Read Tunen Matíó 15 Bible Online

Matíó 15 - Tunen bible

Matíó 15

¹Nɔ́yɛ́, Bɛfalísia na bamanya umbə́ndə́ ɔbá bá ná əbú húlə́kinə ɔ Yəlúsalɛma bá ná tɔ́mbálɛ́la a Yə́susu busíə́, bá ná wɛɛ́ya batá bá sɛ́á:

²«Ɛlɔ́áyɛ́ yatɛ́ báwɔ́á bɔkɔ́nɛna bá lɛ ndɔ bikiní ɔ́ŋgɔ əə́? Ɔ taká, ikúílí yɛ́ ɔnɛ́á, bá ndɔ nɛ́á ɛŋaná makátá ɔsɔa.»

³Yə́susu a sɛ́á: «Mba uwə́nú, ɛlɔ́áyɛ́ yatɛ́ nɔ lɛ ndɔ Umbə́ndə́ wɔ́ Huɛlɛ́ tə́tə́niə, nɔ ndɔ ɔŋgɔ ɔbánɔ́ á bikiní bɛ́ bíə́núə́ bisə́kúlulúnə́ əə́?

⁴Ɔ taká, Huɛlɛ́ a sɛ́á: “Lúbúnə́kə́ tɛ́á na nɛ́á.” A ka laa tɔ́na a sɛ́á: “Bá ná hɔ́ánáná bá wɛ́ɛ́yɛ́ ɔ́nɔ́kɔ́ ɔwá a ŋɔ isə́ ata inyə́ tikisiə.”

⁵Mba uwənú, nɔ ndɔ ínə́niə ɔwá, ábá mɔndɔ a ná yayɛ́á isə́ ata inyə́ lɛ́na a sɛ́á: “Bɔɔ́la ɔbɔ́á mɛ óso ɔwáwɔ uwíndiə ɛlɔ́áyɛ́ ɔwáwɔ ɔwɔ́lɔ, bɔ́ lɛa ɛlɔ́áyɛ́ Huɛlɛ́.”

⁶Wɛ́ɛ́yɛ́ mɔndɔ a lɛ ndɔ isə́ lúbúnə. Nɔ́yɛ́, nɔ ná Ɛtambá yɛ́ Huɛlɛ́ húə́síə́ ɛlɔ́áyɛ́ ɔkɛa ɛ́sɛ́á bíə́núə́ bikiní bɛ́ ndɔ bənú ínə́niə.

⁷Á bɛndɔ bá nɛbɛ́nyɔ́nyɔlɔ! Isáya a ka mənyiə muɛsɛ ɔ uwənú ɛlɔ́á a sɛ́á:

⁸“Yɛ́ɛyɛ ilúkunə yɛ́ ndɔ mɛaŋɔ́á bə́tiə na munuə; wə́búə́ mɔlɛ́má wɔ́ báka hata na mɛaŋɔ́á.

⁹Mə́búə́ manyáná má nibə́tiə má báka itə́mbí, bilə́líə́ ɔbɛ́á bá ndɔ bɛndɔ úkúniə, bɛ́ lɛa ɔbánɔ́ bɛkɛndɛ́ná bɛ́ bɛndɔ.”»

¹⁰Əlimə yɛ nɔ́yɛ́, Yə́susu a ná ilúkunə yɛ́ bɛndɔ ɛlɛ́ákɛ́na, a sɛ́á: «Nɔ́ məlúə́ básɛ́á, nɔ́ ɔ́kɔ́ muɛsɛ:

¹¹Tátá bɔɔ́la ɔbɔ́á mɔndɔ a ndɔ nɛ́á bɔ́ ndɔ wɛɛ́ya tífílə, mba yatɛ́ ɔyɛ́á yɛ́ ndɔ fáma ɔ ɔwáyɛ́ munuə, yɛ́ ndɔ wɛɛ́ya tífílə.»

¹²Nɔ́yɛ́, Bɔkɔ́nɛna bá ná bɛ́nyálɛ́la, bá sɛ́á: «Ɔ ndɔ manya ɔwá Bɛfalísia bá ná bɛ́áwɔ́á bɛtambá ɔ́kɔ́ mɔbɛ́á əə́?»

¹³A sɛ́á: «Ata ɔ́ ubúə́níə́ bɔlɔŋɔ́tɛ́ ɔbɔ́á yamɛ́á Isə́ ɔ Nɔɔ́mɛná á sa nɛma, bá ŋɔ bɔɛ́ta tɔba.

¹⁴Nɔ́ bəə́bu niása; bá lɛa bəndímə́ndímə ɔbá bá ndɔ bɔsɔ́kɔ́ bəndímə́ndímə kɛndana. Ábá mundímə́ndímə a ndɔ ɔsɔ́kɔ́ mundímə́ndímə kɛndana, bá ŋɔ ka kɔ́á ɔ hɛfɛa bəə́bu bəkimə báfandɛ́.»

