Read Tulu ಪ್ರಕಟಣೆ 10 Bible Online

ಪ್ರಕಟಣೆ 10 - Tulu bible

ಪ್ರಕಟಣೆ 10

¹ಬೊಕ್ಕ ಬಲಿಷ್ಟೆ ಆಯಿ ಬೇತೆ ಒರಿ ದೂತೆ ಮುಗಲ್‌ನ್ ಪೊದೆತೊಂದು ಪರಲೋಕೊಡ್ದು ಜತ್ತ್‌ದ್ ಬರ್ಪಿನೆನ್ ತೂಯೆ. ಆಯ ತರೆತ ಮಿತ್ತ್ ಕಾಮನಬಿಲ್ಲ್ ಇತ್ತ್ಂಡ್. ಆಯನ ಮೋನೆ ಸೂರ್ಯನಲೆಕ್ಕಲಾ ಆಯನ ಕಾರ್ ತೂತ ಕಂಬದಲೆಕ್ಕಲಾ ಇತ್ತ್ಂಡ್

²ಆಯನ ಕೈಟ್ ಗಿರ್ತ್‌ದಿನ ಒಂಜಿ ಎಲ್ಯ ಸುರುಳಿ ಇತ್ತ್ಂಡ್. ಆಯೆ ಬಲತ್ತ ಕಾರ್‌ನ್ ಕಡಲ್ದ ಮಿತ್ತ್‌ಲಾ ದತ್ತ ಕಾರ್‌ನ್ ಭೂಮಿದ ಮಿತ್ತ್‌ಲಾ ದೀದ್ ಉಂತುದಿತ್ತೆ.

³ಸಿಮ್ಮ ಬೊಬ್ಬೆ ದೀಪಿಲೆಕ್ಕ ಮಲ್ಲ ಶಬ್ಧೊಡು ಬೊಬ್ಬೆ ದೀಯೆ. ಬೊಬ್ಬೆ ದೀನಗ ಏಳ್‌ ತೆಡಿಲ್ ಒಂಜೊಂಜಾದ್ ಸ್ವರ ಸೇರಾಂಡ್.

⁴ಆ ತೆಡಿಲ್ ಒಂಜೊಂಜಾದ್ ಸ್ವರ ಕೊರ್ನಗ ಯಾನ್ ಬರೆಯೊಡು ಪಂಡ್ದಿತ್ತೆ. ಆಂಡ “ಆ ಏಳ್‌ ತೆಡಿಲ್ ಸ್ವರ ಮಲ್ಪುನಗ ಈ ಮುದ್ರೆ ಪಾಡ್ದ್ ಅವೆನ್ ಬರೆವಂದೆ ಗುಟ್ಟುಡು ದೀಲ,” ಅಂದ್‌ದ್ ಬಾನೊಡ್ದು ಒಂಜಿ ಸ್ವರ ಕೇಂಡೆ.

⁵ಬೊಕ್ಕ ಕಡಲ್ದ ಮಿತ್ತ್‌ಲಾ ಭೂಮಿದ ಮಿತ್ತ್‌ಲಾ ಉಂತುದಿನ ದೂತೆ ತನ ಬಲತ್ತ ಕೈನ್ ಪರಲೋಕದ ಕಡೆಕ್ಕ್ ದೆರ್ತ್ತ್‌ದ್,

⁶ಪರಲೋಕೊನ್ಲಾ ಐಟ್ಟುಪ್ಪು ಮಾತೆನ್ಲಾ ಭೂಮಿನ್ಲಾ ಐಟ್ಟುಪ್ಪು ಮಾತೆನ್ಲಾ, ಕಡಲ್‌ನ್ಲಾ ಐಟ್ಟುಪ್ಪು ಮಾತೆನ್ಲಾ ಉಂಡು ಮಲ್ತ್‌ದ್ ಏನಿತ್ಯೇನಿಗ್ಲಾ ಬದುಕುನಾಯನ ಮಿತ್ತ್ ಆಜ ಪಾಡ್ದ್ ಪಂಡಿನಿ, “ನನ ಸಮಯ ಇಜ್ಜಿ.

