Read Tulu ಪ್ರಕಟಣೆ 14 Bible Online

ಪ್ರಕಟಣೆ 14 - Tulu bible

ಪ್ರಕಟಣೆ 14

¹ಯಾನ್ ತೂವನಗ ಯಜ್ಞದ ಕುರಿಯಾದಿತ್ತಿನಾಯೆ ಚೀಯೋನು ಪರ್ವತೊಡು ಉಂತುದಿನೆನ್ ತೂಯೆ. ಆಯಡೊಪ್ಪ ಒಂಜಿ ಲಕ್ಷದ ನಲ್ಪತ್ತನಾಲ್ ಸಾರ ಮಂದಿ ಇತ್ತೆರ್. ಅಕುಲಾಕುಲೆನ ಮುಂಡೊಡು ಆಯನಲಾ ಆಯ ಅಮ್ಮೆರೆನಲಾ ಪುದರ್ ಬರೆದಿತ್ತ್‌ಂಡ್.

²ಉಂದತ್ತಂದೆ ಪರಲೋಕದ ಕಡೆಡ್ದ್ ನೀರ್‌ದ ಮಲ್ಲ ಶಬ್ಧಲಾ, ತೆಡಿಲ್‌ದ ಶಬ್ಧೊನ್ಲಾ ಕೇಂಡೆ. ಯಾನ್ ಕೇಂಡಿನ ಸ್ವರ ಮಸ್ತ್ ಜನ ಒಟ್ಟಾದ್ ವೀಣೆ ಬಾರಿಸಾವೊಂದು ಪದ ಪನ್ಪಿಲೆಕ್ಕ ಇತ್ತಿ ಸ್ವರೊನು ಕೇಂಡೆ.

³ಅಕುಲು ಗದ್ದಿಗೆದ ಎದುರುಡ್ಲಾ ಆ ನಾಲ್ ಜೀವಿಲೆ ಬೊಕ್ಕ ಹಿರಿಯಾಕುಲೆ ಎದುರುಡ್ಲಾ ಪೊಸ ಪದ ಪಂಡೆರ್. ಭೂಲೋಕದ ಉಲಯಿಡ್ದ್ ದೆತ್ತೊಂಡಿನ ಆ ಒಂಜಿ ಲಕ್ಷದ ನಲ್ಪತ್ತನಾಲ್ ಸಾರ ಜನೊಕುಲೆ ಅತ್ತಂದೆ ಬೇತೆ ಏರ್ಲಾ ಆ ರಾಗೊನು ಕಲ್ಪೆರೆ ಆವಂದ್.

⁴ಪೊಂಜೊವೆ ಸಹವಾಸೊಡ್ದು ಮೈಲೆ ಆವಂದಿನಾಕುಲು ಮೊಕುಲೇ; ಮೊಕುಲು ಕನ್ಯಪೊಣ್ಣುಲೆ ಲೆಕ್ಕ ಕಳಂಕದಾಂತಿನಾಕುಲು, ಯಜ್ಞದ ಕುರಿ ಆದಿತ್ತಿನಾಯೆ, ಒಡೆಗ್ ಪೋಂಡಲಾ ಮೊಕುಲು ಆಯನ ಬೆರಿಯೆ ಪೋಪೆರ್. ಮೊಕುಲು ಜನೊಕುಲೆಡ್ದ್ ಸ್ವಂತ ಜನೊಕುಲಾದ್ ದೆತ್ತೊಂದಿನಾಕುಲಾದ್ ದೇವೆರೆಗ್ಲಾ ಯಜ್ಞದ ಕುರಿ ಆದಿತ್ತಿನಾಯಗ್ಲಾ ಸುರುತ್ತ ಫಲ ಆಯೆರ್.

⁵ಸುಳ್ಳು ಮೊಕ್ಲೆನ ಬಾಯಿಡ್ ಬರಂದ್. ಮೊಕುಲು ದೋಷದಾಂತಿನಾಕುಲಾದುಲ್ಲೆರ್.

⁶ಬೊಕ್ಕೊರಿ ದೂತೆ ನಡು ಬಾನೊಡು ರಾಪಿನೆನ್ ತೂಯೆ. ಭೂಮಿಡುಪ್ಪು ಮಾತ ಜನಾಂಗ, ಗೋತ್ರ, ಭಾಷೆ, ಜನೊಕುಲೆಗ್ ಸಾರಿದ್ ಪನಿಯೆರೆ ನಿತ್ಯದ ಸುವಾರ್ತೆ ಆಯಡ ಇತ್ತ್ಂಡ್.

⁷ಆಯೆ ನಿಕುಲು ಮಾತೆರ್ಲಾ ದೇವೆರೆಗ್ ಪೋಡಿದ್ ಆಯಗ್ ಮೈಮೆನ್ ಸಂದಾಲೆ. ಆಯೆ ನ್ಯಾಯತೀರ್ಪು ಮಲ್ಪುನ ಗಳಿಗೆ ಬೈದ್‌ಂಡ್. ಭೂಲೋಕ, ಪರಲೋಕ, ಕಡಲ್, ಬೊಕ್ಕ ನೀರ್‌ದ ವಸರ್‌ನ್ ಉಂಡು ಮಲ್ತ್‌ದಿನಾಯಗ್ ಆರಾಧನೆ ಮಲ್ಪುಲೆ ಪಂಡ್ದ್ ಮಲ್ಲ ಶಬ್ಧೊಡು ಪಂಡೆ.

