Read Tunen Matíó 14 Bible Online

Matíó 14 - Tunen bible

Matíó 14

¹Ɔ yɛ́táyɛ́ ikúílí, Əlóto á mɔmanɛna wa misí yɛ Kalɛ́lɛa, a ka ɔ́kɔ́kɛ́na bá ndɔ niínyə nɛ́ Yə́susu bɛ́támba.

²A ná báyɛ́á bɔnyɛna lɛ́na a sɛ́á: «Mɛ ná manyá, á Yɔhánɛsɛ Mɔsɔabɛndɔ! A ná hɔŋɔ́á ɔ ətíə́ yɛ bəwə́nú; ɔ́ ɛlɔ́áyɛ́ nɔ́yɛ́ a lɛ́á na iŋgínə́ yɛ biələ́mənə bɛ́ bɛkɔa ɔ ɔkɛa.»

³Ɔ taká, á Əlóto a ná mánɛ́na ɔwá bá Yɔhánɛsɛ halɛ́na, bá wɛɛ́ya ɔ́lɔ́kɔ́kɔ́ na mɛsáŋa, bá wɛɛ́ya háá ɔ ɛbɔka ɛlɔ́áyɛ́ Əlotiátɛ á muəndú wa wayɛ́á munísə́ á Filíbo.

⁴Ɔ taká, Yɔhánɛsɛ a ka bá a ndɔ wɛɛ́ya lɛna a sɛ́á: «Umbə́ndə́ wɔ́ lɛ ndɔ aŋɔ́á iŋgínə́ índiə ɔ muəndú wa wawɔ́á munísə́ ɔ ɔbɛ́lɛna.»

⁵Ata ɛ́sɛ́á Əlóto a ná bá a ndɔ ɛnɔ́mɛ siə ɔyɛ́á mbá á Yɔhánɛnɛ ɔ́nɔ́kɔ́, a ka bá a ndɔ ilúkunə yɛ́ Bɛyútɛnɛ kɔ́lɔ́ma bɔkɔasɛ́á, bá ka báá bá ndɔ luminə ɔwá Yɔhánɛsɛ a lɛa mɔhɛ́nátɔtányɛ́.

⁶Mba nɔ́yɛ́, ɔ hinó hɛ́ ɛhanyɛhányɛ́ hɛ́ nibíbíə́nə nɛ́ Əlóto, ɔmɔ́la wa Əlotiátɛ a ka bínə́kə muɛsɛ ɔ busíə́ bɔ́ bɛndɔ ɔbá Əlóto a ná ɛ́lɛ́ákɛ́na ɔ ɛŋganda. Mátáyɛ́ məbínə́ má ka Əlóto hikəkiə ɛmbáta.

⁷A ná káfámá ɔ ubíkumə ɔ nɛnáka ɔwá, a ndɔ wɛɛ́ya índiəkinə bikimə ɔbɛ́á a ná ósó ɔ ɔwayɛ́ ɔbata.

⁸Ɔwɔŋgɔkɔnɔ na malɛ́hána má yayɛ́á inyə́ á Əlotiátɛ, mɔná a ná Əlóto batá a sɛ́á: «Índíə́ mɛaŋɔ́á mɔlɔ́á wɔ́ Yɔhánɛsɛ Mɔsɔabɛndɔ isíŋáka tálátɔ́ ɔ hɛndándámá.»

⁹Ɛnaka munəni á ɔ́kɔ́kɛ́ná nɔ́yɛ́, a ná busə́kə ɔkɔ; mba, ɛ́sɛ́á a ná bá a nɔ́ bíkumə ɔ busíə́ bɔ́ bɛndɔ bá ɛŋganda, yɛ́ sa báá ɔwá a híáná tɔ́na na əlimə ɔ ɔwɔŋgɔkɔnɔ na yáyɛ́á ɛtambá. A ná manɛ́na ɔwá bá ká ɔmɔ́la mɔlɔ́á wɔ́ Yɔhánɛsɛ índíə́.

¹⁰A ná yɛ́ɛ́yɛ́ ikúílí mɔndɔ lɔ́má ɔ miímə yɛ ɛbɔka ɔkɛaka ɔwá, a ká mɔlɔ́á wɔ́ Yɔhánɛsɛ humbə.

¹¹Bá ná muítə húlə́nə́ tálátɔ́ ɔ hɛndándámá, bá ná índíə́ á ɔmɔ́la. Ɔmɔ́la a ná muítə túmbíə́ á yayɛ́á inyə́.

¹²Bɔkɔ́nɛna bá Yɔhánɛsɛ Mɔsɔabɛndɔ bá ná ndá wə́yíə́ umimə ɛta, bá ná ká wɛɛ́ya nyəə. Əlimə yɛ nɔ́yɛ́, bá ná ká Yə́susu lakɛ́ná ɛ́sɛ́á bɛkɔa bɛ́ ná bɛ́kɛ́áka.

