Read Tulu ಪ್ರಕಟಣೆ 22 Bible Online

ಪ್ರಕಟಣೆ 22 - Tulu bible

ಪ್ರಕಟಣೆ 22

¹ಐಡ್ದ್ ಬೊಕ್ಕ ಆಯೆ ಸ್ಫಟಿಕದ ಲೆಕ್ಕ ಮಿಂಚುನ ಶುದ್ಧ ಜೀವದ ನೀರ್‌ದ ತುದೆನ್ ಎಂಕ್ ತೋಜಾಯೆ, ಅವು ದೇವೆರೆ ಬೊಕ್ಕ ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯನ ಗದ್ದಿಗೆಡ್ದ್ ಪಿದಾಡ್‌ಂಡ್.

²ಅವು ಪಟ್ಟಣದ ಸಾದಿದ ನಡುಟು ಪರತೊಂದಿತ್ತ್‌ಂಡ್. ಆ ತುದೆತ ರಡ್ಡ್ ಬರಿಟ್ಲಾ ಜೀವದ ಮರ ಬುಲೆದಿತ್ತ್‌ಂಡ್. ಐಟ್ಟ್ ಪದ್ರಾಡ್ ಸರ್ತಿ ಫಲ ಬರ್ಪುಂಡು. ಪ್ರತಿ ತಿಂಗೊಲೊಡು ಪದ್ರಾಡ್ ತರತ ಫಲೊಕ್ಲೆನ್ ಕೊರ್ಪುಂಡು. ಐತ ಇರೆ ಜನಾಂಗೊಲೆಗ್ ಗುಣ ಮಲ್ಪೆರೆಗ್ ಉಪಯೋಗ ಮಲ್ತೊಂದಿತ್ತೆರ್. ಶಾಪ ನನ ಒವುಲಾ ಉಪ್ಪಂದ್. ದಾಯೆಗಂದ್ಂಡ ಆ ಪೇಂಟೆಡ್‌ ದೇವೆರೆನಲಾ ಯಜ್ಞದ ಕುರಿತ ಕಿನ್ನಿ ಆದುಪ್ಪುನಾಯನಲಾ ಸಿಮ್ಮಾಸನ ಉಂಡು. ದೇವೆರೆ ಸೇವಕೆರ್ ಆಯನ ಆರಾಧನೆ ಮಲ್ಪುವೆರ್.

⁴ಅಕುಲು ಆಯನ ಮೋನೆನ್ ತೂವೆರ್; ಆಯ ಪುದರ್ ಅಕ್ಲೆನ ಮುಂಡೊಡು ಬರೆದುಪ್ಪುಂಡು.

⁵ಅಲ್ಪ ರಾತ್ರೆ ಉಪ್ಪುಜಿ; ತುಡರ್ ಅತ್ತ್‌ಡ ಸೂರ್ಯನ ಅಗತ್ಯ ಇಜ್ಜಿ. ಕರ್ತವೆ ಆದುಪ್ಪು ದೇವೆರ್ ಅಕ್ಲೆಗ್ ಬೊಲ್ಪು ಕೊರೊಂದುಪ್ಪುವೆ. ಅಕುಲು ಏನಿತ್ಯೇನಿಗ್ಲಾ ಆಳುವೆರ್.

⁶ಬೊಕ್ಕ ಆ ದೂತೆ ಎನಡ ಪಂಡೆ, “ಈ ಪಾತೆರೊಲು ನಂಬಿಕೆದವುಲಾ ಸತ್ಯದವುಲಾ ಆದುಂಡು. ಪ್ರವಾದಿಲೆಗ್ ಆತ್ಮ ಕೊರಿ ದೇವೆರಾದುಪ್ಪು ಕರ್ತವೆ, ಬೇಗೊಡು ಆವೊಡಾಪಿನೆನ್ ತನ ಸೇವಕೆರೆಗ್ ತೆರಿಪಾವೆರೆಗಾದ್ ತನ ದೂತನ್ ಕಡಪುಡುದೆ.”

⁷“ಇಂದಾ, ಯಾನ್ ಬೇಗ ಬರ್ಪೆ. ಈ ಪುಸ್ತಕೊಡು ಬರೆತಿನ ಪ್ರವಾದನೆದ ಪಾತೆರೊಲೆನ್ ಕೈಕೊನುನಾಕುಲು ಭಾಗ್ಯವಂತೆರ್.”