¹⁵Nɔ́yɛ́, Bíə́lə a sɛ́á: «Tɔ́kɔ́lɛ, nífúnínə́ bəsú wútə́yí ɔŋana.»

¹⁶Mba, Yə́susu a sɛ́á: «Nɔ́ ənú lɛa tɔ́na bɛála əə́?

¹⁷Nɔ lɛ ndɔ manya ɔwá, bikimə ɔbɛ́á bɛ́ ndɔ fíninə ɔ munuə bɛ́ ndɔ ka kɔ́á ɔ tɔna; əlimə yɛ nɔ́yɛ́ bɛ́ fámákɛna ɔ ɛfalɔ́ əə́?

¹⁸Mba, bɛtambá ɔbɛ́á bɛ́ ndɔ fáma ɔ munuə, bɛ́ húlə́kinə ɔ mɔlɛ́má, bɛɛ́ta bɛ́ ndɔ mɔndɔ tífílə.

¹⁹Ɔ taká, ɔ mɔlɛ́má nuúmə́ wɔ́ mɔndɔ á bɛfɛka bɛbɛ́á bɛ́ ndɔ húlínə, bɛɛ́ta bɛ́ ndɔ wɛɛ́ya lɔ́ma ɔ muɔnɔ́nɔ, ɔ nɛbambɛa, ɔ mɔnyɔ́kɔ́lɛ́, ɔ buíbi, ɔ imbóŋi yɛ bɛkanja na ɔ bɛkɔ́bálɛ́.

²⁰Ɔ́ bɛ́táyɛ́ bɛkɔa bɛ́ ndɔ mɔndɔ tífílə. Mba, ɔnɛ́á ɛŋaná makátá ɔsɔa wɔ́ lɛ ndɔ mɔndɔ tífílə.»

²¹Əlimə yɛ nɔ́yɛ́, Yə́susu a ná hɔalɛ́na ɔmɔ́tɔ́yɛ́, a ná ákáná ɔ ɛsalɛ yɛ́ misí yɛ Tíli na yɛ Sítono.

²²Muəndú ɔmɔtɛ́, milóní yɛ Kánahána, a ka báá a ndɔ tuənə umə́; a ná ndásá á Yə́susu busíə́, a ná bótólíə́ ɔ ɔwayɛ́ ɔ baŋɛna, a sɛ́á: «Á Isə́lúkú, á Mɔná wa ndə́witi, wə́ə́ mɛaŋɔ́á mɛɛ́lɔ! Wamɛ́á mɔná ɔ muəndú a ndɔ məsə́kə ɔ́kɔ mɔŋɛ́ŋa; a báka na umbúínyi mɔbɛ́á.»

²³Mba, Yə́susu a ná wɛɛ́ya indímə́ sana. Báyɛ́á bɔkɔ́nɛna bá ná bɛ́nyálɛ́la, bá sɛ́á: «Kúbə́kə́ wɔ́ɔwɔ muəndú bɔkɔasɛ́á, a ndɔ bəsú ɔŋgɔ na hikókó hɛ́ malɛlá.»

²⁴Mba, a sɛ́á: «Yamɛ́á Isə́ a ka mɛaŋɔ́á lɔ́ma ɔbánɔ́ ɔ ɛndɔ́mbá yɛ́ Ísilahɛ́lɛ ɔyɛ́á yɛ́ ná niminə.»

²⁵Ata nɔ́yɛ́, wɛ́ɛ́yɛ́ muəndú a ná bɛ́nyálɛ́la, a ná kiníə́ á Yə́susu busíə́, a sɛ́á: «Á Isə́lúkú, tɔ́kɔ́lɛ, ɔ́lɔ́ mɛaŋɔ́á.»

²⁶Yə́susu a sɛ́á: «Yɛ́ lɛ báá muɛsɛ ɔwá bá bɛ́labɔ́nɛ́á bɛ́ tɔlɔ́matɔ́ ɛ́tá, bá índíə́kínə ɔ tɔnámɔ́á.»

²⁷Muəndú a sɛ́á: «Ɛ́ɛ! Á Isə́lúkú yɛ́ lɛa nɔ́yɛ́ taká, mba ɔ matá ma ɛtáka, tɔnámɔ́á tɔ́ ndɔ imbumbú nɛ́á ɔtɔ́á bíə́búə́ bisə́lúkú bɛ́ ndɔ kuəsiə.»

²⁸Nɔ́yɛ́, Yə́susu a sɛ́á: «Á wɔ́ɔwɔ muəndú, yáwɔ́á ilumininə yɛ́ lɛa yɛŋɛ́ŋa! Yɛ́ aŋɔ́á bɛ́kɛ́áká ɛ́sɛ́á ɔ ndɔ siə.» Ɔ umisíúmə́, wayɛ́á mɔná ɔ muəndú a ná niŋə.

