Read Tulu ಪ್ರಕಟಣೆ 2 Bible Online

ಪ್ರಕಟಣೆ 2 - Tulu bible

ಪ್ರಕಟಣೆ 2

¹“ಎಫೆಸೊಡುಪ್ಪು ಸಭೆತ ದೂತಗ್ ಇಂಚ ಬರೆಲ: “ತನ ಬಲತ್ತ ಕೈಟ್ ಏಳ್‌ ಬೊಳ್ಳಿಲೆನ್ ಪತ್ತೊಂದಿನಾಯೆ ಏಳ್‌ ಬಂಗಾರ್‌ದ ದೀಪಕಂಬೊಲೆ ನಡುಟು ತಿರ್ಗೊಂದುಪ್ಪುನಾಯೆ ಪನ್ಪಿನಿ ದಾನೆಂದ್ಂಡ,

²ನಿನ ಕೆಲಸೊಲೆನ್ಲಾ ಈ ಸೊಂದುನೆನ್ಲಾ ನಿನ ತಾಳ್ಮೆನ್ಲಾ ಯಾನ್ ತೆರಿದೆ; ಈ ದುಷ್ಟೆರೆನ್ ಸಹಿಸೊನುಜ; ತನ್ಕುಲೆನ್ ಅಪೊಸ್ತಲೆರ್ ಅಂದ್‌ದ್ ಪಂಡೊನುನಾಕುಲೆನ್ ಈ ಪರೀಕ್ಷೆ ಮಲ್ತ್‌ದ್ ತೂದು ಅಕುಲು ಸುಳ್ಳುಗಾರೆರ್ ಪಂಡ್ದ್ ನಾಡ್ದ್ ಪತ್ತಿಯ.

³ಈ ಎನ ಪುದರ್‌ಗಾದ್ ತಾಳ್ಮೆಡ್ ತೊಂದರೆಲೆನ್ ತಾಂಗೊಂದು ಬೇಜಾರ್ ಮಲ್ತ್‌ದ, ಉಂದು ಮಾತ ತೆರಿದೆ.

⁴ಆಂಡಲಾ ನಿನ ಮಿತ್ತ್ ಎಂಕ್ ಒಂಜಿ ಅಪವಾದ ಉಂಡು. ಅವು ದಾನೆಂದ್ಂಡ, ಎನಡೊಪ್ಪ ಸುರುಟ್ಟಿತ್ತಿ ಪ್ರೀತಿ ಇತ್ತೆ ನಿನಡ ಇಜ್ಜಿ.

⁵ಅಂಚಾಯಿನೆಡ್ದ್ ಈ ಒಲ್ತು ತತ್ತ್‌ದನಾ ಅವೆನ್ ನಿನ ಗೇನೊಗು ಕನತ್‌ದ್ ಪಶ್ಚಾತಾಪ ಪಡೆಲ. ಈ ದುಂಬು ಮಲ್ತೊಂದಿತ್ತಿ ಬೇಲೆಲೆನ್ ಮಲ್ಪುಲ! ಈ ಪಶ್ಚಾತಾಪ ಪಡೆಯಿಜಡ ಯಾನ್ ಬತ್ತ್‌ದ್ ನಿನ ದೀಪಕಂಬೊನು ಐತ ಜಾಗ್‌ಡ್ದ್ ದೆತ್ತ್‌ದ್ ಪಾಡ್ವೆ.

⁶ಆಂಡ ನಿನಡ ಎಡ್ಡೆಂತಿನ ಒಂಜಿ ಉಂಡು, ಯಾನ್ ಪಗೆ ಮಲ್ತೊಂದಿತ್ತಿ *ನಿಕೋಲಾಯಿತೆರೆ ಬೇಲೆಲೆನ್ ಈಲಾ ಪಗೆ ಮಲ್ಪುವ.

⁷“ದೇವೆರಾತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್. ಗೆಂದಿನಾಯಗ್ ಪರಲೋಕೊಡುಪ್ಪು ದೇವೆರೆ ಜೀವ ಇತ್ತಿ ಮರತ ಪರ್ಂದ್‌ನ್ ತಿನಿಯೆರೆ ಕೊರ್ಪೆ.

