Read Tulu ಪ್ರಕಟಣೆ 8 Bible Online

ಪ್ರಕಟಣೆ 8 - Tulu bible

ಪ್ರಕಟಣೆ 8

¹ಆ ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯೆ ಏಳನೆ ಮುದ್ರೆನ್ ದರ್ಪುನಗ ಸುಮಾರ್ ಅರ್ಧ ಗಂಟೆ ಪೊರ್ತು ಮುಟ್ಟ ಪರಲೋಕೊಡು ಶಾಂತ ಆಂಡ್.

²ಅಪಗ ದೇವೆರೆ ಎದುರುಡು ಉಂತುದಿತ್ತಿ ಏಳ್‌ ದೂತೆರೆನ್ ತೂಯೆ. ಅಕ್ಲೆಗ್ ದೇವೆರ್ ಏಳ್‌ ತುತೂರಿಲೆನ್ ಕೊರಿಯೆ.

³ಐಡ್ದ್ ಬೊಕ್ಕ ಬೊಕ್ಕೊರಿ ದೂತೆ ಬತ್ತ್‌ದ್ ಬಂಗಾರ್‌ದ ದೂಪಾರತಿನ್ ಪತ್ತೊಂದು ಬಲಿಪೀಠದ ಕೈತಲ್‌ ಉಂತಿಯೆ. ಗದ್ದಿಗೆದ ಎದುರುಡು ಬಂಗಾರ್‌ದ ಬಲಿಪೀಠದ ಮಿತ್ತ್ ಮಾತ ದೇವಜನೊಕುಲೆ ಪ್ರಾರ್ಥನೆಡೊಪ್ಪ ಸಮರ್ಪಣೆ ಮಲ್ಪೆರೆಗಾದ್ ಆಯಗ್ ಮಸ್ತ್ ಲೋಭಾನ ಕೊರ್ದಿತ್ತ್‌ಂಡ್.

⁴ಅಪಗ ಧೂಪದ ಪುಗೆ ದೂತನ ಕೈಡ್ದ್ ದೇವಜನೊಕುಲೆ ಪ್ರಾರ್ಥನೆಡೊಪ್ಪ ದೇವೆರೆ ದುಂಬು ಏರ್ದ್ ಪೋಂಡು.

⁵ಐಡ್ದ್ ಬೊಕ್ಕ ಆ ದೂತೆ ಧೂಪಾರತಿನ್‌ ದೆತ್ತೊಂದು ಬಲಿಪೀಠದ ಗೆಂಡೊಡು ದಿಂಜಾದ್ ಭೂಮಿಗ್ ದಕ್ಕಿಯೆ. ಅಪಗ ತೆಡಿಲ್‌ದ ಅಬ್ಬರಲಾ, ಮಿಂಚಿಲಾ, ಭೂಕಂಪಲಾ ಆಂಡ್.

⁶ಏಳ್‌ ತುತೂರಿಲೆನ್ ಪತ್ತೊಂದಿತ್ತಿ ಏಳ್‌ ದೂತೆರ್ ತುತೂರಿ ಉರ್ಪೆರೆ ತಯಾರ್ ಆಯೆರ್.

⁷ಸುರುತ್ತ ದೂತೆ ತುತೂರಿ ಉರ್ಪುನಗ ನೆತ್ತೆರ್‌ಡ್ ಕಲತ್ತ್‌ದಿನ ಆನೆಕಲ್ಲ್‌ದ ಬರ್ಸಲಾ ತೂಲಾ ಭೂಮಿದ ಮಿತ್ತ್ ದೊರಿಂಡ್. ನೆಡ್ದ್ ಭೂಮಿದ ಮೂಜೆಟ್ ಒಂಜಿ ಪಾಲ್ ಪೊತ್ತುದು ಪೋಂಡು. ಮರಕ್ಲೆಡ್ ಮೂಜೆಟ್ ಒಂಜಿ ಪಾಲ್ ಬಸ್ಮ ಆಂಡ್. ಪಜ್ಜಿ ಪಜಿರ್‌ಲಾ ಪೊತ್ತುದು ಪೋಂಡು.

