Read Tulu ಪ್ರಕಟಣೆ 13 Bible Online

ಪ್ರಕಟಣೆ 13 - Tulu bible

ಪ್ರಕಟಣೆ 13

¹ಬೊಕ್ಕ ಕಡಲ್‌ಡ್ದ್ ಒಂಜಿ ಮೃಗ ಲಕ್ಕ್‌ದ್ ಬರ್ಪಿನೆನ್ ತೂಯೆ. ಐಕ್ ಏಳ್‌ ತರೆ ಪತ್ತ್ ಕೊಂಬುಲಾ ಕೊಂಬುಲೆ ಮಿತ್ತ್ ಪತ್ತ್ ಕಿರೀಟಲಾ ಮುಂಡೊಡು ದೇವೆರೆನ್ ದೂಷಣೆ ಮಲ್ಪುನ ಪುದರ್‌ಲಾ ಇತ್ತ್ಂಡ್.

²ಯಾನ್ ತೂಯಿ ಮೃಗ ಚಿಟ್ಟೆಪಿಲಿತ್ತ ಲೆಕ್ಕ ಇತ್ತ್ಂಡ್. ಐತ ಕಾರ್ ಕರಡಿದ ಕಾರ್‌ದ ಲೆಕ್ಕಲಾ ಐತ ಬಾಯಿ ಸಿಮ್ಮದ ಬಾಯಿದ ಲೆಕ್ಕಲಾ ಇತ್ತ್ಂಡ್. ಐಕ್ ಘಟಸರ್ಪೆ ತನ ಬಲೊನ್ಲಾ, ಗದ್ದಿಗೆದ ಮಲ್ಲ ಅಧಿಕಾರೊನ್ಲಾ ಕೊರ್‌ಂಡ್.

³ಮೃಗತ ತರೆಲೆಡ್ ಒಂಜಿ ತರೆ ಗಾಯ ಆದ್ ಸೈಪಿಲೆಕ್ಕ ಉಪ್ಪುನೆನ್ ತೂಯೆ. ಆ ಸೈಪಿನಂಚಿ ಗಾಯ ಗುಣ ಆಂಡ್. ಭೂಮಿದಾಕುಲು ಮಾತೆರ್ ಆ ಮೃಗೊನು ತೂದು ಅಚ್ಚಿರ ಆದ್ ಐತ ಬೆರಿ ಪತ್ತಿಯೆರ್.

⁴ಘಟಸರ್ಪೆ ಆ ಮೃಗೊಕ್ಕು ಅಧಿಕಾರೊನು ಕೊರ್ದಿತ್ತಿನೆಡ್ದ್ ಅಕುಲು ಆ ಘಟಸರ್ಪಗ್ ಆರಾಧನೆ ಸಂದಾಯೆರ್ ಅತ್ತಂದೆ ಆ ಮೃಗೊಕ್ಲಾ ಆರಾಧನೆ ಸಂದಾದ್, “ಈ ಮೃಗೊಕ್ಕು ಸಮಾನೆರ್ ಏರ್? ನೆತ್ತೊಟ್ಟುಗು ಲಡಯಿ ಮಲ್ಪುನಾಕುಲು ಏರ್?” ಪಂಡ್ದ್ ಪಂಡೆರ್.

⁵ಆ ಮೃಗೊಕ್ಕು ದೇವೆರೆಗ್ ವಿರೋಧಾದ್ ಮಸ್ತ್ ದೂಷಣೆಲೆನ್ ಪಾತೆರುನ ಬಾಯಿನ್ ಕೊರ್ದಿತ್ತ್‌ಂಡ್. ಬೊಕ್ಕ ನಲ್ಪತ್ತರಡ್ಡ್ ತಿಂಗೊಲು ಮುಟ್ಟ ತನ ಕಾರ್ಯೊಲೆನ್ ನಡಪಾವುನ ಅಧಿಕಾರೊನ್ಲಾ ಕೊರ್ದಿತ್ತ್‌ಂಡ್.