²⁹Yə́susu a ná hɔalɛ́ná ɔ yɛ́táyɛ́ ɛbɔ́ka, a ná ákáná ɔ ɛsɛ́lɛ́ yɛ́ nɔmɔ́ nɛ́ Kalɛ́lɛa. A ná báláka ɔ ɔmáá ɔmbáŋá, a ná tuə́nə ɔ misí.

³⁰Nɔ́yɛ́ ilúkunə yɛŋɛ́ŋa yɛ́ bɛndɔ yɛ́ ná ndásákɔ́na ɔwáyɛ́ busíə́, bá ná bitíndə bɛ́ bɛndɔ húlə́kə́nə, bəndímə́ndímə, bɛáta, məmúkú na bɛndɔ bá bɛfɛ́kɛ́ binə́binə́. Bá ná bəə́bu bɛ́lɛ́ákɛ́ná ɔ ɔwayɛ́ busíə́, a ná bəə́bu niŋə́sə́kíə́.

³¹Bilúkunə bɛ́ ná ə́lə́mə́nə́ ɛ́sɛ́á məmúkú má ndɔ hɔ́ɔ́, bɛndɔ bá bɛfɛ́kɛ́ bá niŋəkə, bitíndə bɛ́ kɛndaka muɛsɛ, bəndímə́ndímə bá siəkinənə. Bá ná botólíə́ á Huɛlɛ́ yɛ Ísilahɛ́lɛ ɔ tuúmə uwíndiə.

³²Yə́susu a ná báyɛ́á bɔkɔ́nɛna ɛ́lɛ́ákɛ́na, a sɛ́á: «Mahana má ndɔ mɛaŋɔ́á ítiə ɛlɔ́áyɛ́ yɛ́ɛyɛ ilúkunə bɔkɔasɛ́á, ɔ́ mɔɔsɛ́ máama málálɔ́ ɔmá bá lɛ́á na mɛaŋɔ́á. Bá lɛ báá tɔ́na na bɔ́labɔ́nɛ́á. Mɛ lɛ ndɔ siə ɔ uwəbú uwúluəsiə mɛtaná, ɛkasɛ bá sá kɔakɔna ɔ ɛnɔ́mɛ ɛŋaná iŋgínə́.»

³³Bɔkɔ́nɛna bá ná wɛɛ́ya batá bá sɛ́á: «Hə́níə́ tɔ óso ɔ bɛbɛlɛ́tɛ ɔbɔ́ŋɔ bɛ́ úlúkínə ɔ nɛ́ɛnɛ nindínə́ nɛ́ ilúkunə, mbá bá nibíə́kínə́ ɔ mátána makɔ́tákɛ əə́?»

³⁴Yə́susu a sɛ́á: «Bɛbɛlɛ́tɛ bɛ́nɛ́á bɛ́ bənú lɛ́á əə́?» Bá sɛ́á: «Bɛ́lɛ́ndɔ́lɔ́mɔnɔ na yɛmɔtɛ́ tɛ́tɛ́á yɛ tuɔfɔfɔ́.»

³⁵Nɔ́yɛ́, Yə́susu a ná ilúkunə tuənə́kíníə́ ɔ misí,

³⁶a ná bɛ́táyɛ́ bɛ́bɛlɛ́tɛ bɛ́lɛ́ndɔ́lɔ́mɔnɔ na tɔ́táyɛ́ tuɔfɔ́ ɛ́ta. A ná Huɛlɛ́ mohóloniə híə́níníə́, a ná bɛɛ́ta bísə́kə́níə́. A ná índíə́kínə́ ɔ bɔkɔ́nɛna, bá ná bəə́bu bəkimə afákɛ́ná.

³⁷Báyɛ́ bɛndɔ bəkimə bá ná nɛaka, bá ná nibíə́kínə; bɔkɔ́nɛna bá ná bɛbɛ́sɛ́bɛsɛ kɔtáka ɔbɛ́á bɛ́ ná tikənə; bá ná úndúsə́kíə́ ɔ bɛkana bɛ́lɛ́ndɔ́lɔ́mɔnɔ.

³⁸Ɔmbana wɔ́ bɛndɔ ɔbá bá ná nɛ́áká, wɔ́ ka báá tukóló túnisə, ɛŋaná bəəndú na tɔlɔ́matɔ́ ɔfanɛna.

³⁹Ɛnaka Yə́susu á bɛndɔ bəkimə úlúə́sə́kíə́, a ná fínə ɔ isóyí, a ná ákáná ɔ nɛkɛ́tɛ nɛ́ misí yɛ Makatána.