Read Tulu 1 ಪೇತ್ರೆ 2 Bible Online

1 ಪೇತ್ರೆ 2 - Tulu bible

1 ಪೇತ್ರೆ 2

¹ಅಂಚಾಯಿನೆಡ್ದ್ ಮಾತ ಪಡಿಕೆಂತಿನೆನ್, ಮಾತ ವಂಚನೆನ್, ಕಪಟೊನು, ಕಿಚ್ಚಿನ್, ಮಾತ ತರತ ನಿಂದೆಲೆನ್ ಬುಡ್ದು ಬುಡ್ಲೆ.

²ಪುರುಬಾಲೆಲೆ ಲೆಕ್ಕ ನಿಕುಲು ದೇವೆರೆ ವಾಕ್ಯ ಪನ್ಪಿ ಶುದ್ಧವಾಯಿನ ಆತ್ಮೀಕ ಪೇರ್‌ನ್ ಬಯಕ್ಲೆ. ಐಟ್ಟ್ ಬಲ ಪಡೆದ್ ರಕ್ಷಣೆನ್ ಪಡೆವರ್.

³ಕರ್ತವೆ ಕರುಣೆದಾಯೆ ಅಂದ್‌ದ್ ನಿಕುಲು ಅನುಭವ ಮಲ್ತ್‌ದ್ ತೆರಿಯೊಂದರ್.

⁴ನಿಕುಲು ಜೀವ ಇತ್ತಿ ಕಲ್ಲಾದುಪ್ಪು ಕ್ರಿಸ್ತನ ಕೈತಲ್‌ ಬೈದರ್. ಆ ಕಲ್ಲ್‌ನ್ ನರಮಾನಿಲು ತಿರಸ್ಕಾರ ಮಲ್ತೆರ್ಡಲಾ ಅವು ದೇವೆರೆಡ್ದ್ ಅಜತ್‌ದಿನವುಲಾ ಬಿಲೆ ಇತ್ತಿನವುಲಾ ಆದುಂಡು.

⁵ಐತ ಲೆಕ್ಕನೇ ನಿಕುಲುಲಾ ಜೀವ ಇತ್ತಿ ಕಲ್ಲ್‌ಲು ಆದುಲ್ಲರ್. ನಿಕ್ಲೆನ್ ದೇವೆರ್ ಆತ್ಮಸಮ್ಮಂಧವಾಯಿನ ಮಂದಿರದಂಚ ಕಟ್ಟಾವೊಂದು ಉಲ್ಲರ್. ಬೊಕ್ಕ ಯೇಸು ಕ್ರಿಸ್ತಡ್ದ್ ದೇವೆರೆಗ್ ಒಪ್ಪಿಗೆ ಇತ್ತಿ ಆತ್ಮೀಕ ಬಲಿನ್ ಸಮರ್ಪಣೆ ಮಲ್ಪುನ ಪರಿಶುದ್ಧ ಯಾಜಕ ವರ್ಗದಾಕುಲಾದುಲ್ಲರ್.

⁶ಗ್ರಂಥೊಡು ಪನ್ಪಿಲೆಕ್ಕ, “ಇಂದಾ, ಯಾನ್ ಚೀಯೋನುಡು ಅಜತ್‌ದಿನ ಬಿಲೆ ಇತ್ತಿ ಮೂಲೆಕಲ್ಲ್‌ನ್ ಪಾಡ್ವೆ; ಆಯ ಮಿತ್ತ್ ನಂಬಿಕೆ ದೀಪಿನಾಯಗ್ ನಾಚಿಗೆ ಆವಂದ್.”

⁷ಅಂಚಾಯಿನೆಡ್ದ್ ನಂಬುನಾಕುಲೆಗ್ ಈ ಕಲ್ಲ್ ಬಿಲೆ ಇತ್ತಿನವು ಆದುಂಡು; ನಂಬಂದೆ ಉಪ್ಪುನಾಕುಲು, “ಈ ಕಲ್ಲ್‌ನ್ ಬೊಡ್ಚಿಂದ್‌ದ್ ಬುಡಿಯೆರ್. ಆಂಡ ಬೊಡ್ಚಿಂದ್‌ದ್ ಬುಡ್ತಿ ಕಲ್ಲೇ ಮೂಲೆದ ತರೆಕಲ್ಲಾಂಡ್.”

