Read Tulu ಪ್ರಕಟಣೆ 1 Bible Online

ಪ್ರಕಟಣೆ 1 - Tulu bible

ಪ್ರಕಟಣೆ 1

¹ಉಂದು ಯೇಸು ಕ್ರಿಸ್ತನ ಪ್ರಕಟಣೆ. ಬೇಗನೆ ನಡಪೆರೆ ಉಪ್ಪುನ ಸಂಗತಿಲೆನ್ ತನ ಸೇವಕೆರೆಗ್ ತೋಜಾವೆರೆಗಾದ್ ದೇವೆರೆಡ್ದ್ ಈ ಪ್ರಕಟಣೆನ್ ಪಡೆಯೆ. ಉಂದತ್ತಂದೆ ಕ್ರಿಸ್ತೆ ತನ ಸೇವಕೆ ಆಯಿ ಯೋಹಾನಗ್ ಈ ಪ್ರಕಟಣೆನ್ ತೆರಿಪಾವೆರೆಗಾದ್ ತನ ದೂತನ್ ಕಡಪುಡಿಯೆ.

²ಯೋಹಾನೆ ತಾನ್ ತೂಯಿನೆನ್ ಮಾತೆನ್ ತೆರಿಪಾವುನಾಯೆ ಆದ್ ದೇವೆರೆ ಪಾತೆರದ ಸಂಗತಿಡ್ಲಾ ಯೇಸು ಕ್ರಿಸ್ತೆ ಪಂಡಿನ ಸಾಕ್ಷಿದ ಸಂಗತಿಡ್ಲಾ ಸಾಕ್ಷಿ ಪಂಡೆ.

³ಈ ಪ್ರವಾದನೆದ ಪಾತೆರೊಲೆನ್ ಓದುನಾಯೆಲಾ, ಓದಿನೆನ್ ಕೇನುನಾಕುಲುಲಾ ಐಟ್ಟ್ ಬರೆತಿ ಪಾತೆರೊಲೆನ್ ಕೈಕೊಂದು ನಡಪುನಾಕುಲುಲಾ ಭಾಗ್ಯವಂತೆರ್‌. ದಾಯೆಗಂದ್ಂಡ ಅವು ನಡಪು ಕಾಲ ಮುಟ್ಟ ಆತ್ಂಡ್.

⁴ಆಸ್ಯ ಸೀಮೆಡುಪ್ಪು ಏಳ್‌ ಸಭೆಲೆಗ್ ಯೋಹಾನೆ ಬರೆಪಿನಿ ದಾನೆಂದ್ಂಡ, ವರ್ತಮಾನ, ಭೂತ, ಭವಿಷ್ಯತ್ ಕಾಲೊಡು ಆದುಪ್ಪುನಾಯಡ್ದ್‌ಲಾ ಆಯನ ಗದ್ದಿಗೆದ ದುಂಬುಪ್ಪು ಏಳ್‌ ಆತ್ಮೊಲೆಡ್ದ್‌ಲಾ ನಂಬಿಕೆ ಇತ್ತಿ ಸಾಕ್ಷಿದಾಯೆಲಾ ಸೈತಿನಾಕುಲೆಡ್ದ್ ದುಂಬತ್ತ ಲಕ್ಕ್‌ದ್ ಬೈದಿನಾಯೆಲಾ ಭೂಮಿದ ಅರಸರೆನ್ ಆಳುನಾಯೆ ಆದುಪ್ಪು ಯೇಸು ಕ್ರಿಸ್ತಡ್ದ್ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್. ಆಯೆ ನಮನ್ ಪ್ರೀತಿ ಮಲ್ಪುನಾಯೆಲಾ, ತನ ನೆತ್ತೆರೆಡ್ದ್ ನಮನ್ ಪಾಪೊಡ್ದು ಬುಡ್ಪಾದಿನಾಯೆಲಾ ಆದುಲ್ಲೆ.

⁶ಬೊಕ್ಕ ನಮನ್ ತನ ಅಮ್ಮೆ ಆದುಪ್ಪು ದೇವೆರೆಗ್ ರಾಜೆರಾದ್‌ಲಾ ಯಾಜಕೆರಾದ್‌ಲಾ ಮಲ್ತಿನಾಯಗ್ ಏನಿತ್ಯೇನಿಗ್ಲಾ ಮೈಮೆಲಾ ಬಲಲಾ ಆವಡ್, ಆಮೆನ್.

