Read Tulu 1 ಪೇತ್ರೆ 5 Bible Online

1 ಪೇತ್ರೆ 5 - Tulu bible

1 ಪೇತ್ರೆ 5

¹ಸಭೆತ ಹಿರಿಯಾಕುಲೇ, ನಿಕ್ಲೆನ ಜತೆ ಹಿರಿಯಾಯೆ ಆಯಿ ಯಾನ್ ಕ್ರಿಸ್ತ ಶ್ರಮೆಲೆಡ್ ಸಾಕ್ಷಿದಾಯೆ; ನನ ದುಂಬು ತೋಜಿದ್ ಬರ್ಪಿ ಮೈಮೆಡ್ ಪಾಲ್‌ದಾರೆ ಆಯಿ ಯಾನ್ ನಿಕ್ಲೆನ್ ಉತ್ತೇಜನ ಮಲ್ತ್‌ದ್ ಪನ್ಪಿನಿ ದಾನೆ ಪಂಡ,

²ನಿಕ್ಲೆನ ವಶೊಟು ಕೊರ್ತಿನ ದೇವೆರೆ ಪುಂಡುನು ಕಾಪುಲೆ. ಬಲಾತ್ಕಾರೊಡ್ದು ಅತ್ತ್ ದೀನ ಮನಸ್‌ಡ್ದೇ, ದುಡ್ಡುದ ಆಸೆಡ್ದ್ ಅತ್ತ್, ಯಥಾರ್ಥ ಮನಸ್‌ಡ್ದ್ ಸೇವೆ ಮಲ್ಪುಲೆ.

³ದೇವೆರ್ ನಿಕ್ಲೆನ ವಶೊಟು ಕೊರ್ತಿ ಸಭೆತ ಮಿತ್ತ್ ಗುರ್ಕಾಮೆ ತೋಜಾವಂದೆ ಸಭೆಕ್ ಮಾದ್ರಿ ಆದ್ ನಡಪುಲೆ.

⁴ಮಾಮಲ್ಲ ಕುರುಬೆ ತೋಜಿದ್ ಬನ್ನಗ ನಿಕುಲು ಏನಿತ್ಯೇನಿಗ್ಲಾ ಬಾಡಂದಿ ಮೈಮೆದ ಕಿರೀಟೊನು ಪಡೆವೊನ್ವರ್.

⁵ಅಂಚೆನೆ ಜವನ್ಯೆರೇ, ನಿಕುಲುಲಾ ಹಿರಿಯಾಕುಲೆಗ್ ವಶ ಆದುಪ್ಪುಲೆ. ನಿಕುಲು ಮಾತೆರ್ಲಾ ದೀನ ಮನಸ್‌ಡ್ ಒರಿ ಒರಿಯಗ್ ಸೇವೆ ಮಲ್ಪುಲೆ. “ದೇವೆರ್ ಅಹಂಕಾರಿಲೆಗ್ ಎದುರುಂತುವೆ, ಆಂಡ ತಗ್ಗ್‌ದಿನಾಕುಲೆಗ್ ದಯ ಕೊರ್ಪೆ.”

⁶ಅಂಚಾಯಿನೆಡ್ದ್ ದೇವೆರೆನ ಬಲ ಇತ್ತಿ ಕೈತ ತಿರ್ತ್ ನಿಕ್ಲೆನ್ ತಗ್ಗಾವೊನ್ಲೆ; ಆಯೆ ತಕ್ಕ ಸಮಯೊಡು ನಿಕ್ಲೆನ್ ಮಿತ್ತ್ ಕನಪೆ.

⁷ನಿಕ್ಲೆನ ಮಾತ ಚಿಂತೆಲೆನ್ ಆಯಗ್ ಒಪ್ಪಿಸಾಲೆ; ಆಯೆ ನಿಕ್ಲೆಗಾದ್ ಚಿಂತೆ ಮಲ್ಪುವೆ.

