Read Tulu 1 ಯೋಹಾನೆ 3 Bible Online

1 ಯೋಹಾನೆ 3 - Tulu bible

1 ಯೋಹಾನೆ 3

¹ತೂಲೆ! ಅಮ್ಮೆ ಆದುಪ್ಪು ದೇವೆರ್ ನಮನ್ ಏತೊಂಜಿ ಪ್ರೀತಿ ಮಲ್ಪುವೆ. ಆಯೆ ನಮನ್ ತನ ಜೋಕುಲಂದ್‌ದ್ ಲೆಪ್ಪುವೆ, ಅಂಚಾದ್ ನಮ ಆಯನ ಜೋಕುಲು ಆದುಲ್ಲ. ಆಂಡ ಈ ಲೋಕದ ಜನೊಕುಲು ದೇವೆರೆನ್ ತೆರಿಯಂದಿನೆಡ್ದ್ ನಮನ್ ಆಯನ ಜೋಕುಲು ಇನ್ಪಿನೆನ್ ತೆರಿಯೊನುಜೆರ್.

²ಪ್ರೀತಿದಾಕುಲೇ, ನಮ ಇತ್ತೆ ದೇವೆರೆ ಜೋಕುಲು ಆದುಲ್ಲ. ದುಂಬಗ್ ನಮ ಎಂಚ ಉಪ್ಪುವ ಅಂದ್‌ದ್ ನಂಕ್ ಗೊತ್ತುಜ್ಜಿ. ಆಂಡ ಕ್ರಿಸ್ತೆ ತೋಜಿದ್ ಬನ್ನಗ, ನಮ ಆಯ ಲೆಕ್ಕನೆ ಉಪ್ಪುವ ಇನ್ಪಿನೆನ್ ತೆರಿದ. ದಾಯೆಗಂದ್ಂಡ ಆಯೆ ಉಪ್ಪುಲೆಕ್ಕನೇ ನಮ ಆಯನ್ ತೂಪ.

³ಆಯ ಮಿತ್ತ್ ಈ ನಿರೀಕ್ಷೆ ದೀತಿನ ಪ್ರತಿ ಒರಿಲಾ ಕ್ರಿಸ್ತೆ ಶುದ್ಧ ಆದುಪ್ಪುಲೆಕ್ಕನೇ ತನನ್ ತಾನೇ ಶುದ್ಧ ಮಲ್ತೊನ್ವೆ.

⁴ಪಾಪ ಮಲ್ಪುನ ಪ್ರತಿ ಒರಿಲಾ ಅನ್ಯಾಯೊನು ಮಲ್ಪುನಾಯೆ ಆದುಲ್ಲೆ. ಪಾಪ ಅನ್ಯಾಯನೇ.

⁵ಪಾಪೊಲೆನ್ ದೆತ್ತ್ ಪಾಡೆರೆಗಾದ್ ಕ್ರಿಸ್ತೆ ತೋಜಿದ್ ಬತ್ತೆ ಅಂದ್‌ದ್ ನಿಕ್ಲೆಗ್ ತೆರಿದುಂಡು; ಆಂಡ ಆಯಡ ಪಾಪ ಇಜ್ಜಿ.

⁶ಆಯಡ್ ಒಂಜಾದುಪ್ಪುನಾಯೆ ಏರ್ಲಾ ಪಾಪ ಮಲ್ಪುಜೆ. ಪಾಪ ಮಲ್ಪುನಾಯೆ ಆಯನ್ ತೂತಿನ್ಲಾ ಇಜ್ಜಿ, ಅತ್ತ್‌ಡ ತೆರಿದಿನ್ಲಾ ಇಜ್ಜಿ.

⁷ಪ್ರೀತಿದ ಜೋಕುಲೇ, ನಿಕ್ಲೆನ್ ಮೋಸ ಮಲ್ಪಂದಿಲೆಕ್ಕ ಏರೆಗ್ಲಾ ಅವಕಾಸ ಕೊರೊಡ್ಚಿ. ಕ್ರಿಸ್ತೆ ನೀತಿವಂತೆ ಆದುಪ್ಪುಲೆಕ್ಕನೇ, ನೀತಿಡ್ ನಡುಪುನಾಯೆ ನೀತಿವಂತೆ ಆದುಲ್ಲೆ.

⁸ಏರಾಂಡಲಾ ಪಾಪ ಮಲ್ತೊಂದೇ ಇತ್ತೆರ್ಡ ಅಕುಲು ಸೈತಾನಗ್ ಸೇರ್ದಿನಾಕುಲು ಅಂದ್‌ದ್ ತೋಜಿದ್ ಬರ್ಪುಂಡು. ಸೈತಾನೆ ಆದಿಡ್ದಿಂಚಿಲಾ ಪಾಪ ಮಲ್ತೊಂದೇ ಇತ್ತೆ. ಆಂಡ ದೇವೆರೆ ಮಗೆ ಸೈತಾನನ ಕಾರ್ಯೊಲೆನ್ ನಾಶ ಮಲ್ಪೆರೆಗಾದ್ ಬತ್ತೆ.

