Read Tunen Matíó 11 Bible Online

Matíó 11 - Tunen bible

Matíó 11

¹Ɛnaka Yə́susu a hɔ́á ɔ nɛ́áyɛ́á niómo nɛ́ bɔkɔ́nɛna na báfandɛ́ ɔhɛ́na, a ná ákáná ɔ uwukúniə na ɔ Imbə́nú Yɛɛsɛ ɔ uhúlə́ nɔŋɔna ɔ uwəbú bətínə́.

²Yɔhánɛsɛ ɔ ɔwayɛ́ ɛbɔka nuúmə́, a ka ɔ́kɔ́kɛna yatɛ́ ɔyɛ́á Kilísitusu a ná báá a ndɔ kɛa. A ná bɔ́mɔtɛ́ báyɛ́á bɔkɔ́nɛna lɔ́má ɔwá bá ká Yə́susu batá bá sɛ́á:

³«Baánɛ, ɔ lɛa wɛ́ɛ́yɛ́ ɔwá a ná hɔ́ánána ɔ ndasá ataná, tɔ́ tátáká muinə́muinə́ əə́?»

⁴Yə́susu a ná bəə́bu bíhíə́níníə́ sɛ́á: «Nɔ́ ká Yɔhánɛsɛ lɛná yatɛ́ ɔyɛ́á nɔ ná ɔ́kɔ́kɛ́na, yatɛ́ tɔ́na ɔyɛ́á nɔ ná siəkínə:

⁵Bəndímə́ndímə bá ndɔ sinənə, bɛkátá bá ndɔ kɛnda, bə́mínú bá lɛa bínə́ŋə́síə́tɔ, bɛ́ndɔ́kɔ́ bá ndɔ ɔ́kɔ́nɔ, bəwə́nú bá ndɔ hɔŋɔa, Imbə́nú Yɛɛsɛ yɛ́ lɛa nɔŋɔ́nákɛ́nátɔ́ ɔ tɔtɔyɔ́nɔ́.

⁶Nɛhɔnɔ na wɛ́ɛ́yɛ́ ɔwá a ŋɔ nɛ́áyɛ́á nɛkɔmba tálɛ́na ɔ ɔwámɛ.»

⁷Ɛnaka bɔkɔ́nɛna bá Yɔhánɛsɛ bá bísúə́lə́, Yə́susu a ná botólíə́ ɔ ilúkunə ɔhɛ́na ɛlɔ́áyɛ́ Yɔhánɛsɛ a sɛ́á: «Yatɛ́ nɔ́ ná kə́síə́kínə ɔ makɔ́tákɛ, nɛtɔŋɔ ɔnɛ́á umbúínyi wɔ́ ndɔ fúkə əə́? Bóo!

⁸Mba, yatɛ́ nɔ́ ná siəkínə nə́ə, mɔndɔ lɛŋábákátɔ́ na bɛlɛŋa bɛɛsɛ əə́? Bááyɛ́ ɔbá bá ndɔ lɛŋaba na bɛlɛŋa bɛɛsɛ bá lɛa tuənə́kínə́tɔ́ ɔ məə́bə má bənəni.

⁹Mɔhɛ́nátɔtányɛ́ nɔ́ ná siəkínə əə́? Ɛ́ɛ! Mɛ ndɔ bənú nɔyɛ́ lɛna muɛsɛ, a lɛa yáyɛ́ná mɔhɛ́nátɔtányɛ́ tɔ́na.

¹⁰Yɔhánɛsɛ a lɛa wɛ́ɛ́yɛ́ ɔwá Mətilə má ndɔ fə́mə́ləniə má sɛ́á: “Ɛkasɛ mɛ taŋá ɔ wamɛ́á mɔsɔ́másɔma ɔlɔ́ma ɔkɛaka ɔwá a aŋɔ́á ɛnɔ́mɛ kunínə.”

