಸೈಪಿನವುಲಾ ಐಡ್ದ್ ಬೊಕ್ಕ ನ್ಯಾಯತೀರ್ಪುಲಾ ನರಮಾನಿಲೆಗ್ ಎಂಚ ನೇಮಕ ಆತ್ಂಡ,

²⁸ಅಂಚೆನೇ ಕ್ರಿಸ್ತೆಲಾ ಮಾತ ನರಮಾನಿಲೆ ಪಾಪೊಲೆನ್ ತುಂಬೊನಿಯೆರೆಗಾದ್ ಒಂಜೇ ಸರಿ ಅರ್ಪಣೆ ಮಲ್ತೊಂಡೆ. ಬೊಕ್ಕ ತನನ್ ನಿರೀಕ್ಷೆ ಮಲ್ಪುನಾಕುಲೆಗಾದ್ ರಕ್ಷಣೆನ್ ಉಂಡು ಮಲ್ಪುನೆಕ್ಕಾದ್ ಪಾಪ ಸಮ್ಮಂಧದಾಂತಿನಾಯೆ ಆದ್ ರಡ್ಡನೆ ಸರ್ತಿ ತೋಜಿದ್ ಬರ್ಪೆ.