⁸ಯೋಹಾನೆ ಪನ್ಪಿ ಯಾನ್ ಈ ಮಾತ ಸಂಗತಿಲೆನ್ ಕೇಂಡ್ದ್, ತೂಯಿನಾಯೆ. ಯಾನ್ ಕೇಂಡ್ದ್ ತೂಯಿ ಬೊಕ್ಕ ಉಂದೆನ್ ಎಂಕ್ ತೋಜಾಯಿ ದೂತಗ್ ಆರಾಧನೆ ಮಲ್ಪೊಡಂದ್‌ದ್ ಕಾರ್‌ಗ್ ಅಡ್ಡಬೂರ್ಯೆ.

⁹ಅಪಗ ಆಯೆ ಪಂಡೆ, “ಬೊಡ್ಚಿ, ಇಂಚ ಮಲ್ಪಡ. ಯಾನ್ ನಿಕ್ಕ್‌ಲಾ ನಿನ ಸಹೋದರೆ ಆದಿತ್ತಿ ಪ್ರವಾದಿಲೆಗ್ಲಾ ಈ ಪುಸ್ತಕೊಡು ಬರೆತಿನೆನ್ ಕೈಕೊನುನ ಮಾತೆರೆಗ್ಲಾ ಒರಿ ಜತೆಸೇವಕೆ ಆದುಲ್ಲೆ. ದೇವೆರೆಗ್ ಆರಾಧನೆ ಮಲ್ಪುಲ.”

¹⁰ಬೊಕ್ಕ ಆಯೆ ಎಂಕ್ ಪಂಡೆ, “ಈ ಪುಸ್ತಕದ ಪ್ರವಾದನೆಲೆಗ್ ಮುದ್ರೆ ಪಾಡಡ. ದಾಯೆಗಂದ್ಂಡ ಸಮಯ ಕೈತಲ್ ಬತ್ತ್ಂಡ್.

¹¹ಅನ್ಯಾಯ ಮಲ್ಪುನಾಯೆ ನನಲಾ ಅನ್ಯಾಯ ಮಲ್ಪಡ್. ಮೈಲೆ ಆತಿನಾಯೆ ತನನ್ ನನಲಾ ಮೈಲೆ ಮಲ್ತೊನಡ್. ನೀತಿವಂತೆ ನನಲಾ ನೀತಿಡ್ ನಡಪಡ್. ಪರಿಶುದ್ಧದಾಯೆ ತನನ್ ನನಲಾ ಪರಿಶುದ್ಧ ಮಲ್ಪಡ್.”

¹²“ಇಂದಾ, ಯಾನ್ ಬೇಗೊಡು ಬರ್ಪೆ. ಮಾತೆರೆಗ್ಲಾ ಅಕ್ಲೆ ಕ್ರಿಯೊಲೆಗ್ ತಕ್ಕ ಪ್ರತಿಫಲೊನು ಯಾನ್ ಪತ್ತೊಂದು ಬರ್ಪೆ.”

¹³ಯಾನೇ ಅ ಕಾರಲಾ ಓ ಕಾರಲಾ ಸುರುತ್ತಾಯೆಲಾ ಕಡೆತ್ತಾಯೆಲಾ ಆದಿಲಾ ಅಂತ್ಯಲಾ ಆದುಲ್ಲೆ.

¹⁴“ತನ್ಕುಲೆ ಅಂಗಿಲೆನ್ ದೆಕ್ಕಿನಾಕುಲು ಭಾಗ್ಯವಂತೆರ್. ಅಕ್ಲೆಗ್ ಪಟ್ಟಣದ ಬಾಕಿಲ್‌ಡ್ದ್ ಉಲಯಿ ಬರಿಯೆರೆಗ್ಲಾ ಜೀವದ ಮರತ ಫಲೊನು ತಿನಿಯೆರೆಗ್ಲಾ ಹಕ್ಕ್ ಉಂಡು.