⁶ಆ ಮೃಗ ಬಾಯಿ ಜತ್ತ್‌ದ್ ದೇವೆರೆನ್ ದೂಷಣೆ ಮಲ್ತಿನಿ ಅತ್ತಂದೆ ಆಯನ ಪುದರ್‌ನ್ಲಾ ಆಯನ ಇಲ್ಲ್‌ನ್ಲಾ ಪರಲೋಕೊಡುಪ್ಪುನಾಕುಲೆನ್ಲಾ ದೂಷಣೆ ಮಲ್ತ್ಂಡ್. ಉಂದತ್ತಂದೆ ದೇವಜನೊಕುಲೆ ಮಿತ್ತ್ ಲಡಯಿ ಮಲ್ತ್‌ದ್ ಅಕ್ಲೆನ್ ಗೆಂದಿಯೆರೆ ಅಧಿಕಾರ ಕೊರ್ದಿತ್ತ್‌ಂಡ್. ಬೊಕ್ಕ ಮಾತ ಗೋತ್ರ, ಪ್ರಜೆ, ಭಾಷೆ, ಜನಾಂಗೊಲೆ ಮಿತ್ತ್ ಐಕ್ ಅಧಿಕಾರ ಕೊರ್ದಿತ್ತ್‌ಂಡ್.

⁸ಲೋಕ ಉಂಡಾಪಿನೆಡ್ದ್ ದುಂಬೇ ಬಲಿಯಾಯಿ ಕುರಿಯಾದಿತ್ತಿನಾಯಡ ಉಪ್ಪು ಜೀವದ ಪುಸ್ತಕೊಡು ಏರೇರೆನ ಪುದರ್ ಬರೆತಿಜಾ, ಅಕುಲು ಐಕ್ ಆರಾಧನೆ ಸಂದಾವೆರ್.

⁹ಕೆಬಿ ಇತ್ತಿನಾಯೆ ಕೇನಡ್.

¹⁰“ಕೈದ್‌ಗ್ ನೇಮಕ ಆತಿನಾಯೆ ಸೆರೆಮನೆಕ್ ಪೋವೆ. ಕತ್ತಿಡ್ ಕೆರಿಯೆರೆ ನೇಮಕ ಆತಿನಾಯೆ ಕತ್ತಿಡೇ ಸೈಯೊಡು.” ನೆಟ್ಟ್ ದೇವಜನೊಕುಲೆ ತಾಳ್ಮೆಲಾ ನಂಬಿಕೆಲಾ ತೋಜಿದ್ ಬರ್ಪುಂಡು.

¹¹ಬೊಕ್ಕೊಂಜಿ ಮೃಗ ಭೂಮಿದ ಉಲಯಿಡ್ದ್ ಬರ್ಪಿನೆನ್ ತೂಯೆ. ಐಕ್ ಕುರಿತ ಕಿನ್ನಿಗ್ ಉಪ್ಪುಲೆಕ್ಕ ರಡ್ಡ್ ಕೊಂಬುಲು ಇತ್ತ್ಂಡ್. ಘಟಸರ್ಪದಲೆಕ್ಕ ಪಾತೆರ್‌ಂಡ್.

¹²ಈ ಮೃಗ ಸುರುತ್ತ ಮೃಗತ ಮಾತ ಅಧಿಕಾರೊನು ಐತೊಟ್ಟಿಗೆ ನಡಪಾವುಂಡು. ಉಂದು ಸೈಪಿನಂಚ ಗಾಯ ಗುಣ ಆದಿತ್ತಿ ಆ ಸುರುತ್ತ ಮೃಗೊಕ್ಕು ಲೋಕಲಾ ಭೂಮಿಡುಪ್ಪು ಮಾತೆರ್ಲಾ ಆರಾಧನೆ ಮಲ್ಪುಲೆಕ್ಕ ಮಲ್ತ್ಂಡ್.

