Read Tulu 1 ಯೋಹಾನೆ 4 Bible Online

1 ಯೋಹಾನೆ 4 - Tulu bible

1 ಯೋಹಾನೆ 4

¹ಪ್ರೀತಿದಾಕುಲೇ, ಮಸ್ತ್ ಮಂದಿ ಸುಳ್ಳು ಪ್ರವಾದಿಲು ಲೋಕದುಲಯಿ ಬೈದಿನೆಡ್ದ್ ನಿಕುಲು ಆತ್ಮಸಮ್ಮಂಧವಾಯಿನ ಮಾತ ಪಾತೆರೊಲೆನ್ ನಂಬಡೆ, ಆ ಪಾತೆರೊಲು ದೇವೆರೆಡ್ದ್ ಬೈದಿನವಾ ಪಂಡ್ದ್ ತೆರಿಯೊನಿಯೆರೆಗಾದ್ ಪರೀಕ್ಷೆ ಮಲ್ಪುಲೆ.

²ದೇವೆರೆ ಆತ್ಮ ಅಕ್ಲೆಡ್ ಉಂಡಾ ಇಜ್ಜಾ ಪಂಡ್ದ್ ನಮ ಎಂಚ ತೆರಿಯೊನೊಲಿ? ಏರಾಂಡಲಾ ಒರಿ ಯೇಸು ಕ್ರಿಸ್ತೆ ನಿಜ ಶರೀರೊಡು ಬತ್ತೆ ಇನ್ಪಿನೆನ್ ಒಪ್ಪಿಯೆಡ ಆಯಡ ದೇವೆರೆ ಆತ್ಮ ಉಂಡು.

³ಆಂಡ ಒರಿ, ಯೇಸುನು ಒಪ್ಪಿಯೊನುಜೆಡ ಆಯೆ ದೇವೆರೆಡ್ದ್ ಬೈದಿನಾಯೆ ಅತ್ತ್. ಆಯಡ ಕ್ರಿಸ್ತ ವಿರೋಧಿನ ಆತ್ಮ ಉಂಡು. ಇಂಚಿನ ಆತ್ಮ ಲೋಕೊಗು ಬರು ಅಂದ್‌ದ್ ನಿಕುಲು ಕೇಂಡ್ದರತ್ತಾ? ಅವು ಇತ್ತೆನೇ ಲೋಕೊಡು ಉಂಡು.

⁴ಪ್ರೀತಿದ ಜೋಕುಲೇ, ನಿಕುಲು ದೇವೆರೆಗ್ ಸೇರ್ದಿನಾಕುಲು, ಬೊಕ್ಕ ನಿಕ್ಲೆಗ್ ಇತ್ತೆನೇ ಸುಳ್ಳು ಪ್ರವಾದಿಲೆ ಮಿತ್ತ್ ಜಯ ತಿಕ್ಕ್‌ದ್ಂಡ್. ದಾಯೆಗಂದ್ಂಡ ನಿಕ್ಲೆಡ್ ಉಪ್ಪುನಾಯೆ ಲೋಕೊಡುಪ್ಪುನಾಯಡ್ದ್ ಶಕ್ತಿದಾಯೆ ಆದುಲ್ಲೆ.

⁵ಆ ಜನೊಕುಲು ಈ ಲೋಕೊಗು ಸೇರ್ದಿನಾಕುಲು; ಅಂಚಾದ್ ಅಕುಲು ಲೋಕದ ರೀತಿಡ್ ಪಾತೆರ್‌ವೆರ್, ಬೊಕ್ಕ ಲೋಕ ಅಕ್ಲೆಗ್ ಕೆಬಿ ಕೊರ್ಪುಂಡು.

⁶ಆಂಡ ನಮ ದೇವೆರೆಗ್ ಸೇರ್ದಿನಾಕುಲು; ದೇವೆರೆನ್ ತೆರಿದಿನಾಕುಲು ನಂಕ್ ಕೆಬಿ ಕೊರ್ಪೆರ್. ಅಕುಲು ದೇವೆರೆಗ್ ಸೇರ್ದ್ ಇಜ್ಜೆರ್ಡ ನಂಕ್ ಕೆಬಿ ಕೊರ್ಪುಜೆರ್. ಉಂದೆಡ್ದೇ ಸತ್ಯದ ಆತ್ಮೊನ್ಲಾ ಮೋಸದ ಆತ್ಮೊನ್ಲಾ ನಮ ತೆರಿಯೊನ್ವ.

