Read Tulu ಪ್ರಕಟಣೆ 9 Bible Online

ಪ್ರಕಟಣೆ 9 - Tulu bible

ಪ್ರಕಟಣೆ 9

¹ಐನನೇ ದೂತೆ ತುತೂರಿ ಉರ್ಪುನಗ ಬಾನೊಡ್ದು ಒಂಜಿ ಬೊಳ್ಳಿ ಭೂಮಿಗ್ ಬೂರಿನೆನ್ ತೂಯೆ. ಆಯಗ್ ಪಾತಾಳದ ಬೀಗದ ಕೈ ಕೊರ್ತುಂಡು.

²ಆಯೆ ಪಾತಾಳೊನು ಜಪ್ಪುನಗ, ಪಾತಾಳೊಡ್ದು ಬತ್ತಿನ ಪುಗೆ ಮಲ್ಲ ಚಿಮಿಣಿದ ಪುಗೆತ್ತ ಲೆಕ್ಕ ಏರ್‌ಂಡ್. ಈ ಪುಗೆಡ್ದ್ ಸೂರ್ಯಲಾ ಬಾನಲಾ ಕತ್ತಲೆ ಆದ್ ಪೋಂಡು.

³ಈ ಪುಗೆಡ್ದ್ ಮೊಂಟೆಲು ಪಿದಾಡ್ದ್ ಭೂಮಿಡ್ ದಿಂಜಿಯ. ಭೂಮಿದ ಚೇಲ್‌ಲೆಗ್ ಉಪ್ಪು ಸಾಮರ್ಥ್ಯದಲೆಕ್ಕನೇ ಐಕ್ಲೆಗ್ಲಾ ಆ ಸಾಮರ್ಥ್ಯ ಕೊರ್ದಿತ್ತ್‌ಂಡ್.

⁴ಭೂಮಿದ ಪಜಿರ್‌ಗಾವಡ್, ದೈಕ್ಲೆಗಾವಡ್, ಮರಕ್ಲೆಗಾವಡ್ ಕೇಡ್ ಮಲ್ಪಂದೆ ಮುಂಡದ ಮಿತ್ತ್ ದೇವೆರೆ ಮುದ್ರೆ ಇಜ್ಜಾಂದಿ ನರಮಾನಿಲೆಗ್ ಮಾತ್ರ ಕೇಡ್ ಮಲ್ಪೊಲಿ ಅಂದ್‌ದ್ ಐಕ್ಲೆಗ್ ಅಪ್ಪಣೆ ಆಂಡ್.

⁵ಮೊಕ್ಲೆನ್ ಕೆರಂದೆ ಐನ್ ತಿಂಗೊಲು ಮುಟ್ಟ ಪೀಡೆ ಕೊರಿಯೆರೆ ಅಪ್ಪಣೆ ಆಂಡ್. ಅಕ್ಲೆಗ್ ಉಂಡಾಯಿ ಪೀಡೆ ನರಮಾನಿಗ್ ಚೇಲ್‌ ತುಚ್ಚಿನ ಪೀಡೆಗ್ ಸಮ ಆದಿತ್ತ್ಂಡ್.

⁶ಆ ದಿನೊಕುಲೆಡ್ ನರಮಾನಿಲು ಮರಣೊನು ಬಯಕುವೆರ್. ಆಂಡ ಮರಣ ಬರಂದ್. ಅಕುಲು ಸೈಯೊಡು ಅಂದ್‌ದ್ ಆಸೆ ಮಲ್ತ್ಂಡಲಾ ಮರಣ ಅಕ್ಲೆನ ಕೈತಲ್‌ಡ್ದ್ ಪಾರ್ದ್ ಪೋಪುಂಡು.

⁷ಆ ಮೊಂಟೆಲೆ ರೂಪ ಯುದ್ಧೊಗು ತಯಾರಾದುಪ್ಪು ಕುದುರೆಲೆ ರೂಪದ ಲೆಕ್ಕ ಇತ್ತ್ಂಡ್. ಐಕ್ಲೆ ತರೆತ ಮಿತ್ತ್ ಬಂಗಾರ್‌ದ ಕಿರೀಟದಲೆಕ್ಕ ದಾದವಾ ಇತ್ತ್ಂಡ್. ಐಕ್ಲೆ ಮೋನೆಲು ನರಮಾನಿಲೆ ಮೋನೆದ ಲೆಕ್ಕ ಇತ್ತ್ಂಡ್.