⁹ದೇವೆರೆಡ್ದ್ ಪುಟ್ಟಿನಾಯೆ ಏರ್ಲಾ ಪಾಪ ಮಲ್ಪುಜೆ, ದಾಯೆಗಂದ್ಂಡ ದೇವೆರೆ ಸ್ವಭಾವ ಆಯಡ ಉಂಡು. ಆಯೆ ದೇವೆರೆಡ್ದ್ ಪುಟ್ಟಿನಾಯೆ ಆದುಪ್ಪುನೆಡ್ದ್ ಪಾಪ ಮಲ್ತೊಂದುಪ್ಪುಜೆ.

¹⁰ದೇವೆರೆ ಜೋಕುಲು ಏರ್ ಬೊಕ್ಕ ಪಿಶಾಚನ ಜೋಕುಲು ಏರ್ ಇನ್ಪಿನವು ಉಂದೆಡ್ದೇ ತೆರಿದ್ ಬರ್ಪುಂಡು. ನೀತಿಡ್ ನಡಪಂದಿನಾಯೆಲಾ ತನ ಸಹೋದ್ರನ್ ಪ್ರೀತಿ ಮಲ್ಪಂದಿನಾಯೆಲಾ ದೇವೆರೆಡ್ದ್ ಪುಟ್ಟಿನಾಯೆ ಅತ್ತ್.

¹¹ನಮ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಇನ್ಪಿನವೇ ನಿಕುಲು ಆದಿಡ್ದಿಂಚಿಲಾ ಕೇಂಡಿನ ಪಾತೆರ ಆದುಂಡು.

¹²ನಮ ಕಾಯಿನ ಲೆಕ್ಕ ಉಪ್ಪೆರೆ ಬಲ್ಲಿ. ಕಾಯಿನೆ ಪಡಿಕೆಂತಿನಾಯೆ ಆದಿತ್ತಿನೆಡ್ದ್ ತನ ಮೆಗ್ಯನ್ ಕೆರಿಯೆ, ಆಯೆ ದಾಯೆಗ್ ತನ ಮೆಗ್ಯನ್ ಕೆರಿಯೆ? ದಾಯೆಗಂದ್ಂಡ ತನ ಕ್ರಿಯೊಲು ಪಡಿಕೆಂತಿನವು, ತನ ಮೆಗ್ಯನ ಕ್ರಿಯೊಲು ನೀತಿದವು ಆದಿತ್ತಿನೆಡ್ದೇ.

¹³ಎನ ಸಹೋದ್ರೆರೇ, ಲೋಕದ ಜನೊಕುಲು ನಿಕ್ಲೆನ್ ಪಗೆ ಮಲ್ತೆರ್ಡ ಅಚ್ಚಿರ ಆವಡೆ.

¹⁴ನಮ ಕ್ರೈಸ್ತಸಹೋದ್ರೆರೆನ್ ಪ್ರೀತಿ ಮಲ್ಪುನಾಕುಲು ಆದುಪ್ಪುನೆಡ್ದ್ ಮರಣೊಡ್ದು ಜೀವೊಗು ದಾಂಟ್‌ದ್ ಬತ್ತ ಅಂದ್‌ದ್ ನಂಕ್ ಗೊತ್ತಾತ್ತ್ಂಡ್. ತನ ಸಹೋದ್ರನ್ ಪ್ರೀತಿ ಮಲ್ಪಂದಿನಾಯೆ ಮರಣೊಡೇ ಉಲ್ಲೆ.

¹⁵ತನ ಸಹೋದ್ರನ್ ಪಗೆ ಮಲ್ಪುನಾಯೆ ನಿಜಾದ್ ಒರಿ ಮಾನ್ಯ ಕೆರ್ಪಿನಾಯೆ ಆದುಲ್ಲೆ. ಬೊಕ್ಕ ವಾ ಮಾನ್ಯಕೆರ್ಪಿನಾಯಡಲಾ ನಿತ್ಯಜೀವ ಇಜ್ಜಿ ಅಂದ್‌ದ್ ನಿಕ್ಲೆಗ್ ಗೊತ್ತುಂಡು.