⁷“ಇಂದಾ, ಆಯೆ ಮುಗಲ್‌ಡ್ ಬರುವೆ; ಮಾತ ಕಣ್ಣ್‌ಲು ಆಯನ್ ತೂವು. ಬರ್ಚಿಡ್ ಆಯನ್‌ ನೋಂತಿನಾಕುಲುಲಾ ತೂವೆರ್, ಈ ಭೂಮಿಡುಪ್ಪು ಮಾತ ಗೋತ್ರೊಲು ಆಯನ್ ತೂದು ತಿಗಲೆಗ್ ದರ್ತೊನ್ವೆರ್.” ಅಂದ್, ಅಂಚೆನೇ ಆವು ಆಮೆನ್.

⁸“ಯಾನ್ [1]ಆದಿಲಾ ಅಂತ್ಯಲಾ, ವರ್ತಮಾನ, ಭೂತ, ಭವಿಷ್ಯತ್ ಕಾಲೊಡು ಉಪ್ಪುನಾಯೆಲಾ ಸರ್ವಶಕ್ತೆಲಾ ಆದುಲ್ಲೆ.” ಅಂದ್‌ದ್ ದೇವೆರಾದುಪ್ಪು ಕರ್ತವೆ ಪನ್ಪೆ.

⁹ಯೋಹಾನೆ ಪನ್ಪಿ ಯಾನ್, ನಿಕ್ಲೆನ ಸಹೋದ್ರೆಲಾ ಯೇಸುಡ್ದು ದೇವೆರೆ ರಾಜ್ಯೊಗು ಸೇರುನಾಕುಲೆಗ್ ಬರ್ಪಿ ಪೋಪಿನ ಭಂಗೊಲೆಡ್ಲಾ, ತಾಳ್ಮೆ ಸಹನೆಡ್ಲಾ ನಿಕ್ಲೆ ಪಾಲ್‌ದಾರೆ ಆದುಲ್ಲೆ. ಯಾನ್ ದೇವೆರೆ ಪಾತೆರೊನು ಸಾರಿನೆಕ್ಕಾದ್ ಯೇಸುಗಾದ್ ಸಾಕ್ಷಿ ಪಂಡಿನೆಕ್ಕಾದ್ ಪತ್ಮೋಸ್ ದ್ವೀಪೊಡಿತ್ತೆ.

¹⁰ಯಾನ್ ಕರ್ತವ ದಿನೊಟು ದೇವೆರಾತ್ಮೊಡು ವಶ ಆದಿತ್ತ್‌ದ್ ಎನ ಪಿರವುಡು ತುತೂರಿದಲೆಕ್ಕನೇ ಮಲ್ಲ ಸ್ವರೊನು ಕೇಂಡೆ.

¹¹ಅವು, “ಈ ತೂಪಿನೆನ್ ಪುಸ್ತಕೊಡು ಬರೆದ್ ಅವೆನ್ ಎಫೆಸ, ಸ್ಮುರ್ನ, ಪೆರ್ಗಮ, ಥುವತೈರ, ಸಾರ್ದಿಸ್, ಫಿಲದೆಲ್ಫಿಯಾ ಬೊಕ್ಕ ಲವೊದಿಕೀಯ ಪನ್ಪಿ ಏಳ್‌ ಪಟ್ಟಣದ ಸಭೆಲೆಗ್ ಕಡಪುಡ್ಲ,” ಅಂದ್‌ದ್ ಪಂಡ್ಂಡ್.

¹²ಎನಡ ಪಾತೆರೊಂದಿತ್ತಿ ಸ್ವರ ಏರೆನವು ಅಂದ್‌ದ್ ತೂವೆರೆ ಯಾನ್ ಪಿರ ತಿರ್ಗಿಯೆ, ತಿರ್ಗಿನಪಗ ಏಳ್‌ ಬಂಗಾರ್‌ದ ದೀಪಕಂಬೊಲೆನ್ ತೂಯೆ.