⁸ಐಕ್ಲೆ ಕುಜಲ್ ಪೊಂಜೊವುಲೆ ಕುಜಲ್‌ದ ಲೆಕ್ಕಲಾ, ಐಕ್ಲೆ ಕೂಲಿಲು ಸಿಮ್ಮದ ಕೂಲಿದ ಲೆಕ್ಕಲಾ ಇತ್ತ್ಂಡ್.

⁹ಐಕ್ಲೆನ ತಿಗಲೆಡ್ ಕರ್ಬದ ಕವಚದಪಟ್ಟಿ ಇತ್ತ್ಂಡ್. ಐಕ್ಲೆ ರೆಂಕೆಲೆ ಶಬ್ಧ ಯುದ್ಧೊಗು ಬಲಿಪುನ ಕುದುರೆದ ರಥೊಕ್ಲೆ ಶಬ್ಧದ ಲೆಕ್ಕ ಇತ್ತ್ಂಡ್.

¹⁰ಚೇಳ್‌ಲೆಗ್ ಉಪ್ಪುಲೆಕ್ಕ ಐಕ್ಲೆಗ್ ಬೀಲಲಾ ಕೊಂಡಿಲಾ ಇತ್ತ್ಂಡ್. ನರಮಾನಿಲೆನ್ ಐನ್ ತಿಂಗೊಲು ಮುಟ್ಟ ಕೇಡ್ ಮಲ್ಪುನ ಸಾಮರ್ಥ್ಯ ಐಕ್ಲೆ ಬೀಲೊಡೇ ಉಪ್ಪುಂಡು.

¹¹ಪಾತಾಳದ ಅಧಿಕಾರಿ ಆಯಿ ದೂತೆ ಐಕ್ಲೆನ್ ಆಳುನ ಅರಸು. [2]ಆಯಗ್ ಇಬ್ರಿಯ ಭಾಷೆಡ್ ಅಬದ್ದೋನ್ ಪಂಡ್ದ್‌ಲಾ ಗ್ರೀಕ್ ಭಾಷೆಡ್ ಅಪೊಲ್ಲಿಯೋನ್ ಪಂಡ್ದ್‌ಲಾ ಪುದರ್ ಉಂಡು.

¹²ಸುರುತ್ತ ಗಂಡಾಂತ್ರ ಕರಿದ್ ಪೋಂಡು. ಆಂಡ ನನಲಾ ರಡ್ಡ್ ಗಂಡಾಂತ್ರೊಲು ಬರಿಯೆರೆಗುಂಡು.

¹³ಬೊಕ್ಕ ಆಜನೆ ದೂತೆ ತುತೂರಿ ಉರ್ಪುನಗ ದೇವೆರೆ ಎದುರುಡಿತ್ತಿನ ಬಂಗಾರ್‌ದ ಬಲಿಪೀಠದ ನಾಲ್ ಕೊಂಬುಲೆಡ್ದ್ ಒಂಜಿ ಸ್ವರೊನು ಕೇಂಡೆ.

¹⁴ತುತೂರಿನ್ ಪತ್ತೊಂದಿತ್ತಿ ಆಜನೆ ದೂತಗ್, “ಯೂಫ್ರೇಟೀಸ್ ಪನ್ಪಿ ಮಲ್ಲ ತುದೆತಲ್ಪ ಕಟ್ಟ್‌ದಿತ್ತಿ ನಾಲ್ ದೂತೆರೆನ್ ಬುಡುಗಡೆ ಮಲ್ಪುಲ,” ಅಂದ್‌ದ್ ಪಂಡ್ಂಡ್.

¹⁵ಅಪಗ ನರಮಾನಿಲೆ ಉಲಯಿಡ್ದ್ ಮೂಜೆಡ್ದ್ ಒಂಜಿ ಪಾಲ್‌ ಜನೊಕುಲೆನ್ ಕೆರಿಯೆರೆಗಾದ್ ಗಳಿಗೆ, ದಿನ, ತಿಂಗೊಲು, ವರ್ಸ ಮಾತೆನ್ ನಿಗಂಟ್ ಮಲ್ತ್‌ದ್ ಆದಿತ್ತ್ಂಡ್. ಐಕ್ ತಯಾರಾದಿತ್ತಿನ ಆ ನಾಲ್ ದೂತೆರೆನ್ ಬುಡ್ದು ಬುಡಿಯೆರ್.

