Read Tulu 1 ಯೋಹಾನೆ 1 Bible Online

1 ಯೋಹಾನೆ 1 - Tulu bible

1 ಯೋಹಾನೆ 1

¹ಎಂಕುಲು ನಿಕ್ಲೆಗ್ ಜೀವದ ವಾಕ್ಯ ಬರೆವೊಂದುಲ್ಲ. ಆ ಜೀವದ ವಾಕ್ಯ ಆದಿಡ್ದ್ ಇತ್ತಿನವು. ಅವೆನ್ ಎಂಕುಲು ಕೆಬಿಟ್ ಕೇಂಡ್ದ್, ಕಣ್ಣ್‌ಡ್ ತೂದು, ದೃಷ್ಟಿ ದೀದ್, ಎಂಕ್ಲೆನ ಕೈಟ್ ಮುಟ್ಟುದ.

²ಆ ಜೀವ ಎಂಕ್ಲೆಗ್ ತೋಜಿದ್ ಬತ್ತ್ಂಡ್; ಎಂಕುಲು ಆಯನ್ ತೂಯ, ಬೊಕ್ಕ ಆಯನ ಸಂಗತಿಡ್ ಸಾಕ್ಷಿ ಪನ್ತ. ಆಯೆ ಪರಲೋಕೊಡು ಅಮ್ಮೆರೆಡೊಪ್ಪ ಇತ್ತ್‌ದ್, ಎಂಕ್ಲೆಗ್ ತೋಜಿದ್ ಬತ್ತಿನ ನಿತ್ಯಜೀವೊನು ಇತ್ತೆ ನಿಕ್ಲೆಗ್ ತೆರಿಪಾವ.

³ಎಂಕ್ಲೆಗ್ ಉಪ್ಪುನ ಅನ್ಯಮನ್ಯೊಡು ನಿಕುಲುಲಾ ಸೇರೊಡಂದ್‌ದ್ ಎಂಕುಲು ತೂಯಿನೆನ್ಲಾ ಕೇಂಡಿನೆನ್ಲಾ ನಿಕ್ಲೆಗ್ ತೆರಿಪಾವ. ಎಂಕ್ಲೆನ ಅನ್ಯಮನ್ಯ ಅಮ್ಮೆರೆಡೊಪ್ಪಲಾ ಆಯ ಮಗೆ ಆದುಪ್ಪು ಯೇಸು ಕ್ರಿಸ್ತಡೊಪ್ಪಲಾ ಉಂಡು.

⁴[1]ಎಂಕ್ಲೆನ ಸಂತೋಷ ಪೂರ್ತಿ ಆಪಿಲೆಕ್ಕ ಈ ಪಾತೆರೊಲೆನ್ ನಿಕ್ಲೆಗ್ ಬರೆವೊಂದುಲ್ಲ.

⁵ದೇವೆರ್ ಬೊಲ್ಪು ಆದುಲ್ಲೆ ಬೊಕ್ಕ ಆಯಡ ಏತ್ ಮಾತ್ರಲಾ ಕತ್ತಲೆ ಇಜ್ಜಿ. ಉಂದೆನ್ ಎಂಕುಲು ಆಯಡ್ದ್ ಕೇಂಡ್ದ್ ನಿಕ್ಲೆಗ್ ತೆರಿಪಾವುನ ಪಾತೆರ ಆದುಂಡು.

⁶ನಂಕ್ ದೇವೆರೆಡೊಪ್ಪ ಅನ್ಯಮನ್ಯೊಡು ಉಲ್ಲ ಪಂಡ್ದ್, ಕತ್ತಲೆಡ್ ಬದುಕೊಂದಿತ್ತಡ, ನಮ ಸುಳ್ಳುಗಾರೆರಾದ್ ಸತ್ಯೊಡು ಉಪ್ಪುಜ.

⁷ಆಂಡ ದೇವೆರ್ ಬೊಲ್ಪುಡು ಉಪ್ಪುಲೆಕ್ಕನೇ ನಮಲಾ ಬೊಲ್ಪುಡು ನಡತೊನ್ವಡ, ನಂಕ್ ಒರಿಯಡೊಪ್ಪ ಒರಿಯಗ್ ಅನ್ಯಮನ್ಯ ಉಂಡು, ಬೊಕ್ಕ ದೇವೆರೆ ಮಗೆ ಆದುಪ್ಪು ಯೇಸುನ ನೆತ್ತೆರ್ ನಮನ್ ಮಾತ ಪಾಪೊಡ್ದು ಶುದ್ಧ ಮಲ್ಪುಂಡು.

⁸ನಮಡ ಪಾಪ ಇಜ್ಜಿ ಪಂಡಡ, ನಂಕ್ ನಮನೇ ಮೋಸ ಮಲ್ತೊಂದುಪ್ಪುವ, ಬೊಕ್ಕ ಸತ್ಯ ನಮಡ ಉಪ್ಪುಜಿ.

⁹ನಮ ಪಾಪೊಲೆನ್ ಯೇಸುಡ ಅರಿಕೆ ಮಲ್ಪುವಡ, ಆಯೆ ನಮ ಪಾಪೊಲೆನ್ ಮಾಪು ಮಲ್ತ್‌ದ್, ನಮನ್ ಮಾತ ಅನ್ಯಾಯೊಡ್ದು ಶುದ್ಧ ಮಲ್ಪುವೆ. ದಾಯೆಗಂದ್ಂಡ ಆಯೆ ನಂಬಿಗೆದಾಯೆಲಾ ನೀತಿವಂತೆಲಾ ಆದುಲ್ಲೆ.

¹⁰ನಮ ಪಾಪ ಮಲ್ತ್‌ದ್‌ಜ ಅಂದ್‌ದ್ ಪಂಡಡ, ನಮ ದೇವೆರೆನ್ ಸುಳ್ಳುಗಾರೆ ಮಲ್ಪುವ ಬೊಕ್ಕ ಆಯನ ಪಾತೆರ ನಮಡ ಇಜ್ಜಿ. ಆಮೆನ್.