Read Tulu ಪ್ರಕಟಣೆ 21 Bible Online

ಪ್ರಕಟಣೆ 21 - Tulu bible

ಪ್ರಕಟಣೆ 21

¹ಬೊಕ್ಕ ಯಾನ್ ಪೊಸ ಪರಲೋಕೊನ್ಲಾ ಪೊಸ ಭೂಮಿನ್ಲಾ ತೂಯೆ. ದುಂಬುದ ಪರಲೋಕಲಾ ಭೂಮಿಲಾ ಇಜ್ಜಂದೆ ಪೋಂಡು. ಬೊಕ್ಕ ಕಡಲ್‌ಲಾ ನನ ಇಜ್ಜಿ.

²ಉಂದತ್ತಂದೆ ಪರಿಶುದ್ಧ ಪಟ್ಟಣ ಆದುಪ್ಪು ಪೊಸ ಯೆರೂಸಲೇಮು, ಪರಲೋಕೊಡ್ದು ದೇವೆರೆ ಕೈತಲ್‌ಡ್ದ್ ಜತ್ತ್‌ದ್ ಬರ್ಪಿನೆನ್ ತೂಯೆ. ಅವು ತನ ಮದ್ಮಯಗಾದ್ ಐತ ಆತಿ ಮದ್ಮಲ್ ಲೆಕ್ಕ ಇತ್ತ್ಂಡ್.

³ಉಂದತ್ತಂದೆ ಗದ್ದಿಗೆಡ್ದ್ ಬತ್ತಿ ಒಂಜಿ ಮಲ್ಲ ಸ್ವರ ಎಂಕ್ ಕೇಂಡ್‌ಂಡ್, “ಇಂದಾ, ದೇವೆರೆ ಗುಡಾರ ಇತ್ತೆ ಆಯನ ಜನೊಕುಲೆಡೊಪ್ಪ ಉಂಡು. ಅಕುಲು ಆಯಗ್ ಪ್ರಜೆಕುಲು ಆದುಪ್ಪುವೆರ್. ದೇವೆರ್ ತಾನೇ ಅಕ್ಲೆಡೊಪ್ಪ ಉಪ್ಪುವೆ.”

⁴ಅಕ್ಲೆನ ಕಣ್ಣೀರ್‌ನ್ ಮಾತೆನ್ ಒಚ್ಚಿದ್ ಬುಡ್ಪೆ. ನನ ಮರಣ ಉಪ್ಪುಜಿ. ನನ ದುಃಖ ಆವಡ್, ಬುಲ್ಪುನವು ಆವಡ್, ಬೇನೆ ಆವಡ್ ಉಪ್ಪುಜಿ. ಸುರುಟ್ಟು ಇತ್ತಿನವು ಮಾತ ಇಜ್ಜಾಂದೆ ಪೋಂಡು ಅಂದ್‌ದ್ ಪಂಡ್ಂಡ್.

⁵ಬೊಕ್ಕ ಗದ್ದಿಗೆಡ್ ಕುಲ್ಲುದಿನಾಯೆ ಪಂಡೆ, “ಇಂದಾ ಯಾನ್ ಮಾತೆನ್ಲಾ ಪೊಸತ್ತ್ ಮಲ್ಪುವೆ.” ಬೊಕ್ಕ ಆಯೆ ಎಂಕ್ ಪಂಡೆ, “ಉಂದೆನ್ ಬರೆಲ, ದಾಯೆಗಂದ್ಂಡ ಯಾನ್ ಪನ್ಪಿನ ಪಾತೆರೊಲು ನಂಬಿಕೆದವುಲಾ ಸತ್ಯದವುಲಾ ಆದುಂಡು.”

⁶ಅಪಗ ಗದ್ದಿಗೆಡ್ ಕುಲ್ಲುದಿತ್ತಿನಾಯೆ, “ಮಾತ ನಡತ್ಂಡ್. ಯಾನೇ ಆದಿಲಾ ಅಂತ್ಯಲಾ, ಸುರುತ್ತಾಯೆಲಾ ಕಡೆತ್ತಾಯೆಲಾ ಆದುಲ್ಲೆ. ಬಾಜೆಲ್ ಆಯಿನಾಯಗ್ ಜೀವದ ವಸರ್‌ಡ್ದ್ ನೀರ್‌ನ್ ಕ್ರಯದಾಂತೆ ಪರಿಯೆರೆ ಕೊರ್ಪೆ.