¹⁵ನಾಯಿಲು, ಮಾಟಮಂತ್ರ ಮಲ್ಪುನಾಕುಲು, ಹಾದ್ರದಾಕುಲು, ಮಾನ್ಯ ಕೆರ್ಪಿನಾಕುಲು, ಮೂರ್ತಿಪೂಜೆ ಮಲ್ಪುನಾಕುಲು, ಬೊಕ್ಕ ಸುಳ್ಳುನು ಪ್ರೀತಿ ಮಲ್ಪುನಾಕುಲು ಮಾತೆರ್ಲಾ ಪಟ್ಟಣದ ಪಿದಯಿಡ್ ಉಲ್ಲೆರ್.

¹⁶“ಯೇಸು ಇನ್ಪಿ ಯಾನೇ, ಎನ ಸಭೆಲೆಗ್ ಈ ಸಾಕ್ಷಿನ್ ನಿನಡ್ದ್ ಕೊರಿಯೆರೆಗಾದ್ ಎನ ದೂತನ್ ಕಡಪುಡುದೆ. ಯಾನ್ ದಾವೀದನ ಬೇರ್‌ಲಾ ಸಂತಾನಲಾ ಆಯ ಸಿಮ್ಮಾಸನೊಗು ಬಾಧ್ಯಸ್ತೆಲಾ ಪುಲ್ಯಕೆಲದ ಮಿಂಚುನ ಬೊಳ್ಳಿಲಾ ಆದುಲ್ಲೆ.”

¹⁷ಆತ್ಮಲಾ ಮದ್ಮಲ್‌ಲಾ “ಬಲ,” ಅಂದ್‌ದ್ ಪನ್ಪೆರ್. ಉಂದೆನ್ ಕೇನುನ ಪ್ರತಿ ಒರಿಲಾ “ಬಲ” ಅಂದ್‌ದ್ ಪನೊಡು. ಬಾಜೆಲ್ ಇತ್ತಿನಾಯೆ ಬರಡ್. ಇಷ್ಟ ಇತ್ತಿನಾಯೆ ಜೀವದ ನೀರ್‌ನ್ ಕ್ರಯದಾಂತೆ ಪರಡ್.

¹⁸ಈ ಪುಸ್ತಕೊಡು ಬರೆತಿ ಪ್ರವಾದನೆಲೆನ್ ಕೇನುನ ಪ್ರತಿ ಒರಿಯಗ್ಲಾ ಯಾನ್ ಸಾಕ್ಷಿಯಾದ್ ಪನ್ಪೆ, ಮುಲ್ಪ ಬರೆದಿತ್ತಿನೆಕ್ಕ್ ಏರಾಂಡಲಾ ದಾದಾಂಡಲಾ ಸೇರಾಯೆಡ ಈ ಪುಸ್ತಕೊಡು ಬರೆತಿ ಉಪದ್ರೊಲೆನ್ ದೇವೆರ್ ಆಯಗ್ ಕೊರ್ಪೆ.

¹⁹ಬೊಕ್ಕ ಈ ಪ್ರವಾದನೆಲೆಡ್ದ್ ಒವೆನಾಂಡಲಾ ದೆಪ್ಪುನಾಯಗ್ ಈ ಪುಸ್ತಕೊಡು ಬರೆತಿ ಜೀವದ ಮರೊಡ್ದುಲಾ ಈ ಪರಿಶುದ್ಧ ಪೇಂಟೆಡ್ದ್‌ಲಾ ತಿಕ್ಕುನ ಪಾಲ್‌ನ್ ದೇವೆರ್ ದೆತ್ತ್‌ದ್ ಬುಡ್ಪೆ.

²⁰ಉಂದು ಮಾತೆಕ್ಕ್‌ಲಾ ಸಾಕ್ಷಿ ಆದುಪ್ಪುನಾಯೆ ಪನ್ಪೆ, “ಅಂದ್, ಯಾನ್ ಬೇಗೊಡೇ ಬರೊಂದುಲ್ಲೆ.” ಆಮೆನ್, ಕರ್ತವೆ ಆದುಪ್ಪು ಯೇಸೋ, ಬಲ.

²¹ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ಮಾತ ದೇವಜನೊಕುಲೆಡೊಪ್ಪ ಉಪ್ಪಡ್. ಆಮೆನ್.