Read Tulu ಪ್ರಕಟಣೆ 16 Bible Online

ಪ್ರಕಟಣೆ 16 - Tulu bible

ಪ್ರಕಟಣೆ 16

¹ಅಪಗ ಆಲಯೊಡ್ದು ಒಂಜಿ ಮಲ್ಲ ಸ್ವರೊನು ಕೇಂಡೆ. ಆ ಏಳ್‌ ದೂತೆರೆಗ್, “ನಿಕುಲು ಪೋದು ಆ ಏಳ್‌ ಬಾಜನೊಡುಪ್ಪು ದೇವೆರೆ ಕೋಪೊನು ಭೂಮಿದ ಮಿತ್ತ್ ಗುಪ್ಪುಲೆ.” ಪಂಡ್ದ್ ಪಂಡ್ಂಡ್.

²ಬೊಕ್ಕ ಸುರುತ್ತ ದೂತೆ ತನ ಬಾಜನೊಡಿತ್ತಿನೆನ್ ಭೂಮಿಗ್ ಗುತ್ತೆ. ಅಪಗ ಸುರುತ್ತ ಮೃಗತ ಗುರ್ತೊನು ಪಾಡೊಂದು ಐತ ಮೂರ್ತಿನ್ ಪೂಜೆ ಮಲ್ತಿನಾಕುಲೆನ ಮೆಯಿತ ಮಿತ್ತ್ ಭಯಂಕರ ಬೇನೆದ ನಂಜಿಪುಡಿ ಲಕ್ಕ್‌ಂಡ್.

³ರಡ್ಡನೆದ ದೂತೆ ತನ ಬಾಜನೊಡಿತ್ತಿನೆನ್ ಕಡಲ್‌ಗ್ ಗುತ್ತೆ. ಐತ ನೀರ್ ಸೈತಿನಾಯನ ನೆತ್ತೆರ್‌ದ ಲೆಕ್ಕ ಆಂಡ್ ಬೊಕ್ಕ ಕಡಲ್‌ಡಿತ್ತಿ ಮಾತ ಜೀವಜಂತುಲು ಸೈತ್ಂಡ್.

⁴ಮೂಜನೆ ದೂತೆ ತನ ಬಾಜನೊಡಿತ್ತಿನೆನ್ ತುದೆಕುಲೆ ಮಿತ್ತ್‌ಲಾ ನೀರ್‌ದ ವಸರ್‌ದ ಮಿತ್ತ್‌ಲಾ ಗುತ್ತೆ. ಅವು ನೆತ್ತೆರ್‌ದ ಲೆಕ್ಕ ಆಂಡ್.

⁵ಐಡ್ದ್ ಬೊಕ್ಕ ನೀರ್‌ದ ಮಿತ್ತ್ ಅಧಿಪತಿ ಆದುಪ್ಪು ದೂತೆ, “ಏಪೊಗ್ಲಾ ಉಪ್ಪುನಾಯಾ, ಪರಿಶುದ್ಧದಾಯಾ, ಈ ಇಂಚನೆ ನ್ಯಾಯತೀರ್ಪು ಮಲ್ತಿನೆಡ್ದ್ ಈ ನೀತಿದಾಯೆನೇ ಆದುಲ್ಲ.

⁶ಅಕುಲು ಪರಿಶುದ್ಧ ಜನೊಕುಲೆನಲಾ ಬೊಕ್ಕ ಪ್ರವಾದಿಲೆನಲಾ ನೆತ್ತೆರ್ ಗುತ್ತೆರ್. ಈ ಅಕ್ಲೆಗ್ ನೆತ್ತೆರ್‌ನೇ ಪರಿಯೆರೆ ಕೊರ್ತ. ನೆಕ್ಕ್ ಅಕುಲು ತಕ್ಕದಾಕುಲು,” ಪಂಡ್ದ್ ಪನ್ಪಿನೆನ್ ಕೇಂಡೆ.

⁷ಐಡ್ದ್ ಬೊಕ್ಕ ಬಲಿಪೀಠೊಡ್ದು, “ಸರ್ವಶಕ್ತೆ ಆದುಪ್ಪು ಓ ದೇವೆರೇ, ನಿನ ನ್ಯಾಯತೀರ್ಪು ಸತ್ಯದವುಲಾ ನ್ಯಾಯದವುಲಾ ಆದುಂಡು ನಿಜ,” ಪಂಡ್ದ್ ಪನ್ಪಿನೆನ್ ಕೇಂಡೆ.

