Read Tulu ಪ್ರಕಟಣೆ 3 Bible Online

ಪ್ರಕಟಣೆ 3 - Tulu bible

ಪ್ರಕಟಣೆ 3

¹“ಸಾರ್ದಿಸ್‌ಡುಪ್ಪು ಸಭೆತ ದೂತಗ್ ಇಂಚ ಬರೆಲ: “ದೇವೆರೆ ಏಳ್‌ ಆತ್ಮೊಲೆನ್ಲಾ ಏಳ್‌ ಬೊಳ್ಳಿಲೆನ್ಲಾ ಪಡೆತಿನಾಯೆ ಪನ್ಪಿನಿ ದಾನೆಂದ್ಂಡ, ಈ ಮಲ್ಪುನ ಮಾತ ಕೆಲಸೊಲೆನ್ ಯಾನ್ ತೆರಿದೆ. ಬದುಕುನಾಯೆ ಪನ್ಪಿ ಪುದರ್ ನಿಕ್ಕ್ ಇತ್ತ್ಂಡಲಾ ಈ ಸೈತಿನಾಯೆ ಆದುಲ್ಲ ಪನ್ಪಿನೆನ್ ತೆರಿದೆ.

²ಎಚ್ಚರಿಕೆ ಆದುಪ್ಪುಲ; ಸೈಪಿಲೆಕ್ಕ ಉಪ್ಪು ಒರಿದಿನೆನ್ ಗಟ್ಟಿ ಮಲ್ತೊನು. ದಾಯೆಗಂದ್ಂಡ ಎನ ದೇವೆರೆ ಎದುರುಡು ನಿನ ವಾ ಬೇಲೆಲಾ ಪೂರ್ತಿದವು ಅಂದ್‌ದ್ ಎಂಕ್ ತೋಜಿದಿಜಿ.

³ಅಂಚಾಯಿನೆಡ್ದ್ ಈ ಪಡೆವೊಂಡಿ ಬೋಧನೆನ್ಲಾ ಈ ಕೇಂಡ್ದಿ ರೀತಿನ್ಲಾ ನೆನೆಪುಗು ಕನತೊಂದು ಅವೆನ್ ಕಾತೊಂದು ಪಶ್ಚಾತಾಪ ಪಡೆಲ. ಈ ಎಚ್ಚರಿಕೆ ಆದಿತ್ತಿಜಡ ಕಲ್ವೆ ಬರ್ಪಿಲೆಕ್ಕನೇ ಯಾನ್ ಬರುವೆ, ಯಾನ್ ವಾ ಗಳಿಗೆಡ್ ನಿನ ಕೈತಲ್‌ ಬರ್ಪೆ ಇನ್ಪಿನವು ಕಂಡಿತ ನಿಕ್ಕ್ ಗೊತ್ತಾವಂದ್.

⁴ಆಂಡಲಾ ತನ್ಕುಲೆ ಕುಂಟುನು ಮೈಲೆ ಮಲ್ತೊನಂದೆ ಉಪ್ಪು ಒಂತೆ ಜನೊಕುಲು ಸಾರ್ದಿಸ್‌ಡ್ ನಿಕ್ಕ್ ಉಲ್ಲೆರ್. ಅಕುಲು ತಕ್ಕದಾಕುಲು ಆದುಪ್ಪುನೆಡ್ದ್ ಎನಡೊಪ್ಪ ಬೊಲ್ದು ಕುಂಟು ಪಾಡೊಂದು ನಡಪುವೆರ್.

⁵ಗೆಂದಿನಾಯಗ್ ಬೊಲ್ದು ಕುಂಟು ಪೊದೆಪಾವೆರ್. ಯಾನ್ ಆಯನ ಪುದರ್‌ನ್ ಜೀವದ ಪುಸ್ತಕೊಡು ಮಾಜಾವಂದೆ ಆಯೆ ಎನ್ನಾಯೆ ಅಂದ್‌ದ್ ಎನ ಅಮ್ಮೆರೆ ಎದುರುಲಾ ಆಯ ದೂತೆರೆ ಎದುರುಲಾ ಒಪ್ಪಿಯೊನ್ವೆ.

⁶“ದೇವೆರಾತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್.

