Read Tulu ಯಾಕೋಬು 5 Bible Online

ಯಾಕೋಬು 5 - Tulu bible

ಯಾಕೋಬು 5

¹ಐಶ್ವರ್ಯವಂತೆರೇ, ಇಂಚಿ ಕೇನ್ಲೆ, ನಿಕ್ಲೆಗ್ ಬರಿಯೆರೆ ಉಪ್ಪುನ ಭಯಂಕರ ಉಪದ್ರೊಲೆಗಾದ್ ಕಣ್ಣೀರ್ ದೀದ್ ಬುಲ್ಪುಲೆ.

²ನಿಕ್ಲೆ ಐಶ್ವರ್ಯ ಹಾಳಾದ್ ಪೋತುಂಡು ಬೊಕ್ಕ ನಿಕ್ಲೆನ ಎಡ್ಡೆ ಕುಂಟುಲು ಕುಟ್ಟೆ ತಿಂದ್‌ದ್ ಪೋತುಂಡು.

³ನಿಕ್ಲೆನ ಬೊಳ್ಳಿ ಬಂಗಾರೊಗು ಕಲೆಂಗ್ ಪತ್ತ್‌ದ್ಂಡ್. ಐತ ಕಲೆಂಗ್ ನ್ಯಾಯತೀರ್ಪುದ ದಿನೊಟು ನಿಕ್ಲೆಗ್ ವಿರೋಧಾದ್ ಸಾಕ್ಷಿ ಆದ್ ಉಂತುಂಡು. ಆ ಕಲೆಂಗ್ ನಿಕ್ಲೆ ಶರೀರೊನು ತೂತ ಲೆಕ್ಕ ತಿಂದ್‌ದ್ ಪಾಡುಂಡು. ಅಂತ್ಯದಿನೊಕುಲೆಗ್ ನಿಕುಲು ಸಂಪೊತ್ತುನು ಕೂಡಾವೊಂಡರ್.

⁴ಕೇನ್ಲೆ, ಮಜೂರಿ ಕೊರಂದೆ ನಿಕುಲು ಕಂಡದ ಬೇಲೆದಾಕುಲೆಗ್ ಮೋಸ ಮಲ್ತ್‌ದರ್, ಅಕುಲು ಬುಲ್ಪುವೆರ್. ಅಕ್ಲೆನ ಬುಲ್ಪು ಪರಲೋಕ ಸೈನ್ಯದ ಕರ್ತವ ಕೆಬಿಕ್ ಬೂರ್ದುಂಡು.

⁵ಭೂಮಿದ ಮಿತ್ತ್ ನಿಕುಲು ಸಂಭ್ರಮೊಡು ಬೊಕ್ಕ ಮನಸ್ ಬತ್ತಿಲೆಕ್ಕ ನಡತೊಂಡರ್. ಬಲಿ ಕೊರ್ಪಿನ ದಿನೊಟು ನಿಕ್ಲೆ ಉಡಲ್‌ನ್ ಸೊರ್ಕಾವೊಂದರ್.

⁶ನಿಕುಲು ನೀತಿವಂತನ್ ಕಂಡಿಸಾದ್ ಕೆರ್ದ್ ಪಾಡಿಯರ್. ಆಯೆ ನಿಕ್ಲೆಗ್ ಎದುರುಂತುಜೆ.

⁷ಸಹೋದ್ರೆರೇ, ಕರ್ತವೆ ಬನ್ನಮುಟ್ಟ ತಾಳ್ಮೆಡ್ ಕಾತೊಂದುಪ್ಪುಲೆ. ಬೆನ್ನಿದಾಯನ್ ತೂಲೆ, ಆಯೆ ಭೂಮಿದ ಎಡ್ಡೆ ಫಲೊನು ಕಾತೊಂದು, ಸುರುತ್ತ ಬರ್ಸೊಗ್ಲಾ ಅಕೇರಿದ ಬರ್ಸೊಗ್ಲಾ ತಾಳ್ಮೆಡ್ ಕಾತೊಂದುಪ್ಪುವೆ.

