Read Tulu 2 ಪೇತ್ರೆ 2 Bible Online

2 ಪೇತ್ರೆ 2 - Tulu bible

2 ಪೇತ್ರೆ 2

¹ಇಸ್ರಾಯೇಲ್ ಜನೊಕುಲೆ ನಡುಟು ಸುಳ್ಳು ಪ್ರವಾದಿಲು ಇತ್ತಿಲೆಕ್ಕ ನಿಕ್ಲೆ ನಡುಟ್ಲಾ ಸುಳ್ಳು ಬೋಧಕೆರ್ ಉಪ್ಪೆರ್. ಅಕುಲು ನಾಶನೊಗು ನಡಪುಡುನ ದುರ್ಬೋಧನೆಲೆನ್ ಗುಟ್ಟುಡು ಕಲ್ಪಾವೆರ್. ತನ್ಕುಲೆನ್ ಕ್ರಯೊಕು ದೆತ್ತೊಂದಿ ಯಜಮಾನನ್ಲಾ ಅರೆಂಜುನಾಕುಲಾದುಲ್ಲೆರ್. ಈ ರೀತಿಡ್ ತನ್ಕುಲೆ ಮಿತ್ತ್ ನಾಶನೊನು ಬೇಗನೆ ಬರ್ಪಾವೊನ್ವೆರ್.

²ಅಕ್ಲೆನ ನಾಶನದ ಬೋಧನೆಲೆನ್ಲಾ ನಾಚಿಗೆದ ಕಾರ್ಯೊಲೆನ್ಲಾ ಮಸ್ತ್ ಜನ ಬೆರಿ ಪತ್ತುವೆರ್, ಬೊಕ್ಕ ಈ ಬೋಧಕೆರೆಡ್ದಾದ್ ಸತ್ಯದ ಮಾರ್ಗೊಗು ದೂಷಣೆ ಆಪುಂಡು.

³ಅಕುಲು ದುರಾಶೆಡ್ ಕೂಡ್ದಿನಕುಲಾದ್ ನಿಕ್ಲೆನ ದುಡ್ಡುನು ಒಯ್ಪೆರೆಗಾದ್ ಸುಳ್ಳುನು ಕಲ್ಪನೆ ಮಲ್ತ್‌ದ್ ಪನ್ಪೆರ್, ಆಂಡ ದೇವೆರ್ ಅಕ್ಲೆನ್ ಏಪನೇ ದೋಷಿಲಂದ್‌ದ್ ನ್ಯಾಯತೀರ್ಪು ಮಲ್ತ್‌ದೆ. ಬೊಕ್ಕ ಅಕ್ಲೆನ ನಾಶನ ತಡದಾಂತೆ ಬರ್ಪುಂಡು.

⁴ದಾಯೆಗಂದ್ಂಡ, ದೇವೆರ್ ಪಾಪ ಮಲ್ತಿನ ದೂತೆರೆನ್ಲಾ ಬುಡ್ತುಜೆ. ಆಯೆ ಅಕ್ಲೆನ್ ಸಂಕಲೆಡ್ ಕಟ್ಟ್‌ದ್ ನರಕೊಗು ಕತ್ತಲೆದ ಗುಂಡಿಗ್ ಪಾಡಿಯೆ. ಅಲ್ಪ ಅಕುಲು ನ್ಯಾಯತೀರ್ಪುದ ದಿನೊನು ಕಾತೊಂದುಲ್ಲೆರ್.

⁵ಬೊಕ್ಕ ದೇವೆರ್ ಆದಿಡ್ ಭಕ್ತಿದಾಂತಿನ ಲೋಕೊನ್ಲಾ ಅಂಚೆನೇ ಬುಡಂದೆ ಅಕ್ಲೆ ಮಿತ್ತ್ ಜಲಪ್ರಳಯ ಬರ್ಪಿಲೆಕ್ಕ ಮಲ್ತೆ. ಆಂಡ ನೀತಿನ್ ಸಾರಿನ ನೋಹನ್ಲಾ ಆಯನ ಕುಟುಂಬಡೊಪ್ಪ ಒರಿದಿ ಏಳ್ ಜನೊಕುಲೆನ್ ಮಾತ್ರ ಒರಿಪಾಯೆ.

