Read Tulu ಯಾಕೋಬು 2 Bible Online

ಯಾಕೋಬು 2 - Tulu bible

ಯಾಕೋಬು 2

¹ಎನ ಸಹೋದ್ರೆರೇ, ಮೈಮೆದ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ ನಂಬಿಕೆ ದೀತಿನಕುಲಾದುಪ್ಪು ನಿಕುಲು ಭೇದಭಾವ ಮಲ್ಪೆರೆ ಬಲ್ಲಿ.

²ಎಂಚಂದ್ಂಡ, ಒರಿ ಬಂಗಾರ್‌ದ ಉಂಗಿಲ, ಎಡ್ಡೆ ಕುಂಟುನು ಪಾಡೊಂದು ಬೊಕ್ಕೊರಿ ಬಡವೆ ಮೈಲೆ ಕುಂಟು ಪಾಡೊಂದು ನಿಕ್ಲೆ ಸಭೆಕ್ ಬನ್ನಗ,

³ನಿಕುಲು ಎಡ್ಡೆ ಕುಂಟು ಪಾಡ್ದಿನಾಯಗ್, “ಮರ್ಯಾದಿ ಕೊರ್ದು ಎದುರುಡು ಕುಲ್ಲಾದ್,” ಬೊಕ್ಕ ಬಡವಗ್, “ಈ ಅಲ್ಪ ದೂರೊಡು ಉಂತುಲ, ಇಜ್ಜಾಂಡ ಎನ ಕಾರಕೈತಲ್ ಕುಲ್ಲುಲ,” ಅಂದ್‌ದ್ ಪಂಡರ್ಡ,

⁴ನಿಕುಲು ನಿಕ್ಲೆ ಉಲಯಿ ಭೇದಭಾವ ಮಲ್ತ್‌ದ್, ಹಾಳ್ ಆಲೋಚನೆಡ್ದ್ ತೀರ್ಪು ಮಲ್ಪುನಾಕುಲು ಆಯರತ್ತಾ?

⁵ಎನ ಪ್ರೀತಿದ ಸಹೋದ್ರೆರೇ ಕೇನ್ಲೆ, ದೇವೆರ್ ಈ ಲೋಕದ ಬಡವನ್ ಅಜತ್‌ದ್ ನಂಬಿಕೆಡ್ ಐಶ್ವರ್ಯವಂತೆ ಆದ್ ಮಲ್ತ್‌ದಿಜೆನಾ? ತನನ್ ಪ್ರೀತಿ ಮಲ್ಪುನಾಕುಲೆಗ್ ದೇವೆರ್ ವಾಗ್ದಾನ ಮಲ್ತ್‌ದಿನ ಪರಲೋಕ ರಾಜ್ಯ ಅಕ್ಲೆಗ್ಲಾ ಅಕ್ಲೆನ ಸ್ವಂತ ಆದ್ ತಿಕ್ಕುಂಡತ್ತಾ?

⁶ನಿಕುಲಾಂಡಲಾ ಬಡವೆರೆಗ್ ಅವಮಾನ ಮಲ್ಪುವರ್ ಅತ್ತಂದೆ ನಿಕ್ಲೆನ್ ಬಲಾತ್ಕಾರೊಡು ನ್ಯಾಯಾಲಯೊಗು ಒಯ್ಪುನಾಕುಲು ಐಶ್ವರ್ಯವಂತೆರೇ ಅತ್ತಾ?

⁷ನಿಕುಲು ಆರಾಧನೆ ಮಲ್ಪುನ ಕ್ರಿಸ್ತನ ಎಡ್ಡೆ ಪುದರ್‌ನ್ ದೂಷಿಯುನಾಕುಲು ಅಕುಲೇ ಅತ್ತಾ?

⁸ಆಂಡಲಾ ನ್ಯಾಯಕಟ್ಟ್‌ಗ್ ಸರಿಯಾದ್ ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪೊಡು ಇನ್ಪಿನ ರಾಜ ನಿಯಮೊಲೆನ್ ಕೈಕೊನುವರ್ಡ ನಿಕುಲು ಎಡ್ಡೆಂತಿನೆನ್ ಮಲ್ಪುನಾಕುಲು ಆದುಲ್ಲರ್.

⁹ಆಂಡ ನಿಕುಲು ಭೇದಭಾವ ಮಲ್ಪುನಾಕುಲು ಆದಿತ್ತ್ಂಡ ಪಾಪ ಮಲ್ಪುನಾಕುಲು ಆದಿತ್ತ್‌ದ್ ಅಪರಾಧಿಲು ಅಂದ್‌ದ್ ನ್ಯಾಯಕಟ್ಟ್‌ಡ್ದ್‌ ನಿಕ್ಲೆಗ್ ತೀರ್ಪು ಆಪುಂಡು.