¹³ರಡ್ಡನೆ ಮೃಗ ಮಲ್ಲ ಮಲ್ಲ ಕಾರ್ನಿಕೊಲೆನ್ ನಡಪಾವೊಂದು, ಜನೊಕುಲೆ ಎದುರುಡು ತೂ ಬಾನೊಡ್ದು ಭೂಮಿಗ್ ಜತ್ತ್‌ದ್ ಬರ್ಪಿಲೆಕ್ಕ ಮಲ್ಪುವೆ.

¹⁴ಆ ಸುರುತ್ತ ಮೃಗತ ಎದುರುಡು ಬಲತ್ತ ಕಾರ್ಯೊಲೆನ್ ಮಲ್ಪು ಅಧಿಕಾರ ಉಪ್ಪುನೆಡ್ದ್, ಭೂಮಿಡ್ ಉಪ್ಪುನಾಕುಲೆನ್ ಮರ್ಲ್ ಮಲ್ಪಾವುಂಡು. ಅಕ್ಲೆಗ್ ಕತ್ತಿಡ್ದ್ ಗಾಯ ಆದ್ ಸೈಯಂದೆ ಬದ್‌ಕಿನ ಮೃಗತ ಮರ್ಯಾದಿಗಾದ್ ಮೂರ್ತಿನ್ ಮಲ್ತೊನೊಡು ಪಂಡ್ದ್ ಕಲ್ಪಾವುಂಡು.

¹⁵ಉಂದತ್ತಂದೆ ಆ ಮೃಗತ ಮೂರ್ತಿಗ್ ಜೀವ ಕೊರ್ಪಿ ಸಾಮರ್ಥ್ಯಲಾ ಉಂದೆಕ್ಕ್ ತಿಕ್ಕ್ಂಡ್. ಆ ಮೃಗತ ಮೂರ್ತಿ ಪಾತೆರುಂಡು. ತನ್ಕ್ ಆರಾಧನೆ ಸಂದಾವಂದಿನ ಮಾತೆರೆಗ್ ಮರಣ ದಂಡನೆ ಆಪಿಲೆಕ್ಕ ಮಲ್ಪುಂಡು.

¹⁶ಬೊಕ್ಕ ಮಲ್ಲಾಕುಲು, ಎಲ್ಯಾಕುಲು ಐಶ್ವರ್ಯವಂತೆರ್, ಬಡವೆರ್, ಸ್ವತಂತ್ರೆರ್, ಗುಲಾಮೆರ್ ಮಾತೆರ್ ತನ್ಕುಲೆ ಬಲ ಕೈತ ಮಿತ್ತಾವಡ್ ಮುಂಡದ ಮಿತ್ತಾವಡ್ ಗುರ್ತ ಪಾಡೊನುಲೆಕ್ಕ ಈ ರಡ್ಡನೆ ಮೃಗ ಮಲ್ಪುಂಡು.

¹⁷ಆ ಗುರ್ತ ಏರೆಗ್ ಇಜ್ಜಾ, ಅಕುಲು ದೆತ್ತೊನ್ನವು ಆವಡ್, ಮಾರುನವು ಆವಡ್ ಮಲ್ಪೆರೆ ಬಲ್ಲಿ ಪಂಡ್ದ್ ಕಟ್ಟ್ ಮಲ್ಪುಂಡು. ಆ ಗುರ್ತ ಒವು ಪಂಡ್ಂಡ ಸುರುತ್ತ ಮೃಗತ ಪುದರ್ ಅತ್ತ್‌ಡ ಐತ ಪುದರ್‌ನ್ ತೆರಿಪಾವುನ ಅಂಕೆ.

¹⁸ನೆಟ್ಟ್ ಜ್ಞಾನ ಇತ್ತಿ ಬುದ್ಧಿ ಸೇರ್ದುಂಡು. ಬುದ್ಧಿವಂತೆ ಆ ಮೃಗತ ಅಂಕೆನ್ ಗೆನ್ಪಡ್. ಅವು ಒರಿ ನರಮಾನಿನ್ ಸೂಚನೆ ಮಲ್ಪು ಅಂಕೆ ಆದುಂಡು. ಐತ ಅಂಕೆ ಆಜಿನೂತ್ತ ಅಜ್ಪತ್ತಾಜಿ.