⁸ಆಯನ ಪಿರವುಡು ರಡ್ಡನೆ ದೂತೆ ಬತ್ತ್‌ದ್, “ಬೂರಿಯಲ್, ಬೂರಿಯಲ್ ಬಾಬೆಲ್ ಪನ್ಪಿ ಮಲ್ಲಪಟ್ಟಣ ಬೂರಿಯಲ್. ಆಲ್ ಮಾತ ಜನಾಂಗೊಲೆಗ್ ತನ ಹಾದ್ರದ ದ್ರಾಕ್ಷಾರಸೊನು ಪರ್ಪಾಯಲ್,” ಅಂದ್‌ದ್ ಪಂಡೆ.

⁹ಆಯನ ಪಿರವುಡು ಮೂಜನೆದ ಒರಿ ದೂತೆ ಬತ್ತ್‌ದ್ ಏರಾಂಡಲಾ ಸುರುತ್ತ ಮೃಗೊಕ್ಕುಲಾ ಐತ ಮೂರ್ತಿಗ್ಲಾ ಆರಾಧನೆ ಮಲ್ತ್‌ದ್ ತನ ಮುಂಡದ ಮಿತ್ತಾವಡ್, ಕೈತ ಮಿತ್ತಾವಡ್ ಗುರ್ತ ಪಾಡಾವೊಂಡೆಡ,

¹⁰ಆಯೆ ದೇವೆರೆ ಕೋಪ ಪನ್ಪಿ ಬಾಜನೊಡು ದಾಲಾ ಬೆರಕೆ ಮಲ್ಪಂದೆ ಪಾಡ್ದಿನ ದೇವೆರೆ ಕೋಪ ಪನ್ಪಿ ದ್ರಾಕ್ಷಾರಸೊನು ಪರ್ಪೆ. ಬೊಕ್ಕ ಪರಿಶುದ್ಧ ದೂತೆರೆ ಎದುರುಡ್ಲಾ ಕುರಿತ ಕಿನ್ನಿ ಆದಿತ್ತಿನಾಯನ ಎದುರುಡ್ಲಾ ತೂಟುಲಾ, ಗಂಧಕೊಡುಲಾ, ಭಯಂಕರ ಸಂಕಟ ಪಡೆವೆ.

¹¹ಅಂಚಿತ್ತಿನಾಕುಲೆನ ಸಂಕಟದ ಪುಗೆ ಏನಿತ್ಯೇನಿಗ್ಲಾ ಏರೊಂದೇ ಪೋಪುಂಡು. ಮೃಗೊಕು ಬೊಕ್ಕ ಐತ ಮೂರ್ತಿಗ್ ಪೂಜೆ ಮಲ್ಪುನಾಕುಲುಲಾ ಐತ ಪುದರ್‌ನ್ ತೋಜಾವುನ ಗುರ್ತೊನು ಪಾಡಾವೊಂಡಿನಾಕುಲು ಮಾತೆರ್ಲಾ ರಾತ್ರೆ ಪಗೆಲ್ ವಾ ಸುಖಲಾ ಉಪ್ಪಂದೆ ಸಂಕಟ ಪಡೆವೆರ್ ಪಂಡ್ದ್ ಮಲ್ಲ ಸ್ವರೊಟ್ಟು ಪಂಡೆ.

¹²ನೆಡ್ದ್ ದೇವೆರೆ ಅಪ್ಪಣೆನ್ಲಾ ಯೇಸುನ ಮಿತ್ತ್ ನಂಬಿಕೆ ದೀವೊಂದು ನಡಪುನಾಕುಲೆನ ದೇವಜನೊಕುಲೆ ತಾಳ್ಮೆಲಾ ತೋಜಿದ್ ಬರ್ಪುಂಡು.

¹³ಪರಲೋಕೊಡ್ದು ಒಂಜಿ ಶಬ್ಧ ಎಂಕ್ ಕೇಂಡ್‌ಂಡ್. ಅವು, “ಇನಿಡ್ದ್ ಕರ್ತವ ಭಕ್ತೆರಾದ್ ಸೈಪಿನಾಕುಲು ಭಾಗ್ಯವಂತೆರ್ ಪಂಡ್ದ್ ಬರೆಲ ಪಂಡ್ದ್ ಎಂಕ್ ಪಂಡ್ಂಡ್.” ಐಕ್ ಆತ್ಮೆ, “ಅಂದ್, ಅಕುಲು ಭಾಗ್ಯವಂತೆರ್.” “ಅಕ್ಲೆನ ಕಷ್ಟ ತೀರ್‌ಂಡ್, ಅಕ್ಲೆಗ್ ವಿಶ್ರಾಂತಿ ಆಪುಂಡು, ಅಕ್ಲೆನ ಎಡ್ಡೆ ಕ್ರಿಯೊಲು ಅಕ್ಲೆ ಬೆರಿಯೆ ಬರ್ಪುಂಡು.” ಪಂಡ್ದ್ ಪಂಡೆ.