¹³Ɛnaka Yə́susu a yɛ́ɛ́yɛ́ imbə́nú ɔ́kɔ́, a ná hɔalɛ́na ɔmɔ́tɔ́yɛ́ bíbúə́ ɔ isóyí nuúmə́; a ná bísúə́lə́ hata na bɛndɔ. Mba, bilúkunə biəŋí bá ná ɔ́kɔ́kɛ́na ɔwá a ná ákana, bá ná fə́mə́kə́níə́ ɔ bətínə́ bəkimə, bá kɛndaka ɔ makɔlɔ́ ɔ ɔwayɛ́ ɔwɔŋgɔ.

¹⁴Ɛnaka Yə́susu á tukinə ɔ isóyí, a ná iloŋo yɛŋɛ́ŋa yɛ́ bɛndɔ ɛ́ná ɔsákɔna, mahana má ná wɛɛ́ya itíə́. A ná bíə́búə́ bɛnákɛnákɛ níŋə́sə́kíə́.

¹⁵Ɛnaka ɛkɔlakɔ́lá yɛ́ kɔ́á, bɔkɔ́nɛna bá Yə́susu bá ná tɔ́mbálɛ́la ɔ ɔwayɛ́ ɛmɛ́ŋɛ́, bá sɛ́á: «Buɔsɛ́ bɔ́ nɔ́ ákána, yɛ́ɛyɛ ɛbɔ́ka yɛ́ lɛa bísúə́lə́tɔ. Lákɛ́ná báaba bɛndɔ ɔkɛaka ɔwá, bá ákáná ɔ mɔnɔŋɔ má mamɛ́ŋɛ́, bá ká bɛ́labɔ́nɛ́á siə́kə.»

¹⁶Yə́susu a sɛ́á: «Yɛ́ lɛ ndɔ siə ɔwá bá ákáka, nɔ́ bəə́bu afɛ́ná bənú bɛ́múɛ́tɛ́!»

¹⁷Mba, bá sɛ́á: «Tɔ báka ɔbánɔ́ na bɛbɛlɛ́tɛ bɛ́lánɔ na tuɔfɔ́ tɔ́fandɛ́ háha ɔ́hɔ́á.»

¹⁸A sɛ́á: «Nɔ́ mɛaŋɔ́á bɛɛ́ta húlə́nínə́ háha.»

¹⁹Əlimə yɛ́ nɔ́yɛ́, a ná ilúkunə yɛ́ bɛndɔ lɛ́na ɔwá bá tuənə́kínə ɔ imbuə. A ná bɛ́táyɛ́ bɛ́bɛlɛ́tɛ bɛ́lánɔ na tuɔfɔ́ tɔ́fandɛ́ ɛ́ta, a ná məə́sə bə́líə́ ɔ ɔmbáŋá, a ná Huɛlɛ́ mohóloniə híə́níníə́. A na bɛ́táyɛ́ bɛbɛlɛ́tɛ bísə́kə́níə́, a ná índíə́ ɔ ɔwayɛ́ bɔkɔ́nɛna. Bá ná bɛɛ́ta afákɛ́ná ɔ ilúkunə.

²⁰Bɛndɔ bəkimə bá ná nɛ́áká, bá ná nibíə́kínə. Bɔkɔ́nɛna bá ná bɛbɛ́sɛ́bɛsɛ kɔtáka ɔbɛ́á bɛ́ ná tíkə́nə́, bá ná úndúsíə́ niómo nɛ́ bɛkana na bɛ́fandɛ́.

²¹Ɔmbana wɔ́ bɛndɔ ɔwá wɔ́ ná nɛ́áká, wɔ́ ka báá hoóyi na tukóló tɔ́lánɔ tɔ́ balɛ́mɛndɔ́, ɛŋaná bəəndú ɔfanɛna na tɔlɔ́matɔ́.

²²Əlimə yɛ ikúílí, Yə́susu a ná báyɛ́á bɔkɔ́nɛna fíníə́ ɔ isóyí, ɔkɛaka ɔwá bá buəkínə ɔ yííní ɛsɛ́lɛ́ yɛ́ nɔmɔ́, ikúílí ɔyɛ́á a tíkə́ bɛndɔ úluəsəkiə.

