Read Tulu ಪ್ರಕಟಣೆ 19 Bible Online

ಪ್ರಕಟಣೆ 19 - Tulu bible

ಪ್ರಕಟಣೆ 19

¹ಉಂದೆಡ್ದ್ ಬೊಕ್ಕ ಪರಲೋಕೊಡ್ದು ಮಲ್ಲ ಗುಂಪುದ ಮಲ್ಲ ಒಂಜಿ ಸ್ವರೊನು ಕೇಂಡೆ. ಅಕುಲು “ಹಲ್ಲೆಲೂಯಾ, ರಕ್ಷಣೆಲಾ ಮೈಮೆಲಾ ಬಲಲಾ ನಮ ದೇವೆರೆಗೇ ಸೇರ್ದಿನವು.

²ಆಯನ ನ್ಯಾಯತೀರ್ಪು ಸತ್ಯದವುಲಾ ನ್ಯಾಯದವುಲಾ ಆದುಂಡು. ತನ ಹಾದ್ರೊಡ್ದು ಲೋಕೊನು ಪೂರ ಹಾಳ್ ಮಲ್ತ್‌ದಿನ ಆ ಮಲ್ಲ ಮಾನ್ಯ ಕೆಟ್ಟ್‌ದಿ ವೇಶ್ಯೆಗ್ ಆಯೆ ತೀರ್ಪು ಮಲ್ತ್‌ದ್ ಆಲ್ ಆಯ ಸೇವಕೆರೆನ್ ಕೆರಿನೆಕ್ಕಾದ್ ಆಲೆಗ್ ಪಗತೆ ಕೊರ್ದು ತೀರಿಸಾವೊಂಡೆ.”

³ರಡ್ಡನೆ ಸರಿ, “ಹಲ್ಲೆಲೂಯಾ, ಅಂದ್‌ದ್ ಬೊಬ್ಬೆ ಪಾಡ್ದ್, ಆಲ್ ಪೊತ್ತುನೆಟ್ಟ್ ಉಂಡಾಪಿ ಪುಗೆ ಏನಿತ್ಯೇನಿಗ್ಲಾ ಏರ್ದ್ ಪೋಪುಂಡು,” ಅಂದ್‌ದ್ ಪಂಡೆರ್.

⁴ಅಪಗ ಇರ್ವತ್ತನಾಲ್ ಹಿರಿಯೆರ್‌ಲಾ ಆ ನಾಲ್ ಜೀವಿಲುಲಾ ಅಡ್ಡಬೂರ್ದು ಗದ್ದಿಗೆಡಿತ್ತಿನ ದೇವೆರೆನ್ ಆರಾಧನೆ ಮಲ್ತ್‌ದ್, “ಆಮೆನ್, ಹಲ್ಲೆಲೂಯಾ,” ಪಂಡೆರ್.

⁵ಐಡ್ದ್ ಬೊಕ್ಕ ಗದ್ದಿಗೆದ ಕಡೆಡ್ದ್ ಬತ್ತಿ ಒಂಜಿ ಸ್ವರ, “ದೇವೆರೆನ ಮಾತ ಸೇವಕೆರೇ, ದೇವೆರೆಗ್ ಪೋಡಿಯುನ ಹಿರಿಕಿರಿಯೆರೇ ನಮ ದೇವೆರೆನ್ ಪುಗರ್‌ಲೆ. ಅಂದ್‌ದ್ ಪಂಡ್ಂಡ್.”

⁶ಬೊಕ್ಕ ಜನೊಕುಲೆ ಮಲ್ಲ ಗುಂಪುದ ಗೌಜಿದಲೆಕ್ಕಲಾ ನೀರ್‌ದ ಬೊಲ್ಲದ ಅಬ್ಬರದ ಲೆಕ್ಕಲಾ ಮಲ್ಲ ತೆಡಿಲ್‌ದ ಶಬ್ಧದಲೆಕ್ಕಲಾ ಇತ್ತಿ ಒಂಜಿ ಶಬ್ಧೊನು ಕೇಂಡೆ, “ಹಲ್ಲೆಲೂಯಾ, ಸರ್ವಶಕ್ತೆ ಆದಿತ್ತಿ ನಮ್ಮ ದೇವೆರಾಯಿ ಕರ್ತವೆ ಆಳುವೆ.

⁷ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯನ ಮದ್ಮೆದ ಕಾಲ ಬತ್ತ್ಂಡ್. ಆಯಗ್ ಮದ್ಮೆ ಆಪಿನ ಬೊಡೆದಿ ತನನ್ ತಯಾರ್ ಮಲ್ತೊಂದಲ್. ನಮ ಸಂತೋಷೊಡು ಉಲ್ಲಾಸ ಮಲ್ಪುಗ; ಆಯಗ್ ಮೈಮೆನ್ ಸಂದಾಗ ಅಂದ್‌ದ್ ಪಂಡ್ಂಡ್.