⁶ದೇವೆರ್ ಸೋದೋಮು ಗೊಮೋರ ಪಟ್ಟಣೊಲೆಗ್ ತೀರ್ಪು ಕೊರ್ದು ಅಕ್ಲೆನ್ ಪೊತ್ತಾದ್ ಬೊನ್ಯ ಮಲ್ತೆ. ಭಕ್ತಿದಾಂತಿನಾಕುಲೆಗ್ ಆಪಿನ ಅವಸ್ಥೆ ದಾನೆ ಆವು ಇನ್ಪಿನೆಕ್ಕ್ ಅಕ್ಲೆನ್ ಒಂಜಿ ಮಾದ್ರಿ ಆದ್ ಮಲ್ತೆ.

⁷ಆಂಡ ಅವ್ವೇ ಸಂಧರ್ಬೊಡು ಆ ದುಷ್ಟೆರೆ ನಾಚಿಗೆದಾಂತಿನ ಸ್ವಭಾವೊಡ್ದು ದುಃಖೊಡಿತ್ತಿ ನೀತಿವಂತೆ ಆಯಿ ಲೋಟನ್ ಐಡ್ದ್ ತಪ್ಪಾಯೆ.

⁸ದಾಯೆಗಂದ್ಂಡ, ಆ ನೀತಿವಂತೆ ಅಕ್ಲೆ ನಡುಟುಪ್ಪುನಗ ತಾನ್ ದಿನಾಲ ತೂಪಿನ, ಕೇನುನ ಅನ್ಯಾಯ ಕೆಲಸೊಲೆಡ್ದಾದ್ ನೀತಿವಂತೆ ಆದುಪ್ಪು ಲೋಟನ ಉಡಲ್‌ಗ್ ದುಃಖ ಆವೊಂದಿತ್ತ್ಂಡ್

⁹ಕರ್ತವೆ ಭಕ್ತೆರೆನ್ ಶೋಧನೆಡ್ದ್ ಒರಿಪಾವೆರೆಗ್ಲಾ ನೀತಿಕೆಟ್ಟಿನಾಕುಲೆಗ್ ಶಿಕ್ಷೆ ಕೊರಿಯೆರೆಗಾದ್ ಕಡೆ ನ್ಯಾಯತೀರ್ಪುದ ದಿನ ಮುಟ್ಟ ದೀವೆರೆಗ್ಲಾ ತೆರಿದಿನಾಯೆ ಆದುಲ್ಲೆ.

¹⁰ಮುಖ್ಯಾದ್ ಬಂಡ್‌ತನೊನು ಆಸೆ ಮಲ್ತೊಂದು ಈ ಶರೀರದ ಇಚ್ಚೆ ಆಸೆಲೆಗ್ ಬೋಡಾದ್ ಬದ್‌ಕ್‌ದ್ ದೇವೆರೆನ ಅಧಿಕಾರೊನು ಅಸಡ್ಡೆ ಮಲ್ಪುನಾಕುಲೆಗ್ ಈ ರೀತಿ ಶಿಕ್ಷೆ ಕೊರ್ಪೆ. ಇಂಚಿತ್ತಿನಾಕುಲು ಏರೆಗ್ಲಾ ಪೋಡಿಯಂದೆ ಕುಸಿ ಬತ್ತಿಲೆಕ್ಕ ನಡಪುನಾಕುಲಾದ್ ಮೈಮೆದ ಜಾಗ್‌ಡಿತ್ತಿನಾಕುಲೆನ್ ಪೋಡಿಗೆದಾಂತೆ ದೂಷಿಪುವೆರ್.

¹¹ದೂತೆರ್ ಶಕ್ತಿಡ್ಲಾ ಬಲೊಟ್ಲಾ ಆ ಸುಳ್ಳು ಪ್ರವಾದಿಲೆಡ್ದ್ ಶ್ರೇಷ್ಠದಾಕುಲು ಆದಿತ್ತ್‌ಂಡಲಾ ಕರ್ತವನ ಎದುರು ಉಂತುನಗ ಅಕ್ಲೆನ್ ದೂಷಿದ್ ತೀರ್ಪು ಮಲ್ಪುಜೆರ್.