⁷ದಾಯೆಗಂದ್ಂಡ, ಏಳನೇ ದೂತೆ ಶಬ್ಧ ಮಲ್ಪುನ ದಿನೊಕುಲೆಡ್ ಆಯೆ ತುತೂರಿ ಉರ್ಪೆರೆ ಉಪ್ಪು ಸಮಯೊಡು ದೇವೆರ್ ಈತ್‌ನೆಟ್ಟ ಗುಟ್ಟುಡು ದೀದಿತ್ತಿನ ದೇವೆರೆ ಮರ್ಮೊನು ತನ ಸೇವಕೆರಾಯಿ ಪ್ರವಾದಿಲೆಗ್ ಸುವಾರ್ತೆಲಾದ್ ತೆರಿಪಾಯಿ ಲೆಕ್ಕನೇ ನಡಪುಡುವೆ,” ಅಂದ್‌ದ್ ಪಂಡೆ.

⁸ಬೊಕ್ಕ ಪರಲೋಕೊಡ್ದು ಎಂಕ್ ಕೇಂಡಿನ ಸ್ವರ ಕುಡ ಎನ್ನೊಟ್ಟುಗು ಪಾತೆರ್‌ದ್, “ಈ ಪೋದು ಕಡಲ್ದ ಮಿತ್ತ್‌ಲಾ ಭೂಮಿದ ಮಿತ್ತ್‌ಲಾ ಉಂತೊಡಿ ದೂತನ ಕೈಟ್ಟುಪ್ಪು ಗಿರ್ತ್‌ದಿ ಸುರುಳಿನ್ ದೆತ್ತೊನ್ಲ” ಅಂದ್‌ದ್ ಪಂಡ್ಂಡ್.

⁹ಯಾನ್ ಆ ದೂತನ ಕೈತಲ್‌ ಪೋದು ಎಲ್ಯ ಸುರುಳಿನ್ ಎಂಕ್ ಕೊರು ಅಂದ್‌ದ್ ಕೇನ್ನಗ ಆಯೆ ಎಂಕ್, “ಈ ಉಂದೆನ್ ದೆತ್ತೊಂದು ತಿಂದ್ ಬುಡು. ಉಂದು ನಿನ ಬಂಜಿನ್ ಕೈಪೆ ಆಪಿಲೆಕ್ಕ ಮಲ್ಪುಂಡು. ಆಂಡ ನಿನ ಬಾಯಿಡ್ ತಿಗತನೆಯಿತ ಲೆಕ್ಕ ಚೀಪೆ ಆದುಪ್ಪುಂಡು” ಅಂದ್‌ದ್ ಪಂಡೆ.

¹⁰ಅಪಗ ಯಾನ್ ಎಲ್ಯ ಸುರುಳಿನ್ ದೂತನ ಕೈಡ್ದ್ ದೆತ್ತೊಂದು ತಿಂದ್‌ದ್ ಬುಡಿಯೆ. ಅವು ಎನ ಬಾಯಿಡ್ ತಿಗತನೆಯಿತ ಲೆಕ್ಕ ಚೀಪೆ ಆದಿತ್ತ್ಂಡ್. ಅವೆನ್ ತಿಂದಿ ಬೊಕ್ಕ ಎನ ಬಂಜಿ ಕೈಪೆ ಆಂಡ್.

¹¹ಐಡ್ದ್ ಬೊಕ್ಕ ದೂತೆ ಎನಡ, “ಈ ಕುಡ ಮಸ್ತ್ ಜನೊಕುಲೆನ, ಜನಾಂಗೊಲೆನ, ಭಾಷೆದಾಕುಲೆನ ಬೊಕ್ಕ ಅರಸುಲೆನ ಸಂಗತಿಡ್ ಪ್ರವಾದನೆ ಪನೊಡು.” ಅಂದ್‌ದ್ ಪಂಡೆ.