⁸ನಿಕುಲುಲಾ ಅಂಚೆನೇ ತಾಳ್ಮೆಡುಪ್ಪುಲೆ. ನಿಕ್ಲೆ ಉಡಲ್‌ನ್ ಸ್ಥಿರ ಮಲ್ತೊನ್ಲೆ, ದಾಯೆಗಂದ್ಂಡ, ಕರ್ತವೆ ಬರ್ಪಿ ದಿನ ಕೈತಲ್‌ ಉಂಡು.

⁹ಸಹೋದ್ರೆರೇ, ನಿಕ್ಲೆಗ್ ನ್ಯಾಯತೀರ್ಪು ಆವಂದಿಲೆಕ್ಕ ಒರಿಯಗ್ ಒರಿ ಗುಣುಗುಟ್ಟಡೆ. ತೂಲೆ, ನ್ಯಾಯಾಧಿಪತಿ ಬಾಕಿಲ್‌ಡೇ ಉಲ್ಲೆ.

¹⁰ಸಹೋದ್ರೆರೇ, ಕರ್ತವ ಪುದರ್‌ಡ್ ಪಾತೆರಿ ಪ್ರವಾದಿಲೆನ್ ನೆನೆಪು ಮಲ್ತೊನ್ಲೆ. ಭಂಗೊನು ತಾಳ್ಮೆಡ್ ತಾಳೊನುನೆಟ್ ಅಕ್ಲೆನ್ ಮಾದ್ರಿ ಆದ್ ಮಲ್ತೊನ್ಲೆ.

¹¹ಇಂದಾ, ತಾಳ್ಮೆಡ್ ತಾಳೊನುನಾಕುಲು ಅಂದ್‌ದ್ ನಮ ಪನ್ಪ. ಯೋಬನ ತಾಳ್ಮೆದ ಸಂಗತಿಡ್ ಕೇನ್ಲೆ, ಕರ್ತವೆ ಕಡೆಕ್ಕ್ ಆಯಗ್ ಮಲ್ತಿನೆನ್ ತೂಲೆ, ಕರ್ತವೆ ದಿಂಜ ಕನಿಕರದಾಯೆಲಾ ಕರುಣೆದಾಯೆಲಾ ಆದುಲ್ಲೆ.

¹²ಎನ ಸಹೋದ್ರೆರೇ, ಆಜ ಪಾಡಡೆ, ಪರಲೋಕದ ಮಿತ್ತ್ ಆವಡ್, ಭೂಮಿದ ಮಿತ್ತ್ ಆವಡ್, ಬೇತೆ ಒಯಿತಾಂಡಲಾ ಮಿತ್ತ್ ಆವಡ್ ಆಜ ಪಾಡಡೆ. ನಿಕ್ಲೆನ ಪಾತೆರ ಅಂದ್ ಆದಿತ್ತ್ಂಡ ಅಂದ್, ಅತ್ತ್ ಆದಿತ್ತ್ಂಡ ಅತ್ತ್ ಆದುಪ್ಪಡ್. ಇಂಚಾಂಡ ನಿಕುಲು ನ್ಯಾಯತೀರ್ಪುಗು ಸೇರುಜರ್.

¹³ನಿಕ್ಲೆಡ್ ಒರಿ ಭಂಗೊಡು ಉಲ್ಲೆನಾ ಆಯೆ ಪ್ರಾರ್ಥನೆ ಮಲ್ಪಡ್, ಒರಿ ಸಂತೋಷೊಡು ಉಲ್ಲೆನಾ ಆಯೆ ದೇವೆರೆಗ್ ಸ್ತುತಿರಾಗ ಮಲ್ಪಡ್.