¹⁴ಯಾನ್ ತೂವನಗ ಇಂದಾ, ಒಂಜಿ ಬೊಲ್ದು ಮುಗಲ್ ಎಂಕ್ ತೋಜ್ಂಡ್. ಆ ಮುಗಲ್‌ದ ಮಿತ್ತ್ ನರಮಾನಿ ಮಗ ಲೆಕ್ಕಂತಿನಾಯೆ ಒರಿ ಕುಲ್ಲುದಿತ್ತಿನೆನ್ ತೂಯೆ. ಆಯನ ತರೆತ ಮಿತ್ತ್ ಬಂಗಾರ್‌ದ ಕಿರೀಟಲಾ ಆಯನ ಕೈಟ್ ಪರ್ತೆದ ಪರ್ಕತ್ತಿ ಇತ್ತ್ಂಡ್.

¹⁵ಅಪಗ ಬೊಕ್ಕೊರಿ ದೂತೆ ಆಲಯದ ಉಲಯಿಡ್ದ್ ಬತ್ತ್‌ದ್ ಮುಗಲ್‌ದ ಮಿತ್ತ್ ಕುಲ್ಲುದಿತ್ತಿನಾಯಗ್, “ಭೂಮಿದ ಬುಲೆ ಬುಲೆದ್‌ಂಡ್. ಕೊಯ್ಪಿ ಕಾಲ ಬತ್ತ್ಂಡ್. ನಿನ ಪರ್ಕತ್ತಿನ್ ಪಾಡ್ದ್ ಕೊಯ್ಲ,” ಪಂಡ್ದ್ ಮಲ್ಲ ಶಬ್ಧೊಡು ಬೊಬ್ಬೆ ದೀಯೆ.

¹⁶ಅಪಗ ಮುಗಲ್‌ದ ಮಿತ್ತ್ ಕುಲ್ಲುದಿತ್ತಿನಾಯೆ ತನ ಪರ್ಕತ್ತಿನ್ ಭೂಮಿದ ಮಿತ್ತ್ ಪಾಡ್ದ್ ಬುಲೆನ್ ಕೊಯ್ಯೆ, ಬೊಕ್ಕ ಭೂಮಿದ ಬುಲೆನ್ ಮಾತ ಕೊಯ್ಪಾಂಡ್.

¹⁷ಐಡ್ದ್ ಬೊಕ್ಕ ನನೊರಿ ದೂತೆ ಪರಲೋಕದ ಆಲಯೊಡ್ದು ಬತ್ತೆ. ಆಯ ಕೈಟ್‌ಲಾ ಒಂಜಿ ಪರ್ತೆದ ಪರ್ಕತ್ತಿ ಇತ್ತ್ಂಡ್.

¹⁸ಬೊಕ್ಕ ತೂತ ಅಧಿಕಾರ ಪಡೆಯಿ ನನೊರಿ ದೂತೆ ಬಲಿಪೀಠೊಡ್ದು ಬತ್ತ್‌ದ್ ಆಯೆ ಪರ್ಕತ್ತಿ ಇತ್ತಿನಾಯಡ, “ನಿನ ಪರ್ಕತ್ತಿನ್ ಪಾಡ್ದ್ ಭೂಮಿದ ದ್ರಾಕ್ಷೆದ ಗೊಂಚಿಲ್ಲೆನ್ ಕೊಯ್ಲ. ಐತ ಪರ್‌ಂದುಲು ಪೂರ ಬುಲೆದ್‌ಂಡ್,” ಪಂಡ್ದ್ ಮಲ್ಲ ಶಬ್ಧೊಡು ಬೊಬ್ಬೆ ದೀಯೆ.

¹⁹ಅಪಗ ಆ ದೂತೆ ತನ ಪರ್ಕತ್ತಿನ್ ಭೂಮಿದ ಮಿತ್ತ್ ಆಡಾಯೆ. ಮಾತ ದ್ರಾಕ್ಷೆಬೂರುನು ಕೊಯ್ದ್ ದೇವೆರೆ ಕೋಪ ಪನ್ಪಿ ಮಲ್ಲ ಗಾಣೊಗು ಪಾಡಿಯೆ.

²⁰ಪಟ್ಟಣದ ಪಿದಯಿಡಿತ್ತಿನ ಗಾಣೊಡು ದ್ರಾಕ್ಷೆನ್ ಪಾಡ್ದ್ ದೊಂಕಿಯೆರ್. ಅಪಗ ಗಾಣೊಡ್ದು ನೆತ್ತೆರ್ ಪಿದಾಡ್ದ್ ಕುದುರೆದ ಕಡಿವಾಣ ಮುಟ್ಟುನಾತ್, ನಿರ್ಪ ಇರ್ನೂದು ಮೈಲ್ ದೂರ ಪರತೊಂದು ಪೋಂಡು.