Read Tulu 1 ಪೇತ್ರೆ 3 Bible Online

1 ಪೇತ್ರೆ 3 - Tulu bible

1 ಪೇತ್ರೆ 3

¹ಅಂಚೆನೆ ಪೊಂಜೊವುಲೆ, ನಿಕ್ಲೆನ ಕಂಡನಿಯಾಡ್ಲೆಗ್ ವಶ ಆದುಪ್ಪುಲೆ.

²ಮೊಕ್ಲೆಡ್ ಕೆಲೆವೆರ್ ದೇವೆರೆ ಪಾತೆರೊನು ನಂಬಂದೆ ಇತ್ತ್ಂಡಲಾ,

³ನಿಕ್ಲೆನ ಎಡ್ಡೆತನೊನ್ಲಾ ಭಯಭಕ್ತಿದ ನಡತೆನ್ಲಾ ತೂದು ವಾಕ್ಯೊಪದೇಶ ಇಜ್ಜಾಂಡಲಾ ಎಡ್ಡೆ ಸಾದಿಗ್ ಬರುವೆರ್.

⁴ತರೆಕುಜಲ್ ನೆಯ್ಪಿನವು, ಬಂಗಾರ್ ಪಾಡೊನುನವು, ಊಂಚಿದ ಕುಂಟು ಪಾಡೊನುನವು, ಉಂದು ನಿಕ್ಲೆನ ಪಿದಯಿದ ಅಲಂಕಾರ ಆದುಪ್ಪೆರೆ ಬಲ್ಲಿ.

⁵ನಿಕ್ಲೆ ಉಡಲ್‌ದ ಉಲಯಿ ಉಪ್ಪುನ ನಾಶಾವಂದಿ ಸಜ್ಜನಿಗೆ ಬೊಕ್ಕ ಶಾಂತದ ಆತ್ಮ ನಿಕ್ಲೆನ ಅಲಂಕಾರ ಆದುಪ್ಪಡ್, ಅವು ದೇವೆರೆ ದೃಷ್ಟಿಡ್ ಬಾರಿ ಬಿಲೆತವು ಆದುಂಡು. ಇಂಚೆನೆ ಪೂರ್ವಕಾಲೊಡು ದೇವೆರೆ ಮಿತ್ತ್ ನಿರೀಕ್ಷೆ ದೀತಿ ಭಕ್ತೆರಾದುಪ್ಪು ಪೊಂಜೊವುಲು ಇಂಚೆನೆ ತನ್ಕುಲೆನ್ ಅಲಂಕಾರ ಮಲ್ತೊಂಡೆರ್. ಅಕುಲು ತನ್ಕ್‌ಲೆ ಕಂಡನಿಯಾಡ್ಲೆಗ್ ಒಳಗಾದಿತ್ತೆರ್.

⁶ಸಾರಲಾ ಅಂಚೆನೆ ಅಬ್ರಹಾಮುಗು ಒಳಗಾದಿತ್ತ್‌ದ್, ಆಯನ್ ತನ ಯಜಮಾನೆ ಅಂದ್‌ದ್ ಲೆತ್ತಲ್. ನಿಕುಲು ಆ ಸಾರನ ಜೋಕುಲು ಆದುಲ್ಲರ್. ನಿಕುಲು ಎಡ್ಡೆಂತಿನೆನ್ ಮಲ್ತೊಂದಿತ್ತರ್ಡ ಒಯಿಕ್‌ಲಾ ಪೋಡಿಯೊಡು ಅಂದ್‌ದ್ ಇಜ್ಜಿ.

⁷ಅಂಚೆನೆ ಕಂಡನಿಯಾಡ್ಲೇ, ಪೊಂಜೊವುಲು ನಿಕ್ಲೆಡ್ದ್ ಕಡಿಮೆ ಬಲ ಇತ್ತಿನಾಕುಲು ಅಂದ್‌ದ್ ತೆರಿದ್ ಬೊಡೆದಿಯಾಡ್ಲೆನ್ ಅರ್ಥ ಮಲ್ತೊಂದು ಪೊರ್ಲುಡು ಜೀವನ ನಡಪಾಲೆ. ಅಕುಲು ದಯತ ಜೀವದ ವರೊಕು ನಿಕ್ಲೆನ ಒಟ್ಟುಗು ಪಾಲುದಾರೆರಾದುಲ್ಲೆರ್ ಅಂದ್‌ದ್ ಎನ್ನೊಂದು ಅಕ್ಲೆಗ್ ಮಾನೊನು ಸಂದಾಲೆ. ನಿಕುಲು ಇಂಚ ಮಲ್ತರ್ಡ ನಿಕ್ಲೆ ಪ್ರಾರ್ಥನೆಗ್ ಅಡ್ಡಿ ಆವಂದ್.