⁷ಪ್ರೀತಿದಾಕುಲೇ, ನಮ ಒರಿಯನ್ ಒರಿ ಪ್ರೀತಿ ಮಲ್ಪಗ; ದಾಯೆಗಂದ್ಂಡ ಪ್ರೀತಿ ದೇವೆರೆಡ್ದ್ ಉಂಡಾಯಿನವು. ಪ್ರೀತಿ ಮಲ್ಪುನ ಪ್ರತಿ ಒರಿಲಾ ದೇವೆರೆಡ್ದ್ ಪುಟ್ಟಿನಾಯೆ ದೇವೆರೆನ್ ತೆರಿದಿನಾಯೆ ಆದುಲ್ಲೆ.

⁸ಆಂಡ ಪ್ರೀತಿ ಮಲ್ಪಂದಿನಾಯೆ, ದೇವೆರೆನ್ ತೆರಿಯಂದಿನಾಯೆ ಆದುಲ್ಲೆ. ದಾಯೆಗಂದ್ಂಡ ದೇವೆರ್ ಪ್ರೀತಿಸ್ವರೂಪಿ ಆದುಲ್ಲೆ.

⁹ದೇವೆರ್ ತನ ಒರಿಯೇ ಮಗನ್, ನಮ ಆಯಡ್ದ್ ಬದುಕುಲೆಕ್ಕ ಲೋಕೊಗು ಕಡಪುಡಿನೆಡ್ದೇ ದೇವೆರೆ ಪ್ರೀತಿ ತೋಜಿದ್ ಬತ್ತ್ಂಡ್.

¹⁰ನಮ ದೇವೆರೆನ್ ಪ್ರೀತಿ ಮಲ್ತಿನೆಟ್ಟ್ ಅತ್ತ್, ಆಯೆ ನಮನ್ ಪ್ರೀತಿ ಮಲ್ತ್‌ದ್, ತನ ಮಗನ್ ನಮ ಪಾಪೊಲೆಗ್ ಬೋಡಾದ್ ಬಲಿ ಆದ್ ಕಡಪುಡಿನೆಟ್ಟೇ ತೋಜಿದ್ ಬರ್ಪುಂಡು.

¹¹ಪ್ರೀತಿದಾಕುಲೇ, ದೇವೆರ್ ನಮನ್ ಈತೊಂಜಿ ಪ್ರೀತಿ ಮಲ್ತಿನೆಡ್ದ್, ನಮಲಾ ಒರಿಯನ್ ಒರಿ ಪ್ರೀತಿ ಮಲ್ಪೊಡಾಪುಂಡು.

¹²ದೇವೆರೆನ್ ಏರ್ಲಾ ಏಪಲಾ ತೂತುಜೆರ್. ಆಂಡ ನಮ ಒರಿಯನ್ ಒರಿ ಪ್ರೀತಿ ಮಲ್ಪುನಾಂಡ ದೇವೆರ್ ನಮಡ ನಿಲೆ ಆದುಲ್ಲೆ ಬೊಕ್ಕ ಆಯನ ಪ್ರೀತಿ ನಮಡ ಪೂರ್ತಿ ಆದುಂಡು.

¹³ಬೊಕ್ಕ ದೇವೆರ್ ನಂಕ್ ತನ ಆತ್ಮೊನು ಕೊರಿನೆಡ್ದಾವರ ಆಯೆ ನಮಡ ಉಲ್ಲೆ, ನಮ ಆಯಡ ಉಲ್ಲ ಅಂದ್‌ದ್ ತೆರಿಯೊನ್ವ.

¹⁴ಅಮ್ಮೆ ಆದುಪ್ಪು ದೇವೆರ್ ತನ ಮಗನ್ ಈ ಲೋಕದ ರಕ್ಷಕೆ ಆದ್ ಕಡಪುಡ್ದಿನೆನ್ ಎಂಕುಲು ಸ್ವಂತ ಕಣ್ಣ್‌ಡ್ ತೂದು, ಇತ್ತೆ ಐಕಾದ್ ಸಾಕ್ಷಿ ಕೊರ್ಪ.