¹⁶ಕ್ರಿಸ್ತೆ ನಂಕಾದ್ ತನ ಜೀವ ಕೊರ್ತಿನೆಡ್ದ್ ನಿಜವಾಯಿನ ಪ್ರೀತಿ ದಾನೆ ಅಂದ್‌ದ್ ನಂಕ್ ತೆರಿದ್‌ಂಡ್. ಅಂಚೆನೇ ನಮಲಾ ಸಹೋದ್ರೆರೆಗಾದ್ ನಮ ಪ್ರಾಣೊನು ಕೊರಿಯೆರೆ ತಯಾರಾದುಪ್ಪೊಡು.

¹⁷ಈ ಲೋಕದ ಸಂಪೊತ್ತು ಇತ್ತಿನಾಯೆ ಕೊರತೆಡುಪ್ಪು ತನ ಸಹೋದ್ರನ್ ತೂದು ಕನಿಕರ ತೋಜಾಯಿಜೆಡ, ದೇವೆರೆ ಪ್ರೀತಿ ಆಯಡ ಎಂಚ ಉಪ್ಪುನು?

¹⁸ಎನ ಪ್ರೀತಿದ ಜೋಕುಲೇ, ನಿಕುಲು ಬಜೀ ಪಾತೆರೊಡ್ದಾವಡ್ ಬಾಯಿ ಪ್ರಚಾರೊಡ್ದಾವಡ್ ಪ್ರೀತಿ ಮಲ್ಪುನಾಕುಲು ಆದುಪ್ಪಡೆ. ನಿಕ್ಲೆ ಪ್ರೀತಿ ಕ್ರಿಯೊಲೆಡ್ಲಾ ಸತ್ಯೊಡ್ಲಾ ತೋಜಿದ್ ಬರಡ್.

¹⁹ನಮ ಸತ್ಯೊಗು ಸೇರ್ದಿನಾಕುಲು ಅಂದ್‌ದ್ ಉಂದೆಡ್ದೇ ನಂಕ್ ಗೊತ್ತಾಪುಂಡು. ಬೊಕ್ಕ ದೇವೆರೆ ಎದುರು ನಮ ಉಡಲ್‌ಗ್ ಧೈರ್ಯ ಆಪುಂಡು.

²⁰ನಮ ಉಡಲ್ ನಮನ್ ತಪ್ಪುಗಾರೆರ್ ಅಂದ್‌ದ್ ತೀರ್ಪು ಮಲ್ತ್ಂಡಲಾ, ದೇವೆರ್ ನಮ ಮನಸಾಕ್ಷಿಡ್ದ್ ಮಲ್ಲಾಯೆ ಆದಿತ್ತ್‌ದ್ ಆಯಗ್ ಮಾತಲಾ ತೆರಿದುಂಡು.

²¹ಪ್ರೀತಿದಾಕುಲೇ, ನಮ ಉಡಲ್ ನಮನ್ ತಪ್ಪುಗಾರೆರ್ ಅಂದ್‌ದ್ ತೀರ್ಪು ಮಲ್ಪುಜಿಡ ನಮ ದೇವೆರೆ ಎದುರು ಧೈರ್ಯೊಡು ಬರೊಲಿ.

²²ನಮ ಆಯ ಅಪ್ಪಣೆಲೆನ್ ಕೈಕೊಂದು ನಡಪುನೆಡ್ದ್‌ಲಾ ಆಯಗ್ ಮೆಚ್ಚಿಗೆ ಇತ್ತಿನೆನೇ ಮಲ್ಪುನಾಕುಲು ಆದುಪ್ಪುನೆಡ್ದ್‌ಲಾ ನಮ ನಟ್ಟೊಂಡಿನೆನ್ ಮಾತೆನ್ಲಾ ಆಯಡ್ದ್ ಹೊಂದುವ.

²³ದೇವೆರೆ ಅಪ್ಪಣೆ ದಾನೆಂದ್ಂಡ, ಆಯ ಮಗೆ ಆದುಪ್ಪು ಯೇಸು ಕ್ರಿಸ್ತನ್ ನಮ ನಂಬುದು ಬೊಕ್ಕ ಆಯೆ ಅಪ್ಪಣೆ ಕೊರಿಲೆಕ್ಕನೇ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಇನ್ಪಿನವೇ.

²⁴ಆಯ ಅಪ್ಪಣೆಲೆನ್ ಕೈಕೊಂದು ನಡಪುನಾಯೆ ಆಯಡ್ ಒಂಜಾದುಲ್ಲೆ ಬೊಕ್ಕ ದೇವೆರ್ ಆಯಡ್ ಒಂಜಾದುಲ್ಲೆ. ಆಯೆ ನಮಡ ಒಂಜಾದುಲ್ಲೆ ಅಂದ್‌ದ್ ಆಯೆ ನಂಕ್ ಕೊರಿ ಆತ್ಮೊಡ್ದೇ ನಮ ತೆರಿಯೊನ್ವ