⁸ನಾಲನೇ ದೂತೆ ತನ ಬಾಜನೊಡಿತ್ತಿನೆನ್ ಸೂರ್ಯನ ಮಿತ್ತ್ ಗುತ್ತೆ. ಅಪಗ ಸೂರ್ಯಗ್ ನರಮಾನಿಲೆನ್ ದೊಂಬುಡು ಕರ್‌ಂಟಾವುನ ಅಧಿಕಾರ ಕೊರ್‌ಂಡ್.

⁹ನರಮಾನಿಲು ಆ ಭಯಂಕರ ಬೆಚ್ಚೊಗು ಬೆಯ್ತ್‌ದ್ ನರಳಿಯೆರ್ಡಲಾ ಅಕುಲು ದೇವೆರೆನ್ ಮೈಮೆ ಪಡೆಪಾವುಲೆಕ್ಕ ಪಶ್ಚಾತಾಪ ಪಡೆಯಂದೆ ಉಪದ್ರೊಲೆ ಮಿತ್ತ್ ಅಧಿಕಾರ ಇತ್ತಿ ದೇವೆರೆ ಪುದರ್‌ನ್ ದೂಷಣೆ ಮಲ್ತೆರ್.

¹⁰ಐನನೇ ದೂತೆ ತನ ಬಾಜನೊಡಿತ್ತಿನೆನ್ ಸುರುತ್ತ ಮೃಗತ ಗದ್ದಿಗೆದ ಮಿತ್ತ್ ಮೈಪುನಗ ಐತ ರಾಜ್ಯ ಕತ್ತಲೆ ಆಂಡ್. ಜನೊಕುಲು ತನ್ಕುಲೆಗ್ ಆದುಪ್ಪು ಕಷ್ಟದ ದಿಸೆಡ್ದ್ ತನ್ಕುಲೆ ನಾಲಯಿಲೆನ್ ತುಚ್ಚೊಂದು,

¹¹ತನ್ಕುಲೆ ಕ್ರಿಯೊಲೆ ಸಂಗತಿಡ್ ಪಶ್ಚಾತಾಪ ಪಡೆಯಂದೆ ತನ್ಕುಲೆ ಕಷ್ಟದ ದಿಸೆಡ್ದ್‌ಲಾ ತನ್ಕ್‌ಲೆಗಾಯಿ ಪುಡಿತ್ತ ಡಿಸೆಡ್ದ್‌ಲಾ ಪರಲೋಕದ ದೇವೆರೆನ್ ದೂಷಣೆ ಮಲ್ತೆರ್.

¹²ಆಜನೆ ದೂತೆ ತನ ಬಾಜನೊಡಿತ್ತಿನೆನ್ ಯೂಫ್ರೇಟೀಸ್ ಪನ್ಪಿ ಮಲ್ಲ ತುದೆಕ್ ಮೈಪುನಗ ಆ ತುದೆತ ನೀರ್ ಆಜಿದ್ ಪೋಂಡು. ನೆಡ್ದ್ ಮೂಡಾಯಿ ದಿಕ್ಕ್‌ಡ್ದ್ ಬರ್ಪಿ ಅರಸುಗು ಸಾದಿ ತಯಾರಾಂಡ್.

¹³ಬೊಕ್ಕ ಘಟಸರ್ಪೆ, ಮೃಗ ಬೊಕ್ಕ ಸುಳ್ಳು ಪ್ರವಾದಿ ಮೊಕ್ಲೆನ ಬಾಯಿಡ್ದ್ ಮೂಜಿ ಕಪ್ಪೆಲೆಕ್ಕಂತಿನ ಅಶುದ್ಧ ಆತ್ಮೊಲು ಬರ್ಪಿನೆನ್ ತೂಯೆ.

¹⁴ಉಂದು ಬಲತ್ತ ಕಾರ್ನಿಕೊಲೆನ್ ಮಲ್ಪುನ ದೆವ್ವೊಲು, ಭೂಲೋಕದ ಮಾತ ಅರಸೆರೆ ಕೈತಲ್‌ ಪೋದು, ಸರ್ವಶಕ್ತೆ ಆದುಪ್ಪು ದೇವೆರೆನ ಮಲ್ಲ ದಿನೊಟು ಆಪಿ ಯುದ್ಧೊಗು ಅಕ್ಲೆನ್ ಕೂಡಾವ.