¹⁶ಕುದುರೆ ದಂಡ್‌ದ ಸಂಖ್ಯೆ ಇರ್ವ ಕೋಟಿ ಜನ ಅಂದ್‌ದ್ ಪನ್ಪಿನವು ಎಂಕ್ ಕೇಂಡ್.

¹⁷ಯಾನ್ ದರ್ಶನೊಡು ಕುದುರೆಲೆನ್ಲಾ ಐತ ಮಿತ್ತ್ ಕುಲ್ಲುದಿನಾಕುಲೆನ್ಲಾ ತೂಯೆ. ಮೊಕ್ಲೆಗ್ ತೂತವುಲಾ ನೀಲದವುಲಾ ಗಂಧಕದವುಲಾ ಕವಚೊಲು ಇತ್ತ್ಂಡ್. ಕುದುರೆಲೆ ತರೆಕುಲು ಸಿಮ್ಮದ ತರೆತಲೆಕ್ಕ ಇತ್ತ್ಂಡ್. ಐಕ್ಲೆ ಬಾಯಿಡ್ದ್ ತೂ, ಪುಗೆ, ಗಂಧಕ ಪಿದಾಡೊಂದಿತ್ತ್‌ಂಡ್.

¹⁸ಕುದುರೆಲೆ ಬಾಯಿಡ್ದ್ ಬರ್ಪಿನ ತೂ, ಪುಗೆ, ಗಂಧಕ ಈ ಮೂಜಿ ಉಪದ್ರೊಡ್ದಾದ್ ಭೂಮಿದ ಮಾತ ಜನೊಕುಲೆಡ್ ಮೂಜೆಟ್ ಒಂಜಂಶ ಸೈತ್ ಪೋಯೆರ್.

¹⁹ಆ ಕುದುರೆಲೆ ಸಾಮರ್ಥ್ಯ ಐಕ್ಲೆ ಬಾಯಿಡ್ಲಾ ಬೀಲೊಡ್ಲಾ ಇತ್ತ್ಂಡ್. ಐಕ್ಲೆನ ಬೀಲ ಸರ್ಪದ ತರೆತಲೆಕ್ಕ ಇತ್ತ್ಂಡ್. ಅವೆಡ್ದ್ ಜನೊಕುಲೆಗ್ ಕೇಡ್ ಮಲ್ಪುವ.

²⁰ಬೊಕ್ಕ ಉಪದ್ರೊಲೆಡ್ದ್ ಸೈಯಂದೆ ಒರಿದಿ ಜನೊಕುಲು ತನ್ಕುಲೆ ಮಲ್ತೊಂಡಿ ಮೂರ್ತಿಲೆನ್ ಬುಡ್ದು ಪಶ್ಚಾತಾಪ ಪಡೆಯಿಜೆರ್. ಅಕುಲು ದೆವ್ವೊಲೆ ಪೂಜೆನ್ಲಾ, ಬಂಗಾರ್, ಬೊಳ್ಳಿ, ತಾಮ್ರ, ಕಲ್ಲ್, ಮರ ತನ್ಕುಲು ಕೈಡ್ದ್ ಮಲ್ತೊಂದಿನೆಕ್ಕ್‌ಲಾ ಅಂದ್ಂಡ ತೂವರೆಗಾವಡ್ ಕೇನಿಯೆರೆಗಾವಡ್, ನಡಪೆರೆಗಾವಡ್ ಆವಂದೆ ಉಪ್ಪು ಮೂರ್ತಿಲೆ ಪೂಜೆನ್ಲಾ ಬುಡ್ದು ಬುಡ್ಜೆರ್.

²¹ಉಂದತ್ತಂದೆ ತನ್ಕುಲು ನಡಪಾವೊಂದಿತ್ತಿ ಕೊಲೆ, ಮಾಟ, ಹಾದ್ರ, ಕಂಡೊನುನವು ಉಂದೆಡ್ದ್ ಒಂಜೆನ್ಲಾ ಬುಡಂದೆ ಪಶ್ಚಾತಾಪ ಪಡೆಯಿಜೆರ್.