⁸“ಸ್ಮುರ್ನೊಡುಪ್ಪು ಸಭೆತ ದೂತಗ್ ಇಂಚ ಬರೆಲ: “ಆದಿಲಾ ಅಂತ್ಯಲಾ ಸೈತ್‌ದ್ ಬದ್‌ಕಿನಾಯೆ ಪನ್ಪಿನಿ ದಾನೆಂದ್ಂಡ,

⁹ನಿನ ಸಂಕಟೊನ್ಲಾ ಬಡತನೊನ್ಲಾ ಯಾನ್ ತೆರಿದೆ. ಆಂಡಲಾ ಈ ಐಶ್ವರ್ಯವಂತೆನೇ ಆದುಲ್ಲ. ಯೆಹೂದ್ಯೆರಂದ್‌ದ್ ಪಂಡೊನುನಾಕುಲು ನಿನನ್ ದೂಷಿಯುನಲಾ ಎಂಕ್ ತೆರಿದ್‌ಂಡ್. ಆಂಡ ಅಕುಲು ಯೆಹೂದ್ಯೆರತ್ತ್. ಅಕುಲು ಸೈತಾನನ ಕೂಟದಾಕುಲು.

¹⁰ನಿಕ್ಕ್ ಬರ್ಪಿನಂಚಿತ್ತಿ ಭಂಗೊಗಾದ್ ಪೋಡ್ಯಡ. ಇಂದಾ! ನಿಕ್ಲೆಡ್ ಕೆಲೆವೆರೆನ್ ಪರೀಕ್ಷೆ ಮಲ್ಪೆರೆಗಾದ್ ಸೈತಾನೆ ಸೆರೆಮನೆಟ್ ಪಾಡುವೆ. ಪತ್ತ್ ದಿನ ಸಂಕಟ ಉಪ್ಪು. ಮರಣ ಬತ್ತ್‌ಂಡಲಾ ನಂಬಿಗಸ್ತೆ ಆದುಪ್ಪುಲ. ಯಾನ್ ನಿಕ್ಕ್ ಜೀವದ ಕಿರೀಟೊನು ಕೊರ್ಪೆ.

¹¹“ದೇವೆರೆ ಆತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್. ಗೆಂದಿನಾಯಗ್ ರಡ್ಡನೆ ಮರಣೊಡ್ದು ವಾ ಕೇಡ್‌ಲಾ ಆವಂದ್.

¹²“ಪೆರ್ಗಮೊಡುಪ್ಪು ಸಭೆತ ದೂತಗ್ ಇಂಚ ಬರೆಲ, ಪರ್ತೆದ ಇರ್ಬಾಯಿ ಕತ್ತಿನ್ ಪತ್ತೊಂದಿತ್ತಿನಾಯೆ ಪನ್ಪಿನಿ ದಾನೆಂದ್ಂಡ,

¹³ಈ ಉಪ್ಪುನ ಜಾಗ್‌ನ್ ಯಾನ್ ತೆರಿದೆ. ಅವು ಸೈತಾನನ ಗದ್ದಿಗೆ ಆದುಂಡು. ಆಂಡಲಾ ಈ ಎನ ಪುದರ್‌ನ್ ಬುಡಂದೆ ಪತ್ತೊಂದ. ಈ ಉಪ್ಪುನ ಸೈತಾನನ ಬುಡಾರೊಡು ಎಂಕ್ ನಂಬಿಗಸ್ತೆಲಾ ಸಾಕ್ಷಿದಾಯೆಲಾ ಆದಿತ್ತಿ ಅಂತಿಪನ್ ಕೆರ್ದ್ ಪಾಡಿಯೆರ್. ಆ ದಿನೊಕುಲೆಡ್ಲಾ ಈ ಎನ ಮಿತ್ತ್ ದೀತಿನ ನಂಬಿಕೆನ್ ಮದೆ ಮಲ್ತ್‌ಜ.

¹⁴ಆಂಡ ನಿನ ಸಂಗತಿಡ್ ನಿನ ಮಿತ್ತ್ ಕೆಲವು ಅಪವಾದ ಉಂಡು. ಮೂರ್ತಿಗ್ ಅರ್ಪಣೆ ಮಲ್ತ್‌ದಿನ ನೈವೇದ್ಯೊಲೆನ್ ತಿನ್ಪಿನೆಟ್ಲಾ ಹಾದ್ರ ಮಲ್ಪುನೆಟ್ಲಾ ಇಸ್ರಾಯೇಲ್ಯೆರ್ ದಂಟ್‌ದ್ ಬೂರೊಡು ಅಂದ್‌ದ್ ಬಿಳಾಮೆ ಬಾಲಾಕಗ್ ಪಂಡಿನ ದುರ್ಬೋಧನೆನ್ ಪತ್ತೊಂದಿನಾಕುಲುಲಾ ನಿನಡ ಉಲ್ಲೆರ್.