¹²ಆಂಡ ಸ್ವಾಭಾವಿಕ ಆದ್ ಬೋಂಟೆಗ್ಲಾ ಕೆರಿಯೆರೆಗ್ಲಾ ಪುಟ್ಟುದಿನ ಬುದ್ಧಿದಾಂತಿನ ಪ್ರಾಣಿಲೆಕ್ಕ ಈ ದುರ್ಮಾರ್ಗೊಡು ಉಪ್ಪುನಾಕುಲು ತನ್ಕುಲೆಗ್ ತೆರಿಯಂದಿ ವಿಚಾರೊಡು ದೂಷಣೆ ಮಲ್ತೊಂದುಪ್ಪುವೆರ್. ಮೊಕುಲು ತನ್ಕುಲೆ ಹಾಳ್‌ತನೊಡ್ದಾದ್ ತನ್ಕುಲೇ ಹಾಳಾದ್ ಪೋಪೆರ್.

¹³ಅಕುಲು ಬಜೀ ವೈಭೋಗೊಡು ಪಗೆಲ್‌ನ್ ಕಳೆವುನೇ ಸುಖ ಅಂದ್‌ದ್ ಎನ್ನುನಾಕುಲಾದುಲ್ಲೆರ್. ಮೊಕುಲು ನಿಕ್ಲೆಡೊಪ್ಪ ಲೇಸ್‌ಡ್ ಸೇರ್ದುಪ್ಪುನಗ ಅಕುಲು ದಗಲ್‌ಬಾಜಿಲು ಆದಿತ್ತ್‌ದ್ ಉನ್ಪಿನೆಟ್ಟ್ ಪರ್ಪಿನೆಟ್ಟ್ ಕುರೆಪಟ್ಟ್‌ಗ್ಲಾ ಅನ್ಯಾಯೊಗ್ಲಾ ಕಾರಣ ಆದುಪ್ಪುವೆರ್.

¹⁴ಅಕುಲು ಕಣ್ಣ್ ದೃಷ್ಟಿಡೇ ವ್ಯಭಿಚಾರ ಮಲ್ಪುನಾಕುಲು, ಅಕ್ಲೆನ ಪಾಪದ ಆಸೆಗ್ ತೃಪ್ತಿಯೇ ಆವಂದ್, ಸ್ಥಿರದಾಂತಿನಾಕುಲೆನ್ ತಿಕ್ಕಾದ್ ಪಾಡುನಾಕುಲು, ದುಡ್ಡುದ ಆಸೆಡ್ ಮುರ್ಕುಪೋತಿ ಉಡಲ್‌ದಾಕುಲು, ಶಾಪದ ಬಾಲೆಲು ಆದುಲ್ಲೆರ್.

¹⁵ಅಕುಲು ಸರ್ತ ಸಾದಿಡ್ದ್ ತೇಲಾದ್ ಬೆಯೋರನ ಮಗೆ ಬಿಳಾಮನ ಮಾರ್ಗೊಡು ಸಾಗ್‌ದ್ ತತ್ತ್‌ದ್ ಪೋತೆರ್. ಈ ಬಿಳಾಮೆ ಅನ್ಯಾಯೊಡು ತಿಕ್ಕುನ ದುಡ್ಡುನು ಪ್ರೀತಿ ಮಲ್ತೆ.

¹⁶ಆಂಡ ಆಯನ ಅಕ್ರಮೊಗು ಖಂಡನೆ ಆಂಡ್. ಬಾಯಿಬರಂದಿ ಕತ್ತೆ ನರಮಾನಿ ಸ್ವರೊಟ್ಟು ಪಾತೆರ್‌ದ್ ಆ ಪ್ರವಾದಿನ ಮರ್ಲ್ ಬುದ್ಧಿಗ್ ಅಡ್ಡಿ ಮಲ್ತ್ಂಡ್.

