Read Tulu ಪ್ರಕಟಣೆ 20 Bible Online

ಪ್ರಕಟಣೆ 20 - Tulu bible

ಪ್ರಕಟಣೆ 20

¹ಅಪಗ ಒರಿ ದೂತೆ ಪಾತಾಳದ ಬೀಗದ ಕೈನ್ಲಾ ಮಲ್ಲ ಸರಪೊಳಿನ್ಲಾ ಕೈಟ್ ಪತ್ತೊಂದು ಪರಲೋಕೊಡ್ದು ಜತ್ತ್‌ದ್ ಬರ್ಪಿನೆನ್ ತೂಯೆ.

²ಆಯೆ ಪಿಶಾಚಿಲಾ ಸೈತಾನೆಲಾ ಆದುಪ್ಪು ಪುರಾತನ ಸರ್ಪೆ ಪನ್ಪಿ ಘಟಸರ್ಪೊನು ಪತ್ತ್‌ದ್ ಸರಪೊಳಿಡ್ ಕಟ್ಟ್‌ದ್ ಸಾರ ವರ್ಸ ಸೆರೆಮನೆಟ್ ದೀಯೆ.

³ಆ ಸಾರ ವರ್ಸ ಮುಗಿನ ಮುಟ್ಟ ಸೈತಾನೆ ನನಲಾ ಜನೊಕುಲೆನ್ ಮೋಸ ಮಲ್ಪಂದಿಲೆಕ್ಕ, ದೂತೆ ಆಯನ್ ಪಾತಾಳೊಗು ನೂಕುದು ಬಾಕಿಲ್ ಮುಚ್ಚುದು ಐಕ್ ಮುದ್ರೆ ಪಾಡಿಯೆ. ಆ ಸಾರ ವರ್ಸ ಆಯಿ ಬೊಕ್ಕ ಆಯಗ್ ಒಂತೆ ಕಾಲ ಬುಡುಗಡೆ ಆವೊಡು.

⁴ಬೊಕ್ಕ ಗದ್ದಿಗೆಲೆನ್ ತೂಯೆ. ಐತ ಮಿತ್ತ್ ಜನೊಕುಲು ಕುಲ್ಲುದಿತ್ತೆರ್. ನ್ಯಾಯತೀರ್ಪು ಮಲ್ಪುನ ಅಧಿಕಾರ ಅಕ್ಲೆಗ್ ಕೊರ್ದಿತ್ತ್‌ಂಡ್. ಬೊಕ್ಕ ಯೇಸುನ ಸಾಕ್ಷಿಗಾದ್ ದೇವೆರೆ ಪಾತೆರೊಗಾದ್ ತರೆ ಕಡ್ತ್‌ದಿನಾಕುಲೆನ ಆತ್ಮೊಲೆನ್ಲಾ ಮೃಗೊಕ್ಲಾ ಐತ ಮೂರ್ತಿಗ್ಲಾ ಅಡ್ಡಬೂರಂದೆ ತನ್ಕುಲೆ ಮುಂಡದ ಮಿತ್ತ್ ಬೊಕ್ಕ ಕೈತ ಮಿತ್ತ್ ಗುರ್ತ ಪಾಡೊನಂದೆ ಉಪ್ಪುನಾಕುಲೆನ್ಲಾ ತೂಯೆ. ಅಕುಲು ಜೀವಾದ್ ಲಕ್ಕ್‌ದ್ ಕ್ರಿಸ್ತಡೊಪ್ಪ ಸಾರ ವರ್ಸ ಆಳಿಯೆರ್.

⁵ಒರಿದಿ ಸೈತಿನಾಕುಲು ಆ ಸಾರ ವರ್ಸ ಮುಗಿನೆಟ್ಟ ಜೀವ ಆದ್ ಲಕ್ಕುಜೆರ್. ಉಂದೇ ಸುರುತ್ತ ಪುನರುತ್ಥಾನ.

⁶ಸುರುತ್ತ ಪುನರುತ್ಥಾನೊಡು ಸೇರ್ದುಪ್ಪುನಾಯೆ ಭಾಗ್ಯವಂತೆಲಾ ಪರಿಶುದ್ಧದಾಯೆಲಾ ಆದುಲ್ಲೆ. ಇಂಚಿತ್ತಿನಾಕುಲೆನ ಮಿತ್ತ್ ರಡ್ಡನೆ ಮರಣೊಗು ಅಧಿಕಾರ ಇಜ್ಜಿ. ಆಂಡ ಅಕುಲು ದೇವೆರೆಗ್ಲಾ ಕ್ರಿಸ್ತಗ್ಲಾ ಯಾಜಕೆರಾದ್ ಕ್ರಿಸ್ತನೊಟ್ಟುಗು ಸಾರ ವರ್ಸ ಆಳುವೆರ್.

⁷ಆ ಸಾರ ವರ್ಸ ಕರಿಬೊಕ್ಕ ಸೈತಾನಗ್ ಸೆರೆಮನೆಡ್ದ್ ಬುಡುಗಡೆ ಆಪುಂಡು.