¹⁵ಅವ್ವೇ ರೀತಿದ ಬೋಧನೆಲೆನ್ ಪತ್ತೊಂದಿನ ನಿಕೋಲಾಯಿತೆರ್ಲಾ ನಿನಡ ಉಲ್ಲೆರ್.

¹⁶ಅವೆಡ್ದಾವರ ಪಶ್ಚಾತಾಪ ಪಡೆದ್ ತಿರ್ಗಿಜೆರ್ಡ ಯಾನ್ ಬೇಗನೆ ನಿನ ಕೈತಲ್‌ಗ್ ಬತ್ತ್‌ದ್ ಎನ ಬಾಯಿಡ್ದ್ ಬರ್ಪಿ ಕತ್ತಿಡ್ದ್ ಅಕ್ಲೆಡೊಪ್ಪ ಯುದ್ದ ಮಲ್ಪುವೆ.

¹⁷“ದೇವೆರಾತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್. ಗೆಂದಿನಾಯಗ್ ದೆಂಗಾದ್ ದೀತಿನ ಮನ್ನ ಪನ್ಪಿ ತಿನಸ್‌ನ್ ಕೊರ್ಪೆ; ಪ್ರತಿಯೊರಿಯಗ್ಲಾ ಒಂಜಿ ಬೊಲ್ದು ಕಲ್ಲ್‌ನ್ ಕೊರ್ಪೆ. ಆ ಕಲ್ಲ್‌ದ ಮಿತ್ತ್ ಒಂಜಿ ಪೊಸ ಪುದರ್ ಬರೆದುಪ್ಪುಂಡು. ಆ ಪುದರ್ ಏರೆಗ್ ತಿಕ್ಕುಂಡಾ ಆಯಗ್ ಅತ್ತಂದೆ ಬೇತೆ ಏರೆಗ್ಲಾ ತೆರಿಯಂದ್.

¹⁸“ಥುವತೈರೊಡುಪ್ಪು ಸಭೆತ ದೂತಗ್ ಇಂಚ ಬರೆಲ: “ಅರ್ಲುನ ತೂತ ಕೆಂಡದಲೆಕ್ಕ ಉಪ್ಪು ಕಣ್ಣುಲು ಪಿತ್ತಲೆದಲೆಕ್ಕಂತಿ ಕಾರುಲು ಉಪ್ಪುನ ದೇವೆರೆ ಮಗೆ ಪನ್ಪಿನಿ ದಾನೆಂದ್ಂಡ,

¹⁹ನಿನ ಕೆಲಸೊಲೆನ್ಲಾ ನಿನ ಪ್ರೀತಿನ್ಲಾ ನಿನ ನಂಬಿಕೆನ್ಲಾ ನಿನ ಸೇವೆನ್ಲಾ ನಿನ ತಾಳ್ಮೆನ್ಲಾ ಯಾನ್ ತೆರಿದೆ. ಉಂದತ್ತಂದೆ ನಿನ ಕಡೆತ ಬೇಲೆಲು ದುಂಬುದೆಡ್ದ್‌ಲಾ ಹೆಚ್ಚ್‌ದವು ಅಂದ್‌ದ್ ತೆರಿದೆ.

²⁰ಆಂಡ ನಿನ ಮಿತ್ತ್ ಒಂಜಿ ಅಪವಾದ ಉಂಡು. ಅವು ದಾನೆಂದ್ಂಡ ಈಜೆಬೆಲ್ ಇನ್ಪಿ ಆ ಪೊಂಜೊವು ತನನ್ ತಾನೇ ಪ್ರವಾದಿನಿ ಅಂದ್‌ದ್ ಪನೊಂದು ಹಾದ್ರ ಮಲ್ಪೊಲಿ ಪಂಡ್ದ್‌ಲಾ ಮೂರ್ತಿಗ್ ನೈವೇದ್ಯ ಮಲ್ತಿನೆನ್ ತಿನೊಲಿ ಅಂದ್‌ದ್ ಬೋಧನೆ ಕೊರೊಂದು ಎನ ಸೇವಕೆರೆನ್ ಅಡ್ಡ ಸಾದಿಡ್ ನಡಪಾವನಗ ಈ ಆಲೆನ್ ತಡೆಪಂದೆ ಬುಡಿಯ.