¹⁰ದಾಯೆಗಂದ್ಂಡ, ಒರಿ ಇಡೀ ನ್ಯಾಯಕಟ್ಟ್‌ದ ಲೆಕ್ಕ ನಡತ್‌ದ್ ಒಂಜೆಟ್ಟ್ ತತ್ತೆಡ, ಆಯೆ ಮಾತೆಟ್ಲಾ ತತ್ತಿನಾಯೆ ಆದುಲ್ಲೆ.

¹¹ದಾಯೆಗಂದ್ಂಡ, “ವ್ಯಭಿಚಾರ ಮಲ್ಪೆರೆ ಬಲ್ಲಿ” ಪಂಡಿನ ಅವ್ವೇ ದೇವೆರ್, “ಕೆರಿಯೆರೆ ಬಲ್ಲಿ” ಪಂಡ್ದ್‌ಲಾ ಪನ್ತೆ. ಅಂಚಾದ್ ಈ ವ್ಯಭಿಚಾರ ಮಲ್ತ್‌ಜಿಡಲಾ ಒರಿಯನ್ ಕೆರಿಯಡ, ನ್ಯಾಯಕಟ್ಟ್‌ಗ್ ತತ್ತಿನಾಯೆ ಆದುಲ್ಲ.

¹²ಅಂಚಾದ್ ನಿಕ್ಲೆನ್ ಬುಡುಗಡೆ ಮಲ್ಪುನ ನ್ಯಾಯಕಟ್ಟ್‌ಡ್ದೇ ನಿಕ್ಲೆಗ್ ತೀರ್ಪು ಆಪುಂಡು ಇನ್ಪಿನೆನ್ ತೆರಿಯೊಂದು ಐಕ್ ತಕ್ಕ ಪಾತೆರ್ಲೆ, ಕಾರ್ಯ ಮಲ್ಪುಲೆ.

¹³ದಾಯೆಗಂದ್ಂಡ, ಕರುಣೆ ತೋಜಾವಂದಿನಾಯಗ್ ಕರುಣೆ ತಿಕ್ಕಂದ್. ಆಂಡ ಈ ಕರುಣೆ ತೋಜಾಯಡ, ದೇವೆರ್ ನಿನನ್ ನ್ಯಾಯತೀರ್ಪು ಮಲ್ಪುನಗ ನಿಕ್ಕ್ ಕರುಣೆ ತೋಜಾವೆ.

¹⁴ಎನ ಸಹೋದ್ರೆರೇ, ನಿಕ್ಲೆಡ್ ಒರಿ ನಂಬಿಕೆ ಉಂಡು ಅಂದ್‌ದ್ ಪನೊಂದು, ಆಯ ಕ್ರಿಯೊಲೆಡ್ ಅವು ತೋಜಿದ್ ಬತ್ತ್‌ಜಿಡ ದಾನೆ ಪ್ರಯೋಜನ? ಅಂಚಿತ್ತಿ ನಂಬಿಕೆ ಆಯನ್ ರಕ್ಷಣೆ ಮಲ್ಪುಂಡಾ?

¹⁵ಒರಿ ಸಹೋದ್ರಗ್ ಅತ್ತ್‌ಡ ಸಹೋದ್ರಿಗ್ ಕುಂಟು, ದಿನತ ಪಡಿ ದಾಂತೆ ಉಪ್ಪುನಗ,

¹⁶ನಿಕ್ಲೆಡ್ ಒರಿ ಅಕ್ಲೆ ಶರೀರೊಗು ಬೋಡಾಪಿನೆನ್ ಕೊರಂದೆ, ಸಮಾಧಾನೊಡು ಪೋಲೆ, ಚಳಿ ಕೈತೊನ್ಲೆ, ಬಂಜಾರ ಉನ್ಲೆ ಅಂದ್‌ದ್ ಪಾತೆರೊಡು ಪಂಡ್ಂಡ ದಾನೆ ಪ್ರಯೋಜನ?

¹⁷ಅಂಚಿನ ಕ್ರಿಯೊಲುದಾಂತಿನ ನಂಬಿಕೆ ತನಡ ಜೀವದಾಂತಿನವು ಆದುಂಡು.