⁸ಕಡೆಕ್ಕ್ ನಿಕುಲು ಮಾತೆರ್ಲಾ ಒಂಜೇ ಮನಸಾದ್, ಸಹೋದ್ರ ಸುಖದುಃಖೊಡು ಸೇರ್ದ್, ಮೆಗ್ಯೆಪಲಯಾಡ್ಲೆ ಲೆಕ್ಕ ಒರಿಯನೊರಿ ಪ್ರೀತಿ ಮಲ್ತೊಂದು, ಕನಿಕರ ಬೊಕ್ಕ ದೀನ ಭಾವೊಡು ಉಪ್ಪುಲೆ.

⁹ಅಪಕಾರ ಮಲ್ಪುನಾಯಗ್ ಅಪಕಾರ ಮಲ್ಪಂದೆ, ನೆರ್ಪಿನಾಯಗ್ ನೆರಂದೆ ಆಶೀರ್ವದಿಪುಲೆ. ಐಕ್ ಬೋಡಾದ್ ದೇವೆರ್ ನಿಕ್ಲೆನ್ ಲೆತ್ತ್‌ದೆ. ನಿಕುಲು ಇಂಚ ಮಲ್ಪುವರ್ಡ ದೇವೆರೆ ಆಶೀರ್ವಾದೊನು ಪಡೆವೊನ್ವರ್.

¹⁰“ಜೀವನೊಡು ಸಂತೋಷ ಮಲ್ತ್‌ದ್ ಎಡ್ಡೆಂತಿನ ದಿನೊಕುಲೆನ್ ತೂವೆರೆ ಆಸೆ ಇತ್ತಿನಾಯೆ, ಆಯೆ ತನ ಬಾಯಿಡ್ ಪಡಿಕೆಂತಿನೆನ್ ಪಾತೆರಂದಿಲೆಕ್ಕಲಾ ಬಿಮ್ಮೊಲೆಡ್ ಸುಳ್ಳು ಪನಂದಿಲೆಕ್ಕಲಾ ಬಿಗಿತ್ತ್‌ದ್ ಪತ್ತೊನಡ್.

¹¹ಆಯೆ ಪಡಿಕೆಂತಿನೆನ್ ಬುಡ್ದು ಎಡ್ಡೆಂತಿನೆನ್ ಮಲ್ಪಡ್; ಸಮಾಧಾನೊನು ನಾಡ್ದ್ ಐಕ್ ತಕ್ಕ ನಡಪೆರೆ ಪ್ರಯತ್ನ ಮಲ್ಪಡ್.

¹²ಕರ್ತವನ ದೃಷ್ಟಿ ಎಡ್ಡೆಂತಿನಾಕುಲೆ ಮಿತ್ತ್ ಉಂಡು. ಆಯೆ ಅಕ್ಲೆನ ಪ್ರಾರ್ಥನೆಗ್ ಕೆಬಿ ಕೊರ್ಪೆ. ಆಂಡ ಕರ್ತವೆ ಪಡಿಕೆಂತಿನಾಕುಲೆಗ್ ವಿರೋಧಾದ್ ಉಲ್ಲೆ,” ಅಂದ್‌ದ್ ಬರೆತ್ಂಡತ್ತಾ?

¹³ನಿಕುಲು ಎಡ್ಡೆಂತಿನೆನ್ ಮಲ್ಪುನೆಟ್ಟ್ ಆಸಕ್ತಿಡ್ ಮನಸ್ ಮಲ್ಪುವರ್ಡ ನಿಕ್ಲೆಗ್ ಹಾಳ್ ಮಲ್ಪುನಾಕುಲು ಏರುಲ್ಲೆರ್?

¹⁴ನಿಕುಲು ನೀತಿಗಾದ್ ಭಂಗ ಸೈಸೊನಿಯರ್ಡ ನಿಕುಲು ನಿಜಾದ್ ಭಾಗ್ಯವಂತೆರ್. ಭಂಗ ಕೊರ್ಪಿ ಜನೊಕುಲೆಗ್ ಪೋಡ್ಯಡೆ,

¹⁵ಗಡಿಬಿಡಿ ಆವಡೆ; ಆಂಡ ಕ್ರಿಸ್ತನ್ ನಿಕ್ಲೆ ಉಡಲ್‌ಲೆಡ್ ಪರಿಶುದ್ಧ ಕರ್ತವೆ ಅಂದ್‌ದ್ ದೀವೊನ್ಲೆ. ನಿಕ್ಲೆಡುಪ್ಪುನ ಕ್ರಿಸ್ತನ ನಿರೀಕ್ಷೆಗ್ ಎಂಚಿನ ಆಧಾರ ಅಂದ್‌ದ್ ಕೇನುನಾಕುಲೆಗ್ ಉತ್ತರ ಕೊರಿಯೆರೆ ಏಪಲಾ ತಯಾರಾದುಪ್ಪುಲೆ. ಆಂಡ ಅವೆನ್ ತಾಳ್ಮೆಡ್ಲಾ ಮರ್ಯಾದಿಡ್ಲಾ ಪನ್ಲೆ.