⁸ಆಂಡ, “ಆ ಕಲ್ಲ್ ಜನೊಕುಲೆನ್ ದಂಟುಲೆಕ್ಕ ಮಲ್ಪು. ಅಂಚೆನೇ ಆ ಕಲ್ಲ್ ಪಾದೆದ ಲೆಕ್ಕ ಜನೊಕುಲೆನ್ ಬೂರುಲೆಕ್ಕ ಮಲ್ಪು,” ಅಂದ್‌ದ್ ಬರೆತಿ ಪಾತೆರ ಸರಿ ಆದುಂಡು. ಅಕುಲು ದೇವೆರೆ ಪಾತೆರೊಗು ಒಳಗಾವಂದಿನೆಡ್ದ್ ದಂಟ್‌ದ್ ಬೂರ್ವೆರ್. ಅಕುಲು ಐಕಾದೆ ನೇಮಕ ಆತೆರ್.

⁹ಆಂಡ ನಿಕುಲು ಅಜತ್‌ದಿನ ಜನಾಂಗೊಲು, ಮಾಮಲ್ಲ ಯಾಜಕ ವರ್ಗದಾಕುಲು, ಪರಿಶುದ್ಧ ಜನಾಂಗೊಲು, ದೇವೆರೆನ ಸ್ವಂತ ಜನೊಕುಲು ಆದುಲ್ಲರ್. ದೇವೆರೆ ಕಾರ್ನಿಕೊಲೆನ್ ತೆರಿಪಾವೆರೆ ಅಜತ್‌ದಿನಾಕುಲು ಆದುಪ್ಪುನೆಡ್ದ್ ದೇವೆರ್ ನಿಕ್ಲೆನ್ ಪಾಪದ ಗರ್ಗಂಡ ಕತ್ತಲೆಡ್ದ್ ಲೆತ್ತ್‌ದ್ ತನ ಮೈಮೆದ ಬೊಲ್ಪುಗು ಸೇರಾದಿನಾಯೆ ಆಯೆನೇ.

¹⁰ಒಂಜಿ ಸಮಯೊಡು ನಿಕುಲು ಪ್ರಜೆಕುಲು ಆದಿತ್ತಿಜರ್; ಇತ್ತೆ ನಿಕುಲು ದೇವೆರೆ ಪ್ರಜೆಕುಲು ಆದುಲ್ಲರ್. ಆ ಸಮಯೊಡು ನಿಕ್ಲೆಗ್ ಕರುಣೆ ತಿಕ್ಕ್‌ದಿಜ್ಜಾಂಡ್; ಇತ್ತೆ ನಿಕ್ಲೆಗ್ ಕರುಣೆ ತಿಕ್ಕ್‌ದ್ಂಡ್.

¹¹ಪ್ರೀತಿದಾಕುಲೇ, ನಿಕುಲು ಈ ಲೋಕದ ಪ್ರಯಾಣಿಕೆರ್‌ಲಾ ಪರದೇಶಿಲುಲಾ ಆದುಪ್ಪುನೆಡ್ದ್ ಆತ್ಮೊಗು ವಿರೋಧ ಆಪಿನ ಶರೀರದ ದುರಾಶೆಲೆಡ್ದ್ ದೂರ ಆದುಪ್ಪುಲೆ ಅಂದ್‌ದ್ ನಿಕ್ಲೆಡ ನಟ್ಟೊನ್ವೆ.

¹²ನಿಕ್ಲೆನ ನಡತೆ ಲೋಕದ ಜನೊಕುಲೆ ನಡುಟು ಎಡ್ಡೆಂತಿನವು ಆದುಪ್ಪಡ್; ಅಪಗ ಅಕುಲು ವಾ ಸಂಗತಿಡ್ ನಿಕ್ಲೆನ್ ಅಕ್ರಮದಾಕುಲು ಅಂದ್‌ದ್ ನಿಂದನೆ ಮಲ್ಪುವೆರಾ, ಅಂಚೆನೆ ನಿಕ್ಲೆನ ಎಡ್ಡೆ ನಡತೆನ್ ತೂದು ಆಯೆ ಕುಡ ಬರ್ಪಿ ದಿನೊಟು ಅಕುಲು ದೇವೆರೆನ್ ಪುಗರ್‌ವೆರ್.