⁸ಮಿಂಚುನವುಲಾ ಶುದ್ಧದವುಲಾ ಇತ್ತಿ ಎಡ್ಡೆ ನಾರ್‌ಮಡಿತ ಕುಂಟುನು ತುತ್ತೊನೆರೆ ಆಲೆಗ್ ಕೊರ್ತುಂಡು. ಆ ನಾರ್‌ಮಡಿ ಪಂಡ್ಂಡ ದೇವಜನೊಕುಲೆ ನೀತಿದ ಕಾರ್ಯೊಲು.”

⁹ಉಂದತ್ತಂದೆ ದೂತೆ ಎನ್ನೊಟ್ಟುಗು ಪಾತೆರೊಂದು, ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯನ ಮದ್ಮೆದ ಲೇಸ್‌ಗ್ ಲೆಪ್ಪಾವೊಂಡಿನಾಕುಲು ಭಾಗ್ಯವಂತೆರ್ ಅಂದ್‌ದ್ ಬರೆಲ ಅಂದ್‌ದ್ ಎಂಕ್ ಪಂಡ್ದ್, ಈ ಪಾತೆರೊಲು ದೇವೆರೆ ಸತ್ಯದ ಪಾತೆರೊಲಾದುಂಡು ಅಂದ್‌ದ್ ಪಂಡೆ.

¹⁰ಅಪಗ ಯಾನ್ ಆಯಗ್ ಅಡ್ಡ ಬೂರೊಡು ಅಂದ್‌ದ್ ಆಯ ಕಾರ ಎದುರು ಬೂರ್ನಗ ಆಯೆ, ಮಲ್ಪಡ ತೂಲ, ಯಾನ್ ನಿಕ್ಕ್‌ಲಾ ಯೇಸುನ ಸಂಗತಿದ ಸಾಕ್ಷಿನ್ ಪಂಡ್ದುಪ್ಪುನ ನಿನ ಸಹೋದರೆರೆಗ್ಲಾ ಜತೆಸೇವಕೆ ಆದುಲ್ಲೆ. ದೇವೆರೆಗೇ ಅಡ್ಡಬೂರ್ಲ ಅಂದ್‌ದ್ ಪಂಡೆ. ಯೇಸುನ ಸಾಕ್ಷಿಯೇ ಪ್ರವಾದನೆದ ಆತ್ಮ ಆದುಂಡು.

¹¹ಬೊಕ್ಕ ಪರಲೋಕ ಜತ್ತ್‌ದುಪ್ಪುನೆನ್ ಯಾನ್ ತೂಯೆ. ಅಪಗ ಇಂದಾ ಒಂಜಿ ಬೊಲ್ದು ಕುದುರೆ ಎಂಕ್ ತೋಜ್ಂಡ್. ಐತ ಮಿತ್ತ್ ಕುಲ್ಲುದಿನಾಯಗ್ ನಂಬಿಗಸ್ತೆಲಾ ಸತ್ಯದಾಯೆಲಾ ಅಂದ್‌ದ್ ಪುದರ್. ಆಯೆ ನೀತಿಡ್ ನ್ಯಾಯತೀರ್ಪು ಮಲ್ಪುವೆ. ನೀತಿಡ್ ಲಡಯಿ ಮಲ್ಪುವೆ.

¹²ಆಯನ ಕಣ್ಣ್ ಉರಿಯುನ ತೂತ ಲೆಕ್ಕ ಉಂಡು. ಆಯ ತರೆತ ಮಿತ್ತ್ ದಿಂಜ ಕಿರೀಟೊಲು ಉಂಡು. ಆಯಗ್ ಒಂಜಿ ಪುದರ್ ಬರೆದ್ ಕೊರ್ತುಂಡು. ಅವು ಆಯಗೇ ಅತ್ತಂದೆ ಬೇತೆ ಏರೆಗ್ಲಾ ತೆರಿಯಂದ್.

¹³ಆಯೆ ನೆತ್ತೆರ್‌ಡ್ ಮುರ್ಕಾದಿನ ಕುಂಟುನು ಪಾಡೊಂದಿತ್ತೆ. ಆಯಗ್, “ದೇವೆರೆ ಪಾತೆರ,” ಅಂದ್‌ದ್ ಪುದರ್.

¹⁴ಪರಲೋಕೊಡುಪ್ಪು ಸೈನ್ಯದಾಕುಲು ಶುದ್ಧ ಬೊಲ್ದು ಎಡ್ಡೆ ನಾರ್‌ಮಡಿತ ಕುಂಟು ಪಾಡೊಂದು ಬೊಲ್ದು ಕುದುರೆಲೆ ಮಿತ್ತ್ ಕುಲ್ಲೊಂದು ಆಯ ಬೆರಿಯೆ ಬರೊಂದಿತ್ತೆರ್.