¹⁶ಎಡ್ಡೆ ಮನಸಾಕ್ಷಿ ಇತ್ತಿನಾಕುಲು ಆದುಪ್ಪುಲೆ. ಅಪಗ ಕ್ರಿಸ್ತಡುಪ್ಪು ನಿಕ್ಲೆನ ಎಡ್ಡೆ ನಡತೆದ ವಿಚಾರೊಡು ಹಾಳ್ ಪಾತೆರುನಾಕುಲು ನಿಕ್ಲೆನ್ ನಿಂದೆ ಮಲ್ತಿನೆಕ್ಕಾದ್ ಅಕುಲೇ ನಾಚಿಗೆಗ್ ಒಳಗಾವೆರ್.

¹⁷ಹಾಳ್ ಬೇಲೆ ಮಲ್ತ್‌ದ್ ಕಷ್ಟೊಡು ಬೂರುನೆಡ್ದ್ ದೇವೆರೆ ಚಿತ್ತ ಇತ್ತ್ಂಡ ಎಡ್ಡೆ ಬೇಲೆ ಮಲ್ತ್‌ದ್ ಕಷ್ಟೊಡು ಬೂರುನ ಎಡ್ಡೆ ಆದುಂಡು.

¹⁸ಕ್ರಿಸ್ತೆಲಾ ನೀತಿವಂತೆ ಆದಿತ್ತ್‌ದ್ ನೀತಿಕೆಟ್ಟಿನಾಕುಲೆಗ್ ಬೋಡಾದ್ ತನ ಪ್ರಾಣೊನು ಕೊರ್ದು ಅಕ್ಲೆನ್ ದೇವೆರೆ ಕೈತಲ್‌ ಸೇರಾಯೆರೆಗಾದ್ ಅಕ್ಲೆ ಪಾಪೊನು ದೆಪ್ಪೆರೆ ಬೇನೆ ತಿಂದ್‌ದ್ ಒಂಜೇ ಸರ್ತಿ ತನ ಪ್ರಾಣೊನು ಕೊರಿಯೆ. ಆಯೆ ಶರೀರೊಡು ಸೈತೆ; ಆಂಡ ಆತ್ಮೊಡು ಕುಡೊರ ಬದುಕುನಾಯೆ ಆದುಲ್ಲೆ.

¹⁹ಅವ್ವೇ ಆತ್ಮ ರೂಪೊಡು ಸೆರೆಮನೆಟುಪ್ಪು ಆತ್ಮೊಲೆ ಕೈತಲ್‌ ಪೋದು ಸಾರಿಯೆ.

²⁰ನೋಹನ ದಿನೊಕುಲೆಡ್ ಆಯೆ ಕಪ್ಪಲ್‌ನ್ ಕಟ್ಟೊಂದುಪ್ಪುನಗ ದೇವೆರ್ ತಾಳ್ಮೆಡ್ ಕಾತೊಂದುಪ್ಪುನ ಸಂಧರ್ಬೊಡು ಅವೀಧೆಯೆರಾಯಿ ಆತ್ಮೊಲೆಗ್ ಸುವಾರ್ತೆನ್ ಸಾರಿಯೆ. ಆ ಕಪ್ಪಲ್‌ಡ್ ಎಣ್ಮ ಜನನೇ ಬೊಲ್ಲದ ನೀರ್‌ಡ್ದ್ ಬಚವು ಆಯೆರ್.

²¹ಅವ್ವೇ ನೀರ್ ಇತ್ತೆ ನಿಕ್ಲೆನ್ ರಕ್ಷಣೆ ಮಲ್ಪುನ ದೀಕ್ಷಾಸ್ನಾನದ ಚಿನ್ನೆ ಆದುಂಡು. ದೀಕ್ಷಾಸ್ನಾನ ಶರೀರದ ಕುರೆ ದೆಪ್ಪುನವು ಅತ್ತ್; ಅವು ಶುದ್ಧ ಮನಸಾಕ್ಷಿಡ್ ದೇವೆರೆಗ್ ಮಲ್ಪುನ ವಾಗ್ದಾನ ಆದುಂಡು. ಯೇಸು ಕ್ರಿಸ್ತೆ ಪುನರುತ್ಥಾನ ಆದುಪ್ಪುನೆಡ್ದ್ ಎಂಕ್ಲೆಗ್ ರಕ್ಷಣೆ ಕೊರಿಯೆ.

²²ಇತ್ತೆ ಆಯೆ ಪರಲೋಕೊಗು ಪೋದು ದೇವೆರೆ ಬಲತ್ತ ಮರ್ಗಿಲ್‌ಡ್ ಉಲ್ಲೆ. ದೂತೆರ್, ಅಧಿಕಾರಿಲು, ಶಕ್ತಿಲು ಮಾತಲಾ ಆಯಗ್ ಒಳಗಾದುಂಡು.