¹⁵ಯೇಸು ದೇವೆರೆ ಮಗೆ ಆದುಲ್ಲೆ ಇನ್ಪಿನೆನ್ ಏರ್ ಅರಿಕೆ ಮಲ್ಪುವೆನಾ, ಆಯಡ ದೇವೆರ್ ಒಂಜಾದುಲ್ಲೆ ಅಂಚೆನೇ ದೇವೆರ್ ಆಯಡ ಒಂಜಾದುಪ್ಪುವೆ.

¹⁶ಅಂಚಾದ್ ದೇವೆರ್ ನಮನ್ ಏತೊಂಜಿ ಪ್ರೀತಿ ಮಲ್ಪುವೆ ಇನ್ಪಿನವು ನಂಕ್ ತೆರಿದುಂಡು. ಬೊಕ್ಕ ನಮ ಅವೆನ್ ನಂಬುದ. ದೇವೆರ್ ಪ್ರೀತಿಸ್ವರೂಪಿ ಆದುಲ್ಲೆ, ಪ್ರೀತಿಡ್ ನಿಲೆ ಆದುಪ್ಪುನಾಯೆ ದೇವೆರೆಡ್ ನಿಲೆ ಆದುಲ್ಲೆ ಬೊಕ್ಕ ದೇವೆರ್ ಆಯಡ ನಿಲೆ ಆದುಲ್ಲೆ.

¹⁷ನ್ಯಾಯತೀರ್ಪುದ ದಿನೊಟು ನಮ ಧೈರ್ಯೊಡು ಉಪ್ಪುಲೆಕ್ಕ ಆಯನ ಪ್ರೀತಿ ನಮಡ ಪೂರ್ತಿ ಆದುಂಡು. ದಾಯೆಗಂದ್ಂಡ ಕ್ರಿಸ್ತೆ ಉಪ್ಪುಲೆಕ್ಕನೇ ನಮಲಾ ಈ ಲೋಕೊಡು ಉಲ್ಲ.

¹⁸ಪ್ರೀತಿ ಉಪ್ಪುನಲ್ಪ ಪೋಡಿಗೆ ಇಜ್ಜಿ. ಆಂಡ ಪೂರ್ತಿ ಇತ್ತಿ ಪ್ರೀತಿ ಪೋಡಿಗೆನ್ ದೂರ ಮಲ್ಪುಂಡು. ಪೋಡಿಗೆ ಬೇನೆ ಕೊರೊಂದೇ ಉಪ್ಪುಂಡು. ಬೊಕ್ಕ ಪೋಡಿಯುನಾಯೆ ಪ್ರೀತಿಡ್ ಪೂರ್ತಿ ಆತಿನಾಯೆ ಅತ್ತ್.

¹⁹ದೇವೆರ್ ನಮನ್ ಸುರು ಪ್ರೀತಿ ಮಲ್ತಿನೆಡ್ದ್ ನಮ ಆಯನ್ ಪ್ರೀತಿ ಮಲ್ಪುವ.

²⁰ಏರಾಂಡಲಾ ಒರಿ, ಯಾನ್ ದೇವೆರೆನ್ ಪ್ರೀತಿ ಮಲ್ಪುವೆ ಅಂದ್‌ದ್ ತನ ಸಹೋದ್ರನ್ ಪಗೆ ಮಲ್ಪುವೆಡ, ಆಯೆ ಸುಳ್ಳುಗಾರೆ ಆದುಲ್ಲೆ. ತಾನ್ ತೂಪಿ ಸಹೋದ್ರನ್ ಪ್ರೀತಿ ಮಲ್ಪಂದಿನಾಯೆ, ತಾನ್ ತೂವಂದಿ ದೇವೆರೆನ್ ಎಂಚ ಪ್ರೀತಿ ಮಲ್ಪೊಲಿ?

²¹ದೇವೆರೆನ್ ಪ್ರೀತಿ ಮಲ್ಪುನಾಯೆ ತನ ಸಹೋದ್ರನ್ಲಾ ಪ್ರೀತಿ ಮಲ್ಪೊಡು ಇನ್ಪಿ ಅಪ್ಪಣೆ ನಂಕ್ ಆಯಡ್ದ್ ತಿಕ್ಕ್‌ದ್ಂಡ್.