⁸ಬೊಕ್ಕ ರಡ್ಡನೆ ದೂತೆ ತುತೂರಿ ಉರ್ಪುನಗ ತೂ ಪತ್ತ್‌ದ್ ಮಲ್ಲ ಗುಡ್ಡೆದಲೆಕ್ಕ ಇತ್ತಿನೆನ್ ಕಡಲ್‌ಗ್ ಪಾಡ್ಂಡ್.

⁹ಅಪಗ ಕಡಲ್ದ ಉಲಯಿ ಮೂಜೆಟ್ ಒಂಜಿ ಪಾಲ್ ನೆತ್ತೆರ್ ಆಂಡ್. ಕಡಲ್‌ಡಿತ್ತಿ ಜೀವಿಲೆಡ್ ಮೂಜೆಟ್ ಒಂಜಿ ಪಾಲ್ ಸೈತ್‌ಪೋಂಡು, ಕಪ್ಪಲುಲೆಡ್ ಮೂಜೆಟ್ ಒಂಜಿ ಪಾಲ್ ಹಾಳಾದ್ ಪೋಂಡು.

¹⁰ಮೂಜನೇ ದೂತೆ ತುತೂರಿ ಉರ್ಪುನಗ ತೂಟೆದಲೆಕ್ಕ ಅರ್ಲುನ ಒಂಜಿ ಮಲ್ಲ ಬೊಳ್ಳಿ ಬಾನೊಡ್ದು ತಿರ್ತ್ ಬೂರ್‌ಂಡ್. ಅವು ತುದೆಲೆಡ್‌ ಮೂಜೆಟ್ ಒಂಜಿ ಪಾಲ್‌ದ ಮಿತ್ತ್‌ಲಾ ನೀರ್‌ದ ವಸರ್‌ದ ಮಿತ್ತ್‌ಲಾ ಬೂರ್‌ಂಡ್.

¹¹ಆ ಬೊಳ್ಳಿಗ್ ಮಾಚಿ ಪತ್ರೆ ಅಂದ್‌ದ್ ಪುದರ್, ನೀರ್ ಮೂಜೆಟ್ ಒಂಜಿ ಪಾಲ್ ಮಾಚಿ ಪತ್ರೆದ ಲೆಕ್ಕ ಕೈಪೆ ಆಂಡ್. ಆ ಕೈಪೆ ನೀರ್‌ನ್ ಪರಿನ ಮಸ್ತ್ ಜನ ಸೈತೆರ್.

¹²ನಾಲನೇ ದೂತೆ ತುತೂರಿ ಉರ್ಪುನಗ ಸೂರ್ಯೆ, ಚಂದ್ರೆ ಬೊಳ್ಳಿಲೆಡ್‌ ಮೂಜೆಟ್ ಒಂಜಿ ಭಾಗೊಗು ಹಾಕ್‌ದ್ ಕತ್ತಲೆ ಆಂಡ್. ಅವೆಡ್ದಾವರ ಪಗೆಲ್‌ಡ್ಲಾ ಮೂಜೆಟ್ ಒಂಜಿ ಪಾಲ್ ಬೊಲ್ಪುದಾಂತೆ ಪೋಂಡು, ರಾತ್ರೆಡ್ಲಾ ಅಂಚೆನೇ ಆಂಡ್.

¹³ಬೊಕ್ಕ ಯಾನ್ ತೂನಗ, ಇಂದಾ ಒಂಜಿ ಗಿಡಿ ನಡು ಬಾನೊಡು ರಾವೊಂದಿತ್ತ್‌ಂಡ್. ಅವು, “ಅಯ್ಯೋ, ಅಯ್ಯೋ, ಅಯ್ಯೋ ಒರಿದಿನ ಮೂಜಿ ದೂತೆರ್ ತನ್ಕುಲೆ ತುತೂರಿ ಉರ್ಪುನಗ ಆಪಿನ ವಿಷಯೊಲೆಡ್ದ್ ಈ ಲೋಕೊಡುಪ್ಪುನಾಕುಲೆಗ್ ಎಂಚಿತ್ತಿ ಆಪತ್ತುಲು ಆಪುಂಡು.” ಅಂದ್‌ದ್ ಮಲ್ಲ ಶಬ್ಧೊಡು ಪನ್ಪಿನೆನ್ ಕೇಂಡೆ.