⁷ಗೆಂದಿನಾಯೆ ನೆಕ್ಕ್ ಮಾತೆಕ್ ಬಾಧ್ಯಸ್ತಿಗೆ ಆಪೆ. ಯಾನ್ ಆಯಗ್ ದೇವೆರಾದುಪ್ಪುವೆ. ಆಯೆ ಎಂಕ್ ಮಗೆ ಆದುಪ್ಪುವೆ.

⁸ಆಂಡ ಪುಕ್ಕೆಲೆರ್, ನಂಬಿಕೆದಾಂತಿನಾಕುಲು, ಭ್ರಷ್ಟೆರ್, ಮಾನ್ಯ ಕೆರ್ಪಿನಾಕುಲು, ಹಾದ್ರದಾಕುಲು, ಮಾಟಮಂತ್ರ ಮಲ್ಪುನಾಕುಲು, ಮೂರ್ತಿಪೂಜೆ ಮಲ್ಪುನಾಕುಲು, ಮಾತ ಸುಳ್ಳು ಪನ್ಪಿನಾಕುಲು ಮೊಕ್ಲೆಗ್ ತಿಕ್ಕುನ ಪಾಲ್ ತೂ ಗಂಧಕೊಡು ಅರ್ಲೊಂದುಪ್ಪುನ ತೂತ ಕೆರೆನೇ. ಉಂದು ರಡ್ಡನೆ ಮರಣ,” ಅಂದ್‌ದ್ ಎಂಕ್ ಪಂಡೆ.

⁹ಕಡೆತ ಏಳ್‌ ಉಪದ್ರೊಲೆಡ್ ದಿಂಜಿದ್ ಏಳ್‌ ಬಾಜನೊಲೆನ್ ಪತ್ತೊಂದಿತ್ತಿ ಏಳ್‌ ಮಂದಿ ದೂತೆರೆಡ್ ಒರಿ ಬತ್ತ್‌ದ್ ಎನಡ ಪಾತೆರೊಂದು, “ಬಲ, ಕುರಿತ ಕಿನ್ನಿದ ಮದ್ಮಲ್ ಆಪಿನ ಬೊಡೆದಿನ್ ನಿಕ್ಕ್ ತೋಜಾವೆ,” ಅಂದ್‌ದ್ ಪಂಡೆ.

¹⁰ಬೊಕ್ಕ ಆಯೆ ಎನನ್ ಆತ್ಮೊಡು ಮಲ್ಲ ಎತ್ತರದ ಒಂಜಿ ಪರ್ವತದ ಮಿತ್ತ್ ಲೆತ್ತೊಂದು ಪೋದು, ಪರಿಶುದ್ಧ ಪಟ್ಟಣ ಆದುಪ್ಪು ಯೆರೂಸಲೇಮು ಪರಲೋಕೊಡ್ದು ದೇವೆರೆ ಕಡೆಡ್ದ್ ಜತ್ತೊಂದು ಬರ್ಪಿನೆನ್ ಎಂಕ್ ತೋಜಾಯೆ.

¹¹ಅವು ದೇವೆರೆ ಮೈಮೆಡ್ ಮಿಂಚೊಂದಿತ್ತ್‌ಂಡ್; ಪಟ್ಟಣ ಬಿಲೆ ಇತ್ತಿ ರತ್ನದ ಬೊಲ್ಪುಗು ಸಮ ಆದಿತ್ತ್ಂಡ್. ಪಳಪಳ ಮಿಂಚುನ ವಜ್ರದ ಲೆಕ್ಕ ತೋಜ್ಂಡ್.

¹²ಆ ಪಟ್ಟಣೊಗು ಎತ್ತರ ಇತ್ತಿ ಮಲ್ಲ ಗೋಡೆಲಾ ಪದ್ರಾಡ್ ಬಾಕಿಲ್‌ಲಾ ಇತ್ತ್ಂಡ್, ಅವೆನ್ ಪದ್ರಾಡ್ ದೂತೆರ್ ಕಾತೊಂದಿತ್ತೆರ್. ಬೊಕ್ಕ ಇಸ್ರಾಯೇಲ್ಯೆರೆ ಪದ್ರಾಡ್ ಗೋತ್ರದ ಪುದರ್ ಆ ಪದ್ರಾಡ್ ಬಾಕಿಲ್‌ಡ್ ಬರೆದಿತ್ತ್‌ಂಡ್.