⁷“ಫಿಲದೆಲ್ಫಿಯದ ಸಭೆತ ದೂತಗ್ ಇಂಚ ಬರೆಲ: “ಪರಿಶುದ್ಧೆಲಾ ಸತ್ಯವಂತೆಲಾ ದಾವೀದನ ಬೀಗದ ಕೈ ಇತ್ತಿನಾಯೆಲಾ ಏರ್ಲಾ ಮುಚ್ಚಂದಿಲೆಕ್ಕ ಜಪ್ಪುನಾಯೆಲಾ, ಏರ್ಲಾ ಜಪ್ಪಂದಿಲೆಕ್ಕ ಮುಚ್ಚುನಾಯೆಲಾ ಆದುಪ್ಪುನಾಯೆ ಪನ್ಪಿನಿ ದಾನೆಂದ್ಂಡ,

⁸ನಿನ ಕೆಲಸೊಲೆನ್ ಯಾನ್ ತೆರಿದೆ. ಇಂದಾ, ನಿನ ಬಲ ಒಂತೆ ಆಂಡಲಾ ಈ ಎನ ಪುದರ್‌ನ್ ಆರೆಂಜಂದೆ ಎನ ಪಾತೆರೊನು ಕಾತೊಂಡಿನೆಡ್ದ್ ನಿನ ಎದುರುಡು ಒಂಜಿ ಬಾಕಿಲ್‌ನ್ ಜತ್ತ್‌ದ್ ದೀತೆ; ಅವೆನ್ ಏರ್ಲಾ ಮುಚ್ಚಯೆರ್.

⁹ತನ್ಕುಲು ಯೆಹೂದ್ಯೆರಂದ್‌ದ್ ಕೊಚ್ಚೊನುನ ಸೈತಾನನ ಸಮಾಜೊಡ್ದು ಕೆಲೆವೆರ್ ಬತ್ತ್‌ದ್ ನಿನ ಕಾರ ಮುದೆಲ್‌ಗ್ ಅಡ್ಡಬೂರುಲೆಕ್ಕಲಾ ನಿನನ್ ಯಾನ್ ಪ್ರೀತಿ ಮಲ್ತ್‌ದೆ ಅಂದ್‌ದ್ ತೆರಿಯೊನುಲೆಕ್ಕಲಾ ಮಲ್ಪುವೆ.

¹⁰ಈ ಎನ ಬೋಧನೆಲೆನ್ ಕಾತೊಂದು ಬತ್ತಿನೆಡ್ದ್ ಲೋಕದ ಜನೊಕುಲೆನ್ ಪರೀಕ್ಷೆ ಮಲ್ಪೆರೆಗಾದ್ ಇಡೀ ಲೋಕೊಗು ಬರ್ಪಿನ ಶೋಧನೆದ ಕಾಲೊಡು ನಿನನ್ ತಪ್ಪಾದ್ ಕಾಪುವೆ.

¹¹ಯಾನ್ ಬೇಗೊಡು ಬರ್ಪೆ. ನಿನ ಕಿರೀಟೊನು ಏರ್ಲಾ ದೆಪ್ಪಂದಿಲೆಕ್ಕ ನಿಕ್ಕುಪ್ಪುನೆನ್ ಗಟ್ಟಿಯಾದ್ ಪತ್ತೊನ್ಲ.

¹²ಗೆಂದಿನಾಯಗ್ ಯಾನ್ ಆಯನ್ ದೇವೆರೆ ಆಲಯೊಡು ಕಂಬ ಆದ್ ಉಂತಾವೆ, ಆಯೆ ಅಲ್ಪ ಏಪೊಗ್ಲಾ ಉಪ್ಪುವೆ. ಉಂದತ್ತಂದೆ ಎನ ದೇವೆರೆ ಪುದರ್‌ನ್ಲಾ, ಎನ ದೇವೆರೆ ಕೈತಲ್‌ಡ್ದ್ ಪರಲೋಕೊಡ್ದು ಜತ್ತ್‌ದ್ ಬರ್ಪಿ ಎನ ಯೆರೂಸಲೇಮು ಪಟ್ಟಣ ಇನ್ಪಿ ಎನ ದೇವೆರೆ ಪಟ್ಟಣದ ಪುದರ್‌ನ್ಲಾ ಎನ ಪೊಸ ಪುದರ್‌ನ್ಲಾ ಆಯ ಮಿತ್ತ್ ಬರೆಪೆ.

¹³“ದೇವೆರೆ ಆತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್.

¹⁴“ಲವೊದಿಕಿಯೊಡುಪ್ಪು ಸಭೆತ ದೂತಗ್ ಇಂಚ ಬರೆಲ: “ಆಮೆನ್ ಪನ್ಪಿನಾಯೆ ನಂಬಿಕೆದ ಸತ್ಯಸಾಕ್ಷಿಲಾ ದೇವೆರೆ ಸೃಷ್ಟಿಗ್ ಅಧಿಕಾರ ಆದುಪ್ಪುನಾಯೆ ಪನ್ಪಿನಿ ದಾನೆಂದ್ಂಡ,

¹⁵ನಿನ ಕೆಲಸೊಲೆನ್ ಯಾನ್ ತೆರಿದೆ; ಈ ಚೌಲಿಲಾ ಅತ್ತ್ ಬೆಚ್ಚಲಾ ಅತ್ತ್, ಈ ಚೌಲಿ ಆವಡ್ ಬೆಚ್ಚ ಆವಡ್ ಇತ್ತ್‌ದ್ಂಡ ಎಡ್ಡೆ ಇತ್ತ್ಂಡ್.