¹⁴ನಿಕ್ಲೆಡ್ ಏರಾಂಡಲಾ ಸೀಕ್‌ಡ್ ಉಲ್ಲೆರಾ? ಆಯೆ ಸಭೆತ ಹಿರಿಯೆರೆನ್ ಬರಿಯೆರೆ ಪನಡ್, ಅಕುಲು ಬತ್ತ್‌ದ್ ಕರ್ತವ ಪುದರ್‌ಡ್ ಎಣ್ಣೆ ಪೂಜಿದ್, ಆಯಗಾದ್ ಪ್ರಾರ್ಥನೆ ಮಲ್ಪಡ್.

¹⁵ನಂಬಿಕೆಡ್ ಮಲ್ತಿನ ಪ್ರಾರ್ಥನೆ ಸೀಕ್‌ದಾಯನ್ ಗುಣ ಮಲ್ಪುಂಡು ಬೊಕ್ಕ ಕರ್ತವೆಲಾ ಆಯನ್ ಗುಣ ಮಲ್ಪುವೆ. ಆಯೆ ಪಾಪ ಮಲ್ತ್‌ದಿತ್ತ್‌ಂಡ ಆಯಗ್ ಬುಡುಗಡೆ ಆಪುಂಡು.

¹⁶ಅಂಚಾದ್ ನಿಕುಲು ಗುಣ ಆವೊಡಾಂಡ ನಿಕ್ಲೆನ ಪಾಪೊಲೆನ್ ಒರಿಯಗ್ ಒರಿ ಅರಿಕೆ ಮಲ್ತೊಂದು ಒರಿಯಗ್ ಬೋಡಾದ್ ಒರಿ ಪ್ರಾರ್ಥನೆ ಮಲ್ಪುಲೆ. ನೀತಿವಂತನ ಅತ್ಯಾಸಕ್ತಿದ ಪ್ರಾರ್ಥನೆ ಬಾರಿ ಬಲತ್ತವು ಆದುಂಡು.

¹⁷ಎಲೀಯೆ ನಮ ಲೆಕ್ಕಂತಿ ಸ್ವಭಾವದ ಒರಿ ನರಮಾನಿ ಆದಿತ್ತೆ. ಆಂಡ ಆಯೆ ಪ್ರಾರ್ಥನೆದ ಮಿತ್ತ್ ಪ್ರಾರ್ಥನೆ ಮಲ್ಪುನಗ ಮೂಜಿ ವರ್ಸ ಆಜಿ ತಿಂಗೊಲು ಭೂಮಿದ ಮಿತ್ತ್ ಬರ್ಸನೇ ಬತ್ತ್‌ಜಿ.

¹⁸ಬೊಕ್ಕ ಆಯೆ ಕುಡ ಪ್ರಾರ್ಥನೆ ಮಲ್ಪುನಗ ಬಾನೊಡ್ದು ಬರ್ಸ ದೊರಿಂಡ್, ಭೂಮಿಡ್ ಬುಲೆ ಬುಲೆಂಡ್.

¹⁹ಎನ ಸಹೋದ್ರೆರೇ, ನಿಕ್ಲೆಡ್ ಏರಾಂಡಲಾ ಒರಿ ಸತ್ಯೊನು ಬುಡ್ದು ದೂರ ಪೋಯೆಡ, ಅಂಚಿತ್ತಿನಾಯನ್ ಕುಡ ಪಿರ ಕನಲೆ.

²⁰ಒರಿ ಪಾಪಿನ್ ತತ್ತಿ ಸಾದಿಡ್ದ್ ಪಿರ ಕನ ಬತ್ತಿನಾಯೆ, ಆಯನ ಆತ್ಮೊನು ಮರಣೊಡ್ದು ತಪ್ಪಾದ್, ಆಯನ ಲೆಕ್ಕದಾಂತಿ ಪಾಪೊಲೆಗ್ ಮಾಪು ತಿಕ್ಕುಂಡು ಅಂದ್‌ದ್ ತೆರಿಯೊನಡ್.