⁸ಜಾಗ್ರತೆ ಆದುಪ್ಪುಲೆ; ಎಚ್ಚರಿಕೆ ಆದುಪ್ಪುಲೆ; ನಿಕ್ಲೆನ ವಿರೋಧಿ ಆದುಪ್ಪು ಸೈತಾನೆ ಗರ್ಜನೆ ಮಲ್ಪುನ ಸಿಮ್ಮದ ಲೆಕ್ಕನೆ ಏರೆನ್ ದಿಂಗೊಲಿ ಅಂದ್‌ದ್ ನಾಡೊಂದು, ತಿರ್ಗೊಂದುಲ್ಲೆ.

⁹ನಿಕುಲು ನಂಬಿಕೆಡ್ ದೃಢ ಆದಿತ್ತ್‌ದ್ ಸೈತಾನಗ್ ಎದುರುಂತುಲೆ; ಲೋಕೊಡುಪ್ಪು ನಿಕ್ಲೆ ಸಹೋದ್ರೆರ್‌ಲಾ ಅಂಚಿನವೇ ಸಂಕಟೊಲೆನ್ ಅನುಭವ ಮಲ್ತೊಂದುಲ್ಲೆರ್ ಅಂದ್‌ದ್ ನಿಕ್ಲೆಗ್ ಗೊತ್ತುಂಡತ್ತಾ?

¹⁰ಯೇಸು ಕ್ರಿಸ್ತಡ್ ಒಂಜಾದುಪ್ಪು ನಿಕ್ಲೆನ್ ತನ ನಿತ್ಯ ಮೈಮೆಗ್ ಲೆತ್ತಿ ಪೂರ್ತಿ ದಯತ ದೇವೆರ್, ಒಂತೆ ಸಮಯ ಸಂಕಟ ಬತ್ತಿ ಬೊಕ್ಕ ನಿಕ್ಲೆನ್ ತಕ್ಕ ಸ್ಥಿತಿಗ್ ಕನತ್‌ದ್ ದೃಢ ಮಲ್ತ್‌ದ್, ಬಲ ಪಡೆಪಾವೆ.

¹¹ಆಯಗ್ ಏನಿತ್ಯೇನಿಗ್ಲಾ ಆಧಿಪತ್ಯ ನಿಲೆ ಆದುಪ್ಪಡ್. ಆಮೆನ್.

¹²ನಂಬಿಗಸ್ತೆ ಆದುಪ್ಪು ಸಹೋದರೆ ಸಿಲ್ವಾನನ ಸಹಾಯೊಡ್ದು ಈ ಎಲ್ಯ ಪತ್ರಿಕೆನ್ ಬರೆತಿನಿ. ಉಂದೆಡ್ದ್ ನಿಕ್ಲೆಗ್ ಉಮೇದ್ ತಿಕ್ಕೊಡು ಬೊಕ್ಕ ಉಂದು ಮಾತ ದೇವೆರೆ ದಯೊಟು ಸತ್ಯಾದುಂಡು ಅಂದ್‌ದ್ ಯಾನ್ ಸಾಕ್ಷಿ ಕೊರ್ಪೆ. ಈ ದಯೊಟು ನಿಕುಲು ಗಟ್ಟಿಯಾದ್ ಉಂತುಲೆ.

¹³ದೇವೆರ್ ಅಜತ್‌ದ್ ದೆತ್ತೊಂಡಿ ಬಾಬೆಲ್‌ಡ್ ಉಪ್ಪು ಸಹೋದ್ರಿ ಸಭೆಲಾ ಎನ ಮಗೆ ಆದುಪ್ಪು ಮಾರ್ಕೆಲಾ ನಿಕ್ಲೆನ್ ವಂದಿಪುವೆರ್.

¹⁴ಪ್ರೀತಿದ ಮುದ್ದು ಕೊರ್ದು ಒರಿಯನ್ ಒರಿ ವಂದಿಪುಲೆ. ಕ್ರಿಸ್ತಡುಪ್ಪು ಸಮಾಧಾನ ನಿಕ್ಲೆಗ್ ಮಾತೆರೆಗ್ಲಾ ಉಪ್ಪಡ್. ಆಮೆನ್.