²¹ಯಾನ್ ಆಲೆಗ್ ಪಶ್ಚಾತಾಪ ಪಡೆಯೆರೆ ಸಮಯೊನು ಕೊರಿಯೆ. ಆಂಡ ಆಲೆಗ್ ಪಶ್ಚಾತಾಪ ಪಡೆದ್ ತನ ಹಾದ್ರೊನು ಬುಡ್ದು ಬುಡಿಯೆರೆ ಮನಸ್ ಇಜ್ಜಿ.

²²ಇಂದಾ, ಆಲ್ ಪಜೆಟ್‌ ನೆಗರುಲೆಕ್ಕ ಮಲ್ಪುವೆ. ಬೊಕ್ಕ ಆಲೆಡೊಪ್ಪ ವ್ಯಭಿಚಾರ ಮಲ್ತ್‌ದಿನಾಕುಲು ತನ್ಕುಲು ಪಶ್ಚಾತಾಪ ಪಡೆವೊಂದು ಆಲೆನ ಸಂಗೊನು ಬುಡ್ದು ಪಶ್ಚಾತಾಪ ಪಡೆಯಿಜೆರ್ಡ ಮಲ್ಲ ಸಂಕಟೊಡು ಬೂರುಲೆಕ್ಕ ಮಲ್ಪುವೆ.

²³ಆಲೆನ ಜೋಕುಲೆನ್ ಕೆರಂದೆ ಬುಡಯೆ; ಅಪಗ ಯಾನ್ ಮಾತ ನರಮಾನಿಲೆನ ಗೇನೊಲೆನ್ಲಾ, ಉಡಲ್‌ನ್ಲಾ ಶೋಧಿದ್ ತೆರಿಯೊನುನಾಯೆ ಅಂದ್‌ದ್ ಮಾತ ಸಭೆಲೆಗ್ ತೆರಿದ್ ಬರ್ಪುಂಡು. ನಿಕ್ಲೆಡ್ ಪ್ರತಿ ಒರಿಯಗ್ಲಾ ಆಯಾಯ ಕ್ರಿಯೊಲೆ ತಕ್ಕ ಇತ್ತಿ ಪ್ರತಿಫಲ ಯಾನ್ ಕೊರ್ಪೆ.

²⁴“ಆಂಡ ಥುವತೈರೊಡುಪ್ಪು ಬಾಕಿದಾಕುಲೆಗ್ ಅಂದ್ಂಡ ಸೈತಾನನ ಕಡೆಡ್ದೆ ಬೈದಿ ದುರ್ಬೋಧನೆಲೆನ್ ನಿಕ್ಲೆಡ್ ಏರೇರ್ ತೆರಿಯಂದೆಲಾ ತರಕೊನಂದೆಲಾ ಉಪ್ಪುವೆರಾ ಅಕ್ಲೆಗ್ ಯಾನ್ ಪನ್ಪಿನಿ ದಾನೆಂದ್ಂಡ,

²⁵ಯಾನ್ ಬನ್ನೆಂಗೆ ನಿಕ್ಲೆಡುಪ್ಪುನೆನ್ ಗಟ್ಟಿಯಾದ್ ಪತ್ತೊನ್ಲೆ.

²⁶ಬೊಕ್ಕ ಗೆಂದಿನಾಯೆ ಆದ್, ಏರ್ ಎಂಕ್ ಮೆಚ್ಚಿಗೆ ಆಪಿ ಬೇಲೆಲೆನ್ ಕಡೇ ಮುಟ್ಟ ಮಲ್ತೊಂದುಪ್ಪುವೆನಾ, ಆಯಗ್ ಯಾನ್ ಎನ ಅಮ್ಮೆರೆಡ್ದ್ ಪಡೆಯಿ ಅಧಿಕಾರದಲೆಕ್ಕ ಜನಾಂಗೊಲೆ ಮಿತ್ತ್ ಅಧಿಕಾರೊನು ಕೊರುವೆ.

²⁷ಆಯೆ ಕರ್ಬದ ಕೋಲುಡು ಅಕ್ಲೆನ್ ಆಳುವೆ. ಮಣ್ಣ್‌ದ ಕರೊಕುಲು ದರಿದ್ ಪೋಪಿಲೆಕ್ಕ ಅಕ್ಲೆನ ಬಲ ನುರಿದ್ ಪೋವು.

²⁸ಉಂದತ್ತಂದೆ ಆಯಗ್ ಪುಲ್ಯಕಾಂಡೆ ಮೂಡುನ ಬೊಳ್ಳಿನ್ ಕೊರ್ಪೆ.

²⁹“ದೇವೆರಾತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್.