¹⁵“ಇಂದಾ, ಯಾನ್ ಕಲ್ವೆ ಬರ್ಪಿಲೆಕ್ಕನೇ ಬರ್ಪೆ. ತಾನ್ ಬತ್ತಲೆ ಆದ್ ತಿರ್ಗೊಂದು ಜನೊಕುಲೆಡ್ದ್ ಅವಮಾನೊಗು ಬೂರಂದಿಲೆಕ್ಕ ಎಚ್ಚರಿಕೆ ಆದಿತ್ತ್‌ದ್ ತನ ಕುಂಟುನು ಜೋಕೆ ಮಲ್ತೊನುನಾಯೆ ಭಾಗ್ಯವಂತೆ.”

¹⁶ಆ ದೆವ್ವೊಲು ಮಾತ ರಾಜೆರೆನ್ ಇಬ್ರಿಯ ಭಾಷೆಡ್ ಹರ್ಮಗೆದೋನ್ ಪನ್ಪಿ ಪುದರುಪ್ಪು ಜಾಗ್‌ಗ್ ಸೇರಾಯ.

¹⁷ಏಳನೇ ದೂತೆ ತನ ಬಾಜನೊಡಿತ್ತಿನೆನ್ ಗಾಳಿ ಮಂಡಲದ ಮಿತ್ತ್ ಮೈಪುನಗ ಆಲಯೊಡುಪ್ಪು ಗದ್ದಿಗೆದ ಕಡೆಡ್ದ್ ಮಲ್ಲ ಶಬ್ಧ ಉಂಡಾದ್, “ಮುಗಿಂಡ್” ಪಂಡ್ದ್ ಪಂಡ್ಂಡ್.

¹⁸ಅಪಗ ಮಿಂಚಿ, ಶಬ್ಧ, ತೆಡಿಲ್ ಉಂಡಾಂಡ್. ಉಂದತ್ತಂದೆ ಮಲ್ಲ ಭೂಕಂಪ ಆಂಡ್. ನರಮಾನಿಲು ಭೂಮಿದ ಮಿತ್ತ್ ಇತ್ತಿನೆಡ್ದಿಂಚಿ ಅಂಚಿತ್ತಿ ಭೂಕಂಪ ಆತಿನೇ ಇಜ್ಜಿ.

¹⁹ಆ ಮಲ್ಲ ಪಟ್ಟಣ ಮೂಜಿ ಪಾಲಾಂಡ್. ಜನಾಂಗೊಲೆ ಮಿತ್ತ್ ಪಟ್ಟಣಲು ಬೂರುಂಡು. ಉಂದತ್ತಂದೆ ದೇವೆರ್ ಆ ಮಲ್ಲ ಬಾಬೆಲ್ ಪೇಂಟೆನ್‌ ನೆನೆಪು ಮಲ್ತೊಂದು ತನ ಕೋಪ ಪನ್ಪಿ ದ್ರಾಕ್ಷಾರಸದ ಬಾಜನೊನು ಆಲೆಗ್ ಪರಿಯೆರೆ ಕೊರಿಯೆ.

²⁰ಮಾತ ದ್ವೀಪೊಲು ಮಾಯ ಆಂಡ್. ಮಾತ ಪರ್ವತೊಲು ನೆಲ ಸಮ ಆಂಡ್.

²¹ಬಾನೊಡ್ದು ನರಮಾನಿಲೆ ಮಿತ್ತ್ ಮಲ್ಲ ಆನೆಕಲ್ಲ್‌ದ ಬರ್ಸ ದೊರಿಂಡ್. ಒಂಜೊಂಜಿ ಬರ್ಸದ ಕಲ್ಲ್ ಹೆಚ್ಚಿಕಡಿಮೆ ನಾಲ್ ಮಣ ತೂಕ ಇತ್ತ್ಂಡ್. ಈ ಆನೆಕಲ್ಲ್‌ದ ಬರ್ಸದ ಕಾಟ ಹೆಚ್ಚಾಯಿನೆಡ್ದ್ ಆ ಬರ್ಸೊಡು ತಿಕ್ಕೊಂಡಿ ಜನೊಕುಲು ದೇವೆರೆನ್ ದೂಷಣೆ ಮಲ್ತೆರ್.