¹⁸ಆಂಡ ಏರಾಂಡಲಾ ಒರಿ, “ಒರಿಯಡ ನಂಬಿಕೆ ಉಂಡು, ಬೊಕ್ಕೊರಿಯಡ ಕ್ರಿಯೊಲು ಉಂಡು” ಅಂದ್‌ದ್ ಪನ್ಪೆ. ಆಂಡ ಎನ ಉತ್ತರ, “ಏರಾಂಡಲಾ ಕ್ರಿಯೊಲಿಜ್ಜಂದೆ ನಂಬಿಕೆನ್ ಎಂಚ ತೋಜಾವೊಲಿ, ಯಾನ್ ಎನ ಕ್ರಿಯೊಲೆಡ್ ನಂಬಿಕೆನ್ ನಿಕ್ಕ್ ತೋಜಾವೆ,” ಅಂದ್‌ದ್ ಪನುವೆ ಅತ್ತಾ?

¹⁹ಒರಿಯೇ ದೇವೆರ್ ಉಲ್ಲೆ ಅಂದ್‌ದ್ ಈ ನಂಬುವನಾ? ಅವು ಎಡ್ಡೆನೇ. ದೆವ್ವೊಲುಲಾ ಉಂದೆನ್ ನಂಬುದು ಪೋಡಿಗೆಡ್ ನಡುಗುವ.

²⁰ಓ ಬುದ್ಧಿದಾಂತಿನಾಯಾ, ಕ್ರಿಯೆದಾಂತಿ ನಂಬಿಕೆ ವ್ಯರ್ಥ ಆದುಂಡು ಪನ್ಪಿನೆಕ್ಕ್ ದೃಷ್ಟಾಂತ ಬೋಡಾ?

²¹ನಮ ಅಮ್ಮೆ ಆಯಿ ಅಬ್ರಹಾಮು ತನ ಮಗೆ ಇಸಾಕನ್ ಬಲಿಪೀಠದ ಮಿತ್ತ್ ಅರ್ಪಣೆ ಮಲ್ಪುನಗ ನೀತಿದಾಯೆ ಅಂದ್‌ದ್ ತೀರ್ಪು ಪಡೆಯಿನಿ ನಂಬಿಕೆದ ಕ್ರಿಯೊಲೆಡ್ದೇ ಅತ್ತಾ?

²²ಆಯನ ನಂಬಿಕೆಲಾ ಕ್ರಿಯೊಲುಲಾ ಅಲ್ಪ ಒಟ್ಟಾದ್ ಬೇಲೆ ಮಲ್ತ್ಂಡ್. ಆಯನ ಕ್ರಿಯೊಲೆಡ್ದಾದ್ ಆಯನ ನಂಬಿಕೆ ಪೂರ್ತಿ ಆಂಡ್ ಅಂದ್‌ದ್ ತೋಜುಂಡತ್ತಾ.

²³ಅಬ್ರಹಾಮು ದೇವೆರೆನ್ ನಂಬಿಯೆ. ಬೊಕ್ಕ ಆ ನಂಬಿಕೆನೇ ಆಯನ ಲೆಖ್ಖೊಗು ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್ ಪನ್ಪಿನ ಶಾಸ್ತ್ರದ ಪಾತೆರ ಇಂಚ ಪೂರ್ತಿ ಆಂಡ್. ಬೊಕ್ಕ ದೇವೆರೆ ಸ್ನೇಹಿತೆ ಪನ್ಪಿನ ಪುದರ್ ಆಯಗ್ ಬತ್ತ್ಂಡ್.

²⁴ನರಮಾನಿ ಕ್ರಿಯೊಲೆಡ್ದ್ ನೀತಿದಾಯೆ ಅಂದ್‌ದ್ ತೀರ್ಪು ಪಡೆಪೆ ಅತ್ತಂದೆ ಬಜೀ ನಂಬಿಕೆಡ್ದೇ ಅತ್ತ್ ಅಂದ್‌ದ್ ತೂಪರ್.

²⁵ಅವ್ವೇ ರೀತಿಡ್ ವೇಶ್ಯೆ ರಹಾಬುಲಾ ಗೂಢಾಚಾರೆರೆನ್ ತನ ಇಲ್ಲಡ್ ಸೇರಾವೊಂದು, ಬೇತೆ ಸಾದಿಡ್ ಅಕ್ಲೆನ್ ಕಡಪುಡ್ದು ಕೊರ್ದು ಕ್ರಿಯೊಲೆಡ್ದ್ ನೀತಿವಂತೆದಿ ಅಂದ್‌ದ್ ತೀರ್ಪು ಪಡೆಯಲ್ ಅತ್ತಾ?

²⁶ಆತ್ಮದಾಂತಿ ಶರೀರ ಎಂಚ ಜೀವದಾಂತಿನವು ಆದುಂಡಾ, ಅಂಚೆನೇ ಕ್ರಿಯೆದಾಂತಿ ನಂಬಿಕೆಲಾ ಜೀವದಾಂತಿನವು ಆದುಂಡು.