¹⁶ಈ ಬೆಚ್ಚಲಾ ಚೌಲಿಲಾ ಆದುಪ್ಪಂದೆ ಉಗುರುಬೆಚ್ಚ ಉಪ್ಪುನೆಡ್ದ್ ನಿನನ್ ಎನ ಬಾಯಿಡ್ದ್ ಉಬ್ಬಿವೆ.

¹⁷“ಈ ನಿನ ವಿಚಾರೊಡು, ‘ಯಾನ್ ಐಶ್ವರ್ಯವಂತೆ, ಸಂಪನ್ನೆ, ಎಂಕ್ ಒಯಿಕ್‌ಲಾ ಕಮ್ಮಿ ಇಜ್ಜಿ,’ ಪನೊಂದುಲ್ಲ. ಆಂಡ ಈ ದರಿದ್ರೆಲಾ, ಕರುಣೆಗ್ ತಕ್ಕದಾಂತಿನಾಯೆಲಾ, ನಟ್ಟುನಾಯೆಲಾ, ಕುರುಡೆಲಾ, ಮೆಯಿಕ್ ಕುಂಟುದಾಂತೆ ಬತ್ತಲೆಡುಲ್ಲ ಪನ್ಪಿನವು ನಿಕ್ಕ್ ತೆರಿಯಂದ್.

¹⁸ಈ ಐಶ್ವರ್ಯವಂತೆ ಆಪಿಲೆಕ್ಕ ತೂಟು ಶುದ್ಧ ಮಲ್ತಿನ ಬಂಗಾರ್‌ನ್ಲಾ, ನಿನ ಬತ್ತಲೆನ್ ಮದೆ ಮಲ್ಪರೆ ಬೊಲ್ದು ಕುಂಟುನ್ಲಾ, ಕಣ್ಣ್ ತೋಜುಲೆಕ್ಕ ನಿನ ಕಣ್ಣ್‌ಗ್ ಪೂಜೆರೆಗಾದ್ ಅಂಜನೊನ್ಲಾ ಎನಡ್ದ್ ಕ್ರಯೊಕು ದೆತ್ತೊನೊಡು ಅಂದ್‌ದ್ ನಿಕ್ಕ್ ಬುದ್ಧಿ ಪನ್ಪೆ.

¹⁹ಯಾನ್ ಏರೇರೆನ್ ಪ್ರೀತಿ ಮಲ್ಪುವೆನಾ ಅಕ್ಲೆನ್ ದಟ್ಟಿಯುವೆ ಬೊಕ್ಕ ಶಿಕ್ಷೆ ಕೊರ್ಪೆ. ಅಂಚಾಯಿನೆಡ್ದ್ ಎಚ್ಚರಿಕೆಡುಪ್ಪುಲ. ಪಶ್ಚಾತಾಪ ಪಡೆಲ.

²⁰ಇಂದಾ, ಯಾನ್ ಬಾಕಿಲ್‌ಡ್ ಉಂತೊಂದು ಬೊಟ್ಟೊಂದುಲ್ಲೆ; ಏರಾಂಡಲಾ ಎನ ಸ್ವರೊನು ಕೇಂಡ್ದ್ ಬಾಕಿಲ್‌ನ್ ಜಪ್ಪುವೆಡ, ಯಾನ್ ಉಲಯಿ ಬತ್ತ್‌ದ್ ಆಯಡೊಪ್ಪ ವಣಸ್ ಮಲ್ಪುವೆ, ಆಯೆಲಾ ಎನಡೊಪ್ಪ ವಣಸ್ ಮಲ್ಪುವೆ.

²¹ಯಾನ್ ಗೆಂದ್‌ದ್ ಎನ ಅಮ್ಮೆರೆಡೊಪ್ಪ ಗದ್ದಿಗೆಡ್ ಕುಲ್ಲಿನಂಚೆನೇ, ಗೆಂದಿನಾಯಗ್ ಎನಡೊಪ್ಪ ಗದ್ದಿಗೆಡ್ ಕುಲ್ಲುಲೆಕ್ಕ ಮಲ್ಪುವೆ.

²²“ದೇವೆರೆ ಆತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್.”