¹¹Ɔ taká, mɛ ndɔ bənú nɔ́yɛ́ lɛna ɔwá, mɔndɔ mɔŋɛ́ŋa a lɛ boóko yáyɛ́ná Yɔhánɛsɛ Mɔsɔabɛndɔ, mba, wɛ́ɛ́yɛ́ ɔwá a lɛ́á mɔtɛ́tɛ́á ɔ ɔyáyɛ́na ɔ nɛmanɛna nɛ́ Huɛlɛ́, a lɛa mɔŋɛ́ŋa yáyɛ́ná wɛɛ́ya.

¹²Ɔ botolokiə ɔ tunó tɔ́ Yɔhánɛsɛ Mɔsɔabɛndɔ ɔ ndafámáká isíŋáka, bɛndɔ bá ndɔ Nɛmanɛna nɛ́ Huɛlɛ́ həŋəbiə, bahaŋaba bá ndɔ nɛɛ́ta ɔ́lɔ.

¹³Bɔhɛ́nátɔtányɛ́ bəkimə na Umbə́ndə́ wɔ́ Mósisi bá ka Imbə́nú Yɛɛsɛ nɔŋɔnaka ɔ ndafámáká ɔ ikúílí yɛ́ Yɔhánɛsɛ.

¹⁴Ábá nɔ ndɔ siə ɔwɔ́kɔ muɛsɛ, wɛɛ́ya a lɛ́á Ɛlíásɛ ɔwá a ná hɔ́ánána ɔ ndahiana.

¹⁵Wɛ́ɛ́yɛ́ ɔwá a lɛ́á na məlúə́, á ɔ́kɔ́kɛ́na!

¹⁶Ɔwanɛ́ ɛ́kɛ mɛ bɛndɔ bá yɛ́ɛyɛ ɛhanyɛ kətiə əə́? Bá lɛa hɔ́ákátɔ́ ɔ baná ɔbá bá lɛ́á tuənə́kínə́tɔ́ ɔ manáka, ɔbá bá ndɔ bɔsɔ́kɔ́ ɛ́lɛna bá sɛ́á:

¹⁷“Tɔ ka bənú ilolí lɔ́ŋɔ́kɛna, nɔ sa ɛ́ndɛ́na ubínə! Tɔ ka bɔŋana bɔ́ mənyənə ósóko, nɔ sa bɛ́lɔ́mɔ́nɔ!”»

¹⁸«Ɔ taká, Yɔhánɛsɛ a ka ndasá, a lɛ nɛ́á mbá ata ɔnyɛ́na, bá sɛ́á: “A lɛa na umbúínyi mɔbɛ́á.”

¹⁹Mɔná wa mɔndɔ á tíkə́ ndafámá, a nɛ́áka a nyákɛna, bá sɛ́á: “Ə́yə́ə́ mɔndɔ wɔ́ɔwɔ ɔwá a ndɔ bɛ́kɔ́lɔmɔna há ɔnɛ́á na məluku ɔ ɔnyɛ́na, a lɛa ɛŋgɔ́áyɛ́ yɛ bakɔtabɛtásɛ na bɔ́mɔtɛ́ bɛndɔ babɛ́á!” Mba, ɛmanya yɛ Huɛlɛ́ yɛ́ ndɔ bífə́mə́ləniə ɔ tɔ́mbákɛna bɛ́áyɛ́á biolí.»

²⁰Nɔyɛ́, Yə́susu a ná botólíə́ ɔ bətínə́ ɔkɛ́kɛ́lɛna ɔhá a ná bɛ́áyɛ́á bisə́mə́tə́ bɛŋɛ́ŋa kɛ́áká bɔkɔasɛ́á, bə́búə́ bɛndɔ bá sa mɔlɛ́má kɔ́ŋɔ́na. A sɛ́á:

²¹«Ɛmɔ́kɛ́ na aŋɔ́á á Kolasínə! Ɛmɔ́kɛ́ na aŋɔ́á á Bɛtɛsayíta! Bɔkɔasɛ́á ata bisə́mə́tə́ ɔbɛ́á bɛ́ ná bɛ́kɛ́áka ɔ uwənú, bɛ́ nɔ́yɛ́ bɛ́kɛaka ɔ Tíli na Sítono, há buɔnɔ́ bá ná fíə́kínə ɔ mələbə, bá mɔlɔ́ bɛ́tɛ́laka ɛlɔ́áyɛ́ mɔlɛ́má ɔkɔ́ŋɔ́na.