¹³ಕರ್ತವಗಾದ್ ಈ ಲೋಕದ ಅಧಿಕಾರಿಲೆಗ್ ಅಧೀನೆರಾದುಪ್ಪುಲೆ. ಸರ್ವಾಧಿಕಾರಿ ಆದಿತ್ತಿನ ಅರಸುಗ್ಲಾ ಅಧೀನೆರಾದುಪ್ಪುಲೆ.

¹⁴ಅರಸು ಕಡಪುಡುನ ಅಧಿಕಾರಿಲೆಗ್ಲಾ ಅಧೀನೆರಾದುಪ್ಪುಲೆ. ದಾಯೆಗಂದ್ಂಡ ಅಧಿಕಾರಿಲು ತಪ್ಪು ಮಲ್ತಿನಾಕುಲೆನ್ ಶಿಕ್ಷೆ ಕೊರಿಯೆರೆಗ್ಲಾ ಎಡ್ಡೆಂತಿನಾಕುಲೆಗ್ ಉತ್ತೇಜನ ಕೊರಿಯೆರೆಗ್ಲಾ ಸರಕಾರೊಡ್ದು ನೇಮಕ ಆತಿನಾಕುಲು ಪಂಡ್ದ್ ಎನ್ನ್‌ದ್ ಅಕ್ಲೆನ ಪಾತೆರೊನು ಕೇನ್ಲೆ.

¹⁵ತೆರಿಯಂದೆ ಪಾತೆರುನ ಹೆಡ್ಡೆರೆನ ಬಾಯಿನ್ ನಿಕ್ಲೆನ ಎಡ್ಡೆ ನಡತೆಡ್ ಮುಚ್ಚಾವೊಡು ಪನ್ಪಿನವೇ ದೇವೆರೆ ಚಿತ್ತ ಆದುಂಡು.

¹⁶ಸ್ವತಂತ್ರದಾಕುಲೆ ಲೆಕ್ಕ ನಡಪುಲೆ; ಆಂಡ ಪಡಿಕೆಂತಿನೆನ್ ದೆಂಗಾವೆರೆಗ್ ಬೋಡಾದ್ ನಿಕ್ಲೆ ಸ್ವತಂತ್ರೊನು ದುರುಪಯೋಗ ಮಲ್ಪಡೆ. ಆಂಡ ನಿಕುಲು ದೇವೆರೆಗ್ ದಾಸೆರಾದ್ ನಡತೊನ್ಲೆ.

¹⁷ಮಾತೆರೆಗ್ ಮಾನ ಕೊರ್ಲೆ; ಸಹೋದ್ರೆರೆನ್ ಪ್ರೀತಿ ಮಲ್ಪುಲೆ; ದೇವೆರೆ ಪೋಡಿಗೆಡ್ ನಡಪುಲೆ; ಸರಕಾರೊಗು ಒಳಗಾಲೆ.

¹⁸ಚಾಕ್ರಿದಾಕುಲೇ, ನಿಕ್ಲೆನ ಯಜಮಾನ್ಯೆರೆಗ್ ಮಾನ ಕೊರ್ದು ಅಧೀನೆರಾದುಪ್ಪುಲೆ. ಎಡ್ಡೆಂತಿನಾಕುಲೆಗ್ಲಾ ಸಜ್ಜನೆರೆಗ್ಲಾ ಮಾತ್ರ ಅತ್ತ್ ಕಠಿಣಾದುಪ್ಪುನಾಕುಲೆಗ್ಲಾ ತಗ್ಗ್‌ದುಪ್ಪುಲೆ.