¹⁷ಇಂಚಿತ್ತಿನಾಕುಲು ನೀರ್‌ದಾಂತಿ ಗುವೆಲ್‌ದಲೆಕ್ಕಲಾ ಬಿರುಗಾಳಿಡ್ ರಾದ್ ಪೋಪಿ ಮುಗಲ್ಲಾ ಆದುಲ್ಲೆರ್. ಇಂಚಿತ್ತಿನಾಕುಲೆನ ಪಾಲ್‌ಗ್ ಗರ್ಗಂಡ ಕತ್ತಲೆ ದೀತ್ತ್ಂಡ್.

¹⁸ತಪ್ಪು ಸಾದಿಡ್ ನಡಪುನಾಕುಲೆನ ಸಹವಾಸೊಡ್ದು ಇಂಚೊಗು ತಪ್ಪಾವೊಂಡಿನಾಕುಲೆನ ಒಟ್ಟುಗು, ಮೊಕುಲು ಬಂಡ್ ಪಾತೆರೊಂದು, ಮಲ್ಲ ಮಲ್ಲ ಬಂಟ್‌ನ್ ಪುಗರೊಂದು, ಶರೀರದಾಶೆನ್ ಪುಟ್ಟಾದ್ ಅಕ್ಲೆನ್ ತಿಕ್ಕಾವೆರ್.

¹⁹ಅಕ್ಲೆಗ್ ಸ್ವತಂತ್ರ ಕೊರ್ಪಾವ ಅಂದ್‌ದ್ ವಾಗ್ದಾನ ಮಲ್ಪುವೆರ್, ಆಂಡ ತನ್ಕುಲು ಸ್ವತಃ ಪಡಿಕೆಂತಿನೆತ್ತ ಗುಲಾಮೆರಾದುಲ್ಲೆರ್. ಏರಾಂಡಲಾ ಒರಿ ಒಯಿಕ್ ಸೋತು ಪೋದುಪ್ಪುವೆನಾ ಆಯೆ ಐತ ಗುಲಾಮೆ ಆದುಪ್ಪುವೆ.

²⁰ಕರ್ತವೆಲಾ ರಕ್ಷಕೆಲಾ ಆದುಪ್ಪು ಯೇಸು ಕ್ರಿಸ್ತನ ಗೇನೊನು ಪಡೆವೊಂದು ಲೋಕದ ಕುರೆಪಟ್ಟ್‌ಗ್ ತಪ್ಪಾವೊಂಡಿನಾಕುಲು ಕುಡ ಐಟ್ಟ್ ರೆಂಕೊಂದು ಸೋತು ಪೋಪೆರ್ಡ ಅಕ್ಲೆನ ಕಡೆತ ಸ್ಥಿತಿ ದುಂಬುದೆಡ್ದ್‌ಲಾ ಹೆಚ್ಚ್ ಹಾಳ್ ಆವು.

²¹ಅಕುಲು ಆ ನೀತಿದ ಸಾದಿನ್ ತೆರಿಯೊಂದು ತನ್ಕುಲೆಗ್ ನೇಮಕ ಆತಿ ಪರಿಶುದ್ಧ ಅಪ್ಪಣೆಡ್ದ್ ತೇಲಾದ್ ಪೋಪಿನೆಡ್ದ್ ಆ ಸಾದಿನ್ ತೆರಿಯಂದೆ ಉಪ್ಪುನವೇ ಅಕ್ಲೆಗ್ ಎಡ್ಡೆ ಆದಿತ್ತುದು.

²²“ನಾಯಿ ತಾನ್ ಕಕ್ಕಿನೆನ್ ತಿನಿಯೆರೆ ಪಿರ ತಿರ್ಗುಂಡು” ಬೊಕ್ಕ “ದೆಕ್ಕ್‌ದಿ ಪಂಜಿ ಕೆಸರ್‌ಡ್ ಪಿರ ಪೊರೆಲೆರೆ ಪೋಪುಂಡು,” ಇನ್ಪಿ ಸತ್ಯ ಗಾದೆಗ್ ಸಮ ಆದ್ ನಡಪುನಾಕುಲು ಆಯೆರ್.