²²Ɔ taká, mɛ ndɔ bənú nɔ́yɛ́ lɛna, ɔ buɔsɛ́ bɔ́ mikə́lə́kí, bá ŋɔ Tíli na Sítono sɔ́kɔ́tɛa tɛ́tɛ́á yáyɛ́ná bənú.

²³Ɔwáwɔ tɔ́na á Kafalanahúmu, ɔ ndɔ fɛka ɔwá ɔ ŋɔ bálaka ɔ ɔmbáŋá əə́? Bá ŋɔ aŋɔ́á lolosoliə há ɔ misí yɛ bəwə́nú! Bɔkɔasɛ́á ata bisə́mə́tə́ ɔbɛ́á bɛ́ ná aŋɔ́á bɛ́kɛ́áka bɛ́ bɛ́kɛaka ɔ Sótomo, há yɛ́ nabáka ɔ ndafámáká niɔfɛ́nɛ.

²⁴Ɔ taká, mɛ ndɔ bənú nɔ́yɛ́ lɛna, bá ŋɔ bɔnɔŋɔ bɔ́ Sótomo sɔ́kɔ́tɛa tɛ́tɛ́á yáyɛ́na aŋɔ́á.»

²⁵Ɔ yɛ́ɛ́yɛ́ ikúílí, Yə́susu a ná ɛtambá ɛ́tá a sɛ́á: «Á Isə́, á Isə́lúkú yɛ nɔɔ́mɛná na misí, mɛ ndɔ aŋɔ́á nyama, yatɛ́ ɔyɛ́á ɔ ná bítə́ ɔ bəmənyí na bɛ́ŋgɛ́lɛ́, ɔ ka nɔ́yɛ́ fə́mə́ləniə ɔ batɛ́tɛ́á.

²⁶Ɛ́ɛ! Á Ába, na wə́wúə́ mɔlɛ́má muɛsɛ ɔ́ ná nɔ́yɛ́ híkə́kíə́.

²⁷Isə́ a ka mɛaŋɔ́á bɛkɔa bikimə híə́niniə. Ata mɔndɔ a lɛ ndɔ Mɔná manya yɛ́ sá bá á Isə́, ata mɔndɔ tɔ́na a lɛ ndɔ Isə́ manya, yɛ́ sá bá á Mɔná na wɛ́ɛ́yɛ́ tɔ́na ɔwá Mɔná a ndɔ hikiə ubífə́mə́ləniə.»

²⁸«Bənú bəkimə ɔbá bɔlɔmɔ́ bɔ́ ndɔ nyɔlɔ, nɔ́ sɔ́nɔ́ na mɛaŋɔ́á, mɛaŋɔ́á mɛ ŋɔ bənú nɛhɔtɔ índiə.

²⁹Nɔ́ yámɛ́á ɛhɔka tuana, nɔ́ bɛ́níása mɛ́ bənú úkúnə́kíə́ bɔkɔasɛ́á, mɛ lɛa ɛbɔ́yɛ́ na mɔlɛ́má wɔ́ nɛlɛaŋɛ, nɔ ŋɔ nɛhɔtɔ kusə ɛlɔ́áyɛ́ bənú bɛ́múɛ́tɛ́ tɔ́na.

³⁰Ɔ taká, yámɛ́á ɛhɔka yɛ́ lɛa ndɛ́ndɛlɛ́á ɔ ɔtúána, bɔ́ámɛ́á bɔlɔmɔ́ hə́hə́nə́tɔ.»