¹⁹ಮನಸಾಕ್ಷಿಡ್ ದೇವೆರೆ ದಯ ಉಂಡು ಅಂದ್‌ದ್ ನೆನೆಪುನಾಯೆ ಅನ್ಯಾಯ ತಾಳ್‌ದ್ ಕಷ್ಟೊನು ಸಹಿಸೊಂಡ ಆಯನ್ ದೇವೆರ್ ಮೆಚ್ಚುವೆ ಅಂದ್‌ದ್ ಆಯಗ್ ಗೊತ್ತುಂಡು.

²⁰ಆಂಡ ತಪ್ಪು ಮಲ್ತ್‌ದ್ ಪೆಟ್ಟ್ ತಿನ್ಪಿನೆಟ್ ತಾಳ್ಮೆಡ್ ಉಪ್ಪುನಾಂಡ ಐಟ್ಟ್ ದಾನೆ ಪುಗರಿಕೆ? ಆಂಡ ಎಡ್ಡೆಂತಿನೆನ್ ಮಲ್ತ್‌ದ್ ಕಷ್ಟೊನು ತಾಳ್ಮೆಡ್ ಸಹಿಸೊಂಡ ಅವು ದೇವೆರೆ ದುಂಬು ಮೆಚ್ಚಿಗೆದವು ಆದುಂಡು.

²¹ಐಕಾದ್ ದೇವೆರ್ ನಿಕ್ಲೆನ್ ಎಡ್ಡೆ ಕೆಲಸೊನು ಮಲ್ತ್‌ದ್ ಕಷ್ಟ ಸೈಸೊನಿಯೆರೆ ಲೆತ್ತ್‌ದೆ, ಅಂಚೆನೆ ಕ್ರಿಸ್ತೆಲಾ ನಿಕ್ಲೆಗ್ ಬೋಡಾದ್ ಕಷ್ಟ ತಿಂದ್‌ದ್, ನಿಕುಲು ಆಯನ ಪಿರವುಡು ನಡಪುಲೆಕ್ಕ ಮಾದ್ರಿ ತೋಜಾಯೆ.

²²“ಆಯೆ ವಾ ಪಾಪಲಾ ಮಲ್ತ್‌ದಿಜೆ; ಆಯನ ಬಾಯಿಡ್ದ್ ವಾ ಕುರ್ತೆಲ್ ಪಾತೆರಲಾ ಬೈದಿಜಿ .”

²³ಆಯಗ್ ನೆರ್ಪಿನಾಕುಲೆಗ್ ಪಿರ ನೆರ್ತಿಜೆ; ದಿಂಜ ಶ್ರಮೆನ್ ಅನುಭವ ಮಲ್ಪುನಗ ಏರೆನ್ಲಾ ಪೋಡಿಯಾಯಿಜೆ. ಆಂಡ ನೀತಿಡ್ ನ್ಯಾಯತೀರ್ಪು ಮಲ್ಪು ದೇವೆರೆಗ್ ತನನ್ ಒಪ್ಪಿಸಾಯೆ.

²⁴ನಮ ಪಾಪೊಲೆಗಾದ್ ಸೈತ್‌ದ್ ನೀತಿವಂತೆರಾದ್ ಬದುಕುಲೆಕ್ಕ ಯೇಸು ನಮ ಪಾಪೊಲೆನ್ ತಾನೇ ತನ ಶರೀರೊಡು ತುಂಬೊಂದು ಮರಣದ ಕಂಬೊನು ಏರಿಯೆ. ಆಯನ ಗಾಯೊಡ್ದು ನಂಕ್ ಗುಣ ಆಂಡ್.

²⁵ನಿಕುಲು ಸಾದಿ ತತ್ತ್‌ದ್ ಪೋತಿ ಕುರಿಕುಲು ಆದಿತ್ತರ್. ಆಂಡ ಇತ್ತೆ ನಿಕುಲು ಪಿರ ತಿರ್ಗ್‌ದ್ ನಿಕ್ಲೆನ ಆತ್ಮೊನು ಕಾಪುನ ಕುರುಬೆಲಾ ಪರಂಬರಿಪುನಾಯೆಲಾ ಆದುಪ್ಪು ಯೇಸು ಕ್ರಿಸ್ತನ ಕೈತಲ್‌ ಬೈದರ್.