¹³ಮುಡಯಿ, ಪಡ್ಡಯಿ, ಬಡಕಯಿ, ತೆನ್‌ಕಯಿ ಇಂಚ ನಾಲ್ ದಿಕ್ಕ್‌ಲೆಡ್ ಒಂಜೊಂಜೆಟ್ ಮೂಜಿ ಮೂಜಿ ಬಾಕಿಲ್ ಇತ್ತ್ಂಡ್.

¹⁴ಪಟ್ಟಣದ ಗೋಡೆಗ್ ಪದ್ರಾಡ್ ಪಂಚಾಂಗದ ಕಲ್ಲ್‌ಲ್ ಇತ್ತ್‌ದ್ ಐಟ್ಟ್ ಯಜ್ಞದ ಕುರಿತ ಕಿನ್ನಿ ಆದುಪ್ಪುನಾಯನ ಪದ್ರಾಡ್ ಅಪೊಸ್ತಲೆರೆ ಪುದರ್‌ಲು ಬರೆದಿತ್ತ್‌ಂಡ್.

¹⁵ಎನಡ ಪಾತೆರಿನಾಯೆ, ಆ ಪೇಂಟೆನ್‌, ಐತ ಬಾಕಿಲ್‌ಲೆನ್ಲಾ ಗೋಡೆಲೆನ್ಲಾ ಲಪ್ಪರೆಗಾದ್ ತನ ಕೈಟ್ ಬಂಗಾರ್‌ದ ಒಂಜಿ ಲಪ್ಪುನ ಕೋಲುನು ಪತ್ತೊಂದಿತ್ತೆ.

¹⁶ಆ ಪಟ್ಟಣ ಚೌಕಾದಿತ್ತ್‌ಂಡ್, ಉದ್ಧದಾತೆ ಅಗೆಲಲಾ ಇತ್ತ್ಂಡ್. ಆಯೆ ಲಪ್ಪುನ ಕೋಲುದ ಉದ್ಧ, ಅಗೆಲ, ಎತ್ತರ ಮಾತಲಾ ಪದ್ರಾಡ್ ಸಾರ ಮೈಲ್ ಆದಿತ್ತ್ಂಡ್.

¹⁷ಬೊಕ್ಕ ಆಯೆ ಗೋಡೆನ್ ಲಪ್ಪುನ ಕೋಲು ಅವು ನೂತ ನಲ್ಪತ್ತ ನಾಲ್‌ ಮುಳ ದಪ್ಪ ಇತ್ತ್ಂಡ್. ಅವು ಆ ದೂತೆ ಲತ್ತಿನಿ ನರಮಾನಿಲೆ ಅಳತೆದ ಲೆಕ್ಕನೇ.

¹⁸ಆ ಗೋಡೆ ಸೂರ್ಯಕಾಂತಶಿಲೆಡ್ದ್ ಕಟ್ಟ್‌ದಿತ್ತ್‌ಂಡ್. ಬೊಕ್ಕ ಪಟ್ಟಣ ಕನ್ನಡಿದಲೆಕ್ಕ ಶುದ್ಧ ಆದಿತ್ತಿನ ಬಂಗಾರ್‌ದವು.

¹⁹ಆ ಪಟ್ಟಣದ ಗೋಡೆನ್ ಮಾತ ಬಿಲೆ ಇತ್ತಿ ಕಲ್ಲ್‌ಲೆಡ್ ಪಂಚಾಂಗದ ಮಿತ್ತ್ ಕಟ್ಟ್‌ದಿತ್ತ್‌ಂಡ್. ಸುರುತ್ತ ಕಲ್ಲ್ ಸೂರ್ಯಕಾಂತಶಿಲೆ, ರಡ್ಡನೆದವು ನೀಲಮಣಿ, ಮೂಜನೆದವು ಪಚ್ಚೆ, ನಾಲನೆದವು ಪದ್ಮರಾಗ

²⁰ಐನ್ನೆದವು ಗೋಮೇಧಿಕ, ಆಜನೆದವು ಮಾಣಿಕ್ಯ, ಏಳನೆದವು ಪೀತರತ್ನ, ಎನ್ಮನೆದವು ಬೆರುಲ್ಲ, ಒಂರ್ಬನೆದವು ಪುಷ್ಯರಾಗ, ಪತ್ತನೆದವು ಗರುಡಪಚ್ಚೆ, ಪತ್ತೊಂಜನೆದವು ಇಂದ್ರ ನೀಲ, ಬೊಕ್ಕ ಪದ್ರಾಡನೆದವು ನೀಲಸ್ಫಟಿಕ.