⁸ಆಯೆ ಪಿದಯಿ ಬತ್ತ್‌ದ್ ಭೂಮಿದ ನಾಲ್ ದಿಕ್ಕ್‌ಲೆಡುಪ್ಪು ಗೋಗ್, ಮಾಗೋಗ್ ಪನ್ಪಿ ಜನಾಂಗೊಲೆನ್ ಮೋಸ ಮಲ್ತ್‌ದ್ ಅಕ್ಲೆನ್ ಲಡಯಿಗ್ ಒಟ್ಟು ಸೇರಾವೆ. ಅಕ್ಲೆನ ಸಂಖ್ಯೆ ಕಡಲ್ದ ಪೊಯ್ಯೆದಾತ್ ಉಪ್ಪುಂಡು.

⁹ಅಕುಲು ಭೂಮಿಡ್ ಮಾತ ಕಡೆಟ್ಟ್ ಪಸರೊಂದು ದೇವಜನೊಕುಲೆನ ದಂಡ್‌ಗ್ಲಾ ಪ್ರೀತಿದ ಪೇಂಟೆಗ್ಲಾ ಸುತ್ತು ಪಾಡಿಯೆರ್. ಅಪಗ ಪರಲೋಕೊಡ್ದು ತೂ ಜತ್ತ್‌ದ್ ಬತ್ತ್‌ದ್ ಅಕ್ಲೆನ್ ಪೊತ್ತಾದ್ ಬುಡುಂಡು.

¹⁰ಉಂದತ್ತಂದೆ ಅಕ್ಲೆನ್ ಮರ್ಲ್ ಕಟ್ಟಾಯಿ ಸೈತಾನನ್ ತೂತವುಲಾ ಗಂಧಕದವುಲಾ ಅರ್ಲುನ ಕೆದುಕು ಪಾಡ್ಪಾಂಡ್. ಅಲ್ಪ ಮೃಗಲಾ, ಸುಳ್ಳು ಪ್ರವಾದಿಲಾ ಉಲ್ಲೆರ್. ಅಕುಲು ರಾತ್ರೆ ಪಗೆಲ್ ಏನಿತ್ಯೇನಿಗ್ಲಾ ಬೇನೆಡ್ ನರಳೊಂದುಪ್ಪುವೆರ್.

¹¹ಐಡ್ದ್ ಬೊಕ್ಕ ಬೊಲ್ಲನೆದ ಮಲ್ಲ ಗದ್ದಿಗೆನ್ಲಾ ಐಟ್ಟ್ ಕುಲ್ಲುದಿನಾಯನ್ಲಾ ತೂಯೆ. ಆಯನ ಎದುರುಡ್ದು ಭೂಮಿಲಾ ಬಾನಲಾ ಪಾರ್‌ಪೋದು ತೋಜಂದಿಲೆಕ್ಕ ಆಂಡ್.

¹²ಉಂದತ್ತಂದೆ ಸೈತ್ ಪೋತಿನ ಎಲ್ಯಾಕುಲುಲಾ ಮಲ್ಲಾಕುಲುಲಾ ಗದ್ದಿಗೆದ ಎದುರುಡು ಉಂತುದಿತ್ತಿನೆನ್ ತೂಯೆ. ಅಪಗ ಪುಸ್ತಕೊಲು ಜತ್ತ್ಂಡ್. ಬೊಕ್ಕ ನನೊಂಜಿ ಪುಸ್ತಕಲಾ ಜತ್ತ್ಂಡ್. ಅವು ಜೀವಬಾಧ್ಯೆರೆ ಪುಸ್ತಕ ಆ ಪುಸ್ತಕೊಲೆಡ್ ಬರೆದಿತ್ತಿ ಸಂಗತಿಲೆ ಆಧಾರೊಡ್ದು ಅಕುಲಾಕುಲೆ ಕ್ರಿಯೊಲೆ ಪ್ರಕಾರ ಸೈತಿನಾಕುಲೆಗ್ ನ್ಯಾಯತೀರ್ಪು ಆಂಡ್.

¹³ಸಮುದ್ರ ತನಡಿತ್ತಿ ಸೈತಿನಾಕುಲೆನ್ ಒಪ್ಪಿಸಾಂಡ್, ಮರಣಲಾ ಪಾತಾಳಲಾ ತನ್ಕುಲೆ ವಶೊಟಿತ್ತಿನಾಕುಲೆನ್ ಒಪ್ಪಿಸಾಯ. ಅಕ್ಲೆಗ್ ಒರಿ ಒರಿಯಗ್ ಅಕುಲಾಕುಲೆ ಕ್ರಿಯೊಲೆಗ್ ತಕ್ಕಾದ್ ನ್ಯಾಯತೀರ್ಪು ಆಂಡ್.

¹⁴ಐಡ್ದ್ ಬೊಕ್ಕ ಮರಣಲಾ ಪಾತಾಳಲಾ ತೂತ ಕೆರೆಕ್ ಬೂರಿಯ. ಈ ತೂತ ಕೆರೆ ರಡ್ಡನೆ ಮರಣ.

¹⁵ಏರೆನ ಪುದರ್ ಜೀವಬಾಧ್ಯೆರೆ ಪುಸ್ತಕೊಡು ಬರೆದಿತ್ತಿನವು ಇಜ್ಜಾಂಡ ಅಕ್ಲೆನ್ ತೂತ ಕೆರೆಕ್ ನೂಕುದು ಪಾಡ್ಯೆರ್.