¹⁵ಜನಾಂಗೊಲೆನ್ ಸೋಪಾವೆರೆಗಾದ್ರ ಒಂಜಿ ಪರ್ತೆದ ಕತ್ತಿ ಆಯ ಬಾಯಿಡ್ದ್ ಬರ್ಪುಂಡು. ಆಯೆ ಕರ್ಬದ ಕೋಲುಡ್ದು ಅಕ್ಲೆನ್ ಆಳುವೆ. ಸರ್ವಶಕ್ತೆ ಆದುಪ್ಪು ದೇವೆರೆನ ಭಯಂಕರ ಕೋಪ ಪನ್ಪಿ ದ್ರಾಕ್ಷೆದ ಗಾಣೊಡಿತ್ತಿನೆನ್ ದೊಂಕುವೆ.

¹⁶ಆಯನ ತೊಡೆತ ಮಿತ್ತ್‌ದ ಕುಂಟುಡು, “ರಾಜಾದಿರಾಜೆಲಾ ಕರ್ತವೆರೆ ಕರ್ತವೆಲಾ,” ಇನ್ಪಿ ಪುದರ್ ಬರೆತ್ಂಡ್.

¹⁷ಐಡ್ದ್ ಬೊಕ್ಕ ಒರಿ ದೂತೆ ಸೂರ್ಯನ ಮಿತ್ತ್ ಉಂತುದಿನೆನ್ ತೂಯೆ. ಆಯೆ ನಡು ಬಾನೊಡು ರಾವೊಂದುಪ್ಪು ಮಾತ ಪಕ್ಕಿಲೆಗ್ ಮಲ್ಲ ಶಬ್ಧೊಡು ಇಂಚ ಪನೊಂದಿತ್ತೆ, “ಬಲೆ, ದೇವೆರೆನ ಮಲ್ಲ ವಣಸ್‌ದ ಲೇಸ್‌ಗ್ ಸೇರ್ದ್ ಬಲೆ.

¹⁸ಅರಸುಲೆನ ಮಾಸೊನು, ಸೇನಾಧಿಪತಿಲೆನ ಮಾಸೊನು, ಬಲಿಷ್ಟೆರೆ ಮಾಸೊನು ಕುದುರೆಲೆ ಮಾಸೊನು, ಬೊಕ್ಕ ಐತ ಮಿತ್ತ್ ಕುಲ್ಲುದಿನಾಕುಲೆನ, ಸ್ವತಂತ್ರೆರ್, ಗುಲಾಮೆರ್, ಬಡವೆರ್ ಮಲ್ಲಾಕುಲು ಮೊಕ್ಲೆನ ಮಾತೆರೆ ಮಾಸೊನು ತಿನಿಯೆರೆ ಬಲೆ.” ಅಂದ್‌ದ್ ಪಂಡೆ.

¹⁹ಬೊಕ್ಕ ಆ ಸುರುತ್ತ ಮೃಗಲಾ ಭೂಮಿದ ಅರಸೆರ್‌ಲಾ ಅಕ್ಲೆನ ಸೈನ್ಯದಾಕುಲುಲಾ ಆ ಕುದುರೆದ ಮಿತ್ತ್ ಕುಲ್ಲುದಿತ್ತಿನಾಯನ ಮಿತ್ತ್‌ಲಾ ಆಯನ ಸೈನ್ಯದ ಮಿತ್ತ್‌ಲಾ ಲಡಯಿ ಮಲ್ಪೆರೆಗಾದ್ ಸೇರ್ದ್ ಬತ್ತಿನೆನ್ ತೂಯೆ.

²⁰ಅಪಗ ಮೃಗ ತಿಕ್ಕ್ಂಡ್. ಉಂದತ್ತಂದೆ ಮೃಗತ ಎದುರು ಬಲತ್ತ ಕಾರ್ನಿಕೊಲೆನ್ ಮಲ್ತ್‌ದ್ ಮೃಗತ ಗುರ್ತ ಪಾಡೊಂದಿನಾಕುಲೆನ್ಲಾ ಐತ ಮೂರ್ತಿಲೆನ್ ಆರಾಧನೆ ಮಲ್ಪುನಾಕುಲೆನ್ಲಾ ಮೋಸ ಮಲ್ತ್‌ದಿ ಆ ಸುಳ್ಳು ಪ್ರವಾದಿಲಾ ಐತ ಜತೆಟ್ ತಿಕ್ಕಿಯೆ. ಇರ್ವೆರೆನ್ಲಾ ಜೀವ ಇತ್ತಿಲೆಕ್ಕನೆ ಗಂಧಕ ಪೊತ್ತುನ ತೂತ ಕೆರೆಕ್ ದಕ್ಕಿಯೆರ್.

²¹ಬಾಕಿದಾಕುಲು ಕುದುರೆದ ಮಿತ್ತ್ ಕುಲ್ಲುದಿನಾಯನ ಬಾಯಿಡ್ದ್ ಬತ್ತಿ ಪರ್ತೆದ ಕತ್ತಿಡ್ದ್ ನಾಶ ಆಯೆರ್. ಬೊಕ್ಕ ಮಾತ ಪಕ್ಕಿಲು ಆ ಮಾಸೊನು ಬಂಜಿ ನಿಲಿಕೆ ತಿಂದ.