¹³ಈ ದೀಪಕಂಬೊಲೆ ನಡುಟು ಒರಿ ನರಮಾನಿ ಮಗೆಲೆಕ್ಕ ಇತ್ತಿನಾಯನ್ ತೂಯೆ; ಆಯೆ ನೇಲ್ಯ ಅಂಗಿನ್ ಪಾಡೊಂದು, ಬಂಗಾರ್‌ದ ಪಟ್ಟಿನ್ ತಿಗಲೆಗ್ ಕಟ್ಟ್‌ದಿತ್ತೆ.

¹⁴ಆಯನ ತರೆತ ಕುಜಲ್ ಬೊಲ್ದು ಹಿಮತ್ತಲೆಕ್ಕ ಬೊಲ್ಲೆನೆ ಇತ್ತ್ಂಡ್. ಆಯನ ಕಣ್ಣ್‌ಲು ಅರ್ಲುನ ತೂತ ಲೆಕ್ಕ ಇತ್ತ್ಂಡ್.

¹⁵ಆಯನ ಪಾದೊಲು ಕೆಂಡೊಡ್ದು ದೆತ್ತಿ ಪಿತ್ತಲೆದ ಲೆಕ್ಕಲಾ, ಆಯನ ಸ್ವರ ಬೊಲ್ಲದ ಕೊರೆಪಾಟದಲೆಕ್ಕಲಾ ಇತ್ತ್ಂಡ್.

¹⁶ಆಯನ ಬಲತ್ತ ಕೈಟ್ ಏಳ್‌ ಬೊಳ್ಳಿಲಿತ್ತ. ಆಯನ ಬಾಯಿಡ್ದ್ ಪರ್ತೆದ ಇರ್ಬಾಯಿ ಕತ್ತಿ ಪಿದಾಡೊಂದಿತ್ತ್‌ಂಡ್. ಆಯನ ಮೋನೆ ಮಧ್ಯಾಹ್ನೊಡು ಅರ್ಲು ಸೂರ್ಯಲೆಕ್ಕ ಇತ್ತ್ಂಡ್.

¹⁷ಯಾನ್ ಆಯನ್ ತೂಯಿನಪಗ ಸೈತಿನಾಯಲೆಕ್ಕ ಆಯ ಕಾರ ಮುದೆಲ್‌ಗ್ ಬೂರಿಯೆ. ಅಪಗ ಆಯೆ ತನ ಬಲತ್ತ ಕೈನ್ ಎನ ಮಿತ್ತ್ ದೀದ್ “ಪೋಡ್ಯಡ! ಯಾನ್ ಆದಿಲಾ ಅಂತ್ಯಲಾ ಏಪೊಗ್ಲಾ ಬದುಕುನಾಯೆಲಾ ಆದುಲ್ಲೆ.

¹⁸ಯಾನ್ ಸೈತ್‌ದಿನಾಯೆ ಅಂದ್, ಆಂಡ ತೂಲ ಯಾನ್ ಏನಿತ್ಯೇನಿಗ್ಲಾ ಬದುಕುನಾಯೆ ಆದುಲ್ಲೆ. ಮರಣದವುಲಾ ಪಾತಾಳದವುಲಾ ಬೀಗದ ಕೈ ಎನಡ ಉಂಡು.

¹⁹ಐಡ್ದಾವರ ಈ ತೂಯಿನೆನ್ಲಾ ಇತ್ತೆ ನಡಪುನೆನ್ಲಾ ದುಂಬಗ್ ಆವೊಡಾಯಿನೆನ್ಲಾ ಬರೆಲ.

²⁰ಎನ ಬಲತ್ತ ಕೈಟ್ ಈ ತೂಯಿನ ಏಳ್‌ ಬೊಳ್ಳಿಲು ಬೊಕ್ಕ ಏಳ್‌ ಬಂಗಾರ್‌ದ ದೀಪಕಂಬದ ಗೂಢಾರ್ಥೊನು ತೆರಿಪಾವೆ. ಆ ಏಳ್‌ ಬೊಳ್ಳಿಲು ಪಂಡ ಏಳ್‌ ಸಭೆತ ದೂತೆರ್. ಆ ಏಳ್‌ ದೀಪ ಕಂಬೊಲು ಅಂದ್ಂಡ ಆ ಏಳ್‌ ಸಭೆಕುಲು.