²³Ɛnaka á bəə́bu úlúə́sə́kíə́, a ná bísúə́lə́ ɔ ɔmáá ɔmbáŋá ɔ mabɛ́kálɛ́na. Ikúílí ibínə́binə yɛ́ ná kɔ́á, Yə́susu a ka bá ɔmɔ́tɔ́yɛ́ wɛɛ́ya bíbúə́;

²⁴isóyí yɛ́ bɔkɔ́nɛna yɛ́ ka báá hata na ɛsɛ́lɛ́. Umbúínyi wɔ́ ka báá wɔ́ ndɔ húkə, wɔ́ húlə́kinə ɔ ɛsalɛ ɔyɛ́á bá ná báá bá ndɔ ákána; iŋunu yɛ́ mənífə́ yɛ́ bísúbə́kə ɔ isóyí.

²⁵Hoóyi na ɔyáá, Yə́susu a ná ká hɔalɛ́na ɔ wákaka ɔ uwəbú ɛmɛ́ŋɛ́, a kɛndaka ɔ mənífə́ ɔmbáŋá má nɔmɔ́.

²⁶Ikúílí bá ná wɛɛ́ya yámá a ndɔ kɛnda ɔ mənífə́ ɔmbáŋá, manɔ́ŋɔ má ná bəə́bu sambana, bá sɛ́á: «Yití yííní.» Bɔkɔ́lɔ́ma bɔ́ ná bəə́bu itíə́. Bá ná lúmə́ ɔ miyə́mə́yə́mə́ ubə́liə.

²⁷Mba ɔ umisíúmə́, Yə́susu a ná bəə́bu hɔ́lɛ́na a sɛ́á: «Nɔ́ ɔ́nɛna! Nɔ lɛ kɔlɔma, mɛaŋɔ́á!»

²⁸Ɛnaka Bíə́lə á ɔ́kɔ́ nɔ́yɛ́, a sɛ́á: «Á Isə́lúkú, ábá taká aŋɔ́á bɛ́múɛ́tɛ́ wɛ́ɛ́yɛ́, índíə́ mɛaŋɔ́á iŋgínə́ yɛ ɔndasá ɔhá ɔ lɛ́á, mɛ́ kɛndáka ɔ mənífə́ ɔmbáŋá.»

²⁹Yə́susu a sɛ́á: «Sɔ́nɔ». Bíə́lə a ná fámá ɔ isóyí, a ná botólíə́ ɔ ɔwakána ɔhá Yə́susu a ná báá, a kɛndaka ɔ mənífə́ ɔmbáŋá.

³⁰Mba, ikúílí a ná ɛ́ná ɛ́sɛ́á umbúínyi wɔ́ ndɔ húkə, bɔkɔ́lɔ́ma bɔ́ ná wɛɛ́ya itíə́; a na botólíə́ ɔ ɔnyúɛ́na ɔ mənífə́. A ná botólíə́ ɔ uyə́mə, a sɛ́á: «Á Isə́lúkú, tɔ́kɔ́lɛ, nuəkə́níə́ mɛaŋɔ́á!»

³¹Ɔ umisíúmə́, Yə́susu a ná mɔkátá sándɔ́na, a ná Bíə́lə itíə́, a sɛ́á: «Ɔwáwɔ́, á mɔndɔ wa ilumininə yɛtɛ́tɛ́á; ɛlɔ́áyɛ́ yatɛ́ ɔ ná ɛ́nyáká əə́?

³²Ɛnaka bəə́bu báfandɛ́ bəkimə bá fínə́ ɔ isóyí nuúmə́, umbúínyi wɔ́ ná nə́yə́níə́.»

³³Nɔ́yɛ́, bɔkɔ́nɛna ɔbá bá ná bá báá ɔ isóyí nuúmə́, bá ná kiníə́ a Yə́susu busíə́, bá sɛ́á: «Taká, aŋɔ́á ɔ lɛ́á Mɔná wa Huɛlɛ́.»

³⁴Ɛnaka Yə́susu na báyɛ́á bɔkɔ́nɛna bá nɔmɔ́ bíásɛ́na, bá ná káfámá ɔ misí yɛ́ Kɛnɛsalɛ́tɛ.

³⁵Bɛndɔ bá yɛ́táyɛ́ ɛbɔ́ka bá ná Yə́susu manya, bá ná imbə́nú yə́mbə́lə́níə́ ɔ bɛndɔ bá yɛ́táyɛ́ misí mikimə, bá ná wɛɛ́ya bɛnákɛnákɛ húlə́kə́nínə́ bikimə.

³⁶Bá ná wɛɛ́ya bɛ́tɔ́kɔ́lɔ́kɛ́na ɔkɛaka ɔwá, a bəə́bu niása ɔbánɔ́ bá nibə́ŋú nɛ́ bɔ́áyɛ́á bɔlɛŋa itíə́lə; bááyɛ́ bəkimə ɔbá bá ná nibə́ŋú nɛ́ bɔ́áyɛ́á bɔlɛŋa itíə́lə, bá ná niŋə́kə́ ikúílí ɛ́mɔtɛ́.