²¹ಬೊಕ್ಕ ಪದ್ರಾಡ್ ಬಾಕಿಲ್ ಪದ್ರಾಡ್ ಮುತ್ತುಲೆಡ್ದ್ ಮಲ್ತ್‌ದಿನವು. ಒಂಜೊಂಜಿ ಬಾಕಿಲ್ ಒಂಜೊಂಜಿ ಮುತ್ತುಡ್ದು ಮಲ್ತ್‌ದಿನವು. ಬೊಕ್ಕ ಐತ ಪಟ್ಟಣದ ಸಾದಿ ಕನ್ನಡಿದಲೆಕ್ಕ ಶುದ್ಧ ಬಂಗಾರ್‌ದವು ಆದಿತ್ತ್ಂಡ್.

²²ಆ ಪೇಂಟೆಡ್ ಎಂಕ್ ವಾ ದೇವಾಲಯಲಾ ತೋಜಿಜಿ; ದಾಯೆಗಂದ್ಂಡ ಸರ್ವತ್ರಾಣಿ ದೇವೆರಾದುಪ್ಪು ಕರ್ತವೆಲಾ ಯಜ್ಞದ ಕುರಿತ ಕಿನ್ನಿ ಆದುಪ್ಪುನಾಯೆಲಾ ಐತ ದೇವಾಲಯ ಆದಿತ್ತೆರ್.

²³ಬೊಕ್ಕ ಆ ಪಟ್ಟಣೊಗು ಸೂರ್ಯೆ ಆವಡ್ ಚಂದ್ರೆ ಆವಡ್ ಬೋಡಿತ್ತಿಜಿ. ದಾಯೆಗಂದ್ಂಡ ದೇವೆರೆ ಮೈಮೆನೇ ಆ ಪಟ್ಟಣೊಗು ತುಡರ್‌ದ ಬೊಲ್ಪು ಆದಿತ್ತ್ಂಡ್; ಯಜ್ಞದ ಕುರಿತ ಕಿನ್ನಿ ಆದುಪ್ಪುನಾಯೆ ಐತ ಬೊಲ್ಪು ಆದಿತ್ತೆ.

²⁴ಐತ ಬೊಲ್ಪುಡು ಜನಾಂಗೊಲು ನಡಪುವೆರ್ ಬೊಕ್ಕ ಭೂಮಿದ ಅರಸುನಕುಲು ತನ್ಕುಲೆ ಮಾತ ಮೈಮೆ ಪ್ರಭಾವಡೊಪ್ಪ ಆ ಪಟ್ಟಣೊಗು ಪ್ರವೇಶ ಆಪೆರ್.

²⁵ಪಗೆಲ್ಡ್ ಪಟ್ಟಣದ ಬಾಕಿಲ್‌ನ್ ಮುಚ್ಚುನೆ ಇಜ್ಜಿ. ದಾಯೆಗಂದ್ಂಡ ಅಲ್ಪ ರಾತ್ರೆನೇ ಉಪ್ಪಂದ್.

²⁶ಮಾತ ಜನಾಂಗೊಲು ತನ್ಕುಲೆ ಮೈಮೆ ಪ್ರಭಾವೊಲೆನ್ ಪಟ್ಟಣದ ಉಲಯಿ ಕನಬರ್ಪೆರ್.

²⁷ಆಂಡ ಅಶುದ್ಧ ಕಾರ್ಯೊನು ಒವೆನ್ಲಾ ಪೊಗ್ಗೆರೆ ಬುಡ್ಪುಜೆರ್. ಅತ್ತ್‌ಡ ಪೇಸಿಗೆದಾಕುಲೆನ್ಲಾ, ಸುಳ್ಳು ಪನ್ಪಿನಾಕುಲೆನ್ಲಾ ಬುಡ್ಪುಜೆರ್. ಆಂಡ ಏರೇರೆನ ಪುದರುಲು ಯಜ್ಞದ ಕುರಿತ ಕಿನ್ನಿ ಆದುಪ್ಪುನಾಯನ ಜೀವಬಾಧ್ಯೆರೆ ಪುಸ್ತಕೊಡು ಬರೆದುಂಡಾ ಅಕುಲು ಮಾತ್ರ ಪಟ್ಟಣೊಗು ಸೇರುವೆರ್.